Rôma 6

1Tîgư̆n, ƀòn mơ̆n rơp tơs amơh? Ƀòn mơ̆n tơm kă pơnjăt te nơ̆m tồi-glài lơi jơno sơmah bơtăl tơngkah-tơngkăñ ya? 2Bră rơ̆ ơ̆ tom tơlôh dî. Ƀòn mơ̆n la cro sŏng sơ̆t gôtrê î tồi-glài, gừn amơh lơh ƀòn mơ̆n rơp hôm dî jîng nhòng gô? 3Hala oh mi rôh lŏ ơ̆ gư̆t lah dilah cro găy sŏng kŏng ƀaptem nơ̆m Yang Dŏng-Klàs Jesu la sŏng dî ƀaptem nơ̆m nhòng jơno sơ̆t Kơnràñ ya? 4Gư̆n-jîng, ƀòn mơ̆n sŏng dî tăp băl î Kơnràñ kơnơm bơh gơnoăr ƀaptem nơ̆m jơno sơ̆t, lơi ma gư̆ptî Yang Dŏng-Klàs kơnơm bơh jơno gơklŏ Bàp dê sŏng dî lơh jîng wăl bơh anẵu sơ̆t mơmơh tîgay, gừn ƀòn mơ̆n kŭng digơlăn lơbà swà nơ̆m jơno jîng mhăy tîrơ̆. 5Bơh dilah ƀòn mơ̆n sŏng gôjîng dubă băl î du pơnah jơno sơ̆t Kơnràñ, gừn pơnah nde, ƀòn mơ̆n kŭng rơp la gư̆p tîgư̆n anẵu jơno jîng wăl Kơnràñ dê; 6bơh gư̆t jơno dô, lah cro rai-jîng yo ƀòn mơ̆n dê sŏng kŏng pư̆ng điñ î Kơnràñ, lơi să-jăn tồi-glài dê digơlăn kŏng tơngroh cĕ, ơ̆ lơi ƀòn mơ̆n hôm lơh dê̆-gơna ma tồi-glài te. 7Bơh cro găy sŏng sơ̆t gừn dî jut lơi căư lơ̆gay jơno yă yom bơh tồi-glài. 8Mơya dilah ƀòn mơ̆n sŏng sơ̆t î Yang Dŏng-Klàs, gừn ƀòn mơ̆n don lah mơ̆n kŭng rơp jîng băl î Kơnràñ. 9Bơh gư̆t lah ma-ngkơi jơ dî lơh jîng wăl bơh anẵu sơ̆t, Yang Dŏng-Klàs ơ̆ hôm sơ̆t te; jơno sơ̆t ơ̆ hôm ăt-bồ nơ̆m Kơnràñ. 10Bơh jơno sơ̆t mà Kơnràñ sŏng kŏng ăt, rơ̆ la Kơnràñ sŏng sơ̆t gôtrê bơh tồi-glài nư̆ng du dơ̆ la tăl. Hôm jơno jîng mà Kơnràñ jîng, rơ̆ la Kơnràñ jîng ma Yang Tơm Trồ. 11Kŭng jăt gư̆p tîgư̆n, bulah oh mi rôh lŏ păl lăng să tơm mơ̆n la cro sơ̆t gôtrê bơh tồi-glài, mơya la jîng ma Yang Tơm Trồ nơ̆m Yang Dŏng-Klàs Jesu.

12Gừn, bư̆ng lơi tồi-glài ăt-bồ nơ̆m să-jăn ờs dơm nteàh jơno sơ̆t oh mi rôh lŏ dê, sŏng gư̆n lơh-jăt lơ̆gay jơno ham-kơñ să-jăn gô. 13Kŭng bư̆ng jao nap lơ̆gay să-jăn mơ̆n ma tồi-glài gư̆ptî jơno lơh ơ̆ tơpăt-durư̆ng. Mơya păl ăn cĕ să tơm mơ̆n ma Yang Tơm Trồ, gôlơh gư̆ptî ndăng jîng tơng wăl bơh cro sơ̆t, î lơ̆gay să-jăn mơ̆n gư̆ptî jơno bră lơh nơ̆m jơno tơpăt-durư̆ng ma Yang Tơm Trồ. 14Bơh tồi-glài rơp ơ̆ dî ăt-bồ nơ̆m oh mi rôh lŏ, bơh oh mi rôh lŏ ơ̆ ăm nteàh jơno-bơlăm, mơya la ăm nteàh jơno sơmah.

15Tîgư̆n amơh? Ƀòn mơ̆n tom kă tìs-glài bơh ƀòn mơ̆n ơ̆ ăm nteàh jơno-bơlăm, mà ăm nteàh jơno sơmah ya? Bră gư̆n ơ̆ tơlôh dî ờ. 16Oh mi rôh lŏ ơ̆ gư̆t lah oh mi rôh lŏ jao phi să tơm mơ̆n ma jơno găy gư̆ptî cro dê̆ nơ̆m jơno don dẵư, gừn oh mi rôh lŏ gôjîng cro ăm dê̆ ma jơno mà mơ̆n don dẵư hala amơh teh — Bulah la tồi-glài bơlăm trôh jơno sơ̆t, hala la jơno don dẵư bơlăm trôh jơno tơpăt-durư̆ng? 17Mơya ưnngai Yang Tơm Trồ bơh oh mi rôh lŏ ờs la cro ăm dê̆ nơ̆m tồi-glài, mà oh mi rôh lŏ sŏng bơh nhòng nùs tua don jơno gôtrê î jăt sơnoa bơtău tơngkah mà mơ̆n dî tơs bơtău. 18Hôm ma-ngkơi jơ dî tơlôh klàs bơh sơ tồi-glài, oh mi rôh lŏ sŏng dî lơh dê̆ ma jơno tơpăt-durư̆ng dê. 19Ăñ tơs jăt jơno kon-mơnùs, tài bơh jơno lơbăn-lơñô să-jăn oh mi rôh lŏ dê. Bơh mơmơh tîgay oh mi rôh lŏ sŏng jao phi lơ̆gay pơnah să-jăn mơ̆n gư̆ptî cro ăm lơh dê̆ ma jơno sơmơ̆-sơmĭñ gư̆m bră dô sơlơ tìs trôh jơno-bơlăm, gừn jơ dô, kŭng tîrơ̆, oh mi rôh lŏ ăn cĕ lơ̆gay pơnah să-jăn mơ̆n dê gư̆ptî cro ăm dê̆ ma jơno tơpăt-durư̆ng kơlôi trôh jơno sang-goh. 20Bơh tơm tô̆ oh mi rôh lŏ hôm la cro ăm dê̆ tồi-glài, gừn oh mi rôh lŏ ờs dî khăt-gơboh jăt î jơno tơpăt-durư̆ng. 21Tîrơ̆ gừn, oh mi rôh lŏ sŏng dî công nha găy bơh jơ rơ̆ lơ̆gay jơno mà jơ dô oh mi rôh lŏ tơmpơl dêh ƀasmăt? Bơh công nha lŭi-dơ̆t lơ̆gay jơno gư̆n la jơno sơ̆t. 22Mơya jơ dô, ma-ngkơi jơ dî tơlôh klàs bơh tồi-glài gư̆m dî lơh cro ăm dê̆ ma Yang Tơm Trồ, oh mi rôh lŏ dî ple-bơkao mơ̆n dê bơlăm trôh jơno gôjîng sang-goh, mà công nha băl la jơno jîng miek miek 23Bơh jên-priè tô̆ tơnge tồi-glài dê la jơno sơ̆t, mơya jơno e gời Yang Tơm Trồ dê la jơno jîng miek miek nơ̆m Yang Dŏng-Klàs Jesu, Yang ƀòn mơ̆n.