Rôma 3

1Tîrơ̆ gừn, pơnah dơng cro Juđa la amơh? Hala bră koh kato tom kwơ găy? 2Khăi ngăn bơh lơ̆gay pơnah bră lơh! Bơh lai ngăn, gư̆n la ƀòn gô sŏng dî jao bră lơ̆gay jơno e tơnggư̆t lai Yang Tơm Trồ dê. 3Lơi amơh lơh dilah du pơnah cro ơ̆ tom jơno don? Ơ̆-iyŏ nùs ơ̆ don ƀòn gô rơp lơh ma jơno don-tơpăt Yang Tơm Trồ dê gôjîng ơ̆ dî kwơ ờ? 4Bră gư̆n ơ̆ tơlôh dî. Tơblơ̆ wăl, păl jong-rơ Yang Tơm Trồ la tơpăt-ngăn, hôm kơp cro la cro blăc pơlum. Gư̆ptî sŏng dî cêh lah:

“Lơi bulah tîgay gừn Kơnràñ sŏng dî e sơđah la tơpăt-durư̆ng nơ̆m lơ̆gay jơno tơs Kơnràñ,

gừn Kơnràñ rơp dî pha-lĭn tơm jơ Kơnràñ kŏng cahrña.”

5Mơya dilah jơno ơ̆ tơpăt-durư̆ng ƀòn mơ̆n tơs tư̆ng yeh jơno tơpăt-durư̆ng Yang Tơm Trồ dê, gừn ƀòn mơ̆n rơp tơs jơno găy? Tom iyŏ Yang Tơm Trồ ơ̆ tơpăt-durư̆ng tơm tô̆ tơngduh jơno tơcao dơng Kơnràñ dê? (Ăñ ndăng tơs jăt jơno kon-mơnùs dê.) 6Bră gư̆n ơ̆ tơlôh dî! Bơh dilah gư̆p tîgư̆n gừn amơh lơh Yang Tơm Trồ rơp cahrña dunya? 7Hôm dilah jơno tơpăt-ngăn Yang Tơm Trồ sŏng lơh ma jơno ang gơklŏ Kơnràñ dơng yơng rlo te anẵu jơno blăc pơlum ăñ jê, gừn ngglơh ăñ kŭng ndăng kŏng cahrña gư̆ptî du hôi cro tìs-glài teh? 8Gừn ơ̆-iyŏ (gư̆ptî ƀòn hî kŏng yă blăc gư̆m gư̆ptî nhẵư hê cro tơs nê̆-năn ƀòn hî lah) “Ƀòn mơ̆n păl lơh jơno bờk, lơi jơno lơbăn-niem digơlăn tơlôh trôh” hala ơ̆h? — Jơno lơh nên glài ƀòn gô la dî păl.

9Tîrơ̆ gừn amơh teh? Ƀòn mơ̆n tom niem rlo te ơ̆? Ơ̆ tom ờ. Bơh ƀòn hî sŏng yă glài lơ̆gay cro Juđa gư̆m cro Grek lờt, lơ̆gay păl ăm nteàh tồi-glài. 10Gư̆ptî sŏng dî cêh lah:

“Ơ̆ tom cro găy tơpăt-durư̆ng ờ, du hôi cro tien gơs kŭng ơ̆.

11Ơ̆ tom cro găy gư̆t wơng.

Ơ̆ tom cro găy jôi jăt Yang Tơm Trồ.

12Lơ̆gay gư̆m sŏng swà sơloah anẵu. Ƀòn gô băl găp jîng ơ̆ kwơ.

Ơ̆ tom cro găy lơh jơno niem, tien gơs ơ̆ tom du hôi cro.”

13“Ngkău lŏnglon ƀòn gô gư̆ptî du-lăm mơ̆ntô ƀùc dî pẵư bơng.

Î lơm-piet mơ̆n, ƀòn gô kư̆ tơs tơlôh jơno blăc pơlum.

Nơ̆m kơ̆mbung yôi ƀòn gô la kăm khêh beh juh bơà,”

14“kơndẵư ƀòn gô prăp bîng-jut jơno sràt-rma gư̆m jơno sràt bơtăng.”

15“Kơ̆mpang jư̆ng ƀòn gô sơbăc-sơbăng swà lơh hua mham.

16Jơno phà tơngroh î gleh-glăr jê-kơkua nơ̆m kơp gung dà gô dê.

17Gừn ƀòn gô ơ̆ gư̆t gung dà lơngăp-lơnge.”

18“Ơ̆ tom jơno duh kơ̆mbrit Yang Tơm Trồ sơđàp măt ƀòn gô.”

19Pơnah nde, ƀòn mơ̆n gư̆t lah dilah lơ̆gay jơno găy mà jơno-bơlăm tơs bơtău la tơs î lơ̆gay cro găy nơ̆m jơno-bơlăm, bulah e kơp du-lăm dẵư kŏng ăm-ƀơt, gừn lơ̆gay dunya kŏng glài nteàh jơno cahrña bơh Yang Tơm Trồ dê, 20tài bơh, sơđàp măt Kơnràñ, ơ̆ tom kon-mơnùs să-jăn găy dî sơnăn tơpăt-durư̆ng bơh lơ̆gay bră lơh-jăt jơno-bơlăm, bơh jơno gư̆t đăl tồi-glài la bơh jơno-bơlăm.

21Mơya tô̆ dô, jơno tơpăt-durư̆ng Yang Tơm Trồ sŏng dî sơđah makin jơno-bơlăm, tơm tô̆ dî lơh cư̆ng bơh jơno-bơlăm î lơ̆gay cro gơnoăr-hwơr, 22mà jơno tơpăt-durư̆ng Yang Tơm Trồ dê, gừn kơnơm jơno don Yang Dŏng-Klàs Jesu, rơ̆ la ăn lơi ma lơ̆gay cro don, bơh ơ̆ tom jơno tơmcơlah găy ờ. 23Bơh lơ̆gay cro sŏng tìs-glài î kŏng prŏi roh jơno ang tơcrà Yang Tơm Trồ dê, 24mà ơ̆ kă păl tăm wăl jơno găy tơm tô̆ dî tơs la tơpăt-durư̆ng bơh jơno sơmah e gời Kơnràñ dê kơnơm bơh jơno dŏng tơwai nơ̆m Yang Dŏng-Klàs Jesu. 25Bơtao mà Yang Tơm Trồ sŏng lơh nên lai gư̆ptî du-lăm jơno ăn tơwai-glài kơnơm jơno don anẵu mham Bơtao rơ̆, lơi la dờp lơh cư̆ng-tang bơh jơno tơpăt-durư̆ng Kơnràñ dê, tai bơh jơno lơi căư lơ̆gay tồi-glài ờs sŏng dî bơh lai, 26bơh nùs ăt-ăl Yang Tơm Trồ dê, kơlôi trôh bră tơs tơnggư̆t jơno tơpăt-durư̆ng Kơnràñ dê nơ̆m rai-jîng tô̆ dô, lơi e Kơnràñ la tơpăt-durư̆ng gư̆m sơnăn tơpăt-durư̆ng ma cro găy sơntơm bơh jơno don anẵu Yang Jesu.

27Tîrơ̆ gừn, jơno tư̆ng yeh să ăm anẵu găy teh? Gô sŏng kŏng lơi căư. Bơh jơno-bơlăm găy teh? Jơno bơlăm bră lơh dê ơ̆h? Ơ̆ tom ờ. Mơya la bơh jơno-bơlăm kơđư̆ng jơno don. 28Bơh gừn, ƀòn mơ̆n swì lăng tơmpơl du hôi cro dî sơnăn tơpăt-durư̆ng bơh jơno don, ơ̆-iyŏ bơh lơ̆gay bră lơh-jăt jơno-bơlăm. 29Hala Yang Tơm Trồ nư̆ng la cro Juđa gời ờ? Ơ̆-iyŏ kŭng la lang bol bơdih dê ơ̆h? Ngăn, kŭng la lang bol bơdih dê te. 30Bơh ngăn jơno, nư̆ng tom du hôi Yang Tơm Trồ, la Bơtao rơp sơnăn tơpăt-durư̆ng cro kŏng koh kato bơh jơno don, gư̆m cro ơ̆ koh kato kơnơm jơno don rơ̆.

31Tîrơ̆ gừn, ƀòn mơ̆n tom lơh ma jơno-bơlăm ơ̆ kwơ bơh jơno don rơ̆ ơ̆h? Bră gư̆n ơ̆ tơlôh dî ờ. Tơblơ̆ wăl, ƀòn mơ̆n lơh bơkhê kơđư̆ng jơno-bơlăm.