Koya Bible
ଯାତ୍ରା 24
ନିୟମ୍ତେ ବଇ ଲେକାନାଦ୍
ତାନ୍ପେର୍କେ ଅଣ୍ଡ୍ ମୋଶାଙ୍କ୍ କେତ୍ତଣ୍ଡ୍, ନିମେ ନୁ ହାରୋଣ ନୁ ନାଦବ୍ ନୁ ଅବୀହୂ ନୁ ଇସ୍ରାଏଲତେ ବେଡ଼ିୟ୍ ନାରୁଡ଼୍ ସତୁରି ଜାନ୍, ମିଡ଼୍ ସଦାପ୍ରବୁନ୍ ଗାରେ ଲାଗିତାସ୍ ଜେକେମାଞ୍ଜ୍ ଉପାସନା ମାଡ଼ାଟ୍। ମାତର୍ ମୋଶାଲ୍ ସଦାପ୍ରବୁ ଗାରେ ୱାଦ୍ତଣ୍ଡ୍, ମାତର୍ ଅଡ଼୍ ଗାରେ ୱାଡ଼ଡ଼୍, କି ନାରୁଡ଼୍ ଅନ୍ତଡ଼୍ ତାରଡ଼୍। ଆସୁଟ୍ ମୋଶାଲ୍ ୱାସ୍ ସଦାପ୍ରବୁନ୍ ଆ ସାରେ ବାକ୍ୟ ନୁ ଶାସନ ବିଷୟତେ ନାରୁଡ଼୍କିଙ୍କ୍ କେସୱାନାକେ, ସାରେତଡ଼୍ ଅଣ୍ଡୟ୍ ଲେଙ୍ଗ୍ ମାଡ଼୍ତଡ଼୍, ସଦାପ୍ରବୁ ବେନ୍ସାରେ ଗଟି କେସମିନ୍ଦେଣ୍ଡ୍ ଆୱୁସାରେ ମାନାଡ଼୍ ପାଲନ୍ମାଡ଼ିକାଡ଼୍। ତାନ୍ପେର୍କେ ମୋଶାଲ୍ ସଦାପ୍ରବୁଙ୍କ୍ ସାରେ ବାକ୍ୟ ଲେକ୍ତଣ୍ଡ୍, ମେଣ୍ଡେ ନାରୁଡ଼୍ ତେଦି ମେଟେତ୍ ମଦଲ୍ ଅଣ୍ଡୟ୍ ଯଜ୍ଞବେଦି ନୁ ଇସ୍ରାଏଲତେ ବାର୍ଟାନ୍ ପିଲୁଡ଼୍ ଲେକାମ୍ ବାରଟାନ୍ ଗୁଡ଼ୁସା ତିଆର ମାଡ଼୍ତଣ୍ଡ୍। ମେଣ୍ଡେ, ଅଣ୍ଡ୍ ଇସ୍ରାଏଲତେ ପିଲାକିଙ୍କ୍ ଲେୟଡ଼୍କିଙ୍କ୍ ରସୱାନାକେ, ଅଡ଼୍ ସଦାପ୍ରବୁନ୍ ଆଦ୍ଦେଶ୍ତେ ମଙ୍ଗଲ୍ତାଦ୍ ପୂଜେ ବେଦି ନୁ ଶାନ୍ତି ମାଇଦିଙ୍କ୍ ପଶୁ ବଲିଦାନ୍ତେ ସାମାନ୍। ଆସୁଟ ମୋଶାଲ୍ ନେତୁର୍ ଅସ୍ ଆଗେତ୍ ବାଗାତ୍ ଗିନେନା ୱାଟ୍ତଣ୍ଡ୍, ମେଣ୍ଡେ ଆଗେତ୍ ବାଗାତ୍ ନେତୁରୁ ବେଦିତ୍ ପର ଇଲିସ୍କ୍ତଣ୍ଡ୍। ମେଣ୍ଡେ ନିୟମ୍ ବଇ ଅସ୍ ନାରୁଡ଼୍ ମୁନେ କାର୍ତିତଣ୍ଡ୍; ଆସୁଟ ଅଡ଼୍ କେତ୍ତଡ଼୍, ସଦାପ୍ରବୁ ବାତେ ବାତେ କେସ୍ମିନ୍ଦେଣ୍ଡ୍, ଆଦ୍ ସାରେ ମାମ୍ ମାନେମ୍ ଆଦ୍ଦାଙ୍କ୍ ନୁ ଆଦେଶ୍ କେଞ୍ଜିତମ୍।
ଆସୁଟ୍ ମୋଶାଲ୍ ଆ ନେତୁରୁ ଅସ୍ ନାରୁଡ଼୍ ପର ଇଲିସ୍କ୍କି କେତ୍ତଣ୍ଡ୍, ଉଡ଼ାଟ୍, ସଦାପ୍ରବୁ ମିଇ ତଡ଼୍ ଇ ସାରେ ବାକ୍ୟ ବିଷୟତେ ବେନ୍ ନିୟମ୍ ମାଡ଼ିମିନ୍ଦେଣ୍ଡ୍, ଆ ନିୟମ୍ତେ ନେତୁରୁ ଇଦ୍। ଆସୁଟ୍ ମୋଶାଲ୍, ହାରୋଣ, ନାଦବ, ଅବୀହୂ ନୁ ଇସ୍ରାଏଲତେ ବେଡ଼ିୟ୍ ନାରୁଡ଼୍ ସତୁରି ଜାନ୍ ଆତ୍ତଡ଼୍; ମେଣ୍ଡେ ଅଡ଼୍ ଇସ୍ରାଏଲତେ ପରମେଶ୍ୱରଦିଙ୍କ୍ କାଇଲ୍ତଣ୍ଡ୍। ମେଣ୍ଡେ, ଅନ୍ ଡେକେତ୍ ମଦଲ୍ ପଡ଼ିୟେ ୱେସ୍ତେ ଇରା କାଲ୍ ତିଆର୍ ଆତ୍ତେ ପାଡ଼ିୟ୍ ଲେକାମ୍ ନୁ ନିର୍ମଲ୍ ମୟଲ୍ ଇନା ମାତ୍ତେ। ମେଣ୍ଡେ ଅଣ୍ଡ୍ ଇସ୍ରାଏଲତେ ନାରୁଡ଼୍ ବାଡ଼ିୟଡ଼୍ ବିରୁଦ୍ଦ୍ତେ କାଇ ଆୱଣ୍ଡ୍ ଆତ୍ତଣ୍ଡ୍; ମାତର୍ ଅଡ଼୍ ପରମେଶ୍ୱରଦିଙ୍କ୍ ଦର୍ଶନ ମାଡ଼୍ତଡ଼୍, ମେଣ୍ଡେ ତିନ୍ଦାନ୍ ଉନ୍ଦାନ୍ ମାଡ଼୍ତଡ଼୍।
ସିନୟ ମେଟେତାଗ୍ ମୋଶାଲ୍
ଇଦିନ୍ମାଦିଙ୍କ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ମିଡ଼୍ ମେଟେତାଗ୍ ଆଞ୍ଜ୍ ମା ଗାରେ ୱାସ୍ ଇ ପଡ଼ିୟ୍ତାଗ ମାନୁଟୁ; ଆସୁଟ ମାମ୍ ନାରୁଡ଼୍ତେ ଶିକ୍ଷା ମାଇଦିଙ୍କ୍ ବାତେ ଲେକିମିନ୍ଦେମ୍, ଆଦ୍ ଇତ୍କେ, ନିୟମ୍ ନୁ ଆଦେଶ୍ ବିଷୟତେ ରେଣ୍ଡ୍ ଦୁଡ଼୍ଡ଼ା କାଲ୍ଦାୱୁ ମିକିଙ୍କ୍ ଇଦିତମ୍। ଆସୁଟ ମୋଶାଲ୍ ନୁ ଅନ୍ ସେବା ମାଡ଼୍ନଣ୍ଡ୍ ଯିହୋଶୂୟ୍ ତେଦ୍ତଣ୍ଡ୍; ମେଣ୍ଡେ ମୋଶାଲ୍ ପରମେଶ୍ୱରତେ ମେଟେତ୍ ପର ଆତ୍ତଣ୍ଡ୍। ମେଣ୍ଡେ ଅଣ୍ଡ୍ ବେଡ଼ିୟ୍ ନାରୁଡ଼୍କିଙ୍କ୍ କେତ୍ତଣ୍ଡ୍, ମାମ୍ ବେସୁଙ୍କ୍ ଆଇନା ମିୟାଗ୍ ଗାରେ ମାଲ୍ସ୍ୱାଡ଼ମ୍, ଆସୁଟ ଆଇନା ମିଡ଼୍ ନାକିଙ୍କି କେପିମାନୁଟ୍; ଉଡ଼ାଟ୍, ହାରୋଣ ନୁ ହୂର୍ ମି ଗାରେ ମିନ୍ଦେଣ୍ଡ୍, ବେନନାଦ୍ ବାତେ ବିବାଦ ଗଟ ପେୟିକେ, ଅଣ୍ଡ୍ ଅଡ଼୍ ପାକେ ଆନିଣ୍ଡ୍।
ତାନ୍ପେର୍କେ ମୋଶାଲ୍ ମେଟେତାଗ ତାର୍ତଣ୍ଡ୍, ମେଣ୍ଡେ ମୟଲ୍ ମେଟେତିଙ୍କ୍ ମୁସ୍ତେ। ଆସୁଟ ସିନୟ୍ ମେଟେତ୍ ପର ସଦାପ୍ରବୁନ୍ ଗୌରବ୍ ଆତ୍ତେ; ମେଣ୍ଡେ ଆଦ୍ ଆରୁଦିନା ମୟଲ୍ଆଦ୍ମି ମାତ୍ତେ; ଆଗାକନ୍ ଅଣ୍ଡ୍ ସାତ୍ ଦିନ୍ତେ ମୟଲ୍ତାଗାଙ୍କ୍ ମୋଶାଙ୍କ୍ କାର୍ଙ୍ଗ୍ତଣ୍ଡ୍। ଆସୁଟ୍ ଇସ୍ରାଏଲତେ ନାରୁଡ଼୍ କଣ୍ଡେତେ ମେଟେତ୍ ନେତିନାଗ ନିଡ଼୍ତାନ୍ କିସ୍ ଇନା ସଦାପ୍ରବୁନ୍ ଗୌରବ୍ ଆତ୍ତେ। ମେଣ୍ଡେ ମୋଶାଲ୍ ମୟଲ୍ତାଗ୍ ନେଙ୍ଗି ମେଟେତ୍ ପର ଆଞ୍ଜ୍ ଚାଲିଶ ନାର୍କା ପାଲି ଆ ମେଟେତ୍ ପର ମାତ୍ତଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.