Konda Porja Bible
ଜିସାଇୟ 52
ଜିରୁସାଲମତିଙ୍ଗ୍ ମାପୁରୁଦି ରକିୟା
ଏ ସିୟୋନ, ନିଙ୍ଗ୍ଆ, ନିଙ୍ଗ୍ଆ, ନିଜେଦି ବପୁ ପୟ୍ଆ; ଏ ପବିତ୍ର ଗାଡ଼୍ ଜିରୁସାଲମ, ନିନ୍ ନିଜେଦି ନେଗି ଆଙ୍ଗିଁ ଆରାଆ; ଇର୍ରିଙ୍ଗ୍ ଇୟା ବେଡ଼ାଦାନ୍ ନି ମାଣାନ୍ ଅସୁନ୍ନତ ମାରି ତାଗ୍ଇ ଲୋକୁ ମାରି ରେଏର୍ । ମିର୍ ନିଜେଦି ମେନ୍ଦଲତି ଦୁଡ଼ି ସାଡ଼୍ଦୁ; ଏ ଜିରୁସାଲମ, ନିଙ୍ଗ୍ଆ, ରାଜାଗାଦିଦୁ ବାସ୍ଆ; ଏ ସିୟୋନଦି ଜଇଲ୍ତୁ ମାନି ରିପା ଆଇଲି, ନିଜେଦି କକ୍ଲାଦି ସିକିଣି ଗାଟିଙ୍ଗ୍ ୱିଜୁ କୁତ୍ସି ପକ୍ଆ । ଇର୍ରିଙ୍ଗ୍ ପ୍ରବୁ ଇୟା ମାଟା ଇଜିନାନ୍, “ମିର୍ ଡାବୁଙ୍ଗ୍ ସିଲେଣ୍ତା ପରାତି ମାର୍ହିଦେର୍, ମାରି ଡାବୁଙ୍ଗ୍ ସିଲେଣ୍ତା ମୁକ୍ଡ଼ାନିଦେର୍ ।” ଇର୍ରିଙ୍ଗ୍ ମାପୁରୁ, ସଦାପ୍ରବୁ ଇୟା ମାଟା ଇଜିନାନ୍, “ମା ଲୋକୁ ପାର୍ତୁମ୍ ତେବାନି ଉଣ୍ତିଙ୍ଗ୍ ମିସରତୁ ସର୍ହାର୍; ମାରି, ଅସୁରିୟ ସେଡିନେ ୱାରି ଉଣ୍ତିଙ୍ଗ୍ ଡାକ୍ତାନ୍ ।” ଇୟାଉଣ୍ଡିଙ୍ଗ୍ ପ୍ରବୁ ଇନାନ୍, “ମା ଲୋକୁ ତ ସେଡିନେ ଅଆଇ ଆତାମାନାର୍, ମାଡ୍ ଇବେନୁ ମାନ୍ଜି ଇନିକା କିଜିନାଟ୍ ?” ସଦାପ୍ରବୁ ଇଜିନାନ୍, ୱାରି ମୁସୁକୁ ପାଣିକିନିକାର୍ ଗାର୍ଜାଜିନାର୍ ମାରି ନା ଦରୁ ୱେଡ଼େୱେଡ଼ାର୍ ନିନ୍ଦା ଆଜିନାତ୍ । “ଇୟାଉଣ୍ଡିଙ୍ଗ୍ ମା ଲୋକୁ ମା ଦର୍ ନେସ୍ନାର୍; ଇୟାଉଣ୍ଡିଙ୍ଗ୍ ଯେ ମାଟା ଇନାନ୍, ୱାନ୍ ଜେ ନାନୁ ନେ, ଇକା ୱାର୍ ଆୟା ନାଣ୍ତିଙ୍ଗ୍ ନେସ୍ନାର୍; ସୁଡ଼ୁଦୁ, ୱାନ୍ ନାନୁ ।” ଆମା ଲୋକୁ ସୁସମାଚାର ତାସିନାର୍, ଆମାକାର୍ ସାନ୍ତିଦି ପ୍ରସାର୍ କିଜିନାର୍, ଆମାକାର୍ ନେଗି ସୁସମାଚାର୍ ତାସିନାର୍, ଆମାକାର୍ ରକିୟାଦି ପ୍ରଚାର୍ କିଜିନାର୍, ଏନ୍ ସିୟୋନଦୁ “ମି ମାପୁରୁଦି ରାଜି କିନାର୍” ଇଜି ଇଜିନାନ୍, ୱାନି ପାଦାମ୍ ଗରନୁ ମୁସୁକୁ ଏସ ସୁନ୍ଦର୍ ତର୍ନାତ୍ ! ଇକା, ମି କାପ୍କିନି ଲୋକା ଆଉଲି ! ୱାର୍ ନାଣ୍ଡ୍ ଆଉଲି ଆଜିନାର୍, ୱାର୍ ଅର୍ସେ ପାଟା ପାର୍ଜିନାର୍; ଇର୍ରିଙ୍ଗ୍ ସଦାପ୍ରବୁ ସିୟୋନଦୁ ଡ଼େସି ୱାନି ୱେଡ଼ାଦୁ ୱାର୍ ସାମ୍ନା ସାମ୍ନି ଆଜି ସୁଡ଼ୁନାର୍ । ଏ ଜିରୁସାଲମଦୁ ରୁଙ୍ଗିଁତିସର୍ଇମାନି ବାଡିୱିଜୁ, ନାଣ୍ଡ ୱେଡ଼ିକା କିଦୁ, ଅର୍ସେ ପାଟା ପାର୍ଦୁ; ଇର୍ରିଙ୍ଗ୍ ସଦାପ୍ରବୁ ନିଜେଦି ଲୋକାଙ୍ଗ୍ ସାନ୍ତି କିତାମାନାନ୍, ୱାନ୍ ଜିରୁସାଲମତିଙ୍ଗ୍ ମୁକୁଡ଼ା କିତାମାନାନ୍ । ସଦାପ୍ରବୁ ୱିଜୁ ଦେସ୍ତି ଲୋକା ଆଗ୍ଡ଼ି ନିଜେଦି ପବିତ୍ର ସାକ୍ତି ସିତା ମାନାନ୍ ମାରି ଦୁନିଆଦି ଆଗ୍ଡ଼ିରି ୱିଜୁ ଲୋକୁ ମା ମାପୁରୁଦି ରକିୟା ସୁଡ଼ୁନାର୍ । ମିର୍ ସାଣ୍ଡ୍ରୁ, ଆୟା ବାଡିଦାନ୍ ସୋସି ସାଣ୍ଡ୍ରୁ; ଆମାବା ଅସୁଚି ଜିନିସ୍ ମୁଟ୍ମାଟ୍; ମିର୍ ୱାନିମାଣାନ୍ ସୋସି ସାଣ୍ଡ୍ରୁ; ଏ ପ୍ରବୁଦି ମନ୍ଦିର୍ତି ଉଣି ଡୁବାଇ ପିଣ୍ତିଜି ବୁଲାନି ଲୋକୁ, ମିରୁ ସୁଚି ଆଦୁ । ଇର୍ରିଙ୍ଗ୍ ମିର୍ ଦାନ୍ଦା ପାନ୍ଦା ଆଜି ସୋସି ସୋଲ୍ମାଟ୍, ମାରି ମିର୍ ଉରୁକ୍ସି ସୋସି ସୋଲ୍ମାଟ୍; ଇର୍ରିଙ୍ଗ୍ ସଦାପ୍ରବୁ ମି ଆଗ୍ଡ଼ି ଆଗ୍ଡ଼ି ସୋନାନ୍ ମାରି ଇସ୍ରାଏଲଦି ମାପୁରୁ ମି ୱେନ୍କା ଆନାନ୍ ।
ଦୁଃକ୍ ପୋଇନି ପ୍ରବୁଦି ଦାସ୍
ସୁଡ଼ୁଦୁ, ମା ଦସ୍ ଇନ୍ଇ ଆଗ୍ଡ଼ିନେ ବ୍ୟବ୍ଆର୍ କିନାର୍, ୱାନ୍ ପେରିକା, ପେରି ପାଣି ପୋଇନାନ୍ ମାରି ପେରିକାନ୍ ଆନାନ୍ । ଲୋକା ମାଣାନ୍ ୱାନି ବାନିମୁର୍ତି ମାରି ଲୋକୁ କଡ଼ ମାଣାନ୍ ୱାନି ବାନିମୁର୍ତି ନାଣ୍ଡ୍ ଆତି ମାନିଙ୍ଗ୍ ଏଣ୍ଡେସ୍ଗି ନାଣ୍ଡଲୋକୁ ୱାନି ବିସୟ୍ତାନ୍ କାବା ଆତା ମାର୍ହାର୍, ଆୟାୱାଜା ୱାନ୍ ନାଣ୍ଡ୍ ଦେସ୍ତି ଲୋକାଙ୍ଗ୍ ପବିତ୍ର କିନାନ୍; ରାଜାର୍ ୱାନି ଆଗ୍ଡ଼ି ନିଜେ ନିଜେଦି ମୋକମ୍ ବନ୍ଦ୍ କିନାର୍; ଇର୍ରିଙ୍ଗ୍ ଆମାକା ୱାରିଙ୍ଗ୍ ଇନ୍ଏଣ୍ଡା ମାର୍ହାର୍, ଆକା ୱାର୍ ସୁଡ଼ୁନାର୍ ମାରି ଆମାକା ୱାର୍ ୱେନ୍ଣ୍ଡା ମାର୍ହାର୍, ଆକା ୱାର୍ ବୁଜାନାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.