Rôma 4

1Gừn, ƀòn mơ̆n rơp tơs Abraham, ông-pang ƀòn mơ̆n dê jăt đah pơnah să-jăn, sŏng sên swì dî jơno găy teh? 2Bơh dilah Abraham dî sơnăn la tơpăt-durư̆ng bơh bră lơh, gừn ông tom jơno lơi tư̆ng yeh să, mơya ơ̆-iyŏ la mađàp măt Yang Tơm Trồ. 3Bơh Sră-Goh tơs jơno găy teh? “Abraham don kơnơm dî Yang Tơm Trồ, î bră gư̆n dî tơs la tơpăt-durư̆ng e ma ông.” 4Pơnah nde, jăt î cro găy lơh bră, gừn priè tơnge ơ̆ dî tơs gư̆ptî jơno sơmah, mơya la gư̆ptî kađòng dồs. 5Hôm jăt bơh î cro găy ơ̆ lơh bră, mà don anẵu Bơtao lơh cro ơ̆ don lơh gôjîng tơpăt-durư̆ng, gừn jơno don cro gư̆n dî tơs la tơpăt-durư̆ng. 6Tien gơs gư̆ptî Dabit kŭng tơs bơh lơnge lơngẵu cro mà Yang Tơm Trồ tơs la tơpăt-durư̆ng ơ̆-iyŏ bơh bră lơh:

7“Lơnge ma lơ̆gay cro găy mà lơ̆gay bră bờk-mơsăk mơ̆n sŏng dî hồ,

î lơ̆gay tồi-glài mơ̆n sŏng dî pôn-ndăp.

8Lơnge ma cro găy mà Yang digơlăn ngăn sŏng ơ̆ yà trôh tồi-glài gô.”

9Tîrơ̆ gừn, lơnge lơngẵu dô nư̆ng dî ăn lơi e ma cro kŏng koh kato, hala kŭng ăn lơi e ma cro ơ̆ koh kato ờ? Bơh ƀòn mơ̆n ndăng tơs lah: “Jơno don rơ̆ la dî tơs tơpăt-durư̆ng ma Abraham.” 10Gừn, jơno don gư̆n sŏng dî tơs gư̆ptî amơh? La nơ̆m dơ̆ sŏng koh kato hala nơ̆m dơ̆ hôm dahrăư koh kato teh? Ơ̆-iyŏ nơ̆m tơm tŭ sŏng koh kato, mơya la nơ̆m dơ̆ hôm dahrăư koh kato. 11Ông sŏng lăñ têl koh kato gư̆ptî ƀăng-kì jơno tơpăt-durư̆ng dê bơh jơno don, rơ̆ la jơno don nơ̆m dơ̆ hôm dahrăư koh kato, lơi e ma ông la ông-pang lơ̆gay cro dî nùs don bulah hôm dahrăư koh kato, bơlăm trôh jơno tơpăt-durư̆ng dî tơs ma lơ̆gay cro rơ̆; 12kŭng lơi ma gô la ông-pang cro kŏng koh kato dê jăt î lơ̆gay cro găy ơ̆ dî nư̆ng sơlôh să bơh gơnoăr koh kato, mà kŭng hôm la lơ̆gay cro đom jăt têl jư̆ng jơno don ông-pang Abraham dê ƀòn mơ̆n, nơ̆m dơ̆ hôm dahrăư koh kato.

13Bơh jơno hăư ăn lơi ma Abraham hala ăn lơi ma nŏk-noi ông dê, rơ̆ la ăn lơi ma cro sơndơn cơdô̆ lơgơ dunya, ơ̆-iyŏ kơnơm jơno-bơlăm mơya la kơnơm jơno tơpăt-durư̆ng nơ̆m jơno don. 14Bơh, dilah cro jîng jăt jơno bơlăm la lơ̆gay cro sơndơn srăy-brê, gừn jơno don gôjîng ơ̆ kwơ, î jơno hăư kŏng gôjîng ơ̆ kwơ măng. 15Bơh jơno-bơlăm iyà wăl jơno tơcao dơng, mơya anẵu găy ơ̆ tom jơno-bơlăm, gừn kŭng ơ̆ tom jơno tìs-glài. 16Tai bơh jơno gư̆n, gư̆n-jîng lơ̆gay cro sơndơn la tơlôh bơh jơno don, bulah e jăt jơno sơmah e gời, lơi jơno hăư la iyŏ ngăn ma lơ̆gay kon so ơ̆ e cro sơđah tơlôh bơh jơno bơlăm gời, mơya la e cro kŭng tơlôh bơh jơno don Abraham, mà gô la ông-pang lơ̆gay ƀòn mơ̆n, 17gư̆ptî sŏng dî cêh lah: “Ăñ sŏng pồ kon lơh bàp khăi lang bol dê,” ăm sơđàp măt Bơtao mà ông don kơnơm, rơ̆ la Yang Tơm Trồ, Bơtao lơh ma cro sơ̆t dî jơno jîng gư̆m hôi lơ̆gay bră ơ̆ tom gư̆ptî ndăng tom; 18mà ông la cro sŏng don jăt nơ̆m jơno cang-kơnơm rlo lơ̆gay jơno cang-kơnơm, lơi e ông dî gôjîng bàp khăi lang bol dê, jăt gư̆ptî jơno sŏng dî tơs lah: “Nŏk-noi kon rơp la gư̆ptî gư̆n.” 19Gừn bulah ơ̆ tom gơhuc nơ̆m jơno don, ông sŏng lăñ tơmpơl să-jăn mơ̆n gư̆ptî sơ̆t lờt (bơh dî mơñ du-rhieng năm) băl î anẵu kon ăm Sara dê să-jăn sŏng rău-răñ. 20Mơya kơnơm trôh jơno hăư Yang Tơm Trồ dê, ông sŏng ơ̆ kŏng kơlôi pên khu tơngoh nơ̆m jơno ơ̆ don, tơblơ̆ wăl, ông sŏng dî pran-kơdăng nơ̆m jơno don, tơm tô̆ ăn jơno ang tơcrà lêh ma Yang Tơm Trồ, 21gừn sŏng don nên-nôn ngăn lah jơno găy Kơnràñ sŏng hăư, gừn Kơnràñ kŭng dî gơnăp-gơnoăr lơi lơh jơno rơ̆. 22Gư̆n-jîng “jơno don rơ̆ dî tơs la tơpăt-durư̆ng ma ông”. 23Pơnah nde, jơno sŏng dî cêh lah “jơno don rơ̆ dî tơs la tơpăt-durư̆ng ma ông” ơ̆-iyŏ nư̆ng bơh ông, 24mà hôm bơh ƀòn mơ̆n, la e lơ̆gay cro mà jơno don rơ̆ rơp dî tơs la tơpăt-durư̆ng, rơ̆ la e lơ̆gay cro găy don anẵu Bơtao sŏng lơh Yang Jesu, Yang ƀòn mơ̆n, jîng wăl bơh anẵu sơ̆t, 25mà Kơnràñ sŏng kŏng nap bơh jơno tìs-glài ƀòn mơ̆n gừn sŏng dî lơh gôjîng wăl bơh jơno sơnăn tơpăt-durư̆ng ma ƀòn mơ̆n.