Rôma 5

1Tîrơ̆ gừn, bơh sŏng dî sơnăn tơpăt-durư̆ng bơh jơno don, ƀòn mơ̆n digơlăn ăt-bồ jơno tơmrơm î Yang Tơm Trồ kơnơm Yang ƀòn mơ̆n, la Yang Dŏng-Klàs Jesu, 2mà kơnơm bơh Bơtao rơ̆, ƀòn mơ̆n bơh jơno don kŭng sŏng dî gung mơ̆t nơ̆m nhòng jơno sơmah e gời dô, la anẵu mà ƀòn mơ̆n ñă kơđư̆ng ăm cŭngsî, gừn ƀòn mơ̆n sơhờp-sờhơn kơnơm bơh nùs cang-kơnơm bơkhê bơh jơno ang tơcrà Yang Tơm Trồ dê. 3Mơya ơ̆ dî nư̆ng tîgư̆n, mà ƀòn mơ̆n hôm sơhờp-sờhơn nơ̆m khăi jơno sơòs-sơngeh, bơh gư̆t lah jơno sơòs-sơngeh iyà trôh pran ayua kơđư̆ng nùs; 4hôm jơno pran ayua kơđư̆ng nùs dô nùs tua dî jîng jơno gư̆t lăm, hôm pran ayua nùs tua dî gư̆t lăm dô jơno cang-kơnơm bơkhê ngăn. 5Hôm jơno cang-kơnơm rơ̆ ơ̆ lơh ƀasmôh ƀasmăt, tai bơh nùs-kơñ kơloh Yang Tơm Trồ dê sŏng dî tôh tơlơ̆p nơ̆m nùs ƀòn mơ̆n kơnơm Yang Hwîng Goh, Bơtao sŏng dî e ma ƀòn mơ̆n. 6Kŭng hôm dahrăư lơ̆, tơm tô̆ ƀòn mơ̆n hôm la lơ̆gay cro lơbăn-lơñô, gừn mơ̆t trôh iyŏ ñăm tô̆ tơnge, Yang Dŏng-Klàs sŏng sơ̆t ala ma lơ̆gay cro ơ̆ don. 7Kălkê ngăn tom cro găy rơp kŏng sơ̆t ala ma cro tơpăt-durư̆ng. Bulah digơlăn tom cro kŭng khơ̆n-sa sơ̆t ala ma cro lơbăn-niem. 8Mơya Yang Tơm Trồ lơh cư̆ng nê̆ nùs-kơñ kơloh să tơm Kơnràñ jăt î ƀòn mơ̆n, gư̆n la tơm jơ ƀòn mơ̆n hôm la cro glài, gừn Yang Dŏng Klàs sŏng sơ̆t ala ma ƀòn mơ̆n. 9Gừn, jơ dô, tơm tô̆ dî sơnăn tơpăt-durư̆ng bơh mham Kơnràñ dê, gừn ƀòn mơ̆n rơp dî dŏng-klàs bơh jơno tơcao dơng khăi rlo te kơnơm Kơnràñ. 10Bơh dilah ƀòn mơ̆n, bulah la cro tơmdră, sŏng dî tơmrơm î Yang Tơm Trồ kơnơm jơno sơ̆t nơ̆m Kon Kơnràñ, gừn tơm tô̆ sŏng dî tơmrơm wăl lờt, ƀòn mơ̆n rơp jîng dî dŏng-klàs bơh jơno jîng Kơnràñ khăi rlo te. 11Mơya ơ̆ iyŏ nư̆ng tîrơ̆ gời ờ, mà ƀòn mơ̆n hôm tư̆ng yeh să mơ̆n nơ̆m Yang Tơm Trồ kơnơm bơh Yang ƀòn mơ̆n, la Yang Dŏng-Klàs Jesu, mà kơnơm Kơnràñ, jơ dô ƀòn mơ̆n sŏng lăñ dî jơno tơmrơm.

12Tai bơh jơno gư̆n, gư̆ptî nư̆ng bơh du hôi cro mà tồi-glài sŏng mơ̆t nơ̆m dunya, gừn bơh tồi-glài jơno sơ̆t, gư̆n-jîng jơno sơ̆t kŭng lam trôh lơ̆gay kon-mơnùs, tài bơh jơno gư̆n mà lơ̆gay cro sŏng tìs-glài. 13Bơh trôh dî rai jơno-bơlăm, gừn tồi-glài ờs tom miek nơ̆m dunya lờt, mơya glài ơ̆ dî katîng khà tơm jơ hôm dahrăư dî jơno-bơlăm. 14Mơya, jơno sơ̆t sŏng ăt-bồ bơh rai Ađam trôh dî rai Môise, tien gơs cŭng lơ̆gay cro ơ̆ ăm tìs-glài gôlơh durư̆ng băl î jơno tìs-glài Ađam dê, mà ông la rồp sơntu bơh Bơtao păl trôh.

15Mơya, jơno e gời ơ̆ lơh gư̆ptî jơno tìs-glài jăt dubă gư̆p tîgư̆n. Bơh dilah tài bơh jơno tìs-glài du hôi cro mà khăi cro sŏng sơ̆t, gừn jơno sơmah-sơmai Yang Tơm Trồ dê, î jơno e gời tài bơh jơno sơmah-sơmai du hôi cro dê, rơ̆ la Yang Krist Jesu, ăn lơi ma khăi cro la tơngkah-tơngkăñ khăi rlo te! 16Jơno e gời rơ̆ ơ̆-iyŏ gư̆ptî jơno dubă kơnơm bơh du hôi cro tìs-glài. Bơh, bulah, jơno cahrña bơh du hôi mà tơlôh, iyà trôh jơno lơh-glài, mơya sơlôh bơh khăi jơno tìs-glài, jơno e gời kơlôi trôh jơno sơnăn la tơpăt-durư̆ng. 17Bơh dilah jơno tìs-glài du hôi cro dê, mà jơno sơ̆t sŏng ăt-bồ kơnơm bơh du hôi cro gư̆n, gừn lơ̆gay cro lăñ dî jơno sơmah-sơmai jơno tơngkah-tơngkăñ î jơno e gời bơh jơno tơpăt-durư̆ng rơp ăt-bồ khăi rlo te nơ̆m jơno jîng kơnơm du hôi cro, rơ̆ la Yang Dŏng-Klàs Jesu. 18Gư̆n-jîng, amơh lơh bơh du-lăm jơno tìs-glài trôh lơ̆gay cro nơ̆m jơno lơh nên glài, gừn bơh du-lăm bră lơh tơpăt-durư̆ng kŭng trôh lơ̆gay cro trôh jơno sơnăn la tơpăt-durư̆ng jơno jîng dê. 19Bơh tien gơs tîgay, tài bơh jơno ơ̆ don dẵư du hôi cro, mà khăi cro kŏng gôjîng tồi-glài, gừn kŭng bơh jơno don dẵu du hôi cro mà khăi cro rơp dî gôjîng tơpăt-durư̆ng tîrơ̆. 20Pơnah nde, jơno-bơlăm sŏng rlèt mơ̆t, lơi jơno tìs-glài digơlăn bơtăl. Mơya anẵu găy tồi-glài bơtăl khăi, gừn jơno sơmah-sơmai sơlơ tơngkah-tơngkăñ bơtăl te. 21Bulah e tồi-glài ăt-bồ nơ̆m jơno sơ̆t gư̆ptî amơh, gừn jơno sơmah-sơmai kŭng digơlăn ăt-bồ tài bơh jơno tơpăt-durư̆ng gư̆p tîrơ̆ lơi lơboh trôh jơno jîng miek miek, kơnơm Yang Dŏng-Klàs Jesu, la Yang ƀòn mơ̆n.