Konda Porja Bible
ହିତୋପଦେଶ 25
ସଲମନତି ନାଣ୍ତ ନେଗି ମାଟେଙ୍ଗ୍
ଇୟା ରାସାତି ନେଗି ମାଟେଙ୍ଗ୍ ୱିଜୁ ନେ ସଲମନତି ରାସ୍ତିକା ମାରି ଜିହୁଦାଦି ରାଜା ହିଜକିୟଦି ଲୋକୁ ଆକା ସୁଡ଼୍ଜି ରାସ୍ତାର୍ ।
ମାଟା ମାରାକ୍ନିକା ମାପୁରୁଦି ଗୌରବ୍; ମାତର୍ ମାଟାଦି ରେବାନିକା ରାଜାଦି ଗୌରବ୍ ।
ମୁସ୍କୁପୁର୍ ଏଣ୍ତେସ୍ ନାଣ୍ତ ମୁସ୍କୁ ମାରି ଦୁନିଆ ଏଣ୍ତେସ୍ ନାଣ୍ତ ନିରିକା, ମାରି ଆୟାୱାଜା ରାଜାରି ମନ୍ ବୁଜାନିକା ନାଣ୍ତ କାସ୍ଟୁ ।
ୱେଣ୍ଡିଦାନ୍ ପିଡ଼୍ମୁ କୁତ୍ସ ପକ୍ଆ, ଆର୍ତିଙ୍ଗ୍ ସୁନାରି ଉଣ୍ତିଙ୍ଗ୍ ଉନ୍ଡ୍ରି ପାଣି ସିନି ଜିନିସ୍ ସୋନାତ୍ । ରାଜାଦି ଆଗ୍ଡ଼ିରାନ୍ ତାଗ୍ଇୱାରିଙ୍ଗ୍ ଆକ କିଦୁ, ମାରି, ୱାନି ରାଜାଗାଦି ଦାର୍ମୁଦାନ୍ ସୁସ୍ତି ଆନାତ୍ । ରାଜାଦି ଆଗ୍ଡ଼ି ନିଜେଦିଙ୍ଗ୍ ପେରିକାନ୍ କିମା, ମାରି, ପେରି ଲୋକା ବାଡିଦୁ ନିଲ୍ମା । ଇର୍ରିଙ୍ଗ୍ ଆମା ପେରି ଲୋକ୍ତିଙ୍ଗ୍ ନି କାଣୁକୁ ସୁଡ଼ୁତେମାନେ, ୱାନି ଲାକ୍ତୁ ନିନୁ ଇସ୍ରିକାନ୍ ଆନି ବାଦ୍ଲୁ ମାତର୍ ଇବେନୁ ରାଆ ଇଜି ନିଙ୍ଗିଁ ୱେର୍ନିକା ନେଗେତ୍ ।
ଜାଟିଜଗଡ଼ା କିଦେଙ୍ଗ୍ ଦାପ୍ରେନେ ଆତ୍ରେ ସଲ୍ମା, ସର୍ରିଙ୍ଗ୍ ଆବେନୁ ସାରାସାରି ନି ପାଡ଼ାକାଦି ଲୋକୁ ନିଙ୍ଗିଁ ସେମାର୍ କିତି ୱେନ୍କା ନିନୁ ଇନିକା କିନି ?
ନିଜେଦି ପାଡ଼ାକାଦି ଲୋକା ୱାଲେ ନିଜେଦି ଜାଟିଜଗ୍ଡ଼ାଦି ବିସାର୍ କିଆ, ମାରି, ଆଇୱାନି ମାର୍ଗିତି ମାଟା ୱିକ୍ମା । ସିଲେତିଙ୍ଗ୍ ୱେନିକାର୍ ନିଙ୍ଗିଁ ସେମାର୍ କିନାର୍, ମାରି ନି ମତ୍ ତେବାଏତ୍ ।
ନେଗେନ୍ତାନ୍ ସତି ସିନ୍ତା ୱେଣ୍ଡିଦି ସାଡ଼୍ୱାଦୁ ବାଙ୍ଗାରାମ୍ ବାନା କିତି ୱାଜା । ବାଙ୍ଗାରାମ୍ ଗିତଣି ପାଗ୍ଡ଼ା ମାରି ନେଗି ବାଙ୍ଗାରାମ୍ଦି ପୁସା ଏମେଜାକୁ, ମନ୍ସିଜି ୱେନି ଲୋକ୍ତି ଉଣ୍ତିଙ୍ଗ୍ ବୁଦିମାନିକାନ୍ ଲାଗାନିକା ଆୟାୱାଜା ।
ପାସିଦି ବେଡ଼ାଦୁ ମାସୁଦି ପିନି ଏମେଜାକୁ, ପୋକ୍ନିୱାରି ଉଣ୍ତିଙ୍ଗ୍ ବିସ୍ବାସ୍ଦି ଦୁତ୍ ଆୟାୱାଜା; ଇର୍ରିଙ୍ଗ୍ ୱାନ୍ ନିଜେଦି ମାଲିକ୍କା ଜିବନ୍ତୁ ସାନ୍ତି ସିନାତ୍ ।
ପିରୁ ରେଇ ବାଦଡ଼୍ ମାରି ଗାଲି ଏମେଜାକୁ, ନିଜେଦି ଦାନ୍ ବିସୟ୍ତାନ୍ ମିସ୍ ଇଜି ଗର୍ବକିନି ଲୋକୁ ଆୟାୱାଜା ।
ସାସ୍ତାନ୍ ମାଣାନ୍ ସାସନ୍କିନିୱାନିଙ୍ଗ୍ ମାନାକିଦେଙ୍ଗ୍ ଆନାନ୍, ମାରି ସାନ୍ତି ୱେୟୁ ପେଡ଼େକୁ ରୁକ୍ନାତ୍ ।
ନିନୁ ଇନିକା ପୁକି ପୋଇତିମାନି ? ନିଙ୍ଗିଁ ଏସୋ ଦର୍କାର୍, ନାସୋ ତିନ୍ଆ; ନାଣ୍ଡ୍ ତିର୍ରିଙ୍ଗା ନିନୁ ଆକା କାକାଜି ପକ୍ନି ।
ନିନୁ ନି ପାଡ଼ାକାଦି ଲୋକାଦି ଇଲୁଦୁ ଜାରିଦିଙ୍ଗ୍ଜାରି ସଲ୍ମା, ସିଲେତିଙ୍ଗ୍ ନି ମୁସ୍କୁ ରିସା ଆଜି ୱାନ୍ ନିଙ୍ଗିଁ କାଡ଼୍ନାନ୍ ।
ନିଜେଦି ପାଡ଼ାକାଦି ଲୋକା ବିରୁଦ୍ତାନ୍ ଏନ୍ ମିସ୍ ସାକି ସିନାନ୍, ୱାନ୍ ଜୁଦ୍ କିନି ଗଦା, କାଣ୍ଡା ମାରି ଦାରାଦି ଦନୁ ତିର୍ ୱାଜା;
କାକୁର୍ତି ବେଡ଼ାଦୁ ବିସ୍ବାସ୍କିଇ ଲୋକାମାନୁ ବିସ୍ବାସ୍ କିନି ଏମେଜାକୁ, ରୁଙ୍ଗିତି ମାନି ପାଲ୍କୁ ମାରି କାଲୁଦି ଗାଟିଙ୍ଗ୍ ମସ୍କେ ଆତିମାନି ପାଦାମ୍ ୱାଜା ।
ପିନି କାଡ଼ାଦୁ ୱାତିଗନ୍ଦା କୁତ୍ସି ଅନିକା ମାରି ଗାଉଁ ମୁସ୍କୁ ସଇନିରସ୍ ଉସ୍ନି ଲୋକୁ ଏଣ୍ତେସ୍, ଦୁକ୍ତି ଲୋକା ଲାକ୍ତୁ ପାଟା ପାର୍ନି ଲୋକ୍ ଆୟାୱାଜା ।
ନି ସାତ୍ରୁ ବାଙ୍ଗାଁ ସାତିଙ୍ଗା, ୱାନିଙ୍ଗ୍ କାଦି ଉଟ୍ପିସ୍ କିଦୁ; ମାରି, ୱାନ୍ ଏର୍କି ଆତିଙ୍ଗାଁ, ୱାନିଙ୍ଗ୍ ଏରୁ ଉଟ୍ପିସ୍ କିଦୁ;
ଆବେନୁ ନିନୁ ୱାନି ତାଲାଦୁ କାସ୍ସିମାନି ଡ଼ିବୁକୁ ଗାଦି କିଜି ଇଡ୍ନି, ମାରି ପ୍ରବୁ ନିଙ୍ଗିଁ ଇନାମ୍ ସିନାନ୍ ।
ଏଣ୍ଡେସ୍ ଡେବ୍ରା ତରଟି ଗାଲି ପିରୁ ତାନାତ୍, ଆୟାୱାଜା ସୁରି ଲୋକ୍ତି ୱେୟୁ ରିସା ତାନିକା ।
ଜାଟିଜଗ୍ଡ଼ା କିନି ଆଡ଼ି ୱାଲେ ଅର୍ସେ ଉଡ୍ରେ ଇଣ୍ଡ୍ର ବାସା କିନି ବାଦ୍ଲୁ ସାତ୍ଦି ଉନ୍ଡ୍ରି କନାଦୁ ବାସା କିନିକା ନେଗେଣ୍ଡ୍ ।
ଏର୍କି ଆତି ଜିବନ୍ତିଙ୍ଗ୍ ସିତ୍ଡ଼ି ଏରୁ ଏଣ୍ତେସ୍, ଆକ ଦେସ୍ତାନ୍ ୱାଜିମାନି ନେଗିକାବୁର୍ ଆୟାୱାଜା ।
ଗଣେଙ୍ଗ୍ ଏରୁ ବାନ୍ଦୁ ମାରି ସେଇ ଜଲାଏରୁ ଏମେଜାକୁ, ସେଇ ଲୋକା ଆଗ୍ଡ଼ି ତିର୍ଗିନି ଦାର୍ମୁ ଲୋକୁ ଆୟାୱାଜା ।
ନାଣ୍ଡ୍ ପୁକି ତିନିକା ଏଣ୍ଡେସ୍ ନେଗେଣ୍ଡ୍ ସିଲେ, ଆୟାୱାଜା ଲୋକୁ ନିଜେଦି ଗୌରବ୍ ରେବାଦେଙ୍ଗ୍ ଗୌରବ୍ ସିଲେ ।
ଆମାକାନ୍ ନିଜେଦିଙ୍ଗ୍ ତେବାକିଦେଙ୍ଗ୍ ଆଟ୍ଏନ୍, ଆକା ରୁଙ୍ଗିତିକା ମାରି କଟିସିଲି ଗାଡ଼୍ ୱାଜା ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.