Koya Bible
ଯାତ୍ରା 25
ପବିତ୍ର ପୟିତେ ମାଇଦିଙ୍କ୍ ଦାନ
(ଯାତ୍ରା ୩୫:୪-୯)
ଅନନ୍ତ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ମିଡ଼୍ ଇସ୍ରାଏଲତେ ନାରୁଡ଼୍ ମା ମାଇଦିଙ୍କ୍ ପୁରସ୍କାର୍ ଗୁପାନଙ୍କ୍ କେଲମ୍; ବେନ୍ ହୃଦୟ ବେନଙ୍କ୍ ଇଚ୍ଛାମାଡ଼ିତ୍, ଅନାଗାଙ୍କ୍ ମିଡ଼୍ ମାୟାଦ୍ ଆ ଦାନ ଗ୍ରହଣ ମାଡ଼ିତଡ଼୍। ଇତ୍କେ, ସୁନା, ରୁପା ନୁ ପିତ୍ତଲ୍; ମେଣ୍ଡେ ନିଲରଙ୍ଗ୍, ଉମେ ରଙ୍ଗ୍ଦେ, ସିନ୍ଦୁର୍ ରଙ୍ଗ୍ଦେ, ପାଣ୍ଡ୍ରି ପାଲ୍ସେ ଚିଲେ ନୁ ମେକେତେ କେଲେକ୍, ଏର୍ରେ ରଙ୍ଗ ମେଣ୍ଢାତେ ତଲ୍କେ ନୁ ପିଲେତେ ତଲ୍କେ, ନୁ ଶିଟିମ୍ ୱେର୍କ୍, କୂପିତ୍ ମାଇଦିଙ୍କ୍ ନିୟି ମେଣ୍ଡେ, ହେଞ୍ଚିନେଃସ୍ ମାନ୍ଦାନ୍ ନିୟି ନୁ ଗାବ୍ମାନ୍ଦାନ୍ ଦୁପାମ୍ତେ ନୁ ଲେକେତ୍ ଗାବ୍ମାନ୍ଦାନ୍ ଜିନିଷ୍, ମେଣ୍ଡେ ଏଫୋଦ1 ନୁ ବୁକୁପଟା ମାଇଦିଙ୍କ୍ ଗୋମେଦକ ମଣି ଲେକେତାୱୁ ୱେଡ଼୍ତେ ଲେକେତ୍ ନେଟେ; ଇସାରେ ଉପହାର୍ ଅଡ଼୍ଆଗାକନ୍ ଗ୍ରହଣ ମାଡ଼ିତିଡ଼୍। ଅଡ଼୍ ମାନ୍ ମାଇଦିଙ୍କ୍ ଅଣ୍ଡୟ୍ ପବିତ୍ର ପଡ଼ିୟେ ତିଆର ମାଡ଼୍; ଆସୁଟ ମାମ୍ ଅଡ଼୍ଆଗାଙ୍କ୍ ବାସ୍ ମାଡ଼ିକାଡ଼୍। ଲତ୍ତେ ଆକାର୍ ଇନା ନୁ ଆଗେତ୍ ସାରେ ସାମାନ୍ ଆକାର୍ତେ ବେନ୍ଲେକ୍ ମାମ୍ ମିକିଙ୍କ୍ ତତିତମ୍, ଆ ଲେକାମ୍ ମିଡ଼୍ ସାରେ ମାଡ଼ିତିଡ଼୍।
ନିୟମ୍ ସିନ୍ଦୁକ୍
(ଯାତ୍ରା ୩୭:୧-୯)
ମେଣ୍ଡେ ଅଡ଼୍ ଦୁଡ଼୍ କାଇ ନାର୍ଗେ, ଦେଢ଼ କାଇ ଲାଟି ନୁ ଦୁଡ଼୍ କାଇ ଡ଼େଙ୍ଗ୍ ଶିଟିମ୍ ୱେର୍କ୍ତେ ୱେରଡ଼୍ ସିନ୍ଦୁକ୍2 ତିଆର୍ ମାଡ଼୍ତଡ଼୍। ଆସୁଟ୍ ମିଡ଼୍ ନିର୍ମଳ ସୁନାତେ ଆଦ୍ ମାଡ଼୍ପିତିଡ଼୍; ମେଣ୍ଡେ ଆଦିନ୍ ଲପେ ନୁ ବାଇଦେ ମାଡ଼୍ପିତିଡ଼୍, ମେଣ୍ଡେ ଆଗେତ୍ ପର ସାରେପାକା ସୁନାତେ ୱେଲ୍ଲୁମ୍ ମାଡ଼ିତିଡ଼୍। ମେଣ୍ଡେ ଆଗେତ୍ ମାଇଦିଙ୍କ୍ ସୁନାତେ ନାଲୁ ଡ଼ାଣ୍ଡେ ଚାଞ୍ଚତେ ତସି ଆଗେତ୍ ନାଲୁ ମୁଲା ଇଦିତିଡ଼୍; ଆଗେତ୍ ଅଣ୍ଡୟ୍ ପାକେ ରେଣ୍ଡେ ଡ଼ାଣ୍ଡେ ନୁ ୱେର୍ ପାକେ ରେଣ୍ଡେ ଡ଼ାଣ୍ଡେ ମୁନେତ୍। ମେଣ୍ଡେ ମିଡ଼୍ ଶିଟିମ୍ ୱେର୍କ୍ତେ ରେଣ୍ଡେ ସୁନା ସାଙ୍ଗ ମାଡ଼ି ଦରାତାଗ୍ ନେଃମୁଟ୍। ମେଣ୍ଡେ ସିନ୍ଦୁକ୍ କାଞ୍ଜାନ୍ ମାଇଦିଙ୍କ୍ ସିନ୍ଦୁକ୍ ରେଣ୍ଡେ ପାକେ ଡ଼ାଣ୍ଡେତେ ଆ ସାଙ୍ଗି ତଡ଼େକ୍ ନେଃତିଡ଼୍। ଆ ସାଙ୍ଗି ସିନ୍ଦୁକ୍ ଡ଼ାଣ୍ଡେତାଗ୍ ମାନ୍ତେ, ଆଗାକଞ୍ଚ୍ ବାଇଦେ ପେସ୍ପ୍ମାଟ୍। ମେଣ୍ଡେ ମାମ୍ ମିକିଙ୍କ୍ ବେନ୍ ସିନ୍ଦୁକ୍ତେ ରେଣ୍ଡେ ସାକ୍ଷ୍ୟଆକି ଇଦ୍ତମ୍, ଆଦ୍ ଆ ସିନ୍ଦୁକତାଗ୍ ନେତିତିଡ଼୍।
ଇଦିନାଗକ୍ ମିଡ଼୍ ସାକ୍ସାକା ସନ୍ଦେ ଦୁଡ଼୍ କାଇଦେ ତେର୍ୱେ ନୁ ଦୁଡ଼୍ କାଇଦେ ଲାଟି ଅଣ୍ଡୟ୍ ପାପ୍ନର୍ଦାନାଦ୍ ମୁଚାନାଦ୍ ତିଆର୍ ମାଡ଼ିତିଡ଼୍। ମିଡ଼୍ ସନ୍ଦେ ରେଣ୍ଡେ କିରୁବ ରେକା ମାନ୍ଦାନାୱୁ ସ୍ୱର୍ଗ ଦୂତକି ତିଆର୍ ମାଡ଼ିତିଡ଼୍; ପିଟା ପାଡ଼ିୟ୍ଦେ ଆଦ୍ ତିଆର୍ ମାଡ଼ି ଆ ପାପ୍ନର୍ଦାନାଦ୍ ରେଣ୍ଡେ ତାଲାନାଗ୍ ଇଦ୍ତିଡ଼୍। ଅଣ୍ଡୟ୍ କିରୁବ ଅଣ୍ଡୟ୍ ତାଲେତ୍ ନୁ ରେଣ୍ଡ୍ କିରୁବତିଙ୍କ୍ ମେଣ୍ଡ୍ ତାଲ୍ତାଗ୍ ୱାଟିତିଡ଼୍; ରେଣ୍ଡେ କିରୁବ ପାପ୍ ନର୍ଦାନାୱ୍ ତଡ଼୍ କାଲ୍ପି ନୁ ଆଗେତ୍ ରେଣ୍ଡ୍ ପାକ୍ଆ ନିଲ୍ସ୍ପି ମେଣ୍ଡେ ୱାଟିତିଡ଼୍। ମେଣ୍ଡେ କିରୁବକି ତଡ଼େକ୍ ତଡ଼େକ୍ ସାମ୍ନା ସାମିନି ଆସ୍ ଆର୍ ପର ତିଆର୍ ମାଡ଼ିତା ପାପ୍ନର୍ଦାନ୍ ଆଦ୍ମିତା; ପାପ୍ନର୍ଦାନାଦ୍ ପର କିରିବକିଡ଼୍ ମକମ୍ ମାନ୍ତେ। ମିଡ଼୍ ଆ ପାପ୍ନର୍ଦାନାଦ୍ ଆ ପେଟେତ୍ତେ ପର ନେଃତିତିଡ଼୍, ମେଣ୍ଡେ ମାମ୍ ମିକିଙ୍କ୍ ବେନ୍ ନିୟମ ସିନ୍ଦୁକ୍ ସାକ୍ଷ୍ୟଆକ୍ ଇଦ୍ତାନ୍, ଆଦ୍ ଆ ପେଟେତ୍ତେ ଲପେୱାଟିତିଡ଼୍। ମେଣ୍ଡେ ମାମ୍ ଆ ପଡ଼ିୟେତାଗ୍ ମିଇତଡ଼୍ କାଇଲିତାନ୍ ନୁ ପାପ୍ନର୍ଦାନ୍ ପରତାଗାଙ୍କ୍, ଇତ୍କେ ସାକ୍ଷ୍ୟ ସିନ୍ଦୁକ୍ତେ ନିୟମ ପରତ୍ପାକେ କିରୁବତାଗାଙ୍କ୍ ନିତଡ଼୍ ତିର୍ୟି ଇସ୍ରାଏଲତେ ମାର୍କିଡ଼୍କ୍ ବିଷୟତେ ମା ସାରେ ଆଦେଶ୍ ମିକିଙ୍କ୍ ପୁଞ୍ଜ୍ପିତାନ୍।
ପବିତ୍ର ରୋଟିତ୍ ଉତ୍ସର୍ଗ ଟେବୁଲ୍
(ଯାତ୍ର ୩୭:୧୦-୧୬)
ଆଗାକନ୍ ମିଡ଼୍ ଶିଟିମ୍ ୱେର୍କ୍ତେ ରେଣ୍ଡେ କାଇକ୍ ତେୱାଦ୍ ନୁ ଅଣ୍ଡୟ୍ କାଇ କାଲ୍ ନୁ ଦୁଡ଼୍କାଇ ଲାଟି ଅଣ୍ଡୟ୍ ଟେବୁଲ୍ ତିଆର୍ ମାଡ଼ିତିଡ଼୍ ନିର୍ମଲ୍ ସନ୍ଦେ ଆଦ୍ ଉଃତିତିଡ଼୍, ମେଣ୍ଡେ ଆଗେ ତିଡ଼୍ପାକା ସନ୍ଦେ ନେଟେ ତିଆର୍ ମାଡ଼ିତିଡ଼୍। ମେଣ୍ଡେ ଆଗେତ୍ ତିଡ଼୍ପାକା ନାଲୁ ୱାଡ଼୍ଞ୍ଜ୍କିନ୍ତଡ଼୍ ତିଆର୍ ମାଡ଼ିତିଡ଼୍ ନୁ ଆ ମାଡ଼୍ତେ ତିଡ଼୍ପାକା ସନ୍ଦେ ନେଟେ ମାଡ଼ିତିଡ଼୍। ମେଣ୍ଡେ ସନ୍ଦେ ତିଆର୍ଆତ୍ତେ ନାଲୁକଡ଼ା ମାଡ଼ି ଆଗେତ୍ ନାଲୁ ପାହ୍ୟାର ନାଲୁ ମୁଲାନାଗ୍ ୱାଟିତିଡ଼୍। ଟେବୁଲ୍ କାଞ୍ଜାନ୍ମାଇଦିଙ୍କ୍ ସାଙ୍ଗି ଗରା ମାଇଦିଙ୍କ୍ ଆ କଡ଼ାନ୍ କୁପ୍ପାନାଦ୍ ଗାରେ ମାନ୍ତେ। ମେଣ୍ଡେ ଆ ଟେବୁଲ୍ କାଞ୍ଜାନ୍ମାଇଦିଙ୍କ୍ ଶିଟିମ୍ ୱେର୍ତେ ସାଙ୍ଗି ତିଆର୍ ମାଡ଼ି ସନ୍ଦେ ମାଡ଼୍ପିତିଡ଼୍। ମେଣ୍ଡେ ତାଲି ନୁ ଉକୁଡ଼୍ ନୁ ମୁନ୍ତା ନୁ ତସ୍ଚାନ୍ ମାଇଦିଙ୍କ୍ କୁଣ୍ଡେ ତିଆର୍ ମାଡ଼ିତିଡ଼୍, ଇସାରେ ନିର୍ମଲ୍ ସନ୍ଦେ ତିଆର୍ ମାଡ଼ିତିଡ଼୍। ମିଡ଼୍ ଆ ଟେବୁଲ୍ ପର ମା ମୁନେ ସାରେୱେଲେ ପବିତ୍ର ରୋଟି ୱାଟିତିଡ଼୍।
ସନ୍ଦେ ୱେଇସ୍ ଗୁଞ୍ଜେ
(ଯାତ୍ରା ୩୭:୧୭-୨୪)
ମେଣ୍ଡେ, ମିଡ଼୍ ସାକ୍ସାକା ଅଣ୍ଡୟ୍ ୱେସ୍ମାଡ଼େ ତିଆର୍ ମାଡ଼ିତିଡ଼୍; ପିଟା ପାଡ଼ିୟ୍ଦେ ଦୀପମାଡ଼େ, ଆଗେତ୍ ଦୁଡ଼େ ନୁ କାମେତେ ତିଆର୍ ଆଦ୍ତେ; ମେଣ୍ଡେ ଗୋଲ୍ଦାଦ୍, ମଗେ ନୁ ପୁଙ୍ଗାର୍ ଆଗେ ପୁୟିତିତାଃ। ଇତ୍କେ, ଆସୁଟ୍ତେ ଅଣ୍ଡୟ୍ ପାକେ ମୁଣ୍ଡୁ କୁପି, ମେଣ୍ଡନ୍ପାକେ ମୁଣ୍ଡୁ ୱେସ୍କମା, ଇଲାନେ ରେଣ୍ଡ୍ପାକେଙ୍କ୍ ଆରୁକମା ପେଇତିତ୍ତା। ଆଗେତ୍ ଅଣ୍ଡୟ୍ କମ୍ମେ ବାଦାମ୍ ପୁଙ୍ଗାର୍ଇନା ମୁଣ୍ଡ୍ ଗୋଲଦେ ଗାଟିତାୱୁ ପୁଙ୍ଗା ମାନ୍ତା, ମେଣ୍ଡେ ୱେର୍ କମ୍ମେତେ ବାଦାମ୍ ପୁଙ୍ଗାର୍ଇନା ମୁଣ୍ଡୁ ଗୋଲ୍ଦାୱୁ, ଗାଟିଲାୱ୍ ନୁ ପୁଙ୍ଗା ମାନ୍ତା; ଆ ୱେସ୍ମାଡ଼େତଡ଼୍ ପେଇତେ ଆରୁ କମମେତ୍ ଇଲାନେ ଆଦ୍ତେ। ମାତର ୱେସ୍ତେ ମାଡ଼େତାଗ୍ ୱେସ୍ ୱାଟାନାଦ୍ ବାଦାମ୍ପୁଙ୍ଗାର୍ଇନା ନାଲୁ ଗଲ୍ଦାୱୁ, ଗାଟିଲାୱ୍ ନୁ ପୁଙ୍ଗାର୍ ମାନ୍ତା; ମେଣ୍ଡେ ଆ ୱେସ୍ମାଡ଼େଡ଼୍ ବେନ୍ ଆରୁ କମା ପେଇତା, ଆୱିନ୍ ଅଣ୍ଡୟ୍ କମାନ୍ ମଦଲ୍ ଅଣ୍ଡୟ୍ ଗାଟି ନୁ ୱେରେ କମାନ୍ ମଦଲ୍ ଅଣ୍ଡୟ୍ ଗାଟି ନୁ ୱେରେତ୍ କମାନ୍ ମଦଲ୍ ଅଣ୍ଡୟ୍ ଗାଟି ମାନ୍ତା। ମେଣ୍ଡେ ଗାଟି ନୁ କମା ଆଗେ କାଇଲିତା ନୁ ସାରେ ନିର୍ମଲ୍ ସନ୍ଦେ ତିଆର୍ ଆତେ ଅଣ୍ଡୟ୍ ପିଟା ପାଡ଼ିୟ୍ଦେ ଆଦ୍ତେ। ମେଣ୍ଡେ, ନିମେ ଆଦିନ୍ମାଇଦିଙ୍କ୍ ସାତ୍ଟାନ୍ ୱେସ୍ ତିଆର୍ ମାଡ଼ିଡ଼୍ତି; ଆସୁଟ ନାରୁଡ଼୍ ଆ ୱେସ୍ ନିଡ଼୍ସ୍ପିତଡ଼୍, ଆଗେତ୍ ମୁନେ ୱେସ୍ ଆଦ୍ତେ। ନୁ ନିର୍ମଲ୍ ସନ୍ଦେ ଚିମ୍ଟା ନୁ ଅଙ୍ଗାରଦାନି ତିଆର୍ ମାଡ଼ିଡ଼୍ତି। ଇ ୱେସ୍ମାଡ଼୍ ନୁ ଆଗେତ୍ ସାମଗ୍ରି ସାରେ ଅଣ୍ଡୟ୍ ତିରିଶ୍ ଏଇଙ୍ଗ୍ କେଜି କିଲଗ୍ରାମ୍ ନିର୍ମଲ୍ ସନ୍ଦେ ତିଆର୍ ଆଦ୍ତେ। ସାବଦାନ୍, ମେଟେତାଗ ମିକିଙ୍କ୍ ବେନ ବେନ୍ ଆଦର୍ଶ ଉଡ଼ି କେସ୍ ମିନ୍ଦେଡ଼୍ ଆଲେନେ ସାରେ ମାଡ଼ାଟ୍।
Source notes (2)
- Footnote ଏଫୋଦ୍ ଇତ୍କେ, ବେଡ଼ିୟେ ଯାଜକ୍ନଡ଼୍ ପାଡ଼େତାଗ୍ ତଃତାନ୍ ଚିଲେ
- Footnote ଚିଲେ ୱାଟାନ୍ ପେଡ଼ି
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.