Konda Porja Bible
ହିତୋପଦେଶ 7
ଦାରିଆଇମାଦି ମାଣାନ୍ ଜାଗାର୍ତା
ଏ ନା ମାରିନ୍, ନା ମାଟା ୱିଜୁ ମାନାଆ ମାରି ନା ମାଟା ୱିଜୁ ନିଜେଦି ଜିବନ୍ତୁ ଉଣ୍ଡା କିଜି ଇଡ୍ଆ ।
ନା ମାଟା ୱିଜୁ ମାନାଆ, ଆବେଟ୍ ନିନ୍ ଜିନି ମାରି ନିଜେଦି କାଣାଗାଦି ଡିଞ୍ଜା ୱାଜା ନା ନିୟମ୍ ରକିୟା କିଆ । ନି ୱିଜୁ ଡ଼ାସ୍କେଙ୍ଗା ଆକା ତର୍ଆ
ନି ଜିବନ୍ତି ପାଟାଦୁ ଆକାୱିଜୁ ରାସ୍ସି ଇଡ୍ଆ ।
ଗ୍ୟାନ୍ଦିଙ୍ଗ୍ ଇନ୍ଆ, “ନିନ୍ ନା ତାଙ୍ଗିଁ,”
ମାରି ନେଗି ବିସାର୍ଦିଙ୍ଗ୍ ନି ନିଜେଦି ଲୋକୁ ଇଜି ଇନ୍ଆ ।
ଆବେଟ୍ ୱାର୍ ଦାରି ଆଇମା
ଇର୍ରିଙ୍ଗ୍, ସାୱି ମାଟେଙ୍ଗ୍ ୱାର୍ଗିନି ଆଇମାଦି ମାଣାନ୍ ନିଙ୍ଗିଁ ରକିୟା କିନାନ୍
ନାନ୍ ନିଜେଦି ଇଲୁଦି କିଡ଼ିକିଦାନ୍ ଜାଲି ପାର୍ଦା ତରିଟାନ୍ ସୁଡ଼ୁଜି ମାର୍ହା;
ଆବେଟ୍ ନାନ୍ ସୁଡ଼ୁତା, ଗ୍ୟାନ୍ସିଲି ଲୋକା ଲୋଇ
ମାରି ସିନିସ୍ତା ମୁରୁଲି ଲୋକା ଲୋଇ ଅରେନ୍ ବୁଦିସିଲି ମୁରୁଲି ଲୋକୁ ମାର୍ହାନ୍ ।
ୱାନ୍ ଦାରି ଆଇମାଦି ଇଲୁ କନା ଲାକ୍ତୁରି ସାକ୍ଡ଼ି ସାରି ସିଜି ସଲ୍ପୁ ସଲ୍ପୁ ତାନି ଇଲୁଦୁ ସନି ସାରିଦୁ ସର୍ହାନ୍ ।
ନାସ୍ତିୱାଲେ ମିଲିମିଲିକା ଆଜିମାର୍ହାତ୍, ୱେଡ଼ା ଆର୍ଜି ମାର୍ହାତ୍, ମଜାୟ୍ ନାଡ଼ାରି ସିକାଟି ମାରି ସିକାଟିଦି ବେଡ଼ା ।
ଆବେଟ୍ ସୁଡ଼ୁଦୁ, ଅରେତ୍ ଆଇମା ୱାନି ୱାଲେ ବେଟ୍ବୁଡ଼ାତାତ୍,
ୱାଦ୍ ଦାରିପାଣିକିନି ୱାତିଗନ୍ଦା ପାଡ଼ିଗିଜି ମାରି ଜିବନ୍ତୁ ସାଲାକିଦିକାତ୍ ମାର୍ହାତ୍ ।
ୱାଦ୍ ନାଣ୍ତ ଟଣ୍ତାଇ ମାରି ମାଟା ମାନାଇକାତ୍, ୱାଦ୍ ନିଜେଦି ଇଣ୍ଡ୍ରୋ ଏସାଙ୍ଗ୍ ତେବାଏତ୍ ।
ୱାଦ୍ ଏସେଙ୍ଗ୍ ଏସେଙ୍ଗ୍ ପେରିଜାରିଦୁ, ଏସେଙ୍ଗ୍ ଏସେଙ୍ଗ୍ ଡେଣାଦୁ ତେବାନାତ୍ ମାରି ୱିଜୁ କୋନାଦୁ କାପ୍କିଜି ବାସ୍ସି ମାନ୍ଜିନାତ୍ । ଆୟା ଆଇମା ୱାନିଙ୍ଗ୍ ଆସ୍ସି ନଣ୍ଡିତାତ୍, ମାରି ସେମାର୍ ସିଲି ମକମ୍ଦାନ୍ ୱାନିଙ୍ଗ୍ ଇର୍ହାତ୍ ନେଗି ପୁଜା ନା ଲାକ୍ତୁ ମାନାତ୍; “ନାନ୍ ନେରୁ ନିଜେଦି ମାନତ୍ ପୁରା କିତାମାନା । ଆଦେଙ୍ଗ୍ ନି ୱାଲେ ବେଟ୍ ଆଦେଙ୍ଗ୍ ଆତ୍ରେ ୱାତା ମାରି ଜାତୁନ୍ତାନ୍ ନି ମକମ୍ ସୁଡ଼ୁଦେଙ୍ଗ୍ ୱାତାମାନା, ମାରି ନିଙ୍ଗିଁ ପୋଇତା । ନାନୁ ଗଦି ମାରି ମିସର ଦେସ୍ତାନ୍ ତାତିମାନି ନେଗି ନୁର୍ନୁରା କାବ୍ରା ସିତ୍ରା ୱାତି ନା କାଟେଲ୍ତୁ ପାର୍ତାମାନା । ମାରି, ବାସ୍ନା ନିୟୁ, ଅଗୁରୁ ମାରି ଦାରୁଚିନିଦାନ୍ ନା କାଟେଲ୍ ବାସ୍ନା କିତାମାନା । ରାଆ, ମାଡ୍ ସାଲ୍ଦି ସାନ୍ଦି ଗୁର୍ନାଟ୍ ମାରି ଜିବନ୍ନୋଜି ୱେଡ଼ିକା କିନାଟ୍ । ଏନ୍ଦାଇର୍ରିଙ୍ଗା ନା କନ୍ଲି ଇଣ୍ଡ୍ରୋ ସିଲେନ୍, ୱାନ୍ ନାଣ୍ତ ଆକ ସର୍ହା ମାନାନ୍ । ୱାନ୍ ଏସୋ ଡାବୁଙ୍ଗ୍ ଅର୍ସେ ଆସ୍ତା ସର୍ହାମାନାନ୍, ୱାନ୍ ପୁନିଦି ବେଡ଼ାଦୁ ଡ଼େସି ଇନ୍ଡ୍ର ୱାନାନ୍ ।” ଇୟାୱାଜା ନାଣ୍ଡ ନେଗି ମାଟା ୱେର୍ସି ୱାଦ୍ ୱାନି ମନ୍ ଡଙ୍ଗାଁ କିତାତ୍, ୱେୟୁଦି ସାୱି ମାଟାଦାନ୍ ୱାନିଙ୍ଗ୍ ସୁତ୍ରିସ୍କିଜି ଅତାତ୍ । ଏମେଜାକୁ କଡି ସାଦେଙ୍ଗ୍ ସନାତ୍ ମାରି ଏଣ୍ଡେସ୍ ସିକିଣିଦାନ୍ ତରାତି ଲୋକୁ ଦଣ୍ଡ୍ ପୋଇଦେଙ୍ଗ୍ ସନାନ୍, ଆୟାୱାଜା ୱାନ୍ ଆୟାଦାପ୍ରେ ଦାନି ୱାଲେ ୱାଲେ ସର୍ହାନ୍ । ମାରି, ଏମେଜାକୁ ପଟି ଉରିଦିଙ୍ଗ୍ ସାନିକା ନେସ୍ଏଣ୍ଡାନେ ଆବେନୁ ଆର୍ଦେଙ୍ଗ୍ ଦାପ୍ରେ ଇମ୍ନାତ୍, ସାରାସାରି ତାନି ତାଡ଼ାକି ଆୟାୱାଜା ୱେଲୁଦାନ୍ ଗୁତାତାତ୍ । ଆଦେଙ୍ଗ୍ ଏ ନା ମାରିନ୍କୁ, ନା ମାଟା ୱେଣ୍ଡ୍ରୁ ମାରି ନା ୱେୟୁଦି ବାକ୍ୟଦିଙ୍ଗ୍ ମନ୍ତୁ ଆସ୍ତୁ । ମି ମନ୍ ଦାନି ସାରିଦୁ ସଲ୍ମାକିତ୍, ମିରୁ ଦାନି ସାରିଦୁ ସଲ୍ମାଟ୍ । ଏନ୍ଦାଇର୍ରିଙ୍ଗ୍ ୱାଦ୍ ନାଣ୍ଡ ଲୋକାଙ୍ଗ୍ କାଣ୍ତିଆକାବ୍ରା କିତାମାନାତ୍, ହୁଁ, ଦାନି ମାଣାନ୍ ସାତି ଲୋକୁ ନାଣ୍ତ ମାନାର୍ । ଦାନି ଇଲୁ ପାତାଲଦୁ ସନି ସାରି, ଆମାକା ସାନି ବାକ୍ରାଦୁ ଅନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.