Konda Porja Bible
ହିତୋପଦେଶ 27
ନିନୁ ୱିଗେରି ବିସୟ୍ତାନ୍ ଗର୍ବ ମାଟା ଇନ୍ମା; ଏନ୍ଦାଇର୍ରିଙ୍ଗ୍ ଉନ୍ଡ୍ରେ ନାଣ୍ତିଙ୍ଗ୍ ଇନିକା ଗଟେ ଆନାତ୍, ଆକା ନିଙ୍ଗିଁ ଜାଣା ସିଲେତ୍ ।
ଆଇ ଲୋକୁ ନିଙ୍ଗିଁ ଗୌରବ୍ କିପିନ୍, ମାତର୍ ନି ନିଜେଦି ୱେୟୁ ଆକା କିମାକିତ୍; ଆଇ ଲୋକୁ କିପିନ୍, ମାତର୍ ନି ନିଜେଦି ୱେୟୁ ଆକା କିମାକିତ୍ ।
ବଜୁ କାଲୁ ମାରି ବଜୁ ମାଣୁ; ମାତର ବୁଦିସିଲି ଲୋକା ରିସା, ଆୟା ରୁଣ୍ଡି ମାଣାନ୍ ବା ନାଣ୍ଡ ବଜୁ ।
ଗିଦ୍ରି ଦୟା କିଏତ୍ ମାରି ନାଣ୍ତ ରିସା ନାସ୍ଟୁ କିନାତ୍; ମାତର୍ ମନ୍ତି ରିସା ଆଗ୍ଡ଼ି ଏନ୍ ନିଲ୍ଦେଙ୍ଗ୍ ଆଟ୍ନାନ୍ ?
ମାରାଗ୍ଜି ଜିବନ୍ନୋନି ମାଣାନ୍ ୱିଜେରି ଆଗ୍ଡ଼ି ଲାଗାନିକା ନେଗେତ୍ ।
ସଙ୍ଗ୍ତି ମାଣାନ୍ ଗାଉ ଆନିକା ବିସ୍ବାସ୍ କିଦେଙ୍ଗ୍ ଆନାତ୍; ମାତର୍ ସାତ୍ରୁ ନଣ୍ଡ୍ନିକା ନାଣ୍ତ ।
ପଟା ପାଜିତିକାନ୍ ପୁକିଟାଟି କାଡ଼୍ନାନ୍; ମାତର୍ ବାଙ୍ଗାଦିୱାନିଙ୍ଗ୍ କେଇନି ଜିନିସ୍ୱିଜୁ ସାୱି ଆନାତ୍ ।
ଆମା ଲୋକ୍ ନିଜେଦି ବାଡି ଡ଼ିସ୍ସି ବୁଲାନାନ୍, ୱାନ୍ ଜାଲୁଦାନ୍ ବୁଲାନି ପଟିଦି ୱାଜା ଆନାନ୍ ।
ନିୟୁ ମାରି ବାସ୍ନା ଦୁପ୍ଣି ଜିବନ୍ତିଙ୍ଗ୍ ୱେଡ଼ିକା କିନାତ୍, ଆୟାୱାଜା ସଙ୍ଗ୍ତି ଜିବନ୍ତି ମାଟାଦାନ୍ ସନି ମାନାନିକା ମନ୍ତିଙ୍ଗ୍ ୱେଡ଼ିକା କିନାତ୍ ।
ନିଜେଦି ସଙ୍ଗ୍ଦିଙ୍ଗ୍ ମାରି ବୁବାଦି ସଙ୍ଗ୍ଦିଙ୍ଗ୍ ଡ଼ିସ୍ମା; ମାରି, ନି ବାଦାଦି ଦିନ୍ତୁ ନିଜେଦି ତଡ଼ାନ୍ଦି ଇଲୁଦୁ ସଲ୍ମା; ଆକଣି ତଡ଼ାନ୍ଦି ମାଣାନ୍ ଲାକ୍ତୁରି ଲୋକୁ ନେଗେଣ୍ଡ୍ ।
ଏ ନା ମାରିନ୍, ବୁଦି ଆଆ ମାରି ନା ଜିବନ୍ତିଙ୍ଗ୍ ୱେଡ଼ିକାକିବିସ୍ କିଆ; ଆବେଟ୍ ନାନ୍ ନିଜେଦି ନିନ୍ଦା କିନିୱାନିଙ୍ଗ୍ ଡ଼େସି ୱେର୍ତେଙ୍ଗ୍ ଆଟ୍ନା ।
ସାଲାକି ଲୋକୁ ବାଦା ସୁଡ଼ୁଜି ନିଜେଦିଙ୍ଗ୍ ଆଡ଼ାକ୍ନାନ୍; ମାତର୍ ଜାଗାର୍ତା ସିଲି ଲୋକ୍ ଆଗ୍ଡ଼ି ସଲ୍ସି ସାସ୍ତି ପୟ୍ନାନ୍ ।
ଆମାକାନ୍ ନେସ୍ଇ ଲୋକ୍ ଉଣ୍ତିଙ୍ଗ୍ ଏନ୍ ଦାୟି ଆନାନ୍, ୱାନି ଆଙ୍ଗିଁପାସିଆ ଅଆ; ମାରି, ଆମାକାନ୍ ଆଇ ଆଇମାଦି ଉଣ୍ତିଙ୍ଗ୍ ଦାୟି ଆନାନ୍, ୱାନିଙ୍ଗ୍ ବାନ୍ଦା ଇଡ୍ଆ ।
ନି ସଙ୍ଗ୍ରିଙ୍ଗ୍ ଉଟ୍ଲା ନାଡ଼ାକାଦେ ନାଣ୍ଡ ପେରି ୱେୟୁଦାନ୍ ମାଡ଼ିସ୍ କିଜି ନିକ୍ନିକା ଆକା ୱାନିଙ୍ଗ୍ ଅବିସାପ୍ ସିନାତ୍ ।
ନାଣ୍ଡ ପିରୁଦି ଦିନ୍ତୁ ପିରୁଡିସ୍ଇ ବଟୁ ୱାଜା ମାରି ଜାଟିଜଗ୍ଡ଼ାକିନି ଆଇମା ଆୟାୱାଜା, ଇୟା ରୁଣ୍ତି ଉନ୍ଡ୍ରେ ସାମାନ୍ ।
ଆମାକାନ୍ ତାନିଙ୍ଗ୍ ଆଙ୍ଗ୍ନାନ୍, ୱାନ୍ ଗାଲିଦିଙ୍ଗ୍ ଆଙ୍ଗ୍ନାନ୍ ମାରି ୱାନି ଉଣି କିୟୁ ନିୟୁ ମୁସୁକୁ ଆର୍ନାତ୍ ।
ଆମାଜାକୁ ଇନ୍ମୁଦିଙ୍ଗ୍ ଇନ୍ମୁନେ ଦାରା କିନାତ୍, ଆୟାୱାଜା ଲୋକ୍ ନିଜେଦି ସଙ୍ଗ୍ତି ମକମ୍ ଜାୟ୍ କିନାନ୍ ।
ଆମାକାନ୍ ତଗା ମାରାନ୍ତିଙ୍ଗ୍ ଜାତୁନ୍ କିନାନ୍, ୱାନ୍ ଆବେଣି ପଲ୍ ତିନାନ୍; ମାରି, ଆମାକାନ୍ ନିଜେଦି ସାଉକାର୍ ଉଣ୍ତିଙ୍ଗ୍ ଜାତୁନ୍ କିନାନ୍, ୱାନ୍ ସନ୍ମାନ୍ ପୟ୍ନାନ୍ ।
ଆମାଜାକୁ ଏରୁଦୁ ମକମ୍ତି ନିଡ଼ିଗା ତର୍ନାତ୍, ଆୟାୱାଜା ଜିବନ୍ ଲୋକ୍ତିଙ୍ଗ୍ ୱାନି ଗୁଣୁ ତର୍ନାତ୍ ।
ଏଣ୍ଡେସ୍ଗି ପାତାଲ୍ ମାରି ସାନି ବାଡି ଏସ୍ତିୱାଲେ ସାନ୍ତି ସିଲେ, ଆୟାୱାଜା ଲୋକ୍ତି କାଣ୍ଗା ଏସ୍ତିୱାଲେ ବା ସାନ୍ତି ଆଏତ୍ ।
ୱେଣ୍ଡି ମାରି ବାଙ୍ଗାରାମ୍ ଜାଗ୍ଣିଦୁ ପରିକା ଆନାତ୍, ଆୟାୱାଜା ଗୁଣ୍ ପରିକା କିଆୟ୍ଆନାନ୍ ।
ନିନୁ ଗଦ୍ମୁଦି ୱାଲେ ବୁଦିସିଲିୱାନିଙ୍ଗ୍ କଲୁଦାନ୍ ଡାସ୍ତିଙ୍ଗ୍ ବା ୱାନି ବୁଦିସିଲିକା ଡ଼ିସ୍ସ ସଲ୍ଏତ୍ ।
ନିନୁ ନିଜେଦି ମେଣ୍ଡେଙ୍ଗ୍ ମାନ୍ଦାଦି ବିସୟ୍ ନେସ୍ନି ଉଣ୍ତିଙ୍ଗ୍ ଜାଗାର୍ତା ଆଆ, ମାରି ନିଜେଦି କଡିଙ୍ଗ୍ ଗରିଏଙ୍ଗ୍ ମାନ୍ଦା ବିସୟ୍ଦାନ୍ ନେଗେନ୍ତାନ୍ ସାରାକିଆ ।
ଇର୍ରିଙ୍ଗ୍ ଦନ୍ ୱିଜୁଦିନ୍ ତେବାଏତ୍ ମାରି ମୁକୁଟ୍ ଇନିକା ଜୁଗ୍ ଜୁଗ୍ ସାନ୍ଦି ତେବାନାତ୍ ?
ଲାଟା କଇତିଙ୍ଗା କଡ଼୍କି ଲାଟା କାଇନାତ୍, ମାରି ଗରକାଣି ଲାଟା ଉଣ୍ତା କିଆୟ୍ଆନାତ୍ ।
ମେଣ୍ଡାପିଲେକ୍ ନିଙ୍ଗିଁ ଆଙ୍ଗିଁ ପାସିୟା ସିନେ; ମାରି, ଗରିଆ ନି କିଡ଼ିଇଦି ଦାରା ୱାଜା ।
ମାରି, ଗରିଆ ପାଲୁ ନିଙ୍ଗିଁ ମାରି ନି ଇଲୁବେଲିଦିଙ୍ଗ୍ କାଦି ଉଣ୍ତିଙ୍ଗ୍ ନାଣ୍ଡ ଆନାତ୍; ମାରି, ନି ଦାସିକା ଉଣ୍ତିଙ୍ଗ୍ ଜିପ୍କା ଆନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.