Koya Bible
ଏଜ୍ରା 6
ଦାରିୟାବସତେ ଆଦେଶ୍
ଆସୁଟ୍ ଦାରିୟାବସ ରାଜାଲ୍ ଆଦେଶ୍ ମାଡ଼ୱାନାକେ, ବାବିଲ୍ତେ ବେନ୍ ବଇକିନାଗ୍ ଲେକ୍ତେ ଆକାର୍ତେ ଦନ୍ ଗୁଡ଼୍ପି ଆତ୍ତେ, ଆଦ୍ ମେଃକାଙ୍କ୍ ଆତ୍ତେ। ମେଣ୍ଡେ, ମାଦୀୟ ପ୍ରଦେଶତେ ଅକ୍ଷ୍ମଥା ପେଦେର୍ତେ ରାଜ୍ଲତ୍ତାଗ୍ ଅଣ୍ଡୟ ଉଡି ମାନ୍ଦାନ୍ ବଇ ଦରକ୍ତେ, ଆଗାକନ୍ ଏର୍କେ ମାଡ଼ାଙ୍କ୍ ଇଲାନେ ଲେକ୍ ଆସ୍ମାତ୍ତେ।
କୋରସ୍ ରାଜାନ୍ ରାଜତ୍ୱତେ ପ୍ରତମ୍ ୱାଡ଼୍ସେତେ କୋରସ୍ ରାଜାଲ୍ ଯିରୁଶାଲମ୍ ପରମେଶ୍ୱରଦେ ଲତ୍ତେ ବିଷୟ ଇ ଗଟ୍ କେତ୍ତଣ୍ଡ୍, “ନାରୁଡ଼୍ ପୁଜାନ୍ ପଡ଼ିୟେ ଆଦ୍ ଲନ୍ ତିଆର୍ ଆୟି ନୁ ଆଗେତ୍ ବିତ୍ତିମୁଲେ ଡ଼ୁଟାଙ୍କ୍ ଇନା ଆୟି; ଆଗେତ୍ ଡେଙ୍ଗ୍ ଷାଠିଏ କାଇ ନୁ ଆଗେତ୍ ଓସାର ଷାଠିଏ କାଇ ଆୟି; ଆୱୁ ମୁଣ୍ଡ୍ ଦାଢି ବାଡ଼ିୟା ବାଡ଼ିୟା କାଲ୍କିନେ ନୁ ଅଣ୍ଡୟ୍ ଦାଢି ପୁଃନେ ୱେର୍କିନେ କୃସ୍ଆୟି; ମେଣ୍ଡେ, ରାଜାନ୍ ଲତ୍ତେକଞ୍ଜ୍ ଆଗେତ୍ କର୍ଚ ଇମୁଟ୍; ମେଣ୍ଡେ, ପରମେଶ୍ୱରତେ ଲତ୍ତେ ବେନ୍ ସୁନା ନୁ ରୂପାତେ ଗିନେ ନବୂକଦ୍ନିତ୍ସର ଯିରୁଶାଲମତେ ପ୍ରାର୍ତନା ମନ୍ଦିର୍କନ୍ ଅସ୍ ବାବିଲତା ତାସ୍ମାତ୍ତଣ୍ଡ୍, ଆୱୁସାରେ ମାଲପିମୁଟ୍, ମେଣ୍ଡେ ସାରେ ଗିନେ ମେଣ୍ଡନ୍ଦାମ୍ ଯିରୁଶାଲମତେ ମନ୍ଦିର୍ତେ ନିଜର ନିଜର ପଡ଼୍ୟେତାଗ୍ ତାଡ଼ାଟ୍, ମେଣ୍ଡେ ମିଡ଼୍ ପରମେଶ୍ୱରତେ ଲତ୍ତାଗ୍ ଆୱୁସାରେ ନେଃମୁଟ୍।”
“ଇଦିନ୍ ମାଇଦିଙ୍କ୍ ତତ୍ତନୟ, ଇଲ୍କେତ୍ ଆପାକେତ୍ ଦେଶ୍କେପାନଡ଼୍, ଅ ଶତର ବୋଷଣୟ ମିଡ଼୍ ନୁ ମିଇ ସାଙ୍ଗଡ଼୍ ଇଲ୍କେତ୍ ଆପାକେତ୍ ଅଫର୍ସକିୟଅଡ଼୍, ଆଗାକନ୍ ଜେକେ ମାନୁଟ୍; ପରମେଶ୍ୱରତେ ଇ ଲତ୍ତେ ପାଡ଼ିୟ୍ ଦାଗ୍ କାଇ ୱାଟ୍ମାଟ୍; ଯିହୁଦିଡ଼୍ ଦେଶ୍କେପାନଡ଼୍ ନୁ ଯିହୁଦିଡ଼୍ ବାଡ଼ିୟଡ଼୍ ପରମେଶ୍ୱରତେ ଇ ଲତ୍ତେ ନିଜର ପଡ଼୍ୟେତାଗ୍ ତିଆର୍ ମାଡ଼ାଟ୍। ମେଣ୍ଡେ, ପରମେଶ୍ୱରତେ ଇ ଲନ୍ ତିଆର୍ ମାଡ଼ାନ୍ ମାଇଦିଙ୍କ୍ ମିଇ ଇ ଯିହୁଦିଡ଼୍ ବାଡ଼ିୟଡ଼୍ ପର ବାତ୍ ମାଡ଼ାନାଦ୍, ଆଦ୍ ମାମ୍ ଆଦେଶ୍ ମାଡ଼ୁତମ୍; ଅଡ଼୍ ବାତେ ବେଲାନେ ଜନ୍ମ ଆୟିମାକି, ଇଦିନ୍ ମାଇଦିଙ୍କ୍ ଆ ନାରୁଡ଼୍କିଙ୍କ୍ ରାଜା ସମ୍ପତ୍ତିକନ୍, ଇତ୍କେ, ଇଲ୍କେତ୍ ଆପାକେତ୍ ରାଜ୍ଚିସ୍ତୁକନ୍ ଅଦିକ୍ ଯତନ୍ତେ ମୁନେତ୍ କର୍ଚ ଇମୁଟ୍। ମେଣ୍ଡେ, ସ୍ୱର୍ଗତ୍ ପରମେଶ୍ୱରତେ ହୋମବଲିତ୍ ମାଇଦିଙ୍କ୍ ଯିରୁଶାଲମତେ ଯାଜକିଡ଼୍ ବାକ୍ୟଲେକାମ୍ ଯୁବା ଷଣ୍ଡ୍ କନ୍ଦା ନୁ ମେକା ନୁ ମେଣ୍ଢାପିଲା, ଗହମ, ଅୱଡ଼୍, ଅଙ୍ଗୁର୍କାଲ୍ ନୁ ନିୟ୍, ବାତେ ବାତେ ଅଡ଼କ୍ ଦରକାର, ଆୱୁସାରେ ନିତାଲ୍ ନିତାଲତେ ବାତେ ବାଦା ଇଲ୍ୱେନଡ଼କ୍ ଅଡ଼୍କିଂଙ୍କ୍ ଇମୁଟ୍; ଆସୁଙ୍କ୍ ଅଡ଼୍ ସ୍ୱର୍ଗତେ ପରମେଶ୍ୱର ଅନୁସାର୍ତେ ମେଣ୍ଢା ପୁଜି ଉତ୍ସର୍ଗ ମାଡ଼ିତଡ଼୍, ମେଣ୍ଡେ ରାଜାଲ୍ ନୁ ଅନ୍ ମାର୍କିଡ଼୍ ଜିଉନ୍ତେ ମାଇଦିଙ୍କ୍ ପ୍ରାର୍ଥନା ମାଡ଼ିତଡ଼୍।” “ମେଣ୍ଡେ ନାନ୍ ଆଦେଶ୍ ମାଡ଼ମିନ୍ଦେନ୍ ଯେ, ବେନ୍ଆୟି ଇ ବାକ୍ୟ ୱେରେ ମାଡ଼ିତଣ୍ଡ୍, ଅନ୍ ଲତ୍ତେକଞ୍ଜ୍ ୱେରଡ଼୍ ପାଟ୍ପେସ୍ପି ଆଦ୍ ପାଟ୍କ୍ତାଗ୍ ଅଣ୍ଡ ତଃସ୍ଆସ୍ ୱେଃସ୍ ଆୟିଣ୍ଡ୍; ମେଣ୍ଡେ, ଆଦିନ୍ ସେଙ୍ଗେ ଅନ୍ଲନ୍ ପେଣ୍ଡେଦିବେ ମାଡ଼ିମୁଟ୍। ମେଣ୍ଡେ, ବେନ୍ ବେନ୍ ରାଜାନ୍ ନୁ ଗୋଷ୍ଟିତଡ଼୍ ପରମେଶ୍ୱର ଯିରୁଶାଲମତେ ଇ ଲନ୍ ନଷ୍ଟ ମାଡ଼ାନ୍ ସାରେ ବାକ୍ୟ ୱେରେ ମାଡ଼ାନଙ୍କ୍ କାଇ ୱାଟିତଡ଼୍, ଅଡ଼୍ ସାରେତଡ଼୍କ୍ ଯିରୁଶାଲମତେ ସାରେତଡ଼୍ ପେଦେର୍ ମାଡ଼୍ନଡ଼୍ ପରମେଶ୍ୱର ଜେକେ ମାଡ଼ିଣ୍ଡ୍। ନାନ୍ ଦାରିୟାବସ ଇ ଆଦେଶ୍ ଇସମିନ୍ଦେନ୍; ଇଦି ଅଦିକ୍ ଯତନ୍ତେ ମୁନେ ମାଡ଼ାଙ୍କ୍ ଆୟି।”
ମନ୍ଦିର୍ ସମର୍ପଣ
ଆସୁଟ୍ ଦାରିୟାବସ ରାଜାଲ୍ ଇ ଆଦେଶ୍ ରତାନ୍ ମାଇଦିଙ୍କ୍ ଇଲ୍କେତ୍ ଆପାକେ ଦେଶ୍କେପାନଡ଼୍ ତତ୍ତନୟ ନୁ ଶତର ବୋଷଣୟ ନୁ ଅଡ଼୍ ତଡ଼୍ଦେନଡ଼୍ ଅଦିକ୍ ଯତ୍ନ ଅନୁସାର୍ତେ ପାଡ଼୍ୟି ମାଡ଼୍ତଡ଼୍। ଇଗାକଞ୍ଚ୍ ହାଗୟ ବବିଷ୍ୟତ୍ବକ୍ତାନ୍ ନୁ ଇଦ୍ଦୋର ମାର୍ ଯିକରିୟନ୍ ବବିଷ୍ୟତ୍ବାକ୍ୟ ତଡ଼୍ ଯିହୁଦିୟଡ଼୍ ବାଡ଼ିୟଅଡ଼୍ ମନ୍ଦିର୍ତିଙ୍କ୍ ତିଆର ମାଡ଼୍ତଡ଼୍ ନୁ ତେର୍ପ୍ପତଡ଼୍। ମେଣ୍ଡେ, ଅଡ଼୍ ଇସ୍ରାଏଲ୍ ପରମେଶ୍ୱରତେ ଆଦେଶ୍ ଲେକାମ୍ ନୁ ପାରସ୍ୟ ରାଜାଲ୍ କୋରସ୍ ନୁ ଦାରିୟାବସ ନୁ ଅର୍ତ୍ତକ୍ଷସ୍ତର ଆଦେଶ୍ ଲେକାମ୍ ତିଆର୍ ମାଡ଼ି ତେର୍ପ୍ପତଡ଼୍। ଦାରିୟାବସ ରାଜାନ୍ ରାଜତ୍ୱତେ ଷଷ୍ଠ ବର୍ଷତ୍ ଅଦର୍1 ପେଦେର୍ ନେଲ୍ଞ୍ଜିନ୍ ମୁଣ୍ଡ୍ଦିନାତେ ଇ ଲନ୍ ତେର୍ସ୍ପ୍ତଡ଼୍। ଇଗାକଞ୍ଚ୍ ଇସ୍ରାଏଲତେ ପିଲା, ଯାଜକିଡ଼୍ ନୁ ଲେବିୟଡ଼୍ ନୁ ବନ୍ଦିତେ ବାଗାତଡ଼୍ ପିଲା ୱେଡ଼୍କେତେ ପରମେଶ୍ୱର ଇ ଲନ୍ ଆରାମ୍ ମାଡ଼୍ତେ ଉତ୍ସବ ପାଲନ୍ ମାଡ଼୍ତଡ଼୍। ମେଣ୍ଡେ, ପରମେଶ୍ୱରତେ ଇ ଲତ୍ତେ ତିଆର୍ ସମୟତେ ଅଡ଼୍ ଏକ ଶହ କନ୍ଦା, ଦୁଇ ଶହ ମେଣ୍ଢା, ଚାରି ଶହ ମେଣ୍ଢାପିଲା ପୁଜ୍ତଡ଼୍; ମେଣ୍ଡେ, ସାରେ ଇସ୍ରାଏଲତେ ପାପ୍ କ୍ଷେମାତେ ପୁଜାନ୍ ମାଇଦିଙ୍କ୍ ଇସ୍ରାଏଲିଡ଼୍ ନଗର୍ତେ ସଂକ୍ୟାଲେକାମ୍ ବାରଟାନ୍ ପିଲା ପୁଜ୍ତଡ଼୍। ମେଣ୍ଡେ, ଅଡ଼୍ ମୋଶାନ୍ - ବଇତେ ଲେକାନୁସାରତେ ଯିରୁଶାଲମ୍ ପରମେଶ୍ୱରତେ ସେବା ମାଇଦିଙ୍କ୍ ଯାଜକ୍ନଡ଼୍ ଅଡ଼୍ ୱେରେ ମାଡ଼ାନ୍ ଲେକାମ୍ ନୁ ଲେବିୟଅଡ଼୍କ୍ ଅଡ଼୍ ପାଲି ଲେକାମ୍ ତିଆର୍ ମାଡ଼୍ତଡ଼୍।
ନିସ୍ତାର ପାଣ୍ଡୁମ୍ ମାଡ଼୍ତଡ଼୍
ତାନ୍ପେର୍କେ ପ୍ରତମ୍ ନେଲ୍ଞ୍ଜିନେ ଚଉଦ ଦିନ୍ ବନ୍ଦିତାଗ୍ ମାନ୍ଦାନ୍ ପିଲା ନିସ୍ତାର୍ ପାଣ୍ଡୁମ୍ ମାଡ଼୍ତଡ଼୍। ବାତେଙ୍କ୍ଇତ୍କେ ଯାଜକିଡ଼୍ ନୁ ଲେବିୟଅଡ଼୍ ଅଣ୍ଡୟ୍ ଦାମ୍ ମିକିଙ୍କ୍ ପବିତ୍ର ମାଡ଼୍ତଡ଼୍; ଆ ସାରେତଡ଼୍ ଶୁଚି ଆସ୍ମାତ୍ତଡ଼୍; ଇଦିଙ୍କ୍ ଅଡ଼୍ ବନ୍ଦିତାଗ୍ ମାନ୍ଦାନ୍ ସାରେ ପିଲାନ୍ ମାଇଦିଙ୍କ୍, ତାମ୍ ଯାଜକନଡ଼୍ ଦାଦାଲଡ଼୍ ମାଇଦିଙ୍କ୍ ନୁ ନିଜେତ୍ ମାଇଦିଙ୍କ୍ ନିସ୍ତାର୍ ପାଣ୍ଡୁମ୍ତାଗ୍ ପୁଜ୍ତଡ଼୍। ମେଣ୍ଡେ, ବନ୍ଦି ଆସ୍ମାନ୍ଦାନ୍ ପୁଃନେ ଇସ୍ରାଏଲତେ ପିଲା ନୁ ବେନ ଅଡ଼୍ ପାକେ ଆସ୍ ଇସ୍ରାଏଲତେ ପରମେଶ୍ୱର ସଦାପ୍ରବୁଙ୍କ୍ ମେଃକାନ୍ ମାଇଦିଙ୍କ୍ ଦେଶତାଗ୍ ମାନ୍ଦାନଡ଼୍ ୱେରେ ଦେଶତେ କାରାପ୍ ମାଇଦିଙ୍କ୍ ୱେରେ ମାଡ଼ି, ଆୱୁ ସାରେ ତିତ୍ତଡ଼୍। ମେଣ୍ଡେ, ସାତ୍ ଦିନେତ୍ ୱେଡ଼୍କେତେ ମୁଞ୍ଜା ରୋଟିତେ ପାଣ୍ଡୁମ୍ ପାଲନ୍ ମାଡ଼୍ତଡ଼୍; ବାତେଙ୍କ୍ଇତ୍କେ ସଦାପ୍ରବୁ ଅଡ଼୍ ୱେଡ଼୍କେ ମାଡ଼ିମାତ୍ତଡ଼୍ ନୁ ଇସ୍ରାଏଲତେ ପରମେଶ୍ୱର, ପରମେଶ୍ୱରତେ ଲତ୍ତେ ପାଡ଼ିୟ୍ଦାଗ୍ ଅଡ଼୍କାଇ ଡ଼ୁଟାଙ୍କ୍ମାଡ଼ାନ୍ ମାଇଦିଙ୍କ୍ ଅଡ଼୍ ପର ଅଶୂର ରାଜାନ୍ ହୃଦୟକଞ୍ଜ୍ ମାଲ୍ପିମାତ୍ତଡ଼୍।
Source notes (1)
- Footnote ମାଗ୍ ନୁ ପଗୁଣ ନେଲ୍ଞ୍ଜ୍ତେ ଆଦ୍ ଲନ୍ ତେର୍ସ୍ପତଡ଼୍
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.