Rôma 2

1Gư̆n-jîng, ơ cro năy, bulah kơ̆p cro găy ờs dơm cahrña, mê ơ̆ tom jơno găy lơi tơmpẵu dî, bơh nơ̆m jơno găy mà mê cahrña cro nde, gừn mê lơh nên glài dêh sătan mê; bơh mê, la cro cahrña, kŭng tìs-glài lơ̆gay bră rơ̆. 2Hôm ƀòn mơ̆n sŏng gư̆t lah jơno cahrña Yang Tơm Trồ dê, la iyŏ ngăn î jơno-tơpăt tơmdră wăl lơ̆gay kơp cro lơh tìs lơ̆gay bră gư̆ptî rơ̆. 3Mơya, ơ cro năy, la cro cahrña lơ̆gay cro lơh tìs lơ̆gay jơno tîrơ̆ mà sătan mơ̆n kŭng lơh lơ̆gay bră gư̆ptî gư̆n, iyŏ ngăn mê kơlôi-sơnư̆ng bơh bră dô, lah mê rơp pleh klàs jơno cahrña Yang Tơm Trồ? 4Hala la mê lăng ơ̆săp-ơ̆său jơno kơnhơ̆p-mơ̆nda nùs lơbăn-niem dê, î nùs kŏng-ăt, băl î jơno ăt-ăl Kơnràñ dê, bơh ơ̆ gư̆t lah nùs lơbăn-niem Yang Tơm Trồ dê tề-bơlăm mê trôh jơno tơcao mbư̆ng glài? 5Mơya jăt jơno kră kơdăng mê î nùs tua ơ̆ kơñ tơmbơgăl, mê ndăng ăn lơi ma mơ̆n jơno tơcao dơng nơ̆m nge tơcao dơng î sơđah tơlôh bơh jơno cahrña tơpăt-durư̆ng Yang Tơm Trồ dê, 6la Bơtao rơp kla ma kơp cro pơnjăt lơ̆gay bră lơh cro rơ̆ dê: 7Du đah la jơno jîng miek miek ăn lơi ma lơ̆gay cro jôi jăt jơno gơklŏ î kingam băl î jơno dơng mang jăt jơno lơh bră niem, 8hôm đah năy la jơno tơcao dơng gư̆m nùs dôh phưng phưng ăn lơi ma lơ̆gay cro bơh nùs ham-kơñ kơnêh î ơ̆ don jơno-tơpăt mà kŏng pơlum mơ̆ndơm hala jăt jơno ơ̆ tơpăt. 9Rŭng-rai î jơno jê-kơkua ăm nơ̆m lơ̆gay hwîng-soan cro lơh bră bờk-mơsăk, lai ngăn ma cro Juđa, gư̆m ma cro Grek. 10Mơya jơno ang tơcrà î jơno kingam băl î jơno lơngăp-lơnge ăn lơi ma lơ̆gay cro lơh jơno lơbăn-niem, lai ngăn e ma cro Juđa, gư̆m e ma cro Grek. 11Bơh ơ̆ tom jơno lăng ơ̆săp, nơ̆m jơno sơđah măt Yang Tơm Trồ dê. 12Dilah lơ̆gay cro găy sŏng tìs-glài jăt jơno ơ̆ dî jơno-bơlăm, gừn kŭng rơp roh sơ̆t jăt jơno ơ̆ dî jơno-bơlăm, gừn dilah lơ̆gay cro găy sŏng tìs-glài ăm nhòng jơno-bơlăm, gừn rơp kŏng cahrña î jơno-bơlăm. 13Bơh ơ̆-iyŏ lơ̆gay cro kơnău jơno-bơlăm la tơpăt-durư̆ng sơđàp măt Yang Tơm Trồ, mơya lơ̆gay cro lơh-jăt jơno-bơlăm gừn rơp dî sơnăn tơpăt-durư̆ng. 14Bơh tơm tô̆ lơ̆gay lang bol bơdih, la lơ̆gay lang bol ơ̆ tom gư̆t jơno-bơlăm, jăt jơno ờs dơm lơh lơ̆gay jơno-bơlăm, gừn bulah ơ̆ tom jơno-bơlăm, ƀòn gô la jơno-bơlăm ma să tơm mơ̆n, 15rơ̆ la tơmpôl cro e tơmpơl lơ̆gay bră lơh jơno-bơlăm sŏng dî cêh nhòng nùs ƀòn gô, tơm tô̆ nùs tua ƀòn gô lơh cư̆ng, gư̆m lơ̆gay nùs-kơlôi tơmyă hala tien gơs tơmpẵu nhòng să tơm ƀòn gô î găp 16nơ̆m nge mà Yang Tơm Trồ rơp cahrña lơ̆gay jơno ămpôn ndăp kon-mơnùs kơnơm bơh Yang Dŏng-Klàs Jesu, jăt gư̆ptî Jơno Niem ăñ jê.

17Hôm dilah mê añ sơnăn la cro Juđa, kơnơm nơ̆m jơno-bơlăm, tư̆ng yeh să nơ̆m Yang Tơm Trồ, 18gư̆t wơng nùs-kơñ Kơnràñ, sên swì lơ̆gay jơno phadêh niem rlo sŏng dî ƀăn mơntău bơh nơ̆m jơno-bơlăm; 19pơnjăt te, mê don nên dêh sătan mơ̆n la cro bơlăm gung lơ̆gay cro ñô̆ng măt, jơno ang ma lơ̆gay cro ăm nhòng kơnăm ñô̆ng, 20cro sơđah pơđơ tơmpôl wì gơla, cro bơtău mơntău tơmpôl kơmom dahrăư gư̆t, bơh dî ngui krơh niem nơ̆m tơngoh jăk î jơno-tơpăt jơno-bơlăm dê, 21tîrơ̆ gừn, ơ cro ƀăn mơntău cro nde năy, mê ơ̆ ƀăn mơntău dêh sătan mê hala ơ̆h? Ơ cro tơs bơtău bư̆ng kơntô̆ng-kơño năy, mê tom kơntô̆ng-kơño ya. 22Ơ cro pơđơ bư̆ng lơh tìs-glài bo-nai, mê tom tìs-glài bo-nai ơ̆? Ơ cro tơcao lơ̆gay rồp-ràk năy, mê tom kơntô̆ng lơ̆gay jơno nơ̆m hîh bơmôm? 23Mê tư̆ng yeh să la cro ăm nơ̆m jơno-bơlăm, mê tom tơngyŏ-tơnghiel Yang Tơm Trồ bơh bră lơh tìs jơno-bơlăm ơ̆? 24Bơh, gư̆ptî jơno sŏng dî cêh “sơnăn Yang Tơm Trồ kŏng tơs bờk nhòng tơmpôl lang bol bơdih tai bơh ƀòn mê.” 25Ngăn, bulah gơnoăr koh kato iyà trôh kwơ dilah mê digơlăn lơh-jăt jơno-bơlăm, mơya dilah mê la cro lơh tìs-glài jơno-bơlăm, gừn bră kŏng koh kato mê dê sŏng gôjîng ơ̆ koh kato. 26Tîrơ̆ gừn, dilah du hôi cro hôm dahrăư koh kato prăp jư lơ̆gay kơp kơñ jơno-bơlăm dê, gừn ơ̆-iyŏ bră hôm dahrăư koh kato nơ̆m cro gư̆n rơp dî katîng khà gư̆ptî bră sŏng koh kato hala ơ̆h? 27Gừn tơm tô̆ lơh wêl-tăl jơno-bơlăm, cro hôm dahrăư koh kato anẵu să-jăn rơp cahrña mê, rơ̆ la cro bơh jơno cêh î gơnoăr koh kato la cro lơh tìs-glài jơno-bơlăm. 28Bơh ơ̆-iyŏ du hôi cro bơh đah să-jăn makin la cro Juđa, kŭng ơ̆-iyŏ jơno ăm đah makin nơ̆m poăc-să la gơnoăr koh kato, 29ala sơgư̆n, cro Juđa la ăm anẵu pôn-ndăp nơ̆m nhòng, î gơnoăr kŏng koh kato la nơ̆m nùs tua bơh Yang Hwîng, ơ̆-iyŏ bơh jơno cêh; mà jơno jong-rơ cro gư̆n ơ̆ iyŏ bơh kon-mơnùs mơya bơh Yang Tơm Trồ.