Biblica® Open Sorani Kurdish Book of Life
کردار 16
تیمۆساوس له‌گه‌ڵ پۆڵسو سیلا
ئینجا پۆڵس گه‌یشته شاری ده‌ربه، پاشان ڕۆیشت بۆ شاری له‌ستره، له‌وێ قوتابیه‌كی لـێ‌بوو ناوی تیمۆساوس بوو، دایكی جووله‌كه بوو باوه‌ڕی به مه‌سیح هێنابوو، باوكیشی یۆنانی بوو. تیمۆساوس له له‌ستره‌و ئیقونیه ناوبانگی بهچاكه ده‌ركردبوو له‌نێو برایان. پۆڵس حه‌زی ده‌كرد تیمۆساوس له‌گه‌ڵی بێت لهمزگێنیدانی ووشه‌ی خودا، به‌ڵام جووله‌كه‌ی ئه‌و ناوچه‌یه ده‌یانزانی باوكی یۆنانیه، له‌به‌ر ئه‌وه پۆڵس بردیو خه‌ته‌نه‌یكرد. پۆڵسو هاوڕێكانی لهشارێكهوه ده‌چوون بۆ شارێكیكه، بڕیاره‌كانی نێرراوانو پیرانی قودسیان سه‌باره‌ت به‌چه‌ند مه‌سه‌له‌یه‌ك به‌باوه‌ڕداران ڕاده‌گه‌یاند. جا كۆمه‌ڵه‌كانی باوه‌ڕداران له‌باوه‌ڕدا به‌هێز ده‌بوون، ڕۆژ لهدوای ڕۆژ ژماره‌یان زیادی ده‌كرد.
بینینی پۆڵس له‌ترواس
له‌به‌رئه‌وه‌ی ڕۆحی پیرۆز ڕێی لـێ‌گرتن ووشه‌ی خودا لهناوچهی ئاسیا بڵاوبكه‌نه‌وه، ئه‌وسا ڕۆیشتن بۆ ناوچه‌ی فریجیه‌و غه‌ڵاتیه. به‌ڵام كاتێ گه‌یشتنه سنووری ناوچه‌ی میسیا به‌ره‌و ناوچه‌ی بیسینیه ڕۆیشتن، لێره ڕۆحی عیسا ڕێگای نه‌دان، ئه‌وسا به‌ره‌و شاری ترواس به ناوچه‌ی میسیادا ڕۆیشتن. پۆڵس شه‌و له‌خه‌ودا پیاوێكی بینی لهدانیشتوانی مه‌كدۆنیا لێی ده‌پاڕایه‌وه‌و ده‌یووت: (وه‌ره بۆ مه‌كدۆنیاو یارمهتیمانبده.)
پۆڵسو سیلا له‌فیلیپی
ئه‌و كاته‌ی خه‌وه‌كه‌ی بینی، دڵنیابووین كه‌وا خودا بانگیكردووین بۆ مزگێنیدان لهمهكدۆنیا، ئه‌وسا یه‌كسه‌ر ڕۆیشتین بۆی. جا به‌ڕێگای ئاو لهمینای ترواس بۆ دورگه‌ی ساموسراكی ڕۆیشتین. بۆ ڕۆژی داهاتوو به‌رده‌وام بووین له‌گه‌شته‌كه‌مان به‌ره‌و مینای نیاپۆلیس، له‌وێشه‌وه بۆ شاری فیلیپی كه ناودارترین شاری ناوچه‌ی مه‌كدۆنیا بوو، له‌ژێر ده‌سه‌ڵاتی ڕۆمانیه‌كان بوو. له‌وێ چه‌ند ڕۆژێك ماینه‌وه. له‌ڕۆژی شه‌ممه‌دا چووینه ده‌ره‌وه‌ی شار بۆ سه‌ر ڕووبارێك، له‌وێ شوێنێك هه‌بوو نوێژی لێدهكرا. دانیشتین قسه‌مان له‌گه‌ڵ ئه‌و ژنانه كرد كه له‌وێ كۆبووبوونه‌وه، لهنێویان ژنێكی خواناسی لـێ‌بوو ناوی لیدیا بوو بازرگانی قوماشی گرانبه‌ها بوو لهشاری سیاتیرا، خوداوه‌ند دڵی كرده‌وه تاگوێ له قسه‌كانی پۆڵس بگرێ. كاتێ خۆیو ئه‌ندامانی خێزانه‌كه‌ی له‌ئاوهه‌ڵكێشران، به‌گه‌رمی داوای لـێكردن به میوانی بچنه لای و پێیووتین: (گه‌ر ئێوه بڕیارتان داوه من باوه‌ڕم به‌خوداوه‌ند هه‌یه، وه‌رنه ماڵهكهمو له‌وێ بمێننه‌وه.) ئیتر ئێمه ناچار بووین ڕازی بین به بانگكردنهكهی.
ده‌ركردنی ڕۆحی جادوگه‌رێتی
ڕۆژێكیان كاتێ ده‌ڕۆیشتین بۆ نوێژكردن، كچه‌كاره‌كه‌رێكمان تووش هات ڕۆحی جادوگه‌رێتی تیادابوو، به‌هۆی جادوگه‌رێتییه‌وه پاره‌یه‌كی زۆری به‌ده‌ست ده‌هێنا بۆ خاوه‌نه‌كه‌ی، به‌دوای پۆڵسو ئێمه كهوتو هاواری ده‌كرد: (ئه‌م مرۆڤانه نۆكه‌ری خودای مه‌زنن، ڕێگای ڕزگاریتان بۆ ئاشكرا ده‌كه‌ن.) چه‌ند ڕۆژێك ئه‌مه‌ی كرد، تاكو پۆڵس زۆر بێزار بوو، لێره ئاوڕی دایه‌وه‌و به‌ڕۆحه پیسه‌كه‌ی ووت كه تیایدا بوو: (به‌ناوی عیسای مه‌سیح فرمانت پێ‌ده‌ده‌م لێی وه‌ره ده‌ره‌وه!) ئه‌وسا یه‌كسه‌ر ڕۆحه پیسه‌كه لێی هاته ده‌ره‌وه.
پۆڵسو سیلا لهبهندیخانه
كاتێ خاوه‌نه‌كانی كچه‌كاره‌كه‌ره‌كه بینییان سه‌رچاوه‌ی داهاتیان بڕاوه، ئه‌وسا پۆڵسو سیلایان گرت، ڕایانكێشان بۆ گۆڕه‌پانی شاره‌كه بۆ به‌رده‌م فه‌رمانڕه‌وایان، دایاننه‌ده‌ست فهرمانڕهوایانو ووتیان: (ئه‌م دوو پیاوه جووله‌كه‌یه له شاره‌كه‌دا ئاژاوه ده‌نێنه‌وه، شتێ بڵاوده‌كه‌نه‌وه كه ئێمه‌ی ڕۆمانی نه‌ده‌توانین وهریگرینو نه‌ده‌توانین كاری پێ‌بكه‌ین.) ئیتر خه‌ڵكه‌كه زۆر لێیان پڕبوون، فه‌رمانڕه‌واكان جله‌كانیان دڕاندنو فرمانیاندا داركاریبكرێن، جـا زۆر داركاریانكــردنو خستیاننه به‌ندیخانه‌وه، فهرمانیاندا به‌ســه‌رپه‌رشتیكه‌ری به‌ندیخانه‌كه كه‌وا بیانخاته ژێر چاودێریه‌كی زۆره‌وه. ئه‌وسا سهرپهرشــتیكهری به‌ندیخانه‌كه ئه‌م فه‌رمانه تونده‌ی جێ‌به‌جێ‌كردو هه‌ر دووكیانی خــسته ناو قووڵایی زیندان، هه‌ردوو قاچی خستنه ناو قاڵبێكی ته‌خته.
باوه‌ڕهێنانی سه‌رپه‌رشتیكه‌ری به‌ندیخانه
له‌نیوه‌ی شه‌و پۆڵسو سیلا نوێژیان ده‌كــردو گــۆرانی ڕۆحیان بۆ خودا ده‌ووت، به‌ندكراوه‌كانیش گوێیان لــێ‌بـوو، له‌پڕ بومه‌له‌رزه‌یه‌كی توند ڕوویدا گۆشه‌كانی به‌ندیخانه‌كه‌ی هه‌ژاند، ئه‌وسا دهستبهجێ هه‌موو ده‌رگاكانی كرایه‌وه، كۆتو زنجیری هه‌موو به‌ندكراوه‌كان كرایه‌وه. بومه‌له‌رزه‌كه سه‌رپه‌رشتیكه‌ری به‌ندیخانه‌كه‌ی خه‌به‌ركرده‌وه، كاتێ بینی ده‌رگاكان كراوه‌ته‌وه وایزانی به‌ندكراوه‌كان ڕایانكردووه، شمشێره‌كه‌ی هه‌ڵكێشا تاخۆی بكوژێ، به‌ڵام پۆڵس به ده‌نگێكی به‌رز هاواریكرد: (هیچ له‌خۆت مه‌كه، ئێمه هه‌موومان لێره‌ین!) ئینجا كابرا داوای ڕووناكی كردو چووه ژووره‌وه لهترسا هه‌موو له‌شی ده‌له‌رزی، چۆكی دادا له‌به‌رده‌م پۆڵسو سیلا، ئه‌وسا بردنیه ده‌ره‌وه‌و لێیپرسین: (گه‌وره‌م، پێویسته چی بكه‌م تا ڕزگارم بێ؟) ئه‌وانیش وهڵامیاندایهوه: (باوه‌ڕبهێنه بهعیسای خوداوه‌ند، خۆتو خێزانه‌كه‌ت ڕزگارتان ده‌بێ.) جا سه‌باره‌ت به ووشه‌ی خودا بۆ خۆیو هه‌موو خێزانه‌كه‌ی دوان. ئیتر كابرا به‌و شه‌وه هه‌ردووكیانی بردو برینه‌كانی تیماركردنو دهستبهجێ خۆیو هه‌موو خێزانه‌كه‌ی له‌ئاوهه‌ڵكێشران. كابرا بردنیه ماڵی خۆیو خواردنی بۆ دانان، خۆیو هه‌موو خێزانه‌كه‌ی زۆر دڵشادبوون چونكه باوه‌ڕیان بهخودا هێنا. سه‌ر له‌به‌یانی فه‌رمانڕه‌واكان چه‌ند سه‌ربازێكیان نارد، تاكو فه‌رمانی ئازادبوونی پۆڵسو سیلا به سه‌رپه‌رشتیكه‌ری به‌ندیخانه‌كه ڕابگه‌ێنن. ده‌رگاوانی به‌ندیخانه‌كه ئه‌م هه‌واڵه‌ی بهپۆڵس داو ووتی: (فه‌رمانڕه‌وایان فه‌رمانی ئازادبوونتانیان ده‌ركردووه، ئێستا وه‌رنه ده‌ره‌وه‌و به ئاشتی بڕۆن.) به‌ڵام پۆڵس به ناڕه‌زاییه‌وه ووتی: (به‌ئاشكرا له‌به‌رده‌می خه‌ڵك داركارییان كردین به‌بێ فه‌رمانی دادگا، هه‌رچه‌نده ڕه‌گه‌زنامه‌ی ڕۆمانیشمان هه‌یه ئێمه‌یان خسته به‌ندیخانه. ئیتر ئێستا چۆن به نهێنی ده‌رمان ده‌هێنن؟ نه‌خێر! با خۆیان بێن ده‌رمان بهێنن.) پۆلیسه‌كان ئه‌م قسانه‌یان به فه‌رمانڕه‌واكان ڕاگه‌یاند، ئه‌وانیش ترسان كاتێ زانییان ئه‌و دووانه ڕۆمانین، به‌م شێوه‌یه هاتن داوای لـێ‌بوردنیان لـێكردن، ئازادیانكردنو داوایان لـێكردن شاره‌كه به‌جێ‌بهێڵن.
ئه‌وسا پۆڵسو سیلا لهبهندیخانه هاتنه ده‌ره‌وه به‌ره‌و ماڵی لیدیا چوون، له‌وێ برایانیان بینیو ووره‌یان به‌رزكردنه‌وه ئینجا ڕۆیشتن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.