Koya Bible
ଏଜ୍ରା 5
ପ୍ରାର୍ତନା ଲନ ପୁଃନେ ତିଆର୍
ଇଗାକଞ୍ଚ୍ ହାଗୟ ବବିଷ୍ୟତ୍ବକ୍ତାଲ୍ ନୁ ଇଦ୍ଦୋରତେ ମାର୍ ଯିକରିୟ, ଇ ବବିଷ୍ୟତ୍ବକ୍ତାଲଡ଼୍ ଯିହୁଦା ନୁ ଯିରୁଶାଲମତେ ଯିହୁଦିଡ଼୍ ଗାରେ ବବିଷ୍ୟତ୍ବାକ୍ୟ ଜନା ମାଡ଼୍ତଡ଼୍; ଅଡ଼୍ ଇସ୍ରାଏଲତେ ପରମେଶ୍ୱତେ ପେର୍ଦତେ ଅଡ଼୍ ଗାରେ ବବିଷ୍ୟବାକ୍ୟ ଜନା ମାଡ଼୍ତଡ଼୍। ଆସୁଙ୍କ୍ ଶଲ୍ଟିୟେଲତେ ମାର୍ ଯିରୁବ୍ବାବିଲ୍ ନୁ ଯୋଷାଦକନ୍ ମାର୍ ଯେଶୂୟ ତେଦି ଯିରୁଶାଲମତେ ପରମେଶ୍ୱରତେ ମେଣ୍ଡେ ଲୋନ୍ ତିଆର୍ ମାଡ଼ାନଙ୍କ୍ ପସ୍ପ୍ତଡ଼୍; ବବିଷ୍ୟତ୍ବକ୍ତାଲଡ଼୍ ଅଡ଼୍ ତଡ଼୍ ମାଞ୍ଜ୍ ଅଡ଼୍କିଂଙ୍କ୍ ସାହାଯ୍ୟ ମାଡ଼୍ତଡ଼୍। ଆ ସମୟତେ ତତ୍ତନୟ, ଇଲ୍କେତ୍ ଆପାକେତ୍ ଦେଶ୍କେପାନଡ଼୍ ନୁ ଶତର ବୋଷଣୟ ନୁ ଅଡ଼୍ ତଡ଼୍ଦେନଡ଼୍ ୱାସ୍ ଅଡ଼୍କିଂଙ୍କ୍ ପାସ୍ରିଞ୍ଚତଡ଼୍, “ଇ ଲନ୍ ତିଆର ମାଡ଼ାଙ୍କ୍ ନୁ ଇ ନେଟେ ତେରପ୍ପାନଙ୍କ୍ ବେନ ମିକିଙ୍କ୍ ଗଟ୍ ଇତ୍ତଣ୍ଡ୍?” ଆସୁଙ୍କ୍ ମାମ୍ ଅଡ଼୍କିଂଙ୍କ୍ ଆଦ୍ ଲେକାମ୍ ଉତ୍ତର ଇତ୍ତମ୍; ଅଡ଼୍ ପାସ୍ରିଞ୍ଚିତଡ଼୍, “ଇଦି ତିଆର ମାଡ଼ାନଡ଼୍ ପେଦେର୍ ବାତେ ?” ମାତର୍ ଯିହୁଦିୟତେ ବାଡ଼ିୟଅଡ଼୍ ପର ଅଡ଼୍ ପରମେଶ୍ୱରତେ କଣ୍ଡେ ମାନ୍ନାଙ୍କ୍ ଦାରିୟାବସତେ ଗାରେ ଇ ଗଟି ହେଉୱାକେ ନୁ ଚିଟି ତଡ଼୍ ଆ ବିଷୟତେ ଉତ୍ତର ମେଣ୍ଡନ୍ଦାମ୍ ୱାଡ଼୍ୱାକେ ଶତ୍ରୁଡ଼୍ ଅଡ଼୍କିଂଙ୍କ୍ ବନ୍ଦ ମାଡ଼ଡ଼୍ ଆତ୍ତଡ଼୍।
ଦାରିୟାବସ ରାଜାନ୍ ଗାରେ ତତ୍ତନୟତେ ଚିଟି
ତତ୍ତନୟ, ଇଲ୍କେତ୍ ଆପାକେତ୍ ଦେଶ୍କେପାନଡ଼୍ ନୁ ଶତର ବୋଷଣୟ ନୁ ଇଲ୍କେତ୍ ଆପାକେତ୍ ଅନ୍ ତଡ଼୍ଦେନଡ଼୍ ଅଫର୍ସକିୟଅଡ଼୍ ଦାରିୟାବସ ରାଜାନ୍ ଗାରେ ପ୍ରେରିତ୍ ଚିଟି ଲେକ୍ତାଦ୍; ଅଡ଼୍ ଅନ୍ ଗାରେତିଙ୍କ୍ ବେନ୍ ଚିଟି ରସମାତ୍ତଣ୍ଡ, ଆଗେ ଇଲାନେ ଲେକ୍ ମାତ୍ତେ; “ବେଡ଼ିୟ୍ ରାଜାନ୍ ଦାରିୟାବସତେ ସାରେଶାନ୍ତି। ବେଡ଼ିୟ୍ ରାଜାନ୍ ଗାରେ ପୁଞ୍ଜପ୍ତଡ଼୍ ଇଲାନେ ଯେ, ମାମ୍ ଯିହୁଦା ପ୍ରଦେଶତେ ମହାନ୍ ପରମେଶ୍ୱରଦେ ଲତ୍ତିଙ୍କ୍ ଆଞ୍ଜ୍ ମାତ୍ତମ୍, ଆୱୁ ବାଡ଼ିୟା ବାଡ଼ିୟା କାଲ୍କିନେ ତିଆର୍ ଆସ୍ ମିନ୍ଦେ ନୁ ନେଟେତାଗ୍ ୱାସାକ୍ ୱାଟ ମିନ୍ଦେଡ଼୍, ମେଣ୍ଡେ ଇ ପାଡ଼୍ୟି ଯତନ୍ତେ ଆସମିନ୍ଦେ ନୁ ଅଡ଼୍ କାଇଦେ ସାରେ ଆସମିନ୍ଦେ। ଆସୁଙ୍କ୍ ମାମ୍ ଆ ବାଡ଼ିୟଡ଼୍କିଙ୍କ୍ ଇଲା ପାସ୍ରିଞ୍ଚ୍ତମ୍, ଇ ଲନ୍ ତିଆର ମାଡ଼୍ନଙ୍କ୍ ନୁ ଇ ନେଟେ ତେର୍ପ୍ପାନଙ୍କ୍ ବେନ ମିକିଙ୍କ୍ ଗଟ୍ ଇତ୍ତଣ୍ଡ୍ ? ଆଗେକ୍ବା ମାମ୍ ମିକିଙ୍କ୍ ପୁଞ୍ଜପାନଙ୍କ୍ ଅଡ଼୍ ବାଡ଼ିୟଅଡ଼୍ ପେଦେ ଲେକି ଅଦାନଙ୍କ୍ ଅଡ଼୍ ପେଦେ ପାସ୍ରିଞ୍ଚ୍ତମ୍। ଆସୁଙ୍କ୍ ଅଡ଼୍ ମାକିଙ୍କ୍ ଇଦ୍ ଉତ୍ତର ଇତ୍ତଡ଼୍, ମାମ୍ ସ୍ୱର୍ଗ ନୁ ପୃତିବିତେ ପରମେଶ୍ୱରତେ ଦାସ, ମେଣ୍ଡେ ଇ ବେନ୍ ଲନ୍ ତିଆର ମାଡ଼ୁତମ୍, ଇଦି ନାର୍ଗେ ବର୍ଷତ୍ ମୁନେ ତିଆର୍ ଆସ୍ ମାତ୍ତେ, ଇସ୍ରାଏଲତେ ଅର୍ରତୁଣ୍ଡ୍ ବେଡ଼ିୟ୍ ରାଜାଲ୍ ଆଦ୍ ତିଆର ମାଡ଼ି ତେର୍ସ୍ପି ମାତ୍ତଣ୍ଡ୍। ମାତର୍ ମାମ୍ ଆନିଦାଦିଡ଼୍ ସ୍ୱର୍ଗତେ ପରମେଶ୍ୱତିଙ୍କ୍ ନେଃସୱାନାକେ ଅଣ୍ଡ ଅଡ଼୍କିଂଙ୍କ୍ ବାବିଲ୍ତେ ରାଜାଲ୍ କଲ୍ଦୀୟ ନବୂକଦ୍ନିତ୍ସତେ କାଇଦେ ପସପ୍ପୱାନାକେ, ଅଣ୍ଡ ଇ ଲତ୍ତେ ନଷ୍ଟ ମାଡ଼୍ଡ଼ି ନାରୁଡ଼୍କିଙ୍କ୍ ବାବିଲ୍ତା ଅତ୍ତଣ୍ଡ୍। ମାତର୍ ବାବିଲ୍ତେ ରାଜାଲ୍ କୋରସ୍ତିଙ୍କ୍ ରାଜତ୍ୱତେ ପ୍ରଥମ ୱାଡ଼୍ସେତେ ପରମେଶ୍ୱରତିଙ୍କ୍ ଇ ଲନ୍ ତିଆର ମାଡ଼୍ନଙ୍କ୍ କୋରସ୍ ରାଜାଲ୍ ଆଦେଶ୍ ଇତ୍ତଣ୍ଡ୍। ମେଣ୍ଡେ, ନବୂକଦ୍ନିତ୍ସ ପରମେଶ୍ୱରତେ ଲତ୍ତାଗ୍ ବେନ୍ ସାରେ ସୁନାତାୱୁ ନୁ ରୁପା ଗିନେ ଯିରୁଶାଲମ୍ତେ ପ୍ରାର୍ତନା ମନ୍ଦିର୍ତାଗ୍ ଅସ୍ ବାବିଲ୍ତେ ମନ୍ଦିର୍ତାଗ୍ ତାସ୍ ମାତ୍ତଣ୍ଡ୍, ଆୱୁସାରେ କୋରସ୍ ରାଜାନ୍ ବାବିଲ୍ତେ ମନ୍ଦିକନ୍ ପେସ୍ପିତ୍ତଣ୍ଡ୍, ମେଣ୍ଡେ ଆୱୁସାରେ ଶେଶବସର ପେଦେର୍ତେ ଅକିଂଙ୍କ୍ ହେଞ୍ଚି ଶାସନକର୍ତ୍ତାନ୍ କାଇଦାଗ୍ ଦର୍କ୍ତେ; ମେଣ୍ଡେ, ଅଣ୍ଡ ଅକିଙ୍କ୍ କେତ୍ତଣ୍ଡ, ଇସାରେ ଗିନେ ଅସ୍ ଯିରୁଶାଲମ୍ ପ୍ରାର୍ତନା ମନ୍ଦିର୍ତାଗ୍ ନେଃମୁଟ୍ ନୁ ପରମେଶ୍ୱରତେ ଲେକେତ୍ ପଡ଼୍ୟେତାଗ୍ ତିଆର୍ ଆୟି। ଆସୁଙ୍କ୍ ଆ ଶେଶବସର ୱାସ୍ ଯିରୁଶାଲମତେ ପରମେଶ୍ୱରତେ ଲତ୍ତେ ବିତ୍ତିମୁଲେ ପସ୍ପତଣ୍ଡ୍; ମେଣ୍ଡେ ଆ ସମୟକନ୍ ଇଞ୍ଜେ ଆୟିନା ଆଦ୍ ତିଆର୍ ଆସମିନ୍ଦେ, ଆଗେକ୍ବା ଆଦ୍ ତେର୍ୱେ ମାତ୍ତେ। ଇଦିନ୍ ମାଇଦିଙ୍କ୍ ମହାରାଜାଙ୍କ୍ ଆଦ୍ ଲେକେତ୍ ତନ୍ଦିତ୍, ଆସୁଙ୍କ୍ କୋରସ୍ ରାଜାଲ୍ ଯିରୁଶାଲମ୍ ପରମେଶ୍ୱରତେ ଇ ଲନ୍ ତିଆର ମାଡ଼ାନାଦ୍ ଆଦେଶ୍ ଇସ୍ ମାତ୍ତଣ୍ଡ୍ କି ଇଲେ, ଆଦ୍ ବାବିଲ୍ତେ ମହାରାଜାନ୍ ବାକ୍ଡ଼େତେ ଲନ୍ ମେଃକାଙ୍କ୍ ଆୟି, ମେଣ୍ଡେ ଇ ବିଷୟତେ ମହାରାଜାଲ୍ ମା ଗାରେ ଅନାଦ୍ ଗଟ୍ ମାକିଙ୍କ୍ କେଲିଣ୍ଡ୍।”
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.