Biblica® Open Sorani Kurdish Book of Life
کردار 15
كۆبوونه‌وه‌ی نێرراوان له‌قودس
هه‌ندێ جووله‌كه له‌وانه‌ی باوه‌ڕیان به عیسا هێنابوو لهناوچهی یه‌هودیه‌وه هاتن بۆ ئه‌نتاكیا، دهستیانكرد به فێركردنی برایانو ووتیان: (ڕزگارتان نابێ گه‌ر به‌پێی شه‌ریعه‌تی موسا خۆتان خه‌ته‌نه نه‌كه‌ن.) ئه‌وسا پۆڵسو به‌رنابا له‌م باره‌یه‌وه ده‌مه‌قاڵیه‌كی توندیان له‌گه‌ڵ كردن. دوای ئه‌و ده‌مه‌قاڵه‌یه باوه‌ڕدارانی ئه‌نتاكیا بڕیاریاندا پۆڵسو به‌رنابا له‌گه‌ڵ هه‌ندێ لهباوهڕداران ڕووبه‌رووی نێرراوانو پیران ببنه‌وه له قودس، له‌و بابه‌ته له‌گه‌ڵیان بكۆڵنه‌وه. پاش ئه‌وه‌ی ئه‌ندامانی كۆمه‌ڵی باوه‌ڕداران ماڵئاواییان لـێ‌كردن، ڕۆیشتن بۆ قودس به‌ناو شاری فنیقیه‌و سامیره، له‌وێ ههواڵیاندا به برایان كه‌وا ئه‌وانه‌ی جووله‌كه‌ش نین باوه‌ڕیان هێناوه به عیسا، به‌مه خۆشییه‌كی زۆر له‌نێو هه‌موو برایان بڵاوبووه‌وه. كاتێ گه‌یشتنه قودس، هه‌موو نێرراوانو پیرانی كۆمه‌ڵی باوه‌ڕداران پێشوازیان لـێ‌كردن، هه‌واڵی هه‌موو ئه‌و شتانه‌یان دانێ كه خودا به‌هۆی ئه‌وانه‌وه كردبووی. به‌ڵام هه‌ندێ له‌و باوه‌ڕدارانه‌ی لهپێشا له‌سه‌ر ڕێگای فه‌ریسیه‌كان بوون ههستانو ووتیان: (پێویسته ئه‌و باوه‌ڕدارانه‌ی جووله‌كه نین خه‌ته‌نه بكرێنو به شه‌ریعه‌تی موسا هه‌ڵسوكه‌وت بكه‌ن.
پهترۆسو پیرانی قودس
جا نێرراوانو پیران كۆبوونه‌وه‌یه‌كیان كرد بۆ لـێكۆڵینه‌وه‌ی ئه‌م بابه‌ته. پاش گفتوگۆیه‌كی زۆر، په‌ترۆس هه‌ستاو ووتی: (ئه‌ی برایان، ئێوه ده‌زانن ماوه‌یه‌كی زۆره خودا ده‌یه‌وێ ئه‌وانه‌ی جووله‌كه نین له‌سه‌ر زمانی من كه له‌نێوان ئێوه‌دا هه‌ڵیبژاردم گوێ له‌ووشه‌ی مزگێنی بگرنو باوه‌ڕ بهێنن. ئه‌و خودایه‌ی ده‌زانێ چی لهدڵدایه، شایه‌تییان بۆ ده‌داو ڕۆحی پیرۆزی پێ‌به‌خشیون وه‌ك به ئێمه‌ی به‌خشیوه. ئه‌و به هیچ شتێك جیاوازی له‌نێوان ئێمه‌و ئه‌وان نه‌كردووه، به‌باوه‌ڕ دڵی پاك كردونه‌ته‌وه. ئیتر بۆچی ئێوه خودا تاقیدهكهنهوه، نیرێك ده‌خه‌نه سه‌ر شانی قوتابیان ئه‌وه‌ی خۆمانو باوباپیرانمان نهمانتوانی هه‌ڵیگرین؟ به‌ڵام له‌و باوه‌ڕه‌داین ئێمه‌و ئه‌وانیش به‌هۆی به‌ره‌كه‌تی عیسای خوداوه‌ند ڕزگار ده‌بین.(
ئیتر ده‌مه‌قاڵه له‌نێوان دانیشتوان نه‌ما، دهستیانكرد به گوێ‌گرتن له به‌رناباو پۆڵس، كاتێ هه‌واڵی ئه‌و نیشانه‌و كاره سه‌رسوڕهێنه‌رانه‌یان پێ‌ڕاگه‌یاند كه خودا له‌سه‌ر ده‌ستی ئه‌وان كردی له‌نێو ئه‌وانه‌ی جووله‌كه نین. دوای ئه‌وه‌ی هه‌ردووكیان لهقسه بوونه‌وه، یاقوب ووتی: (ئه‌ی برایان گوێم لـێ‌بگرن: شه‌معون پێی ڕاگه‌یاندن چۆن خودا له‌سه‌ره‌تاوه بایه‌خیداوه به‌وانه‌ی جووله‌كه نین تا له نێوانیان میلله‌تێك هه‌ڵبژێرێ ناوی ئه‌و هه‌ڵگرێ، ئه‌مه‌ش له‌گه‌ڵ ووته‌ی پێغه‌مبه‌ران ڕێكدهكهوێ، هه‌روه‌ك له‌كتێبی پیرۆز نووسراوه: [[دوای ئه‌مه ده‌گه‌ڕێمه‌وه خانووه ڕووخاوه‌كه‌ی داود دروست ده‌كه‌مه‌وه، ئینجا پارچه‌ی خانووه‌كه ههڵدهگرمو سه‌ر له‌نوێ دروستی ده‌كه‌مه‌وه، تا گه‌لانی ترو هه‌موو ئه‌و میلله‌تانه‌ی ناوی منیان هه‌ڵگرتووه به‌دوای خوداوه‌ند بگه‌ڕێن، ئه‌مه ئه‌وه‌یه كه خوداوه‌ند ده‌یڵێ ئه‌وه‌ی هه‌موو ئه‌م شتانه‌ی دروستكردووهو هه‌ر له سه‌ره‌تاوه‌ش زانراون.]] له‌به‌رئه‌وه وای به باش ده‌زانم قورسایی نه‌خه‌ینه سه‌ر شانی ئه‌وانه‌ی جووله‌كه نینو ڕێگای خودایان گرتووه، به‌ڵكو نامه‌یه‌كیان بۆ بنووسینو تیایدا ڕایانسپێرین خۆیان دووربخه‌نه‌وه له‌گڵاوی بتو داوێنپیسی، هه‌روه‌ها له‌خواردنی گۆشتی ئاژه‌ڵی خنكێنراو و خواردنه‌وه‌ی خوێن. چونكه هه‌ر لهكۆنهوه موسا له‌هه‌موو شارێك پیاوی هه‌بووه ناوی ئه‌و ڕابگه‌ێنن، هه‌موو ڕۆژێكی شه‌ممه‌ش شه‌ریعه‌ته‌كه‌یان خوێندۆته‌وه له‌كه‌نیشته‌كان.(
بڕیاری كۆبوونه‌وه‌ی نێرراوان
ئینجا نێرراوانو پیرانو هه‌موو ئه‌ندامانی كۆمه‌ڵی باوه‌ڕداران بـه‌باشیان زانی دوو پیاو هه‌ڵبژێرن له‌ناو برایانو بیاننێرن بۆ ئه‌نتاكیا له‌گه‌ڵ پۆڵسو به‌رنابا. ئیتر سیلاو یه‌هوزا كه نازناوی به‌رسابا بوو ههڵیانبژاردن، ئه‌م دووانـه‌ش شوێنێكی به‌رزیان هه‌بوو له‌نێو برایان. ئه‌م نامه‌یه‌یان دایه‌ده‌ستیان: (له نێرراوانو پیرانی براوه، بۆ ئه‌و برا باوه‌ڕدارانه‌ی جــوولــه‌كه نین له‌ناوچه‌كانی ئه‌نتاكیاو سوریاو كیلیكیه:
سڵاوتان لـێ‌بێ. بیستمان هه‌ندێ كه‌س هاتوون بۆ لاتان له‌لایه‌ن ئێمه‌وه بێ‌ئه‌وه‌ی ئێمه ڕایانسپێرین، به‌هۆی قسه‌ی ئه‌وانه‌وه ناخۆشی كه‌وته ناوتانه‌وه، مێشكتان ناڕهحهتبوو. بۆیه به‌باشمان زانی به‌یه‌ك بیروڕاوه دوو پیاو ههڵبژێرینو بۆتان بنێرین له‌گه‌ڵ برایانی خۆشه‌ویستمان به‌رناباو پۆڵس، ئه‌و دوو پیاوه‌ی ژیانیان تهرخانكردووه بۆ خزمهتكردنی عیسای مه‌سیحی خوداوه‌ند. جا ئێمه یه‌هوزاو سیلامان بۆ ناردن تا هه‌مان شتتان به‌ده‌م پێ‌ڕاگه‌ێنن. چونكه ڕۆحی پیرۆزو ئێمه وامان به‌باش زانی قورسایی نه‌خه‌ینه سه‌ر شانتان جگه له‌وه‌ی پێویسته. كه ئه‌مانه‌ن: خۆتان دووربخه‌نه‌وه له‌و شتانه‌ی ده‌كرێ به‌قوربانی بۆ بت، هه‌روه‌ها له‌خوێن خواردنه‌وه‌و خواردنی ئاژه‌لێ خنكێنراو و داوێنپیسی. گه‌ر خۆتان پاراست له‌مانه، شتی چاك دهكهنو خودا له‌گه‌ڵتانه.)
ئه‌وسا ههستانو نامه‌كه‌یان ههڵگرتو ڕۆیشتن بۆ ئه‌نتاكیا، هه‌موو باوه‌ڕدارانیان بانگكرد بۆ كۆبوونه‌وه‌و نامه‌كه‌یان پێشكهشكردن. كاتێ خوێندیانه‌وه زۆر دڵشاد بوون به‌و هاندانه‌ی تیایدا بوو. هه‌روه‌ها یه‌هوزاو سیلا به ووشه‌ی خودا ده‌دوان، زۆر قسه‌یان بۆ برایان كردو ووره‌یان به‌رزكردنه‌وه‌و هانیاندان. پاش ماوه‌یه‌ك برایان به ئاشتی ڕه‌وانه‌یان كردنه‌وه بۆ لای ئه‌وانه‌ی ناردوبوویانن. [به‌ڵام سیلا به‌لایه‌وه باشتر بوو له‌وێ بمێنێته‌وه.] پۆڵسو به‌رناباش هه‌ر له‌ئه‌نتاكیا مانه‌وه‌و له‌گه‌ڵ خه‌ڵكێكی زۆر ووشه‌ی خوداوه‌ندیان ڕاده‌گه‌یاندو فێر ده‌كرد.
لێكجیابونهوهی پۆڵسو به‌رنابا
پاش چه‌ند ڕۆژێك پۆڵس به به‌رنابای ووت: (وه‌ره بابگه‌ڕینه‌وه سه‌رێك لهبرایان بدهینو هه‌واڵیان بزانین له‌هه‌موو شارێك كه‌وا ووشه‌ی خوداوه‌ندمان تیایدا ڕاگه‌یاندووه.) ئینجا به‌رنابا پێشنیاریكرد كه‌وا یۆحه‌ننا كه نازناوی مه‌رقۆسه له‌گه‌ڵ خۆیان ببه‌ن، به‌ڵام پۆڵس نه‌یویست له‌گه‌ڵ خۆیان بیبات، چونكه له‌په‌مفیلیه بهجێیهیشتبوونو له‌گه‌ڵیان نه‌ڕۆیشت بۆ خزمهتكردن. له‌به‌ر ئه‌وه ده‌مه‌قاڵه كه‌وته نێوانیان، تا وای لـێهات له‌یه‌كتری جیابوونه‌وه. ئه‌وسا به‌رنابا مه‌رقۆسی له‌گه‌ڵ خۆی بردو به‌ڕێگای ده‌ریا بۆ قوبرس ڕۆیشتن، به‌ڵام پۆڵس سیلای هه‌ڵبژارد له‌گه‌ڵی بڕوات، ئیتر ئه‌وێیان بهجێهێشتو برایان ئه‌وانیان به به‌ره‌كه‌تی خوداوه‌ند سپارد. ئینجا ڕۆیشتن بۆ ناوچه‌كانی سوریاو كیلیكیه تاباوه‌ڕی كۆمه‌ڵه‌كانی باوه‌ڕداران به‌هێز بكه‌ن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.