Konda Porja Bible
ହିତୋପଦେଶ 8
ଗ୍ୟାନ୍ଦି ୱେଡ଼ିକା
ଗ୍ୟାନ୍ ଇନିକା କୁକ୍ଏତ୍ ?
ବୁଦି ଇନିକା ନାଣ୍ଡ ଆଉଲି ଆଏତ୍ ?
ୱାଦ୍ ସାରି ଲାକ୍ତୁରି ମୁସ୍କୁରି ବାଡିଦି ଟିପୁଦୁ,
ସାର୍ରିଦିୱିଜୁ ଡେଣା ବାଡିଦୁ ନିଲ୍ନାତ୍ ।
ୱାଦ୍ ଗାଡ଼୍ତି ସେର୍ଲା ଲାକ୍ତୁ, ଗାଡ଼୍ତି ଡ଼ୁଗୁନି ସେର୍ଲାଦୁ,
ସେର୍ଲାଦି ଡ଼ୁଗୁନି ବାଡିଦୁ ତେବାଜି ନାଣ୍ତ ଆଉଲିଆଜି କୁକ୍ସି ଇନାତ୍,
“ଏ ଲୋକୁ, ନାନ୍ ମିଙ୍ଗିଁ କୁକ୍ସିନା;
ମାରି, ଲୋକା ଉଣ୍ତିଙ୍ଗ୍ ନା ବଲୁ ମାନାତ୍ ।
ଏ ଅବୁଜା ଲୋକୁ, ଜାଗାର୍ତାଦି ମାଟା ବୁଜାଦୁ;
ଏ ମୁର୍କୁ ଲୋକୁ, ମିର୍ ନେଗି ବୁଦି ଆଦୁ ।
ୱେଣ୍ଡ୍ରୁ, ଏନ୍ଦାଇର୍ରିଙ୍ଗ୍ ନାନ୍ ନେଗି ମାଟାଦି ବିସୟ୍ ଇନା; ନାନ୍ ୱେୟୁ ମେଲାକିଜି ଟିକ୍ ମାଟା ଇନା ।
ଏନ୍ଦାଇର୍ରିଙ୍ଗ୍ ନା ୱେୟୁ ସତ୍ ଇନାତ୍, ସେଇକା ନା ୱେୟୁଦି କାଡ଼୍ନି ବିସୟ୍ ।
ନା ୱେୟୁଦି ୱିଜୁ ମାଟା ଦାର୍ମୁ;
ଆବେନୁ ମିସ୍ ମାରି ସୁରିମାଟା ଇନିକା ସିଲେତ୍ ।
ଆମାକାନ୍ ଆକା ବୁଜାନାନ୍, ୱାନି ଉଣ୍ତିଙ୍ଗ୍ ଆୟାୱିଜୁ ଟିକ୍; ମାରି, ସିକିୟା ପୟ୍ତି ଲୋକା ଉଣ୍ତିଙ୍ଗ୍ ଆକା ନାଣ୍ଡ ନେଗେତ୍ ।
ୱେଣ୍ଡିଦି ବାଦ୍ଲୁ ନା ମାଟା ମାରି ବାସେକିତି ବାଙ୍ଗାରାମ୍ତି ବାଦ୍ଲୁ ଗ୍ୟାନ୍ ଆସ୍ତୁ ।
ଏନ୍ଦାଇର୍ରିଙ୍ଗ୍ ଗ୍ୟାନ୍ ବାଙ୍ଗାରାମ୍ ମାଣାନ୍ ନେଗିକା ମାରି ୱିଜୁ ନେଗି ଜିନିସ୍ ଦାନି ୱାଲେ ସାମାନ୍ ଆଦେଙ୍ଗ୍ ଆଏତ୍ ।
ନାନ୍ ଗ୍ୟାନ୍, ଜାଗାର୍ତାଦିଙ୍ଗ୍ ନିଜେଦି ତେବାନି ବାଡି କିତାମାନା, ମାରି, ବୁଦି ମାରି ତାନି ବୁଜାନିକା ପୋଇନାତ୍ ।
ପ୍ରବୁଦି ବିସୟ୍ତିଙ୍ଗ୍ ନାନୁ ତିଲାନା, ତାଗ୍ଇତାନିଙ୍ଗ୍ କାଡ଼୍ନା; ଆକାର୍, ଗର୍ବ ମାରି ସେଇସାରି ମାରି ସୁରି ୱାର୍ଗିନି ୱେୟୁ ନାନୁ କାଡ଼୍ନା ।
ନେଗି ସିନ୍ତା ମାରି ନେଗି ବୁଦି ନା ମାନୁ ମାନାତ୍;
ନାନୁ ନିଜେ ବୁଜାଜିନା; ନା ମାନୁ ସାକ୍ତି ମାନାତ୍ ।
ନା ମାଣାନ୍ ରାଜାର୍ ସାସନ୍ କିନାର୍ ମାରି ସାସନ୍କିନିକାର୍ ସତ୍ ବିସାର୍ କିନାର୍ ।
ନା ମାଣାନ୍ ସାସନ୍କିନିକାର୍, ପେରିକାର୍ ମାରି ଦୁନିଆଦି ୱିଜୁ ବିସାର୍ କିନିକାର୍ ସାସନ୍ କିନାର୍ ।
ଆମାକାର୍ ନାଙ୍ଗିଁ ଜିବନ୍ନୋନାର୍, ନାନ୍ ୱାରିଙ୍ଗ୍ ଜିବନ୍ନୋନା, ମାରି ଆମାକାର୍ ଜାତୁନ୍ଦାନ୍ ନାଙ୍ଗିଁ ରେବାନାର୍, ୱାର୍ ନାଙ୍ଗିଁ ପୋଇନାର୍ ।
ନା ମାନୁ ଦନ୍ ମାରି ପେରିଦରୁ ମାନାତ୍, ମାରି, ନାସ୍ଟୁ ଆଇ ସମ୍ପତି ମାରି ଦାର୍ମୁ ମାନାତ୍ ।
ନା ପଲ୍ ନେଗି ବାଙ୍ଗାରାମ୍ଦି ମାଣାନ୍ ନେଗିକା;
ମାରି, ନା ଉଣ୍ତାକିନିକା ନେଗି ୱେଣ୍ଡିଦି ମାଣାନ୍ ନେଗେଣ୍ଡ୍ ।
ନାନ୍ ଦାର୍ମୁଦି ସାରିଦୁ, ବିସାର୍ କିନି ସାରି ଲୋଇ ବୁଲାନା,
ମାରି ଆମାକାର୍ ନାଙ୍ଗିଁ ଜିବନ୍ନୋନାର୍, ୱାରିଙ୍ଗ୍ ୱିଜୁ ସମ୍ପତିଦି ଅଦିକାରିର୍ କିନା ମାରି ୱାରି ଇଡ୍ନି ବାକ୍ରା ନାଣ୍ତ ଦନ୍ ପୁରା କିନା;
ପ୍ରବୁ ନିଜେଦି ପାଣି ଆରାମ୍ କିନି ଆଗ୍ଡ଼ି, ୱାନି ୱିଜୁ ପାଣିଦି ଆଗ୍ଡ଼ି ନାଙ୍ଗିଁ ତିଆର୍ କିତାମାର୍ହାନ୍ ।
ପୁର୍ବେକାଡ଼ାଦାନ୍ ବା ଆଗ୍ଡ଼ିରି କାଡ଼ାଦାନ୍ ମାରି ଦୁନିଆଦି ମୁଲ୍ ତିଆର୍ଆତି ଆଗ୍ଡ଼ିରାନ୍ ନାନୁ ମାନା ।
ସାମ୍ଦୁର୍ ୱିଜୁ ସିଲେଣ୍ଡା ମାର୍ହି ବେଡ଼ାଦୁ, ଜଲାଏରୁ ୱିଜୁ ସିଲେଣ୍ଡା ମାର୍ହି ବେଡ଼ାଦୁ ନାନୁ ଜନମ୍ ଆତାମାନା;
ମାରି, ଗରକୁ ମାରି ଇସ୍ରି ଗରକୁ ତିଆର୍ ଆନି ଆଗ୍ଡ଼ିନେ ନାନୁ ଜନମ୍ ଆତାମାନା;
ଆୟା ବେଡ଼ାଦୁ ବୁମି, ମାରି ବାଟାବାଇଲୁ, ମାରି ଦୁନିଆଦି ଦୁଡ଼ି ୱାନ୍ ତିଆର୍ କିଏଣ୍ଡା ମାର୍ହାନ୍ ।
ଆମା ବେଡ଼ାଦୁ ୱାନ୍ ବାଦଡ଼୍ ତିର୍ କିତାନ୍, ଆୟା ବେଡ଼ାଦୁ ନାନୁ ଆବେନୁ ମାର୍ହା,
ଆମା ବେଡ଼ାଦୁ ୱାନ୍ ସାମ୍ଦୁର୍ତି ଗୁମି ଏରୁ ମୁସ୍କୁ ସାନ୍ଦି ତିଆର୍ କିତାନ୍,
ମାରି ମୁସ୍କୁରି ବାଦଡ଼୍ତିଙ୍ଗ୍ ଡାଟ୍ କିତାନ୍
ମାରି ସାମ୍ଦୁର୍ତି ଉସେଙ୍ଗ୍ୱିଜୁ ନାଣ୍ଡ ଏରୁ ସତେ;
ଏରୁୱିଜୁ ଏଣ୍ଡେସ୍ ୱାନି ମାଟା ଅମାନ୍ୟ କିଦେଙ୍ଗ୍ ଆଟ୍ଏତ୍, ଇୟାଉଣ୍ଡିଙ୍ଗ୍ ଆମା ବେଡ଼ାଦୁ ୱାନ୍ ସାମ୍ଦୁର୍ତି ସାନ୍ଦି ତିଆର୍ କିତାନ୍ ମାରି ଆମା ବେଡ଼ାଦୁ ଦୁନିଆଦି ମୁଲ୍କୁନାଦି ସିନା କିତାନ୍;
ଆୟା ବେଡ଼ାଦୁ ନାନ୍ ୱାନି ଲାକ୍ତୁ ପାଣିକିନିକାନ୍ ମାର୍ହା; ମାରି, ନାନ୍ ୱିଜୁଦିନ୍ ୱେଡ଼ିକା ଆଜି ୱାନି ଆଗ୍ଡ଼ି ୱିଜୁଦିନ୍ ୱେଡ଼ିକା କିତା ।
ମାରି, ୱାନି ଦୁନିଆଦୁ ୱେଡ଼ିକା କିତା ମାରି ଲୋକା ୱାଲେ ନା ୱେଡ଼ିକା ମାର୍ହାତ୍ ।
ଇୟାଉଣ୍ଡିଙ୍ଗ୍ ଏ ନା ମାରିନ୍କୁ, ନା ମାଟା ୱେଣ୍ଡ୍ରୁ, ଏନ୍ଦାଇର୍ରିଙ୍ଗ୍ ଆମାକାର୍ ନା ସାରି ଆସ୍ନାର୍, ୱାର୍ ଦନ୍ୟ ।
ନେଗିମାଟା ୱେନ୍ଜି ଗ୍ୟାନି ଆଦୁ; ମାରି, ଆକା ୱେନ୍ଜି ଏଲା କିମାଟ୍ ।
ଆମାକାନ୍ ନା ମାଟା ୱେନାନ୍ ମାରି ନା ସେର୍ଲା ଡାଗୁରୁ ଦିନାମି କାପ୍କିଜି ମାନ୍ଜିନାନ୍, ନା ସେର୍ଲାଦି ବନ୍ଦ୍ ଲାକ୍ତୁ ସନାନ୍, ଆୟା ଲୋକୁ ଦନ୍ୟ ।
ଏନ୍ଦାଇର୍ରିଙ୍ଗ୍ ଆମାକାନ୍ ନାଙ୍ଗିଁ ପୋଇନାନ୍, ୱାନ୍ ଜିବନ୍ ପୋଇନାନ୍ ମାରି ପ୍ରବୁଦି ଦୟା ପୋଇନାନ୍ ।
ମାତର୍ ଆମାକାନ୍ ନା ବିରୁଦ୍ତାନ୍ ପାପ୍ କିନାନ୍, ୱାନ୍ ନିଜେଦି ଜିବନ୍ତିଙ୍ଗ୍ ନାସ୍ଟୁ କିନାନ୍; ଆମା ୱିଜୁ ଲୋକୁ ନାଙ୍ଗିଁ କାଡ଼୍ନାର୍, ୱାର୍ ସାନିଦାନିଙ୍ଗ୍ ଜିବନ୍ନୋନାର୍ ।”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.