Koya Bible
ଯାତ୍ରା 26
ଇଶ୍ୱର୍ ମାନ୍ଦାନ୍ ଗୁଡ଼ୁସେ
(ଯାତ୍ରା ୩୬:୮-୩୮)
ମେଣ୍ଡେ ମିଡ଼୍ ଦଶ ପରଦାତେ ଗୁଡ଼ୁସା ତିଆର୍ ମାଡ଼ିତିଡ଼୍, ଆ ସାରେ ଯବନିକା ପାଣ୍ଡ୍ରିଲାଦ୍ ଚୁଦୁଲାଦ୍, ନିଲ, ଉମେ ନୁ ସିନ୍ଦୁର୍ କଲର୍ ନିଲ୍ଦେ ତିଆର ଆଦ୍ତେ, ଆସୁଟ ଶିଳ୍ପିତ୍ କିରୁବଡ଼୍ଲେକେ ଆଦ୍ତେ। ଆ ସାରେ ଯବନିକା ଅଟାଇଶ କାଇଦେ ନାର୍ଗେ ନୁ ନାଲୁ କାଇ ଓସାର୍, ସାରେ ପରଦା ଅଣ୍ଡୟ୍ ସାମାନ୍ ଆଦ୍ତା। ମେଣ୍ଡେ ଅଣ୍ଡୟ୍ତାଗ ଏଇଙ୍ଗ୍ ଚିଲେ ପରଦା ନିଜେ ନିଜେ ଯୋଗମାନ୍ଦେ, ମେଣ୍ଡେ ବାଗାତାୱୁ ଏଇଙ୍ଗ୍ ଚିଲେ ପରଦା ନିଜେ ନିଜେ କାଇଲିମାନ୍ତା। ମେଣ୍ଡେ ରେଣ୍ଡ୍ ପଡ଼ିୟାନାଗ ପ୍ରତୁମ୍ ତେର୍ତେ ପରଦା ଲାଇନ୍ତେ ନିଲ କରଲ୍ତେ ନୁଲ୍ଦେ ଗାଟ୍ ମାଡ଼ିତିଡ଼୍ ନୁ ରେଣ୍ଡ୍ ପଡ଼ିୟେତାଗ ଦ୍ୱିତିୟ ତେରାନ୍ ପରଦା ଲାଇନ୍ତେ ଆଲେମାଡ଼ିତିଡ଼୍। ଇତ୍କେ, ପ୍ରତୁମ୍ ପରଦା ନଡ଼ମ୍ତେ ପଚାଶ୍ଟାନ୍ ଉଡ଼ିୟି ମାଡ଼ିତିଡ଼୍ ନୁ ରେଣ୍ଡ୍ ପଡ଼ିୟାନାଗ ଦ୍ୱିତିୟ ପରଦା ଲାଇନ୍ତେ ପଚାଶ ନୁଲ୍ ଗାଟି ମାଡ଼ିତିଡ଼୍; ଆ ରେଣ୍ଡ୍ ଗାଟି ଶ୍ରେଣି ନିଜେ ନିଜେତ୍ ସାମ୍ନା ସାମ୍ନି ଆସ୍ ମାନ୍ତା। ମେଣ୍ଡେ ପଚାଶ ସନ୍ଦେ ଆଙ୍କଡ଼ା ମାଡ଼ି ଆଙ୍କଡ଼ା ପରଦା ସାରେ ନିଜେ ନିଜେତିଙ୍କ୍ କାଲ୍ପିତିଡ଼୍; ଆସୁଟ ଅଣ୍ଡୟ୍ ମାନ୍ଦାନାଦ୍ ଆଦ୍ତେ। ମେଣ୍ଡେ ଆ ଲତ୍ତେ ପରୁ ୱେସ୍ତେ ଗୁଡ଼ୁସେତ୍ ମାଇଦିଙ୍କ୍ ମେକେତ୍ ତଲ୍କେତେ ଏଗାର୍ଟାନ୍ ପରଦା ତିଆର ମାଡ଼ିତିଡ଼୍। ଆ ସାରେ ପରଦା ଦୈର୍ଗ୍ୟ ତିରିଶ କାଇ ନୁ ଓସାର୍ ନାଲୁ କାଇ; ଇ ଏଗାଟାନ୍ ପରଦା ଅଣ୍ଡୟ୍ ସାମାନ୍ ଆଦ୍ତା। ଇଦିନ୍ମାଦିଙ୍କ୍ ଏଇଙ୍ଗ୍ ପରଦା ରେଣ୍ଡ୍ ରେଣ୍ଡ୍ ଯଡ଼୍ସ୍ପି ଲେକେତ୍ ଡ଼ୁଟାଙ୍କ୍ ନେଃତିତିଡ଼୍ ନୁ ୱେର୍ ଆରୁ ପରଦା ୱେରେ ନେଃତିତଡ଼୍, ମେଣ୍ଡେ ଇଡ଼୍ଆଗାଙ୍କ୍ ଷଷ୍ଠ ପରଦା ମାଡ଼ି ଗୁଡ଼ୁସେତ୍ ମୁନେ ନେଃତିତିଡ଼୍। ମେଣ୍ଡେ ଯୋଡ଼ା ପଡ଼ିୟେତାଗ୍ ପ୍ରତୁମ୍ ଶେଷ କାପାଟ୍ ପରଦା ନାଡ଼୍ମ୍ତେ ପଚାଶ ଗାଟି ମାଡ଼ିତିଡ଼୍ ନୁ ଦ୍ୱିତିୟ ପରଦା ଯୋଡ଼ାପଡ଼ିୟେତାଗ୍ ନାଡ଼୍ମ୍ତଡ଼୍ ପଚାଶ ଗାଟି ମାଡ଼ିତିଡ଼୍। ମେଣ୍ଡେ ପିତ୍ତଲ୍ତେ ପଚାଶ ଆଙ୍କଡ଼ା ମାଡ଼ି ଆ ଉଡ଼ିୟିଦାଗ୍ ନେସ୍ ଗୁଡ଼ୁସେ ଯୋଡ଼ପିତିଡ଼୍; ଆଗାକନ୍ ମେଣ୍ଡନ୍ ଗୁଡ଼ୁସେ ଆଦ୍ତେ। ଆ ଗୁଡ଼ୁସେ ଯବନିକାତେ ଅଣ୍ଡୟ୍ ଦୁଡ଼େ, ଇତ୍କେ, ବେନ୍ ଦୁଡ଼୍ ପରଦା ଦର୍କା ମୁନେତ୍, ଆଦ୍ ଲତ୍ତେ ପେର୍କେତ୍ ପାକେ ୱେଲ୍ଙ୍ଗି ମାନ୍ତେ। ମେଣ୍ଡେ ଗୁଡ଼ୁସେ ପରଦା ତେରୱାଦ୍ ବେନ୍ ବେଡ଼ିୟେ ଦୁଡ଼େ ଇଦ୍ ଅଣ୍ଡୟ୍ କାଇ ନୁ ଆ ପାକେ ଅଣ୍ଡୟ୍ କାଇ ଦର୍କା ମାନ୍ତେ, ଆଦ୍ ଲତ୍ତେ ଇପାକେ ଆପାକେ ମୁଚାନ୍ ମାଇଦିଙ୍କ୍ ଉଙ୍ଗିତେ। ଆସୁଙ୍କ୍ ମିଡ଼୍ ଏର୍ରେ ରଙ୍ଗ୍ଦେ ମେଣ୍ଢାତ୍ ତଲ୍କେତେ ଗୁଡ଼ୁସେତ୍ ଅଣ୍ଡୟ୍ ଚାତ୍ ମାଡ଼ିତିଡ଼୍, ମେଣ୍ଡେ ଆ ପର ବିଡ଼୍ଦୁଲ୍ ତଲ୍କେତ୍ ଅଣ୍ଡୟ୍ ୱେସ୍ରାମ୍ ମାଡ଼ିତିଡ଼୍। ଲପେକନ୍ ମିଡ଼୍ ଲତେମାଇଦିଙ୍କ୍ ଶିଟିମ୍ ୱେର୍ତେ ଟିଆପଟା ତିଆର୍ ମାଡ଼ିତିଡ଼୍। ଅଣ୍ଡୟ୍ ଅଣ୍ଡୟ୍ ବାଲା ଦଶ କାଇ ନାର୍ଗେ ନୁ ଦୁଡ଼୍ କାଇ ଓସାର୍ ଆଦ୍ତେ। ଆଗେତ୍ ଆସତ୍ ଆସତାୱୁ ଆଲେନେ ରେଣ୍ଡ୍ ପାଦାକ୍ ମାଡ଼ିତି; ଇଲାନେ ଲତ୍ତେ ସାରେ ବାଲାନ୍ ମାଇଦିଙ୍କ୍ ତିଆର୍ ମାଡ଼ିତିଡ଼୍। ମେଣ୍ଡେ ଲତ୍ତେ ମାଇଦିଙ୍କ୍ ବେନ୍ ସାରେ ବାଲା ମାଡ଼ିତିଡ଼୍, ଆ ସାରେ ଦକ୍ଷିଣ ପାକେ ଦକ୍ଷିଣତେ ମାଇଦିଙ୍କ୍ କୋଡ଼ିଏଟାନ୍ ବାଲା ମାଡ଼ିତିଡ଼୍। ମେଣ୍ଡେ ଆ କୋଡ଼ିଏଟାନ୍ ବାଲାନ୍ ମଦଲ୍ ଚାଲିଶଟାନ୍ ରୁପା କୁଟି ଦରା ମାଡ଼ିତିତଡ଼୍; ଅଣ୍ଡୟ୍ ବାଲେତ୍ ମଦଲ୍ ଆଗେତ୍ ରେଣ୍ଡେ ରେଣ୍ଡେ ପଦତ୍ ମାଇଦିଙ୍କ୍ ରେଣ୍ଡ୍ ଚୁଙ୍ଗି ନୁ ୱେର୍ ବାଲାନ୍ ମଦଲ୍ ଅଡ଼୍ଆଗାଙ୍କ୍ ରେଣ୍ଡେ ରେଣ୍ଡେ ପଦତ୍ ମଦଲ୍ ରେଣ୍ଡେ ଚୁଙ୍ଗି ଆଦ୍ତା। ମେଣ୍ଡେ ଲତ୍ତେ ୱେର୍ତେ ପାକେ ମାଇଦିଙ୍କ୍ ଉତ୍ତରତେ ପାକେ କୋଡ଼ିଏଟାନ୍ ବାଲା ଆଦ୍ତା। ଅଣ୍ଡୟ୍ ବାଲେତ୍ ମଦଲ୍ ରେଣ୍ଡ୍ ଚୁଙ୍ଗି 1ନୁ ୱେରେ ବାଲେତ୍ ମଦଲ୍ ରେଣ୍ଡେ ରେଣ୍ଡେ ଚୁଙ୍ଗି; ଇଲାନେ ରୁପା ଚାଲିଶଟାନ୍ ଚୁଙ୍ଗି ଆଦ୍ତା। ଗୁଡ଼ୁସେତ୍ ପେର୍କେତ୍ ମେଣ୍ଡେ ପାକେ ମାଇଦିଙ୍କ୍ ଆରୁ ଦୁୱାଆଡ଼୍ ବାଲା ଆଦ୍ତା। ମେଣ୍ଡେ ଲତ୍ତେ ଆ ପେର୍କେତ୍ପାକେ ରେଣ୍ଡେ ମୁଲାନା ରେଣ୍ଡେ ଦୁୱାଆଡ଼୍ ବାଲା ଆଦ୍ତା। ଇ ମୁଲାନାଗ୍ ମାନ୍ଦାନ୍ ବାଲାଙ୍କ୍ ଯୋଡ଼୍ପି ମଦଲ୍କନ୍ ପରତ୍ ତାଲ୍ତାଗେ ହେୱୁନା କାଇଲିତା, ରେଣ୍ଡେ ମୁଲାନା ମାନ୍ଦାନ୍ ରେଣ୍ଡେ ବାଲା ଇଲାନେ ତିଆର୍ ଆଦ୍ତା। ଆସୁଟ ଆଗେ ବାଲା ଆଟ୍ଟାନ୍ ଦୁଡ଼୍ ଆଦ୍ତା ନୁ ଆସୁଟ ଷୋଲ ରୁପା ଚୁଙ୍ଗି ଆଦ୍ତା; ଅଣ୍ଡୟ୍ ବାଲେତ୍ ମଦଲ୍ ରେଣ୍ଡ୍ ଚୁଙ୍ଗି ନୁ ୱେର୍ ବାଲା ମଦଲ୍ ରେଣ୍ଡେ ଚୁଙ୍ଗି ଆଦ୍ତା। ମେଣ୍ଡେ ମିଡ଼୍ ଶିଟିମ୍ ୱେର୍କତେ ଦ୍ୱୱାର୍ବନ୍ଦ୍ ତିଆର୍ ମାଡ଼ିତିଡ଼୍; ଲତ୍ତେ ଅଣ୍ଡୟ୍ ପାକେ ବାଲାନେ ଏଇଙ୍ଗ୍ ଗୁଞ୍ଜେ ନୁ ମେଣ୍ଡନ୍ପାକେ ବାଲାନେ ଏଇଙ୍ଗ୍ ଗୁଞ୍ଜେ ଗୁଡ଼ୁସେତ୍ ପଡ଼ଦ୍ ଆଦାନ୍ପାକେ ପେର୍କେତ୍ ପାକେ ବାଲ୍ତେ ଏଇଙ୍କ୍ ଗୁଞ୍ଜେ ଇଦ୍ତିଡ଼୍ । ମେଣ୍ଡେ ନାଡ଼୍ମେତ୍ ଗୁଞ୍ଜେନ୍ ବାଲ୍ତେ ନାଡ଼୍ମେତ୍ ଦେଶ୍କିନାଗ୍ ଇ ତାଲ୍ଲେକନ୍ ଆ ତାଲ୍ହେୱୁନା ହେୱୁଦ୍ତେ । ମେଣ୍ଡେ ଆ ସାରେ ବାଲା ସନ୍ଦେ ମାଲ୍ପିତିଡ଼୍ ନୁ ଗୁଞ୍ଜେତେ ମାଇଦିଙ୍କ୍ ଚୂନ୍ତେ ମାଡ଼୍ପିତିଡ଼୍, ମେଣ୍ଡେ ଗୁଞ୍ଜେସାରେ ସନ୍ଦେ ମାଡ଼୍ପିତିଡ଼୍। ଇ ଲେକାମ୍ତେ ଲନ୍ ବେନ୍ ଯୋଜନା ମେଟେତାଗ୍ ମିଡ଼୍ ତସି ମିନ୍ଦେନ୍; ଆ ଲେକାମ୍ ଆଦ୍ ତିଆର୍ ମାଡ଼ାଟ୍। ମେଣ୍ଡେ ମିଡ଼୍ ନିଲ ରଙ୍ଗ୍ ନୁ ଉମେ ରଙ୍ଗ୍ ନୁ ସିନ୍ଦୁ ରଙ୍ଗ୍ କଟ୍ତେ ପାଣ୍ଡ୍ରିଲାଦ୍ ଚୁଦୁଲାଦ୍ ନୁଲ୍ଦେ ଅଣ୍ଡୟ୍ ଲିକ୍ତେ ଚିଲେ ତିଆର୍ ମାଡ଼ିତିଡ଼୍; ଆଦ୍ ଦକ୍ଷତା ମାନ୍ଦାନ୍ ମିସ୍ତ୍ରିଇନା ପାଡ଼ିୟ୍ଦେ କିରୁବନଡ଼୍ ଚିତ୍ର ଲେକାମ୍ ମାଡ଼୍ଙ୍କ୍ଆଦ୍ତେ। ନିମେ ଆଦ୍ ସନ୍ତେ ମାଡ଼୍ପି ଶିଟିମ୍ ୱେର୍କ୍ ନାଲୁଗୁଞ୍ଜେନ୍ ପର ୱେଃତିତିଡ଼୍; ମେଣ୍ଡେ ରୁପା ନାଲୁ ଚୁଙ୍ଗି ପର ଅଡ଼୍ ସନ୍ଦେ ଆଙ୍କଡ଼୍ ସାରେ କୁସ୍ପିତିଡ଼୍। ମେଣ୍ଡେ ଗୁଣ୍ଡିତ୍ ସାରେ ମଦଲ୍ ଲିକ୍ତେ ଚିଲେ ୱେସ୍ ଆ ଲିକ୍କା ଚିଲେ ଏଡ଼୍ ସାକ୍ଷ୍ୟଲେକାତ୍ ସିନ୍ଦୁକ୍ ତାତ୍ତିତିଡ଼୍, ଆଗାକଞ୍ଚ୍ ଆ ଲିକ୍ତେ ଚିଲେତ୍ ପବିତ୍ର ପଡ଼ିୟେତାଗ୍ ନୁ ମହାପବିତ୍ର ପଡ଼ିୟେତାଗାଙ୍କ୍ ୱେରେ ଆଦ୍ତେ। ମେଣ୍ଡେ ମିଡ଼୍ ବେଡ଼ିୟ୍ ପବିତ୍ର ପଡ଼ିୟେତାଗ୍ ସାକ୍ଷ୍ୟ ସିନ୍ଦୁକ୍ତେ ପରୁ ପାପ୍ତିଙ୍କ୍ ମୁସି ନେଃତିଡ଼୍। ଲିକ୍ତେ ଚିଲେତ୍ ବାୟିଦେ ଟେବୁଲ୍ ନେଃତିଡ଼୍ ନୁ ଟେବୁଲ୍ତେ ମୁନେ ଲତ୍ତେ ଦକ୍ଷିଣ ଦିଗ୍ତେପାକେ କୁପି ନେଃତିଡ଼୍ ନୁ ଉତ୍ତର୍ତେ ପାକେ ଟେବୁଲ୍ ନେଃତିଡ଼୍। ମେଣ୍ଡେ ଲତ୍ତେ ଆର୍ଦେ ମାଇଦିଙ୍କ୍ ନିଲ, ଉମେ, ସିନ୍ଦୁର୍ ରଙ୍ଗ୍ ନୁ ବଲା ପାଣ୍ଡ୍ରିଲାଦ୍ ନୁଲ୍ଦେ ତିଆର୍ ଆତ୍ତେ ଚିତ୍ରା କାବ୍ରା ୱେରଡ଼୍ ମୁଚାନ୍ଚିଲେ ତିଆର୍ ମାଡ଼ିତିଡ଼୍। ଆ ମୁଚାନ୍ ଚିଲେତ୍ ମାଇଦିଙ୍କ୍ ଏଇଙ୍ଗ୍ ଶିଟିମ୍ ୱେର୍କ୍ ଗୁଜେ ତିଆର୍ ମାଡ଼ି ସୁନା ମାଡ଼୍ପିତିଡ଼୍, ମେଣ୍ଡେ ସନ୍ଦେ ଆଗେ ଆଙ୍କଡ଼ା ମାଡ଼ିତିଡ଼୍ ନୁ ଆଗେତ୍ ମାଇଦିଙ୍କ୍ ପିତ୍ତଲ୍ତେ ଏଇଙ୍ଗ୍ ଚୁଙ୍ଗି ତସିତିଡ଼୍।
Source notes (1)
- Footnote ରୂପାତେ ତିଆର୍ ଆତ୍ତେ ଦୁୱାର୍ବନ୍ଦ୍ ଡ଼ାଟାମ୍ ମାଡ଼ି ନିଲ୍ସ୍ପାନଙ୍କ୍ ଦୁୱାର୍ବନ୍ଦ୍ ଦରା
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.