Rôma 7

1Ơ oh mi rôh lŏ (bơh ăñ ndăng tơs î tơmpôl cro gư̆t jơno-bơlăm), hala la oh mi rôh lŏ ơ̆ gư̆t lah jơno-bơlăm dî gơnăp-gơnoăr nơ̆m du hôi cro nhòng khăi nhẵư jŏ ƀòn gô hôm jîng hala ơ̆h? 2Bơh cro-ua dî bo-klo sŏng kŏng jơno-bơlăm kađòng kăt î bo-klo hôm jîng mơ̆n dê, mơya dilah bo-klo sơ̆t, gừn cro-ua ơ̆ hôm kŏng kađòng kăt jơno-bơlăm klàs bơh cro bo-klo rơ̆ te. 3Gư̆n-jîng, nơ̆m jơ bo-klo hôm jîng, dilah e tơm bơrkòt băl î du hôi cro-klo nde, gừn e rơp tơs tơnggư̆t durư̆ng băl î sơnăn cro rês-àr bơnan. Mơya dilah bo-klo sơ̆t, gừn e dî khăt-gơboh klàs î jơno-bơlăm, e rơp ơ̆-iyŏ la cro rês-àr bơnan bulah tơm bơrkòt î cro-klo nde. 4Kŭng tîrơ̆, ơ oh mi rôh lŏ ăñ jê, să tơm oh mi rôh lŏ kŭng sŏng dî lơh jîng sơ̆t jăt î jơno-bơlăm kơnơm bơh să-jăn Yang Dŏng-Klàs, lơi e oh mi rôh lŏ dî tơm bơrkòt băl î cro nde, rơ̆ la î Bơtao sŏng dî lơh jîng wăl bơh anẵu sơ̆t, bulah e ƀòn mơ̆n digơlăn ple-đău ma Yang Tơm Trồ. 5Bơh dơ̆ ƀòn mơ̆n hôm ăm nơ̆m să-jăn, lơ̆gay jơno ham-kơñ tồi-glài e tơnggư̆t jơno-bơlăm ờs ble rơnggô nơ̆m pơnah să-jăn ƀòn mơ̆n dê, lơi tơlôh công nha lơi ma jơno sơ̆t. 6Mơya tô̆ dô ƀòn mơ̆n sŏng dî tơlôh klàs bơh jơno-bơlăm, bơh sŏng sơ̆t jăt î jơno mà ƀòn mơ̆n ờs kŏng căp kăt, gư̆n-jîng ƀòn mơ̆n digơlăn duh bră nơ̆m jơno niem mhăy Yang Hwîng dê, mà ơ̆-iyŏ jăt bơh jơno yo nơ̆m jơno cêh ờ.

7Gừn, ƀòn mơ̆n rơp tơs jơno găy? Jơno-bơlăm la tồi-glài ya? Bră gư̆n ơ̆ tom tơlôh dî ờ. Mơya, ăñ sŏng ơ̆ đăl gư̆t tồi-glài dilah ơ̆ kơnơm nơ̆m jơno-bơlăm. Bơh ăñ sŏng ơ̆ đăl gư̆t glài ham-hà dilah jơno bơlăm ơ̆ pơđơ lah: “Mê bư̆ng ham-hà.” 8Mơya tồi-glài, ma-ngkơi jơ dî tô̆ lơwah kơnơm bơh jơno pơđơ bơlăm, sŏng iyà wăl lơ̆gay jơno ham-kơñ nơ̆m ăñ. Bơh ơ̆ tom jơno-bơlăm gừn tồi-glài sơ̆t. 9Pơnah nde, lai ƀua, ăñ ờs jîng ơ̆ dî jơno-bơlăm, mơya ma-ngkơi jơ jơno pơđơ bơlăm trôh, gừn tồi-glài sŏng jîng wăl, 10hôm ăñ gừn sơ̆t. Gừn jơno pơđơ bơlăm la jơno blăc trê lêh ma jơno jîng, gừn gô sŏng dî tơmpơl gư̆ptî la jơno sơ̆t gôtrê î ăñ. 11Bơh ma-ngkơi jơ cơƀah dưñ tô̆ lơwah kơnơm jơno pơđơ bơlăm, tồi-glài sŏng pơlum ăñ, gừn kơnơm bơh jơno gư̆n, sŏng lơh tơngsơ̆t ăñ. 12Tîgư̆n, jơno-bơlăm la sang-goh, jơno pơđơ bơlăm kŭng la sang-goh, tơpăt-durư̆ng, î lơbăn-niem.

13Gừn, jơno lơbăn-niem sŏng gôjîng jơno sơ̆t e ma ăñ hala ơ̆h? Bră gư̆n ơ̆ tom tơlôh dî ờ. Tơblơ̆ wăl, lơi kơnơm bơh jơno lơbăn-niem, tồi-glài digơlăn kŏng rang sơđah la tồi-glài, rơ̆ la jơno iyà wăl jơno sơ̆t nơ̆m ăñ, bulah e ma jơno-bơlăm, tồi-glài gôjîng bờk-mơsăk khăi oăn. 14Bơh ƀòn mơ̆n gư̆t lah jơno-bơlăm la jơno đah hwîng, hôm să tơm ăñ la poăc-să, sŏng kŏng brău lơh jîng cro ăm dê̆ nteàh tồi-glài. 15Bơh ăñ ơ̆ wơng bră mơ̆n lơh tơlôh. Bơh ơ̆-iyŏ ăñ lơh jơno mà ăñ kơñ. Mơya ăn lơh jơno mà ăñ tơcao. 16Mơya dilah ăñ lơh jơno mà mơ̆n ơ̆ kơñ, gừn ăñ du nùs băl î jơno-bơlăm lah lơbăn-niem ngăn. 17Mơya jơ dô să tơm ăñ ơ̆ lơh bră gư̆n te, mà la tồi-glài ndăng ăm nhòng ăñ! 18Bơh ăñ gư̆t lah jơno niem ơ̆ ăm nhòng ăñ, rơ̆ la nơ̆m să-jăn ăñ. Bơh kơp kơñ jơno niem, gừn hôm sơđah nhòng ăñ, mơya lơh tơlôh jơno niem gừn ơ̆ dî. 19Bơh jơno niem mà ăñ kơñ gừn ơ̆ lơh, mơya jơno mơsăk mà ăñ ơ̆ kơñ, gừn ăñ lơh jơno gư̆n. 20Hôm dilah ăñ lơh jơno mà mơ̆n ơ̆ kơñ lơh, gừn ơ̆-iyŏ să tơm ăñ lơh jơno rơ̆ te, mơya la tồi-glài ăm nhòng ăñ. 21Gư̆n-jîng, ăñ gư̆t đăl jơno-bơlăm dô nhòng ăñ, rơ̆ la nơ̆m kon-mơnùs kơp kơñ lơh jơno niem dô, rơ̆ la jơno bờk-mơsăk kŭng ndăng sơđah nhòng ăñ. 22Bơh ăñ sơhờp-sờhơn bơh jơno-bơlăm Yang Tơm Trồ jăt cro đah nhòng. 23Mơya ăñ lăng tơmpơl du-lăm jơno-bơlăm nde nơ̆m lơ̆gay pơnah să-jăn mơ̆n, tơmlơh tơmdră wăl jơno-bơlăm nhòng tơngoh ăñ gư̆m kơ̆p lơh dê̆-gơna ăñ bơh jơno-bơlăm tồi-glài, la jơno-bơlăm ndăng ăm miek nơ̆m lơ̆gay pơnah să-jăn ăñ jê. 24Ăñ la du hôi cro gleh-glăr ngăn! Mơ̆t cro rơp dŏng-klàs ăñ bơh să-jăn jơno sơ̆t dô teh? 25Ưnngai Yang Tơm Trồ kơnơm bơh Yang Dŏng-Klàs Jesu, la Yang ƀòn mơ̆n! Bơh tîrơ̆, gư̆n-jîng bulah î tơngoh, să tơm ăñ duh bră jơno-bơlăm Yang Tơm Trồ dê, mơya î să-jăn gừn ăn lơi ma jơno-bơlăm tồi-glài dê.