Biblica® Open Sorani Kurdish Book of Life
کۆلۆسی 1
له‌پۆڵس نێرراوی عیسای مه‌سیح له‌سه‌ر خواستی خودا، هه‌روه‌ها لهتیمۆساوسی برامانه‌وه، بۆ خوشكو برایانی پیرۆزو سه‌رڕاست لهشاری كۆلۆسی، با بهرهكهتو ئاشتی خودای باوكتان له‌گه‌ڵ بێ.
سوپاسو نوێژكردن
ئێمه هه‌ر كاتێك نوێژ ده‌كه‌ین بۆتان، هه‌میشه سوپاسی خودای باوكی عیسای مه‌سیحی خوداوه‌ندمان ده‌كه‌ین، چونكه هه‌واڵی باوه‌ڕتان به عیسای مه‌سیح پێمان گه‌یشت له‌گه‌ڵ ئه‌و خۆشه‌ویستیه‌ی هه‌تانه به‌رامبه‌ر هه‌موو خوشكو برایانی پیرۆز، له‌پێناوی ئه‌و هیوایه‌ی خودا ئاماده‌یكردووه بۆتان لهئاسمان، ئه‌و هیوایه‌ی له‌پێشا له‌ووشه‌ی ڕاستیتان بیست، واته مزگێنی. ئه‌و مزگێنییه‌ی به‌رهه‌م دههێنێتو بڵاوده‌بێته‌وه له‌هه‌موو جیهان، هه‌روه‌ك چۆن به‌رهه‌می هێناو بڵاوبووه‌وه لهنێواتان له‌و ڕۆژه‌ی به‌ڕاستی به‌ره‌كه‌تی خوداتان بیستووهو ناسیووتانه. هه‌روه‌ك له‌ئه‌پفراسی به‌نده‌ی هاوڕێی خۆشه‌ویست فێربوون، ئه‌و خزمه‌تكارێكی سه‌رڕاستی مه‌سیحه له‌پێناوی ئێمه. هه‌ر ئه‌ویش بوو بۆی باسكردین سه‌باره‌ت به‌و خۆشه‌ویستیه‌ی ڕۆح پێی به‌خشیون. له‌به‌ر ئه‌وه له‌و ڕۆژه‌وه‌ی ئه‌مه‌مان بیستووه، بێ‌ڕاوه‌ستان نوێژتان بۆ ده‌كه‌ین، داوا له‌خودا ده‌كه‌ین داناییو تێگه‌یشتنی ڕۆحیتان بداتێ، تا خواستی ئه‌و به‌ته‌واوی بزانن. هه‌تا به‌شێوه‌یه‌ك هه‌ڵسوكه‌وت بكه‌ن له‌ژیان شایانی خوداوه‌ند بێتو به‌ته‌واوی جێگای ڕه‌زامه‌ندی ئه‌و بێت، بۆ ئه‌وه‌ی بهرههمبهێنن له‌هه‌موو كارێكی چاكو پێ‌بگه‌ن له‌ناسینی خودا، هه‌روه‌ها بۆ ئه‌وه‌ی به‌هێزتان بكات به‌هه‌موو هێزێك به‌گوێره‌ی توانای شكۆداری خۆی، تا خۆتان ڕاگرن له‌ئاست هه‌موو شتێكو ئارام بگرن، بهخۆشیهوه سوپاسی باوك بكه‌ن، ئه‌وه‌ی ئێوه‌ی ئامادهكردووه بۆ به‌شداریكردنی میراتی خوشكو برایانی پیرۆز له‌ڕووناكی. هه‌ر ئه‌وه ئێمه‌ی ڕزگاركردووه لهدهسهڵاتی تاریكیو ئێمه‌ی گواسته‌وه بۆ پادشاهێتی ڕۆڵه‌ی خۆشه‌ویستی. ئه‌وه‌ی به‌خوێنی خۆی ئێمه‌ی كڕیه‌وه له‌كۆیله‌یه‌تی گوناه، ئه‌ویش به لـێخۆشبوونی گوناه.
عیسا وێنه‌ی خودای نه‌بینراوه
عیسا وێنه‌ی خودای نه‌بینراوه، نۆبه‌ره‌ی هه‌موو بوونه‌وه‌رانه. هه‌ر به‌ویش هه‌موو شتێك دروست بووه، ئه‌وه‌ی لهئاسمانو له‌سه‌ر زه‌وییه، ئه‌وه‌ی ده‌بینرێ‌و نابینرێ، خاوه‌ن تهختو تاج یان سهرۆكو ده‌سه‌ڵاتدار، خودا هه‌مووی بهعیساو بۆ عیسا دروستكرد. ئه‌و پێش هه‌موو شتێك بووه‌و هه‌ر له‌ئه‌ویشدا هه‌موو شتێك ده‌بێت. ئه‌و سه‌ری له‌شه، واته سه‌ری كۆمه‌ڵه‌ی باوه‌ڕداران، سه‌ره‌تاو نۆبه‌ره‌ی زیندووبوونه‌وه‌ی دوای مردنه، تا لهسهرووی هه‌موو شتێك بێت. چونكه خودا حه‌زی كرد به‌هه‌موو پڕی خۆی له‌ئه‌ودا به‌رجه‌سته بێ. تا به‌هۆی ئه‌و ئاشتبێتهوه له‌گه‌ڵ هه‌موو ئه‌وانه‌ی له‌سه‌ر زه‌ویو لهئاسماندایه، به خوێنڕشتنی ئه‌ویش له‌سه‌ر خاچ ئاشتی هاته‌دی.
ئێوه جاران به‌هۆی كرداری خراپتان نامۆ و دوژمن بوون له‌بیركردنه‌وه، به‌ڵام ئێستا ئاشتیكردنه‌وه به‌مردنی، به‌له‌شی مرۆڤانه‌ی خۆی، تا ئێوه به پاكوپیرۆزیو بێ كهموكوڕیو بێ‌گله‌یی بێنه به‌رده‌می. به‌مه‌رجێك بهردهوامبن له‌سه‌ر باوه‌ڕتان، باوه‌ڕێكی چه‌سپاو و ڕه‌گ داكوتراوتان هه‌بێ، لانه‌ده‌ن له‌هیوای ئه‌و مزگێنییه‌ی بیستتانو هه‌موو بوونه‌وه‌رانی ژێر ئاسمان پێی ڕاگه‌یه‌نرا، خۆشمبووم به‌خزمه‌تكار بۆی.
تێكۆشانی پۆڵس بۆ باوه‌ڕداران
من ئێستا دڵشادم به‌و ئازاره‌ی له‌پێناوتان ده‌یچێژم، چونكه له‌له‌شی خۆمدا كهموكوڕی ته‌نگانه‌ی مه‌سیح ته‌واو ده‌كه‌م، له‌پێناوی له‌شی ئه‌و كه كۆمه‌ڵه‌ی باوه‌ڕدارانه، ئه‌وه‌ی من بووم به خزمه‌تكار بۆی، له‌سه‌ر خواستی خودا به‌من دراوه له‌پێناوتان، تا ووشه‌ی خوداتان به ته‌واوی پێ‌بناسێنم، ئه‌م نهێنیه‌ش لای نه‌وه‌كانی ڕابردوو شاراوه بوو، به‌ڵام ئێستا خودا ده‌ریخست بۆ خوشكو برا پیرۆزه‌كان. ئه‌وانه‌ی خودا خۆی ویستی ده‌وڵه‌مه‌ندی شكۆداری ئه‌م نهینییه بۆ هه‌موو میلله‌تان ده‌ربخات، ئه‌وه‌یه مه‌سیح له‌ناوتاندایه، هیوای شكۆمه‌ندییه.
ئه‌وه‌ی بانگه‌وازی پێ‌ده‌ده‌ین، هه‌موو مرۆڤێكی پێ ئاگادار ده‌كه‌ینه‌وه، هه‌روه‌ها هه‌موو مرۆڤێكی پێ فێر ده‌كه‌ین به‌هه‌موو ژیرییه‌وه، تاهه‌موو مرۆڤێك له‌مه‌سیحدا به‌ته‌واوی ئاماده بكه‌ین.
له‌پێناوی ئه‌مه منیش ماندوو دهبمو تێده‌كۆشم به‌هه‌موو توانایه‌ك، ئه‌وه‌ی به‌هێز له‌مندا كار ده‌كات.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.