Koya Bible
ଏଜ୍ରା 7
ଏଜ୍ରା କଲେଜ୍ତେ ମେସ୍ତେରି
ଇସାରେ ଗଟଣାକନ୍ ପାରସ୍ୟ ରାଜା ଅର୍ତ୍ତକ୍ଷସ୍ତର ଅଦିକାରିଡ଼୍ ସମୟତେ ସରାୟରତେ ମାର୍ ଏଜ୍ରା ବାବିଲ୍କନ୍ ଆତ୍ତଣ୍ଡ୍; ଉକ୍ତ ସରାୟ ଅସରିୟରତେ ପିଲା, ଅସରିୟ ହିଲ୍କିୟରତେ ପିଲା, ହିଲ୍କିୟ ଶଲ୍ଲୁମ୍ରତେ ପିଲା, ଶଲ୍ଲୁମ୍ ସାଦୋକର୍ତେ ପିଲା, ସାଦୋକ ଅହିଟୁବରତେ ପିଲା, ଅହିଟୁବ ଅମରିୟରତେ ପିଲା, ଅମରିୟ ଅସରିୟରତେ ପିଲା, ଅସରିୟ ମରାୟୋତତେ ପିଲା, ମରାୟୋତ ସରହିୟରତେ ପିଲା, ସରହିୟ ଉଷିରତେ ପିଲା, ଉଷି ବୁକ୍କିରତେ ପିଲା, ବୁକ୍କି ଅବିଶୁୟର୍ତେ ପିଲା, ଅବିଶୁୟ ପୀନହସ୍ତେ ପିଲା, ପିନହସ ଇଲିୟାସର୍ତେ ପିଲା, ଇଲୀୟାସରତେ ବାଡ଼ିୟଡ଼୍ ଯାଜକ ହାରୋଣତେ ମାର୍।
ଇ ଏଜ୍ରା ବାବିଲ୍କନ୍ ଆତ୍ତଣ୍ଡ୍; ଅଣ୍ଡ୍ ଇସ୍ରାଏଲତେ ପରମେଶ୍ୱର ସଦାପ୍ରବୁ ପେୟିତେ ମୋଶାନ୍ ନିୟମ୍ତାଗ୍ ଅଦିକ୍ ପୁତ୍ତେ କଲେଜ୍ତେ ମେସ୍ତେରି ମାତ୍ତଣ୍ଡ୍; ମେଣ୍ଡେ, ଅନ୍ ପର ଅନ୍ ପରମେଶ୍ୱର ସଦାପ୍ରବୁନ୍ କାଇଦେ ସାହାଯ୍ୟତେ ରାଜାଙ୍କ୍ ଅଣ୍ଡ୍ ସାରେ ମୁନେତ୍ ବିଷୟ ଅଂକିଙ୍କି ଇତ୍ତଣ୍ଡ୍। ମେଣ୍ଡେ, ଅର୍ତ୍ତକ୍ଷସ୍ତ ରାଜାନ୍ ସାତ୍ ୱାଡ଼୍ସେତେ ଇସ୍ରାଏଲତେ ପିଲାନେ ନୁ ଯାଜକିଡ଼୍ ନୁ ଲେବିୟଅଡ଼୍ ବେସ୍କ୍ ନାରୁଡ଼୍, ମେଣ୍ଡେ ପାଟାପାରାନଡ଼୍ ନୁ ଗେଟ୍କେପାନଡ଼୍ ନୁ ସେବାକାରିଡ଼୍ ଯିରୁଶାଲମତା ଆତ୍ତଡ଼୍। ମେଣ୍ଡେ, ଏଜ୍ରା ଏଇଙ୍ଗ୍ ନେଲ୍ଞ୍ଜିନେ, ବା ରାଜାନ୍ ଆ ସାତ୍ ୱାଡ଼୍ସେତେ ଯିରୁଶାଲମତାଗ୍ ଆଞ୍ଜ୍ ଏୱୁତଡ଼୍। ବାତେଙ୍କ୍ଇତ୍କେ, ଅଣ୍ଡ ପ୍ରଥମ ଦିନ୍ତେ ବାବିଲ୍କନ୍ ଆଦାନାଦ୍ ଆରାମ୍ ମାଡ଼୍ତଣ୍ଡ,ମେଣ୍ଡେ ଅନ୍ ପର ପରମେଶ୍ୱରତେ ମଙ୍ଗଲମୟ କାଇ ସାହାଯ୍ୟା ପ୍ରମାନନ୍ତେ ଅଣ୍ଡ୍ ଏଇଙ୍ଗ୍ ନେଲ୍ଞ୍ଜିନ୍ ପ୍ରଥମ ଦିନ୍ତେ ଯିରୁଶାଲମତାଗ୍ ହେଉତଣ୍ଡ୍। ଆଦିଙ୍କ୍ ଏଜ୍ରା ସଦାପ୍ରବୁନ୍ ନିୟମ୍ ମେଃକାନାଦ୍ ନୁ ପାଲନ ମାଡ଼ାଙ୍କ୍, ମେଣ୍ଡେ ଇସ୍ରାଏଲ୍ କଞ୍ଜ୍ ନିୟମ୍ ନୁ ଶାସନ ଶିକ୍ଷା ଇଦାଙ୍କ୍ ନିଜର ମନ୍ଦାଗ୍ ନେଃସ ମାତ୍ତଣ୍ଡ୍।
ଅର୍ତ୍ତକ୍ଷସ୍ତ ଏଜ୍ରାଙ୍କ୍ ଇସ୍ମାନ୍ଦାନ୍ ଚିଟି
ଅର୍ତ୍ତକ୍ଷସ୍ତ ରାଜାଲ୍ କଲେଜ୍ ମେସ୍ତେରି ଏଜ୍ରା ଯାଜକତିଙ୍କ୍, ବା ସଦାପ୍ରବୁନ୍ ଆଦେଶ୍ତେବାକ୍ୟ ନୁ ଇସ୍ରାଏଲତେ ପର ଅନ୍ ନିୟମ୍ତେ କଲେଜ୍ ମେସ୍ତେରିଙ୍କ୍ ବେନ୍ ଚିଟି ଇସ୍ମାତ୍ତଣ୍ଡ୍, ଆଗେ ଲେକ୍ତାଦ୍ ଇଦି, “ରାଜାନ୍ ରାଜାଲ୍ ଅର୍ତ୍ତକ୍ଷସ୍ତ ସ୍ୱର୍ଗତେ ପରମେଶ୍ୱରଦେ ନିୟମ୍ତେ କଲେଜ୍ ମେସତେରି, ଏଜ୍ରା ବକ୍ତାଲ୍, ଇୱୁସାରେ ଯାଜକତେ ଏଜ୍ରା ପର, ନାନ୍ ଆଦେଶ୍ ମାଡ଼ମିନ୍ଦେ ଯେ, ନା ରାଜ୍ୟତେ ଇସ୍ରାଏଲକନ୍ ବେସର ନାରୁଡ଼୍, ମେଣ୍ଡେ ଅଡ଼୍ ଯାଜକ ନୁ ଲେବିୟଅଡ଼୍ ଯିରୁଶାଲମ୍ତିଙ୍କ୍ ଆସାମ୍ ଆଦାନଙ୍କ୍ ମନ୍ ମାଡ଼ୱାନାକେ, ଅଡ଼୍ ମିଇତଡ଼୍ ଆନିଡ଼୍। ବାତେଙ୍କ୍ଇତ୍କେ ମିଇ କାଇଦେ ମିଇ ପରମେଶ୍ୱରତେ ନିୟମ୍ ପ୍ରମାନ୍ତେ ଯିହୁଦା ନୁ ଯିରୁଶାଲମତେ ଗଟିନ୍ ବିଷୟ ପୁନ୍ଦାନଙ୍କ୍, ମେଣ୍ଡେ, ଯିରୁଶାଲମ୍ ବେନ୍ଲନ ମିନ୍ଦେ, ଇସ୍ରାଏଲତେ ଆ ପରମେଶ୍ୱରତେ ଉଦ୍ଦେଶ୍ୟତେ ରାଜାଲ୍ ନୁ ତାନ୍ ମନ୍ତ୍ରିତିଡ଼୍ ନିଜେତ୍ ଇଚ୍ଛାତେ ସୁନା ନୁ ରୁପା, ମେଣ୍ଡେ, ବାବିଲ୍ତେ ସାରେ ପ୍ରଦେଶତେ ମିଇ ବେନ୍ ସାରେ ରୁପା ନୁ ସୁନା ପାହେମ୍ ଆଦ୍ତିଡ଼୍, ମେଣ୍ଡେ ନାରୁଡ଼୍ ନୁ ଯାଜକକିଡ଼୍ ଅଡ଼୍ ପରମେଶ୍ୱରତେ ଯିରୁଶାଲମତେ ଗାରେତ୍ ଲକିନ୍ ମାଇଦିଙ୍କ୍ ଆସାମ୍ ଇତ୍ତେ ମୁନେନ୍ ବାତ୍ ଇଦ୍ତଡ଼୍, ଆୱୁସାରେ ଆସାମ୍ ଇତ୍ତେ ଉପହାରତେ ଅଦାନ୍ ମାଇଦିଙ୍କ୍ ମିଡ଼୍ ରାଜାଙ୍କ୍ ନୁ ଅନ୍ ସାତ୍ ମନ୍ତ୍ରିତଡ଼୍ ମାଲ୍ଦୁତିଡ଼୍; ଇଦିଙ୍କ୍ ମିଡ଼୍ ଇ ଡ଼ାବ୍ତଡ଼୍ ଯତ୍ନମୁନେ, କନ୍ଦା, ମେଣ୍ଢା, ମେଣ୍ଢାପିଲା ନୁ ଆଗେତ୍ ପେୟ ଜିନିଷ୍ ଆସିମିକା ପରମେଶ୍ୱରଦିଙ୍କ୍ ଯିରୁଶାଲମତେ ଗାରେତ୍ ଲତ୍ତେ ବେଦିତ୍ ପର ଉତ୍ସର୍ଗ ମାଡ଼ିତିଡ଼୍। ମେଣ୍ଡେ, ବାଗାତ୍ ରୁପା ନୁ ସୁନା ମିକିଙ୍କ୍ ନୁ ମିଇ ଦାଦାଲଡ଼୍କ୍ ବାତେ ମାଡ଼ାନଙ୍କ୍ ସାୟେ ତନ୍ଦିତ୍, ଆଦ୍ ମିଡ଼୍ ନିଜର ପରମେଶ୍ୱରଦିଙ୍କ୍ ଇଚ୍ଛା ଲେକାମ୍ ମାଡ଼ିତିଡ଼୍। ମେଣ୍ଡେ, ମି ପରମେଶ୍ୱର ଲତ୍ତେ ସେବାତେ ବେନ୍ସାରେ ଗିନେ ମିକିଙ୍କ୍ ଇସ୍ଆଞ୍ଜ୍ମିନ୍ଦେ, ଆୱୁସାରେ ମିଡ଼୍ ଯିରୁଶାଲମ୍ ପରମେଶ୍ୱରତେ ମୁନେ ସର୍ପା ମାଡ଼ାଟ୍। ମେଣ୍ଡେ, ମିଡ଼୍ ପରମେଶ୍ୱର ଲତ୍ତାଗ୍ ବାତେ ଦରକାର ମେଣ୍ଡେ ବାତା ଆୟି ମିକିଙ୍କ୍ ଇଦାନଙ୍କ୍ ୱେଇତିତ୍, ଆୱୁ ରାଜାନ୍ ବାକ୍ଡ଼େତାଗ୍ ଇମୁଟ୍।
ମେଣ୍ଡେ ସ୍ୱର୍ଗତେ ପରମେଶ୍ୱର ନିୟମ୍ତେ କଲେଜ୍ ମେସ୍ତେରି ଏଜ୍ରା ଯାଜକ ମିୟାଗାଙ୍କ୍ ବାତେ ବାତେ ଇଚ୍ଛା ମାଡ଼ୁତଣ୍ଡ୍, ଆୱୁସାରେ ଏକ ଶହ ତାଳନ୍ତ ଏୱୁନା ରୁପା ନୁ ଏକ ଶହ ବଡ଼୍ ଏୱୁନା ଗହମ ନୁ ଏକ ଶହ ବଡ଼୍ ଏୱୁନା ଅଙ୍ଗୁର୍କାଲ୍ ନୁ ଏକ ଶହ ବଡ଼୍ ଏୱୁନା ନିୟ୍ ନୁ କାଇଲୱ ଅୱଡ଼୍ ଯତ୍ନତ୍ ମୁନେ ଇଦାନ୍ ମାଇଦିଙ୍କ୍ ମାମ୍ ଅର୍ତ୍ତକ୍ଷସ୍ତ ରାଜାନ୍ ଇଲ୍କେତ୍ ଆପାକେ ସାରେ ଡାବ୍କ୍ ନେଃତାନଡ଼୍ ଆଦେଶ୍ ମାଡ଼ିମିନ୍ଦେମ୍। ସ୍ୱର୍ଗତେ ପରମେଶ୍ୱରଦେ ତଡ଼୍ ବାତେ ବାତେ ଆଦେଶ୍ ମାଡ଼ି ମିନ୍ଦେଣ୍ଡ୍, ଆୱୁସାରେ ସ୍ୱର୍ଗତେ ପରମେଶ୍ୱରଦେ ଲତ୍ତେ ମାଇଦିଙ୍କ୍ ଟିକ୍ତେ ମାଡ଼ାଙ୍କ୍ ଆୟି; ବାତେଙ୍କ୍ଇତ୍କେ ରାଜାଲ୍ ନୁ ଅନ୍ ମାର୍କିଡ଼୍ ରାଜ୍ୟ ବିରୁଦ୍ଦତେ ବାତାଙ୍କ୍ କପାମ୍ ଆଦ୍ତେ ? ମେଣ୍ଡେ, ଯାଜକିଡ଼୍ ନୁ ଲେବିୟଡ଼୍, ପାଟାପାରାନଡ଼୍, ଗେଟ୍କେପାନଡ଼୍, ସେବାକାରିଡ଼୍ ନୁ ପରମେଶ୍ୱରଦେ ଇ ଲତ୍ତେ ସେବକିଡ଼୍ ବେନ୍ପର, ରାଜସ୍ୱ ବା ମାଶୁଲ୍ କୁସ୍ପାନ୍ ନିୟମ୍ ବିରୁଦ୍ଦ ଆଦ୍ତେ ଇଞ୍ଜ ମାମ୍ ମିକିଙ୍କ୍ ପୁଞ୍ଜ୍ସ୍ପି ମିନ୍ଦେମ୍। ମେଣ୍ଡେ, ଅ ଏଜ୍ରା, ମିଇ ପରମେଶ୍ୱରଦେ ବିଷୟତେ ବେନ୍ ବୁଦ୍ ମିଇ କାଇଦାଗ୍ ମିନ୍ଦେ, ଆଦ୍ ଲେକାମ୍ ଇଲ୍କେତ୍ ଆ ପାକେତ୍ ସାରେ ନାରୁଡ଼୍ ବିଚାର୍ତେ ବେନଡ଼୍ ମିଇ ପରମେଶ୍ୱରଦେ ନିୟମ ପୁନ୍ତଡ଼୍, ଇଲାନେ ଶାସନକର୍ତ୍ତାଲ ନୁ ବିଚାରକର୍ତ୍ତଲଡ଼୍କ୍ ମିଡ଼୍ ଏଞ୍ଚିତିଡ଼୍; ମେଣ୍ଡେ, ବେନ ପୁଃନଣ୍ଡ୍, ଅଂକିଙ୍କ୍ ମିଡ଼୍ ଶିକ୍ଷା ଇମୁଟ୍। ମେଣ୍ଡେ, ବେନ୍ ଆୟି ମିଇ ପରମେଶ୍ୱରଦେ ନିୟମ୍ ନୁ ରାଜାନ୍ ନିୟମ ପାଲନ ମାଡ଼ାଙ୍କ୍ ରାଜି ଆୟିଣ୍ଡ୍, ଆ ଦୋଷ ଡଲାନ୍ଦଣ୍ଡତେ କି ନିର୍ବାସନତେ କି ଡାବ୍କ୍ଦଣ୍ଡତେ କି ଜେଲ୍ଦଣ୍ଡ ଆୟିଣ୍ଡ୍ ପେର୍କେ, ଯତ୍ନମୁନେ ଅନ୍ ଶାସନ ମାଡ଼ାଙ୍କ୍ ଆଦ୍ତେ।”
ଏଜ୍ରାଙ୍କ୍ ଇଶ୍ୱର୍ତେ ପ୍ରଶଂସା
ବେନ୍ ସଦାପ୍ରବୁ ମାନାଙ୍କ୍ ବାବାଲଡ଼୍ ପରମେଶ୍ୱରଦେ ସଦାପ୍ରବୁନ୍ ଯିରୁଶାଲମତେ ଗାରେ ମାନ୍ଦାନଡ଼୍କ୍ ସନ୍ମାନ୍ତେ ରାଜାନ୍ ମୁନେ ଇଦ୍ଲେକାମ୍ ବକ୍ତି ମାଡ଼ି ମିନ୍ଦେଣ୍ଡ୍, ମେଣ୍ଡେ, ରାଜାନ୍ ନୁ ଅନ୍ ମନ୍ତ୍ରିଡ଼୍ ନୁ ରାଜାନ୍ ପରାକ୍ରନ୍ତ ଅଦିପତିଡ଼୍ ସାରେତଡ଼୍ ମୁନେ ନା' ପର ଦୟା ତଃସ୍ମିନ୍ଦେ, ଅଣ୍ଡ୍ ଦନ୍ୟ ଆୟିଣ୍ଡ୍। ଇଲାନେ ନା' ପର ସଦାପ୍ରବୁ ନା' ପରମେଶ୍ୱରଦେ କାଇଦେ ସାହାଯ୍ୟ ପ୍ରମାନନ୍ତେ ନା ଡ଼ୁଟାଙ୍କ୍ ଆତ୍ତାନ୍ ନୁ ନା'ତଡ଼୍ ଆଦାନଙ୍କ୍ ଇସ୍ରାଏଲତେ ବାଡ଼ିୟେ ନାରୁଡ଼୍କ୍ ଅଣ୍ଡୟତାଗ୍ ମାଡ଼୍ତାନ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.