Konda Porja Bible
ହିତୋପଦେଶ 6
ୱିଜୁ ଜାଗାର୍ତା ମାଟେଙ୍ଗ୍
ଏ ନା ମାରିନ୍, ଜଦି ନିନ୍ ନିଜେଦି ପାଡ଼ାକାଦି ଲୋକା ମୁକୁଡ଼ାକିନି ଉଣ୍ତିଙ୍ଗ୍ ଦାୟି ଆନିମାନି, ଜଦି ଆଇ ଲୋକା ଉଣ୍ତିଙ୍ଗ୍ ପାର୍ମାଣ୍ କିଜି ଦାୟି ଆନିମାନି, ଆର୍ତିଙ୍ଗ୍ ନିନ୍ ନିଜେଦି ୱେୟୁଦି ମାଟାଦି ଉରିଦୁ ଆର୍ତିମାନି ମାରି ନିଜେଦି ୱେୟୁଦି ମାଟାଦାନ୍ ଆସାଇ ଆତିମାନି । ଏ ନା ମାରିନ୍, ନିନ୍ ଇଲେଇ ଇୟା ପାଣି କିଆ, ନିଜେଦିଙ୍ଗ୍ ରକିୟା କିଆ; ଏନ୍ଦାଇର୍ରିଙ୍ଗ୍ ନିନ୍ ନିଜେଦି ସଙ୍ଗ୍ତି ଅଦିକାର୍ତାନ୍ ମାନି; ସାଙ୍ଗ୍ଆ, ନିଜେଦିଙ୍ଗ୍ ସାନ୍ତି କିଜି ନି ପାଡ଼ାକାଦି ଲୋକ୍ତିଙ୍ଗ୍ ବାତିଙ୍ଗ୍ମାଲ୍ଆ । ନିନୁ ନିଜେଦି କାଣ୍କାଙ୍ଗ୍ ସୁଜ୍ଦେଙ୍ଗ୍ ସିମା, ଗି ନିଜେଦି କାଣ୍ଗା ବୁଡାଦିଙ୍ଗ୍ ନାପ୍ତେଙ୍ଗ୍ ସିମା । ନିଜେଦିଙ୍ଗ୍ ବନ୍ ଗରିଆ ୱାଜା ବନ୍ୱା କିୟୁଦାନ୍, ପଟି ୱାଜା ଜାଡ଼ି ଅଡ୍ନିୱାନି ଉରିଦାନ୍ ରକିୟା କିଆ ।
ଏ ଗାଡ଼ିଆ ଲୋକୁ, ମିର୍ ସିୱାଣ୍ତିଙ୍ଗାଁ ଲାକ୍ତୁ ସାଣ୍ଡ୍ରୁ, ତାନି ପାଣି ବିସାର୍ କିଦୁ ମାରି ବୁଦି ଆଦୁ । ତାନି ବିସାର୍ କିନିକାନ୍, ପେରିଲୋକୁ ମାରି ମାଲିକ୍ ଏନ୍ ସିଲେତିଙ୍ଗ୍ବା ୱାଦ୍ ଜେଟାଲେଜି ନିଜେଦି କାଦି ଉଣ୍ତା କିନାତ୍, ମାରି, ପାସିଦି ବେଡ଼ାଦୁ କାଦି ଉଣ୍ଡା କିନାତ୍ । ଏ ଗାଡ଼ିଆ ଲୋକୁ, ନିନୁ ଏସା ବେଡ଼ା ଗୁର୍ନିମାନି ? ନିନୁ ଏସ୍ତିୱାଲେ ସୁସ୍କାଣ୍କୁ ପାୟ୍ଜି ନିଙ୍ଗ୍ନି ? ମାରି ଅଡ଼ପ୍ ସୁଜିତିଙ୍ଗା, ମାରି ଅଡ଼ପ୍ କରତିଙ୍ଗା, ମାରି ସାଣେକ୍ ସୁଜ୍ନି ଉଣ୍ତିଙ୍ଗ୍ କିକୁ ସାକ୍ବା ବାତିଙ୍ଗ୍, ନି କାକୁର୍ତି ଦିନ୍ ସାରିଦୁ ବୁଲାନି ବଇଗେରି ୱାଜା ୱାନାତ୍, ମାରି, ନି ଦିନ୍ କାତି କାଣ୍ଡା ଆସ୍ତି କାଙ୍ଗାର୍ଏନ୍ ୱାଜା ଇଗା ୱାନାତ୍ । ସେଇ ଲୋକୁ, ଦସ୍ତି ଲୋକୁ; ୱାନ୍ ୱିଜୁ ୱେଡ଼ାଦୁ କୁଟ୍ ମାଟେଙ୍ଗ୍ ୱେର୍ସି ବୁଲାନାନ୍; ୱାନ୍ କାଣୁକୁ ଡ଼େଇନାନ୍, ୱାନ୍ କାଲୁଦାନ୍ ତର୍ନାନ୍, ୱାନ୍ ଡ଼ାସ୍କେଙ୍ଗ୍ଣାନ୍ ଜୁଟ୍ସି ୱେର୍ନାନ୍; ୱାନି ମନ୍ତୁ କୁଟ୍ ମାଟା ତେବାନାତ୍, ୱାନ୍ ୱିଜୁ ୱେଡ଼ାଦୁ ସେଇକାନେ ସିନ୍ତା କିନାନ୍; ୱାନ୍ ଜାଟିଙ୍ଗ୍ ଆନି ୱିତୁ ୱିତ୍ନାନ୍ । ଆଦେଙ୍ଗ୍ ୱାନି ବାଦା ଦାପ୍ରେ ଇଗା ୱାନାତ୍, ମାରି, ୱାନ୍ ଦାପ୍ରେନେ ନାସ୍ଟୁ ଆନାନ୍ ମାରି ଜିଦେଙ୍ଗ୍ ଉପାୟ୍ ତେବାଏତ୍ । ସୋଅ ଗଟା ବିସୟ୍ଦିଙ୍ଗ୍ ପ୍ରବୁ କାଡ଼୍ନାନ୍; ସାତ୍ ଗଟା ଜିନିସ୍କୁ ବା ୱାନି କାଡ଼୍ନି ମାଟା । ଆକାର୍ତାନ୍ ସୁଣିକା, ମିସ୍ମାଟା ୱାର୍ଗିନି ୱେତଲ୍ ମାରି ନେଗି ଲୋକାଙ୍ଗ୍ ଡାକ୍ନି କିୟୁ; ସେଇକା ସିନ୍ତା କିନି ମନ୍ ସେଇ ପାଣି କିଦେଙ୍ଗ୍ ଦାପ୍ରେ ସନି ପାଦାମ୍; ମିସ୍ ସାକି ଆମାକାନ୍ ମିସ୍ ଇନାନ୍ ମାରି ଆମାକାନ୍ ତଡ଼ାନ୍କା ଲୋଇ ଜାଟିଦି ୱିତୁ ୱିତ୍ନାନ୍ ।
ଦାରିପାଣିକିନି ବିରୁଦ୍ତାନ୍ ଜାଗାର୍ତା
ଏ ନା ମାରିନ୍, ନିନୁ ନିଜେଦି ବୁବାଦି ମାଟା ମାନାଆ, ମାରି, ନିଜେଦି ୟାୟାଦି ସିକିୟା ବାଣାମା । ଆକା ୱିଜୁଦିନ୍ ନି ଜିବନ୍ତୁ ତର୍ସି ଇଡ୍ଆ, ନିଜେଦି କକ୍ଲାଦୁ ତର୍ଆ । ନିନୁ ବୁଲାନି ୱାଲେ ଆକା ନିଙ୍ଗିଁ ସାରି ତର୍ନାତ୍, ମାରି ସୁଜ୍ନି ୱାଲେ ଆକା ନି କାପ୍କିନିକାତ୍ ଆନାତ୍; ନିନୁ ନିଙ୍ଗ୍ନି ୱାଲେ ଆକା ନି ୱାଲେ ମିସାନାତ୍ । ଏନ୍ଦାଇର୍ରିଙ୍ଗ୍ ଆୟା ମାଟା ଦିୱା; ମାରି ଆୟା ସିକିୟା ଜାୟ୍; ମାରି ସିକିୟାସିଜି ଲାଗାନିକା ଜିବନ୍ତି ସାରି ଆନାତ୍; ଆକା ନିଙ୍ଗିଁ ସେଇ ଆଇମା ମାଣାନ୍ ମାରି ଦାରି ଆଇମାଦି ୱେୟୁଦି ସାୱି ୱାର୍ଗିନି ମାଟାଦାନ୍ ରକିୟା କିନାତ୍ । ନି ଜିବନ୍ତୁ ତାନି ସୁନ୍ଦର୍ତିଙ୍ଗ୍ ସୁଡ଼ୁଜି ଲାଲାୟ୍ ଆମା; ମାରି ୱାଦ୍ କାଣୁକୁ ଡ଼େଇଜି ନିଙ୍ଗିଁ ଆସ୍ତେଙ୍ଗ୍ ତାନିଙ୍ଗ୍ ସିମା । ଏନ୍ଦାଇର୍ରିଙ୍ଗ୍ ବେସ୍ୟା ଉଣ୍ତିଙ୍ଗ୍ କାଦି ଉଣା ଆନାତ୍, ମାରି ଦାରି ଆଇମା ଲୋକାଦି ନାଣ୍ଡ ଦାରାଦି ଜିବନ୍ତିଙ୍ଗ୍ ଆସ୍ତେଙ୍ଗ୍ ବଦା କିନାତ୍ ।
ଏନ୍ ଏସେଙ୍ଗ୍ ନିଜେଦି ବକାଦୁ ସିସୁ ଇଡ୍ନାନ୍, ଆର୍ତିଙ୍ଗ୍ ୱାନି ଆଙ୍ଗିଁ ଇନିକା ୱେଏତ୍ ? ମାରି ଏନ୍ ଏସେଙ୍ଗ୍ ସିସୁକାସ୍ନି ଡ଼ିବ୍କା ମୁସୁକୁ ବୁଲାନାନ୍, ଆର୍ତିଙ୍ଗ୍ ୱାନି ପାଦାମ୍ତୁ ଇନିକା ପଡ଼ଙ୍ଗ୍ ଆଏତ୍ ? ନିଜେଦି ପାଡ଼ାକାଦି ଆଇମା ଲାକ୍ତୁ ଆମା ଲୋକୁ ସନାନ୍, ୱାନ୍ ଆୟା ୱାଜା; ଏନ୍ ତାନିଙ୍ଗ୍ ମୁଟ୍ତିଙ୍ଗ୍, ୱାନ୍ ଦଣ୍ତ୍ ପୟ୍ନାନ୍ । ଡଙ୍ଗାଁର୍ଏନ୍ ବାଙ୍ଗା ଆଜି ଜିବନ୍ ରକିୟା ଉଣ୍ତିଙ୍ଗ୍ ଜଦି ଡଙ୍ଗାଁ କିନାନ୍, ଆର୍ତିଙ୍ଗ୍ ଲୋକୁ ୱାନିଙ୍ଗ୍ କାଡ଼୍ଏର୍ । ମାତର୍ ୱାନ୍ ଦାରାପଡ଼ାତିଙ୍ଗା, ୱାନିଙ୍ଗ୍ ସାତ୍ ଗୁଣ ଡ଼େପ୍ସି ସିଦେଙ୍ଗ୍ ପଡ଼ାନାତ୍; ନିଜେଦି ଇଲୁଦି ୱିଜୁ ୱାନିଙ୍ଗ୍ ସିଦେଙ୍ଗ୍ ଆନାତ୍ । ଅରେନ୍ ଦାରିପାଣିକିନି ମେମାରି ସତ୍ନେ ନିର୍ବୁଦି; ଆମାକାନ୍ ନିଜେଦି ଜିବନ୍ ନାସ୍ଟୁ କିନାନ୍, ୱାନ୍ ଆକା କିନାନ୍ । ୱାନ୍ ମାଡ୍ତିନାନ୍ ମାରି ସେମାର୍ ପୟ୍ନାନ୍; ମାରି, ୱାନି ଦସ୍ ମାର୍ଗିଏତ୍ । ଏନ୍ଦାଇର୍ରିଙ୍ଗ୍ ମେମାରି ମନ୍ ଲୋଇ ରିସା ଆଜି ନାଣ୍ତ ରିସା ଆନାନ୍ ମାରି ୱାନ୍ ଏସ୍ତିୱାଲେ ବାଦ୍ଲୁ ଅନାନ୍ ନାସ୍ତିୱାଲେ ଏନ୍ ଦୟା କିଦେଙ୍ଗ୍ ଆଟ୍ଏନ୍ । ୱାନ୍ ଏମେବା ଦାରା ସିନିତାନିଙ୍ଗ୍ ମାନାଏନ୍; ଗି ନିନ୍ ନାଣ୍ଡ ଲାସ୍ ସିତିଙ୍ଗାବା ୱାନ୍ ମାନାଏନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.