Konda Porja Bible
ଜିସାଇୟ 53
ମା ମାଟା ଏନ୍ ବିସ୍ବାସ୍ କିତାମାନାର୍ ? ମାରି ସଦାପ୍ରବୁଦି ସାକ୍ତି ଆମାୱାନି ଲାକ୍ତୁ ତରିତାମାନାତ୍ ? ଇର୍ରିଙ୍ଗ୍ ୱାନ୍ ୱାରି ଆଗ୍ଡ଼ି ପାଡ଼ା ୱାଜା ମାରି ୱାର୍ତି ବୁମିଦୁ ନେରିତି ଦଲୁ ୱାଜା ପିରିତାର୍; ୱାନି ରୁପ୍ ଇନିକା ସବା ସିଲେତ୍; ମାରି, ୱାନିଙ୍ଗ୍ ସୁଡ଼ୁତିଙ୍ଗା, ମାପ୍ ଜେ ସାର୍ଦା କିନାଟ୍, ୱାନି ଇୟାୱାଜା ସୁନ୍ଦର୍ ସିଲେତ୍ । ୱାନ୍ କାଡ଼ାଇଆତାନ୍ ମାରି ଲୋକାଦି ଡ଼ିସ୍ତିକାନ୍; ଦୁଃକ୍ ଲୋକୁ ମାରି ଆଡ଼୍ବାତିକାନ୍, ମାରି ଲୋକୁ ଆମାୱାନି ମାଣାନ୍ ମୋକମ୍ ପିଡ଼ିକ୍ନାର୍, ଇୟାୱାଜା ଲୋକା ୱାଜା ୱାନ୍ କାଡ଼ାଇ ଆତାନ୍, ମାରି ମାଡ୍ ୱାନିଙ୍ଗ୍ ମାନ୍ୟ କିଏତାଟ୍ । ସତ୍ନେ ୱାନ୍ ମା ଜାତୁନ୍ ୱିଜୁ ଆସ୍ତା ମାନାନ୍ ମାରି ମା କାସ୍ଟୁ ୱିଜୁ ପିଣ୍ଡିତା ମାନାନ୍ । ମାରିବା ମାଡ୍ ୱାନିଙ୍ଗ୍ ଦୁଃକ୍ ମାରି ମାପୁରୁଦି ମାଣାନ୍ ଡାକାତିକା ମାରି ଦୁଃକ୍ତିକାନ୍ ଇଜି ମାନାତାପ୍ । ମାତର୍ ୱାନ୍ ମା ଅଦାର୍ମୁ ଉଣ୍ତିଙ୍ଗ୍ କାଣ୍ତିଆକାବ୍ରା ଆତାନ୍ ମାରି ମା ଦସ୍ ଉଣ୍ତିଙ୍ଗ୍ ଗୁଣ୍ଡ୍ଗୁଣ୍ଡା ଆତାନ୍; ମା ସାନ୍ତିଦି ସାସ୍ତି ୱାନି ମୁସୁକୁ ୱାତାତ୍ ମାରି ୱାନି ମାଡ୍ଡାକ୍ତି ମାଣାନ୍ ମାଡ୍ ନେଗେଣ୍ଡ୍ ଆତାପ୍ । ମାଡ୍ ୱିଜେରେ ମେଣ୍ଡେଙ୍ଗା ୱାଜା ଆଇ ସାରିଦୁ ସର୍ହିମାନିକା; ମାପୁ ୱିଜେରେ ନିଜେ ନିଜେଦି ସାରିଦୁ ଡ଼େସିୱାତାପ୍; ମାରି, ପ୍ରବୁ ମା ୱିଜେରି ଦସ୍ ୱାନି ମୁସୁକୁ ଅତାମାନାନ୍ । ୱାନ୍ ନାଣ୍ଡ କାସ୍ଟୁ ପୟ୍ତାନ୍, ମାରିବା ୱାନ୍ ନିଜେଦିଙ୍ଗ୍ ସାନ୍ତି କିଜି ନିଜେଦି ମାଟା ଇନ୍ଏତାନ୍; କାତ୍ତେଙ୍ଗ୍ ଅନି ମେଣ୍ଡାଦି ୱାଜା, ତାଲା କୋୟ୍ନି ଲୋକା ଆଗ୍ଡ଼ି ସାନ୍ତିଦି ମେଣ୍ଡା ୱାଜା ଆଜି ୱାନ୍ ନିଜେଦି ମାଟା ଇନ୍ଏତାନ୍ । ୱାନ୍ ନାଣ୍ତ କାସ୍ଟୁ ପୟ୍ତାନ୍ ମାରି ବିସାର୍ତାନ୍ ଆକ ଆତାନ୍; ମାରି, ୱାନ୍ ଜେ ଜିବନ୍ତି ଲୋକାଦି ଦେସ୍ତାନ୍ ଆକ ଆତାନ୍, ଇକା ୱାନି ବେଡ଼ାଦି ଲୋକା ମାଣାନ୍ ଏନ୍ ଅଡ଼୍ବିଏତାର୍ ? ମା ଲୋକା ଦସ୍ ଉଣ୍ତିଙ୍ଗ୍ ୱାନ୍ ମାଡ୍ତିରାନ୍ । ମାରି, ୱାନ୍ ଇନିବା ଅନିୟାଇ କିଇତିଙ୍ଗ୍ ବା ମାରି ୱାନି ମାଟାଦୁ ଇନି ବାଣ୍ତିସ୍କିନିକା ସିଲେତିଙ୍ଗ୍ ବା ଲୋକୁ ତାଗ୍ଇ ଲୋକା ୱାଲେ ୱାନି ମୁସ୍ନି ବାଡି ତିୟାର୍ କିତାର୍ ମାରି ସାତିବାନୁ ୱାନ୍ ଦନି ଲୋକା ୱାଲେ ସାଙ୍ଗ୍ ଆତାନ୍ । ମାରିବା ୱାନିଙ୍ଗ୍ ଗୁଣ୍ଡ୍ଗୁଣ୍ଡା କିଦେଙ୍ଗ୍ ପ୍ରବୁଦି ମୋନ୍ ଆତାତ୍; ୱାନ୍ ୱାନିଙ୍ଗ୍ ଦୁଃକ୍ କିତାମାନାନ୍; ମିର୍ ୱାନି ଜିବନ୍ତିଙ୍ଗ୍ ପାପ୍ତି ପୁଜାଦି ୱାଜା କିତିଦେର୍, ୱାନ୍ ନିଜେଦି କୁଟୁମ୍ ସୁଡ଼ୁନାନ୍, ୱାନ୍ ନାଣ୍ତଦିନ୍ ଜିନା ତେବାନାନ୍ ମାରି ୱାନି କିୟୁଦୁ ପ୍ରବୁଦି ବଦା ପୁରା ଆତାତ୍ । ୱାନ୍ ନିଜେଦି ଜିବନ୍ତି କାସ୍ଟୁଦି ପଲ୍ ସୁଡ଼ୁଜି ୱେଡ଼ିକା ଆନାନ୍; ମା ଦାର୍ମୁଦି ଦାସ୍ ନିଜେଦି ବୁଦିଦି ମାଣାନ୍ ନାଣ୍ଡ୍ ଲୋକାଙ୍ଗ୍ ଦାର୍ମୁ କିନାନ୍ ମାରି ୱାନ୍ ୱାରି ପାପ୍ ପିଣ୍ଡ୍ନାନ୍ । ଇୟାଉଣ୍ଡିଙ୍ଗ୍ ମାଡ୍ ପେରିଲୋକା ବାନୁ ୱାନିଙ୍ଗ୍ ବାଡି ସିନାଟ୍ ମାରି ୱାନ୍ ସାକ୍ତିଦି ଲୋକାୱାଲେ ଡଙ୍ଗାଁ କିତିକା ବାଟା କିଜି ଅନାର୍; ଇର୍ରିଙ୍ଗ୍ ୱାନ୍ ସାନିବାନୁ ନିଜେଦି ଜିବନ୍ ସିତାନ୍; ମାରି ଅଦାର୍ମୁଦି ଲୋକା ୱାଲେ ଇସାବ୍ଆତାନ୍; ମାରିବା ୱାନ୍ ନାଣ୍ଡ୍ ଲୋକା ବଜୁ ପିଣ୍ଡିତାନ୍ ମାରି ଅଦାର୍ମୁଦି ଲୋକା ଉଣ୍ତିଙ୍ଗ୍ ପାର୍ତନା କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.