Biblica® Open Sorani Kurdish Book of Life
کردار 17
پۆڵسو سیلا له‌ته‌سالۆنیكی
پۆڵسو سیلا گه‌یشتنه ته‌سالۆنیكی دوای ئه‌وه‌ی بهشاری ئهمفیپولیسو ئه‌پولونیادا ڕۆیشتن. له‌ته‌سالۆنیكی كه‌نیشتی جووله‌كه‌ی لـێ‌بوو. پۆڵس وه‌ك جاری جاران ڕۆیشت بۆ ئه‌وێ، سێ ڕۆژی شه‌ممه له‌سه‌ر یه‌ك سه‌باره‌ت به‌كتێبی پیرۆز گفتوگــۆی له‌گه‌ڵ كردن، جا بۆی ڕوونكــردنهوهو ئاشكرایكرد كه‌وا مه‌سیح ده‌بێ ئازار بكێشێ‌و له‌نێو مــردوواندا زیندووبێته‌وه. پێیووتن: (ئه‌و مــه‌سیحه‌ی چـاوه‌ڕێی ده‌كه‌ن ئه‌و عیسایه‌یه كــه‌وا ئێستا بۆتانی ڕاده‌گه‌ینم.) هه‌ندێ له ئامــاده‌بووان باوه‌ڕیان هێناو لایه‌نگیری پۆڵسو سیلایان كرد. له‌وانه ژماره‌یه‌كی زۆر یۆنانی خوداپهرستو ژماره‌یه‌كی زۆر ژنی خانه‌دان. جا ئه‌مه بووه هۆی به‌غیلی ئه‌و جوولــه‌كانه‌ی باوه‌ڕیان نه‌بوو، ئه‌وسا هه‌ندێ كوڕی خراپی سه‌رجاده‌یان هێنا، خه‌ڵكیان كۆكــرده‌وه‌و دهستیانكرد به هاندانی خه‌ڵكی هه‌تا ئاژاوه كه‌وته ناو شار، ئینجا هێرشیان برده سه‌ر ماڵی یاسونو داوایان لـێ‌كرد پۆڵسو سیلا بداته ده‌ست خه‌ڵكه‌كه. ئیتر كاتێ ئه‌وانیان له‌وێ نه‌دۆزیه‌وه، یاسونو هه‌ندێ برایانیان ڕاكێشاو بردیانن بۆ لای فـه‌رمانڕه‌وایانی شار، شكاتیان لـێكردنو هاواریانكرد: (ئه‌م دوو پیاوه‌ی دنیایان هه‌ڵگێڕاوه‌ته‌وه، بۆ شاره‌كه‌ی ئێمه‌ش هــاتوون، یاسـون میوانداری كـردوون. ئه‌وان سه‌رپێچی فه‌رمانه‌كانی قه‌یسه‌ر ده‌كه‌ن، ده‌ڵێن پادشایه‌كی تر هه‌یه ناوی عیسایه.) جا به‌م قسانه فهرمانڕهواكانو خه‌ڵكه‌كه‌یان ووروژاند. ئیتر فه‌رمانڕه‌واكان له یاسون و ئه‌وانه‌ی له‌گه‌ڵی بوون بارمته‌یان وهرگرتو ئازادیان كردن.
لهشاری بیریه
برایان یه‌كسه‌ر پۆڵسو سیلایان له‌شه‌ودا نارد بۆ شاری بیریه، ئه‌وانیش له‌وێ بۆ كه‌نیشتی جووله‌كه‌كان چوون. به‌ڵام جووله‌كه‌ی بیریه باشتر بوون لهجوولهكهی ته‌سالۆنیكی، ووشه‌ی خودایان زۆر به‌په‌رۆشه‌وه وه‌رگرت، هه‌موو ڕۆژێك ده‌ستیان ده‌كرد به لـێكۆڵینه‌وه‌ی كتێبی پیرۆز تاكو دڵنیابن له‌راستی مه‌سه‌له‌كان. له‌وانه ژماره‌یه‌كی زۆریان باوه‌ڕیان هێنا، هه‌روه‌ها له یۆنانیه‌كانیش زۆر ژنی خانهدانو ژماره‌یه‌كی زۆر لهپیاوان باوه‌ڕیان هێنا.
به‌ڵام كاتێ جووله‌كه‌ی ته‌سالۆنیكی زانیان پۆڵس لهبیریه ووشه‌ی خودا ڕاده‌گه‌ێنێ، دوایكهوتنو دهستیانكرد به هاندانی خه‌ڵكه‌كه دژی پۆڵسو سیلا. دهستبهجێ هه‌ندێ برایان پۆڵسیان به‌ره‌و ده‌ریا برد تا گه‌شت بكات، به‌ڵام سیلاو تیمۆساوس له‌وێ مانه‌وه. ئه‌وانه‌ی له‌گه‌ڵ پۆڵس بوون له‌گه‌ڵـی ڕۆیشتن تا گه‌یاندیانه شاری ئه‌سینا، ئینجا گه‌ڕانه‌وه پاش ئه‌وه‌ی پۆڵس ڕایسپاردن به زووترین كات سیلاو تیمۆساوس بێن بۆ لای.
پۆڵس لهئهسینا
كاتێ پۆڵس له ئه‌سینا چاوه‌ڕێی ده‌كردن، شاره‌كه‌ی بینی پڕه له بت، به‌مه دڵی تهنگبوو. لهكهنیشتهكان گفتوگۆی ده‌كرد له‌گه‌ڵ جوولهكهكانو خه‌ڵكه خواناسه‌كان، هه‌روه‌ها ئه‌وانه‌ی هه‌موو ڕۆژێ له گۆڕه‌پانی شاره‌كه‌دا تووشی ده‌هاتن. ئه‌وسا ده‌مه‌قاڵه له نێوان ئهمو هه‌ندێ له فه‌یله‌سوفه ئهپیقوریهكانو ڕه‌واقیه‌كان په‌یدابوو. كاتێ بینییان ئه‌و عیساو زیندووبوونه‌وه‌كه‌ی له‌نێو مردوواندا ڕاده‌گه‌ێنێ، هه‌ندێكیان ووتیان: (ئه‌م چه‌نه‌بازه مه‌به‌ستی چییه له قسه‌كانی؟) هه‌ندێكیتریشیان ووتیان: (ئه‌مه له‌وه ده‌كات ئاینێكی نامۆ بڵاوبكاته‌وه.) ئینجا بردیان بۆ گردی ئهریوباغوسو لێیان پرسی: (ئایا بۆمان هه‌یه بزانین ئه‌م فێركردنه تازه‌یه‌ی بانگه‌وازی پێ‌ده‌كه‌یت چییه؟ چونكه ئێمه قسه‌ی سه‌یرت لـێ‌ده‌بیستین ده‌مانه‌وێ واتاكه‌ی بزانین.) له‌و سه‌رده‌مه دانیشتوانی ئه‌سیناو ئه‌و بێگانانه‌ی تیایدا دانیشتبوون، كاتی بێكاریان بههیچ شتێك به‌سه‌ر نه‌ده‌برد جگه لهلێكۆڵینهوهی بیروڕای تازه نه‌بێ.
ووتارێك له ئه‌ریوباغوس
پۆڵس له ناوه‌ڕاستی ئهریوباغوسدا وه‌ستاو ووتی: (ئه‌ی دانیشتوانانی ئه‌سینا، دهتانبینم له‌هه‌موو لایه‌كه‌وه زۆر دیندارن. له‌كاتێكدا له‌ناو شاره‌كه‌تان ده‌گه‌ڕام سه‌یری په‌رستگاكانتانم ده‌كرد، قوربانگه‌یه‌كم بینی له‌سه‌ری نووسرا بوو: (بۆ خودای نه‌ناسراو.) جا من ئه‌و خودایه‌تان بۆ ڕاده‌گه‌ێنم كه دهیپهرستنو نایناسن. ئه‌و خودایه‌ی دروستكه‌ری جیهانو هه‌موو ئه‌و شتانه‌ی تیایه‌تی، ئه‌و لهخانوویهك دانانیشێ ده‌ستی مرۆڤ دروستی كردبێ، چونكه خوداوه‌ندی ئاسمانو زه‌وییه، پێویستی به‌وه نییه به‌ده‌ستی مرۆڤ خزمهتبكرێ، وه‌ك بڵێی پێویستی به‌شتێك بێ. ئه‌و بهههموو مرۆڤێ ژیانو هه‌ناسه‌و هه‌موو شتێك ده‌به‌خشێ. هه‌موو میلله‌تانی لهیهكێك دروستكردووه، تا له‌سه‌ر هه‌موو زه‌وی نیشتهجێبن، پێشتر كاتی دروستبوونو سنووری ووڵاته‌كه‌یانی دهستنیشان كردووه، تا بگه‌ڕێن به‌دوای خودا به‌هیوای ئه‌وه‌ی بیدۆزنه‌وه‌و ڕێگای ئه‌و بگرنه به‌ر، هه‌رچه‌نده ئه‌و دوور نییه له هه‌ر یه‌كێكمان، چونكه ئێمه له‌و دهژینو ده‌جولێینه‌وه‌و هه‌ین، هه‌روه‌ك چۆن هه‌ندێ له شاعیره‌كانتان ده‌ڵێن: (ئێمه‌ش نه‌وه‌ی ئه‌وین.) جا چونكه ئێمه نه‌وه‌ی خوداین، پێویسته سه‌یری خودایه‌تی نه‌كه‌ین وه‌ك بتێك له زێڕ یا زیو یاخود به‌رد كه‌وا مرۆڤ بتوانێ بیتاشێ یاخود دایڕێژێ به‌و شێوه‌یه‌ی بیری بۆ ده‌ڕوات. ئێستا خودا له‌به‌رئه‌وه‌ی چاوی پۆشیوه لهسهردهمی نه‌زانی، هه‌موو كه‌سێك له‌هه‌موو شوێنێك بانگ ده‌كات بۆ تۆبه‌كردن، چونكه ڕۆژێكی دیاریكردووه تیایدا حوكمبدرێ به‌سه‌ر جیهان به دادپه‌روه‌ری له‌سه‌ر ده‌ستی پیاوێك بۆ ئه‌م مه‌به‌سته‌ی هه‌ڵبژاردوه. خودا بۆ هه‌موو كه‌سێكی سه‌لماند ئه‌م پیاوه هه‌ڵبژێرراوه، به‌وه‌ی له‌نێو مردووانی هه‌ستانده‌وه. (
كاتێ ئاماده‌بووان گوێیان له‌هه‌ستانه‌وه‌ی نێو مردووان بوو هه‌ندێكیان دهستیانكرد به گاڵته‌پێ‌كردنی، به‌ڵام هه‌ندێكیكه‌یان به پۆڵسیان ووت: (ده‌مانه‌وێ جارێكیكه له‌م باره‌یه‌وه قسه‌مان بۆ بكه‌یت.) ئیتر به‌م شێوه‌یه پۆڵس له‌ناویان چووه ده‌ره‌وه. به‌ڵام هه‌ندێكیان لایه‌نگیری پۆڵسیان كردو باوه‌ڕیان پێ‌هێنا. له‌وانه دیونیسیوس كه ئه‌ندامی ئه‌نجوومه‌نی ئه‌ریوباغوس بوو، هه‌روه‌ها ژنێك ناوی داماریس بوو له‌گه‌ڵ چه‌ند كه‌سێكیكه.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.