Konda Porja Bible
ହିତୋପଦେଶ 26
ଏଣ୍ତେସ୍ ଜେଟା କାଡ଼ାଦୁ ମାସୁ ମାରି ଆନାମ୍ କୟ୍ନି ବେଡ଼ାଦୁ ପିରୁ, ଆୟାୱାଜା ମୁର୍କୁଦିଙ୍ଗ୍ ସନ୍ମାନ୍ ସିଆଏତ୍ ।
ଅବିସାପ୍ ନିଙ୍ଗିଁ ନାସ୍ଟୁ କିଏତ୍ ଜଦି ନିନୁ ଆକା ପୟ୍ଦେଙ୍ଗ୍ ଜଗ୍ ସିଲେ । ୱାର୍ ପଟିଙ୍ଗାଁ ୱାଜା, ଏମେକେଙ୍ଗ୍ ଇମ୍ନେ ସନେ ମାରି ଏସ୍କାଙ୍ଗ୍ ତିର୍ ତେବାଉ ।
ଗଡ଼ା ଉଣ୍ତିଙ୍ଗ୍ କର୍ଡା; ଗଦ ଉଣ୍ତିଙ୍ଗ୍ ତର୍ନି ନାସୁ, ମାରି, ମୁର୍କୁଦି ମୁଟାମ୍ ଉଣ୍ତିଙ୍ଗ୍ ବାଡିଗା ।
ମୁର୍କୁଦିଙ୍ଗ୍ ୱାନି ବୁଦିସିଲି ଇସାବ୍ଦାନ୍ ମାଟା ଇନ୍ମାଟ୍, ୱେର୍ତିଙ୍ଗା ନିନୁ ବା ୱାନି ସାମାନ୍ ଆନି ।
ମୁର୍କୁଦିଙ୍ଗ୍ ୱାନି ବୁଦିସିଲି ଇସାବ୍ଦାନ୍ ମାଟା ୱେର୍ତୁ, ସିଲେତିଙ୍ଗ୍ ୱାନ୍ ନିଜେଦି ଆଗ୍ଡ଼ି ନିଜେଦିଙ୍ଗ୍ ବୁଦିମାନ୍ ଇଜି ଅଡ଼୍ବିନାନ୍ ।
ମୁର୍କୁ ଲୋକ୍ତି କିୟୁଦୁ ଏନ୍ ନେଗି କାବୁର୍ ପୋକ୍ନାନ୍, ୱାନ୍ ନିଜେଦି ପାଦାମ୍ ନିଜେ କୋୟ୍ଜି କାସ୍ଟୁ ପୋଇନାନ୍ ।
ସଟା ଲୋକ୍ତି କାଲୁ ଏଣ୍ତେସ୍ ଲେଡ଼େଲେଡ଼େ ଦୁଙ୍ଗ୍ନାତ୍, ବୁଦିସିଲି ଲୋକ୍ତି ୱେୟୁଦୁ ଏଣ୍ତେସ୍ ନେଗି ମାଟା ।
ଗପେନାଦୁ କାଲୁ ତର୍ନିକା ମଣି ଏଣ୍ତେସ୍, ମୁର୍କୁ ଲୋକ୍ଦିଙ୍ଗ୍ ସନ୍ମାନ୍ ସିନିକା ଆୟାୱାଜା ।
ସସ୍ତି ଲୋକ୍ କିୟୁଦୁ ସାମ୍କୁ ଆସ୍ନିକା ଏଣ୍ଡେସ୍, ମୁର୍କୁ ଲୋକା ୱେୟୁଦୁ ନେଗି ମାଟା ଆୟାୱାଜା ।
ବନ୍ୱାଏନ୍ ଏଣ୍ତେସ୍ ୱିଜେରିଙ୍ଗ୍ କାଣ୍ତିଆକାବ୍ରା କିନାନ୍, ଆୟାୱାଜା ଆୟା ଲୋକ୍, ଆମାକାନ୍ ମୁର୍କୁଦିଙ୍ଗ୍ ବୁତି ସିନାନ୍ ମାରି ଏନ୍ ସାରିଦୁ ବୁଲାନି ଲୋକ୍ତିଙ୍ଗ୍ ବୁତି ସିନାନ୍ ।
ନୁକୁଡ଼ି ଏଣ୍ତେସ୍ କାକ୍ତି ୱେନ୍କା ମାରିଡ଼େସି ତିନାତ୍, ଜାରିଦିଙ୍ଗ୍ଜାରି ନିଜେଦି ବୁଦିସିଲି ପାଣି କିନି ମୁର୍କୁ ଲୋକ୍ ଆୟାୱାଜା ।
ଆମାକାନ୍ ନିଜେଦି କାଣାଗାଦୁ ବୁଦିଦିକାନ୍, ଇୟାୱାଜା ଲୋକ୍ତିଙ୍ଗ୍ ସୁଡ଼ୁଜିନି ନ ? ୱାନି ବାଦ୍ଲୁ ମୁର୍କୁ ବିସୟ୍ତାନ୍ ନାଣ୍ଡ୍ ଆସା ମାନାତ୍ ।
ଗାଡ଼ିଆ ଲୋକ୍ ଇନାନ୍, “ସାରିଦୁ ପାର୍ଟା ନରେସ୍ ମାନାତ୍, ଡେଣାଦୁ ପାର୍ଟା ନରେସ୍ ମାନାତ୍ ।”
ଏଣ୍ଡେସ୍ଗି କାବ୍ଜାଦାନ୍ ସେର୍ଲା ତିର୍ବିନାତ୍, ଆୟାୱାଜା ଗାଡ଼ିଆ ନିଜେଦି ଗୁରିତି ଟାଟିଦୁ ତେର୍ନାନ୍ ।
ଗାଡ଼ିଆ ଲୋକ୍ ସାଡ଼୍ୱାଦୁ କିୟୁ ରସି ମାରି ଅର୍ସୁ ଉଣ୍ତେଙ୍ଗ୍ ବଦା କିଏନ୍ ।
ସାତ୍ ଲୋକୁ ନେଗି ବିସାର୍ କିଜି ବୁଦିଦି ମାଟା ୱେର୍ନି ଲୋକା ବାଦ୍ଲୁ ଗାଡ଼ିଆ ଲୋକୁ ନିଜେଦି କାଣାଗାଦୁ ବୁଦିଦିକାନ୍ ।
ଆମା ଲୋକୁ ସାରିଦୁ ସଲ୍ପୁ ସଲ୍ପୁ ନିଜେଦି ନେସ୍ଇ ଲୋକା ଜାଟିଜଗ୍ଡ଼ାଦୁ ରିସା ଆନାନ୍, ୱାନ୍ ନୁକୁଡ଼ିଦି ଗିତଣି ଆସ୍ନି ଲୋକ୍ ୱାଜା ।
ସିସୁକାସ୍ନି ପଟ୍କି, ତିର୍ ମାରି ସାପିସ୍କିନି ତିର୍ ପୋକ୍ନି ବାୟା ଏମେଜାକୁ;
ନିଜେଦି ପାଡ଼ାକାଦି ଲୋକାଙ୍ଗ୍ ଆମାକାନ୍ ବାଣ୍ଡିସ୍ କିଜି ଇନାନ୍, “ନାନ୍ ଇନିକା ସାଲାକି କିଏଜିନା ?” ୱାନ୍ ଆୟାୱାଜା ।
ୱେର୍କୁ ୱିଜିତିଙ୍ଗା ସିସୁ ନାମ୍ନାତ୍, ସୁରି ୱେର୍ନିକା ତେବାତିଙ୍ଗାଁ ଜାଟିଙ୍ଗ୍ ସାନ୍ତି ଆନାତ୍ ।
ଆମାଜାକୁ କାସ୍ନି ଡ଼ିବୁଦିଙ୍ଗ୍ ଡ଼ିବୁ ମାରି ସିସୁଦିଙ୍ଗ୍ ୱେର୍କୁ, ଆୟାୱାଜା ଜାଟିଜଗ୍ଡ଼ା କିଦେଙ୍ଗ୍ ଜାଟିଙ୍ଗ୍ କିନି ଲୋକୁ ।
ଗିତଣିଦୁ ୱେର୍ହି ମାଟା ସାୱିଦି କାଦି ୱାଜା, ଆକା ଜିବନ୍ତି ଲୋଇ ସନାତ୍ ।
ତାଗ୍ଇ ମାଟେଙ୍ଗ୍ ଇଜିମାନି ୱେୟୁ ମାରି ସେଇ ଜିବନ୍ ଇକା ସାଟିଦୁ ୱେଣ୍ଡିଦାନ୍ ଡାଲେଆତି ୱାଜା ।
କାଡ଼୍ନିକାନ୍ ନିଜେଦି ୱେୟୁଦାନ୍ ସୁରି ମାଟା ଇନାନ୍, ମାତର୍ ମନ୍ତୁ ବାଣ୍ତିସ୍କିନି ମାଟା ମାନାତ୍ ।
ୱାନ୍ ସାୱିଦି ମାଟାଦାନ୍ ଇର୍ରିଙ୍ଗା, ୱାନିଙ୍ଗ୍ ବିସ୍ବାସ୍ କିମାଟ୍, ଇର୍ରିଙ୍ଗ୍ ୱାନି ଜିବନ୍ତୁ ସାତ୍ ଗଟା କାଡ଼୍ନି ବିସୟ୍ ମାନ୍ଜିନାତ୍ ।
ୱାନି କାଡ଼୍ନିକା ସୁରିଦାନ୍ ନିଜେଦିଙ୍ଗ୍ ଆଡ଼ିକ୍ତିଙ୍ଗ୍ବା ୱାନି ସେଇକା ନାଣ୍ତ ଲୋକାବାନୁ ୱିଙ୍ଗିଁନାତ୍ ।
ଆମାକାନ୍ ଗୁଟା କାର୍ନାନ୍, ୱାନ୍ ନିଜେ ଆୟା ଲୋଇ ଆର୍ନାନ୍; ମାରି, ଆମାକାନ୍ କାଲ୍କୁ ଗୁରୁପ୍ନାନ୍, ଆକା ୱାନି ମୁସ୍କୁ ଡ଼େସି ଆର୍ନାତ୍ ।
ମିସ୍ମାଟା ୱେର୍ନି ୱେତଲ୍ ଆମାୱାନିଙ୍ଗ୍ ସାପିସ୍ କିନାତ୍, ୱାନିଙ୍ଗ୍ ନେ କାଡ଼୍ନାତ୍; ମାରି, ସାୱିସାୱିଦି ମାଟା ୱାର୍ଗିନିୱାନି ୱେୟୁ ସାନିକା ତାନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.