Koya Bible
ହିତୋପଦେଶ 22:6
Verse 6 is marked below, with the whole chapter around it. Read from the start
ନାର୍ଗେ ଦନ୍ତେ ବାଦୁଲ୍ତେ ସାୟେତ୍ ପେଦେର୍ ଏଞ୍ଚିଆଦାନାଦ୍ ଟିକ୍, ମେଣ୍ଡେ, ରୁପା ନୁ ସୁନା ବାଦୁଲ୍ତେ ପ୍ରେମ ମାଡ଼ାନାଦ୍ ଅନୁଗ୍ରହ ସାୟେ । ସାଉକାରି ନୁ ଗରିବ୍ ଅଣ୍ଡୟାଗେ କାଇଲିତଡ଼୍; ସଦାପ୍ରବୁ ଆ ସାରେତଡ଼୍କିଙ୍କ୍ ତିଆର୍ ମାଡ଼୍ତେନଣ୍ଡ୍ । ଚତୁର୍ ନାରୁଣ୍ଡ୍ ବିପଦ୍ତିଙ୍କ୍ ଉଡ଼ି ନିଜରତିଙ୍କ୍ ମିଞ୍ଜ୍ପିତଣ୍ଡ୍; ମାତର୍ ମୁର୍କ ନାରୁଡ଼୍ ମୁନେଆଞ୍ଜ୍ ଦଣ୍ଡ୍ ପାହେମ୍ ଆଦ୍ତଡ଼୍ । ଶାନ୍ତି ନୁ ସଦାପ୍ରବୁନ୍ ବିଷୟ ୱେର୍ଦାନ୍ ପୁରସ୍କାର ଦନ, ସନ୍ମାନ୍ ନୁ ଜିଉନ୍ ଆଦ୍ତେ । କାରାପ୍ ନାରୁଡ଼୍ତେ ଆର୍ଦାଗ୍ କୟେ ନୁ ଉଡ଼୍ୟି ମାନ୍ତେ; ବେନ ନିଜର ଜିଉନ୍ ଗେଲ୍ସ୍ପିତଣ୍ଡ୍, ଅଣ୍ଡ୍ ଆ ସାରେକଞ୍ଚ୍ ଜେକେ ମାନ୍ତଣ୍ଡ୍ । ପେକାନ୍ ଟିକ୍ ଆର୍ଦାଗ୍ ଅକିଙ୍କ୍ ଶିକ୍ଷା ଇମୁଟ୍; ଆଦିଙ୍କ୍ ଅଣ୍ଡ୍ ମୁୟ୍କେ ବା ଆଗେକଞ୍ଚ୍ ୱେର୍ ଆୟଣ୍ଡ୍ । ସାଉକାରି ଗରିବ୍ତେ ପର ଶାସନ ମାଡ଼ିତଣ୍ଡ୍, ମେଣ୍ଡେ, ଋନ୍ ଅତ୍ତେ ନାରୁଣ୍ଡ୍ ଋନ୍ ଇଦାନନ୍ ଦାସ ଆଦ୍ତଣ୍ଡ୍ । ବେନ୍ କରାପ୍ ୱିଜେ ୱିତିତଣ୍ଡ୍, ଅଣ୍ଡ୍ ଆ ବିପଦ୍ତେ ୱିଜେ କୟିଦ୍ତନ୍ ନୁ ଅନ୍ କପାମ୍ତେ ଡୁଡ୍ ଉର୍ଙ୍ଗିତେ । ବେନ ଦୟାତେ ଉଡ଼ିତଣ୍ଡ୍, ଅଣ୍ଡ୍ ଆଶିର୍ବାଦ୍ ପାହେମ୍ ଆଦ୍ତଣ୍ଡ୍; ବେଲାକି ଅଣ୍ଡ୍ ନିଜର କାଦିକଞ୍ଚ୍ ଗରିବିଡ଼୍କ୍ ଇଦ୍ତଣ୍ଡ୍ । ନିନ୍ଦାମାଡ଼ାନଙ୍କ୍ ବାୟିଦେ ପେସ୍ପିମୁଟ୍, ଆସୁଟ୍ ରାମ୍କ୍ ପେୟିସ୍ ଆଦ୍ତେ; ମେଣ୍ଡେ, ରାମ୍କ୍ ନୁ ଅପମାନ୍ ବନ୍ଦ୍ ଆଦ୍ତେ । ବେନ୍ ନାରୁଣ୍ଡ୍ ହୃଦୟତେ ସାକ୍ସାକାତିଙ୍କ୍ ପ୍ରେମ ମାଡ଼ିତଣ୍ଡ୍, ବେନନ୍ ପାୟୁର୍କଞ୍ଜ୍ ବାକ୍ୟତେର , ରାଜାଲ୍ ଅନ୍ ସାଙ୍ଗ ଆଦ୍ତଣ୍ଡ୍ । ସଦାପ୍ରବୁନ୍ କଣ୍ଢା ଜ୍ଞାନ ପାହେମ୍ ଆତ୍ତେ ନାରୁଙ୍କ୍ ରକ୍ଷା ମାଡ଼ିତା; ମାତର୍ ବିଶ୍ୱାସ୍ତିଙ୍କ୍ ଉଃତେନନ୍ ଗଟିଙ୍କ୍ ଅଣ୍ଡ୍ ଦଂସ ମାଡ଼ିଦ୍ତଣ୍ଡ୍ । ମଣ୍ଡି ନାରୁଣ୍ଡ୍ କେତିତଣ୍ଡ୍, ବାୟିଦେ ସିଂହଡୁୱ୍ ମିନ୍ଦେ; ନାନ୍ ଆର୍ଦାଗ୍ ଡଲିତାନ୍ । ଲାଞ୍ଜେ ନାଟାଡ଼୍ତେ ପାୟୁର୍ ଗାଟି ଗୁୟିନ୍ଦେ, ସଦାପ୍ରବୁଙ୍କ୍ ପାସ୍କାନ୍ ନାରୁଣ୍ଡ୍ ଆଦିନାଗ୍ ରାଲିତଣ୍ଡ୍ । ପେକାନ୍ ମନତାଗେ ଜ୍ଞାନ୍ ମାନ୍ନ, ମେଣ୍ଡେ, ଶାସନ ମାଡ଼ାନ୍ ଡୁଡ୍ ପେସ୍ପି ଅନ୍ନାଗାକନ୍ ଜେକେ ମାଡ଼ିଦ୍ତେ । ବେନ୍ ନାରୁଣ୍ଡ୍ ନିଜର୍ ଦନ ପେର୍ସ୍ପାନ୍ ମାଇଦିଙ୍କ୍ ଗରିବ୍ତେ ପର କାରାପ୍ ମାଡ଼ିତଣ୍ଡ୍; ମେଣ୍ଡେ, ବେନ ସାଉକାରିଙ୍କ୍ ଦାନ ମାଡ଼ିତଣ୍ଡ୍, ଅକିଙ୍କ୍ ଅବାବ୍ ଗଟେମ୍ ଆଦ୍ତେ ।
ତିରିଶ୍ଟାନ୍ ଜ୍ଞାନତେ ଗଟି
ନିମେ ନିଜର କେୱୁତାରି ଜ୍ଞାନିମାନ୍ଦାଡ଼୍ ଗଟି କେଞ୍ଜା; ମେଣ୍ଡେ, ନା ବୁଦ୍ଦ୍ତେ ନିଜର ମନ୍ ଇମ୍ । ବେଲାକି ନିମେ ଆଦ୍ ହୃଦୟତାଗେ ନେଃକେ ନୁ ନି ପାୟୁର୍ତଡ଼୍ ଆଦ୍ ଅଣ୍ଡୟାଗେ କାଇଲ୍କେ ସାର୍ଦେ ଇନା ଆଦ୍ । ସଦାପ୍ରବୁନାଗେ ବେଲାନେ ନିୟାଦ୍ ଆଶେ ମାନ୍ତେ, ଇଦିନ୍ ମାଇଦିଙ୍କ୍ ନାନ୍ ନେଣ୍ଡ୍ ନିକିଙ୍କ୍, ଇସାରେ ଗଟି ପୁଞ୍ଜ୍ପ୍ତାନ୍ । ନାନେ ମିଇ ସେଙ୍ଗେ ତିରିଶ୍ଟାନ୍ ଜ୍ଞାନ ଗଟି ଲେକାତାନ୍ ଇଗେ ଲେକେତାଦ୍ ବୁଦ୍ଦ୍ ନୁ ଜ୍ଞାନ ଦିବେଣ୍ଡ୍ ମିନ୍ଦେ, ମିଡ଼୍ ବେଲାନେ ଅଡ଼୍କିଙ୍କ୍ ସତ୍ ଉତ୍ତର ଇଦେପାର୍ତିଡ଼୍, ଇଦିନ୍ ମାଇଦିଙ୍କ୍ ନାନ୍ ବାତେ ମିଇପର ନ୍ୟାୟ ନୁ ଶିକ୍ଷାତେ ସାୟେତ୍ ବାକ୍ୟ ଲେକନ୍ ? ଗରିବ୍ତିଙ୍କ୍ ଗରିବ୍ ପୁଞ୍ଜ ଅନ୍ ସାମାନ୍ ଡଙ୍ଗି ଅୟିମାଟ୍, ମେଣ୍ଡେ, ନଗର ଆର୍ଦାଗ୍ ଦୁଃକିଡ଼୍ ପର ଦୁଃକାମ୍ ମାଡ଼୍ମାଟ୍ । ବେଲାକି ସଦାପ୍ରବୁ ଅଡ଼୍ ପାକେ ରାମ୍କ୍ ମାଡ଼ିତଣ୍ଡ୍, ମେଣ୍ଡେ, ବେନଡ଼୍ ଅଡ଼୍ ସାମାନ୍ ଅଦ୍ତଣ୍ଡ୍, ଅଣ୍ଡ୍ ଅଡ଼୍ ଜିଉନ୍ତିଙ୍କ୍ ଅଦ୍ତଣ୍ଡ୍ । କପାତ୍ତେ ନାରୁନ୍ତଡ଼୍ ସାଙ୍ଗ ଆୟିମାଟ୍, ମେଣ୍ଡେ, କପାତ୍ତେ ନାରୁନ୍ତଡ଼୍ ତାକ୍ମାଟ୍ । ଆଲେନେ ମାଡ଼୍କେ, ମିଡ଼୍ ବା ଅନ୍ ଆର୍ ଶିକ୍ଷାମାଡ଼ି ନିଜର ଜିଉନ୍ତେ ମାଇଦିଙ୍କ୍ ଉଡ଼ିୟ୍ ତିଆର ମାଡ଼ିତିଡ଼୍ । ବେନଡ଼୍ କାଇୟ୍ କାଲ୍ପାନଡ଼୍ ବା ଋନ୍ତେ ଗାରେତଡ଼୍ ଆଦ୍ତଡ଼୍, ଅଡ଼୍ ଲପେଙ୍କ୍ ମିଡ଼୍ ୱେରଣ୍ଡ୍ ଆୟିମାଟ୍ । ବେସୁଙ୍କ୍ ମାଲ୍ପାନଙ୍କ୍ ମିକିଙ୍କ୍ ବାତେ ମାନ୍ଅ, ଆସୁଙ୍କ୍ ଅଣ୍ଡ୍ ବାତେଙ୍କ୍ ମି ମଦଲ୍ ତାର୍ତେ ସିଲେ ଅଦ୍ତଣ୍ଡ୍ ? ମି ଆନିଦାଦିଡ଼୍ ବେନ୍ ପାଃନ୍ତେ ସାନ୍ଦେ ତିଆର୍ ମାଡ଼ିମିନ୍ଦେଡ଼୍, ଆଦ୍ ଗୁଞ୍ଚା ମାଡ଼୍ମାଟ୍ । ମିଡ଼୍ ବାତେ ବେନ୍ଆୟି ନାରୁଙ୍କ୍ ନିଜର ବେପାର୍ତାଗ୍ ଦାନ୍ଦେଆଦାନାଦ୍ ଉଡ଼ୁତିଡ଼୍ ? ଅଣ୍ଡ୍ ରାଜାଲଡ଼୍ ମୁନେ ନିତିତଣ୍ଡ୍ । ଅଣ୍ଡ୍ ସୁଦୁନଡ଼୍ ନାରୁଡ଼୍ ମୁନେ ନିଲଣ୍ଡ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.