Rôma 8

1Gư̆n-jîng, tô̆ dô ơ̆ tom jơno lơh nên glài găy ma tơmpôl cro găy ăm nơ̆m Yang Dŏng-Klàs Jesu. 2Bơh jơno-bơlăm Yang Hwîng dê jơno jîng nơ̆m Yang Dŏng-Klàs Jesu sŏng hồ dŏng-klàs ăñ bơh jơno-bơlăm tồi-glài dê î jơno sơ̆t. 3Bơh jăt î bră jơno-bơlăm dê ơ̆ lơh dî, rơ̆ la nơ̆m bră bơh poăc-să gô ờs lơbăn-lơñô, gừn Yang Tơm Trồ, ma-ngkơi jơ pơđơ să tơm Kon Kơnràñ trôh nơ̆m nùs tua gôlơh gư̆ptî poăc-să tồi-glài gừn tài bơh tồi-glài dê, Kơnràñ sŏng lơh nên tồi-glài nơ̆m poăc-să, 4lơi lơ̆gay bră tơpăt-durư̆ng jơno-bơlăm dê dî lơh wêl-tăl nơ̆m ƀòn mơ̆n, la tơmpôl cro ơ̆ lơbà swà jăt poăc-să, mơya jăt Yang Hwîng. 5Bơh tơmpôl cro jîng jăt să-jăn gừn kơlôi-sơnư̆ng nơ̆m lơ̆gay jơno gôtrê đah să-jăn, hôm tơmpôl cro jăt Yang Hwîng gừn kơlôi-sơnư̆ng nơ̆m lơ̆gay jơno gôtrê đah Yang Hwîng nơ̆m lơ̆gay jơno. 6Bơh tơngoh poăc-să dê la jơno sơ̆t, hôm tơngoh nơ̆m Yang Hwîng la jơno jîng î lơngăp-lơnge. 7Rơ̆ la bơh tơngoh nơ̆m să-jăn gừn bulah tơmdră î Yang Tơm Trồ, bơh gô ơ̆ kơñ don-duh nteàh jơno-bơlăm Yang Tơm Trồ dê, bơh gô ơ̆ pran ayua lơi lơh tîgư̆n. 8Hôm tơmpôl cro jîng jăt poăc-să gừn ơ̆ digơlăn lơh niem-nùs Yang Tơm Trồ. 9Mơya, oh mi rôh lŏ ơ̆ ăm nơ̆m poăc-să, mà la nơ̆m Yang Hwîng, dilah iyŏ ngăn Hwîng Yang Tơm Trồ dê ăm jîng nhòng oh mi rôh lŏ. Hôm dilah cro găy ơ̆ tom Hwîng Yang Dŏng-Klàs dê, gừn cro gư̆n ơ̆ gôtrê ma Kơnràñ. 10Tơblơ̆ wăl dilah Yang Dŏng-Klàs ăm nơ̆m oh mi rôh lŏ, gừn bulah să-jăn la jơno sơ̆t tài bơh tồi-glài, mơya Yang Hwîng Goh la jơno jîng tài bơh jơno tơpăt-durư̆ng. 11Hôm dilah Yang Hwîng Bơtao sŏng lơh Yang Jesu jîng wăl bơh anẵu sơ̆t ndăng ăm wăl nơ̆m oh mi rôh lŏ, gừn Bơtao sŏng lơh Yang Dŏng-Klàs Jesu jîng wăl bơh anẵu sơ̆t kŭng e jơno jîng ma să-jăn nteàh jơno sơ̆t oh mi rôh lŏ, bơh Yang Hwîng Kơnràñ ăm băl nơ̆m oh mi rôh lŏ.

12Gư̆n-jîng, ơ oh mi rôh lŏ, ƀòn mơ̆n ơ̆-iyŏ la cro kađòng dồs poăc-să lơi jîng jăt đah poăc-să. 13Bơh dilah oh mi rôh lŏ jîng jăt đah poăc-să, oh mi rôh lŏ rơp păl sơ̆t, hôm dilah kơnơm bơh Yang Hwîng oh mi rôh lŏ lơh tơngsơ̆t lơ̆gay bră lơh să-jăn dê, gừn oh mi rôh lŏ rơp jîng. 14Bơh dilah cro găy dî tề lăm bơh Hwîng Yang Tơm Trồ dê, tơmpôl ƀòn gư̆n la Kon Yang Tơm Trồ dê. 15Bơh oh mi rôh lŏ sŏng ơ̆ dưñ-lăñ dî hwîng-nùs să-jăn cro ăm dê̆ lơi kơlôi wăl trôh jơno kơ̆mbrit-kơ̆mbròt, mơya oh mi rôh lŏ sŏng dưñ-lăñ Yang Hwîng nơ̆m gơnoăr bră la kon rong dê, kơnơm bơh gư̆n ƀòn mơ̆n hôi lah: “Aba, Bàp!” 16Să tơm Yang Hwîng lơh cư̆ng băl î hwîng-nùs ƀòn mơ̆n lah ƀòn mơ̆n la kon so Yang Tơm Trồ. 17Mà dilah la kon so, gừn kŭng la cro sơndơn, du pơnah la lơ̆gay cro sơndơn Yang Tơm Trồ dê, pơnah nde la lơ̆gay cro sơndơn băl î Yang Dŏng-Klàs — dilah ƀòn mơ̆n iyŏ ngăn kŏng gleh-glăr î Kơnràñ, lơi ƀòn mơ̆n kŭng dî gơklŏ î Kơnràñ.

18Bơh ăñ kơlôi lah lơ̆gay jơno gleh-glăr nơ̆m tô̆ tơnge jơ dô ơ̆ dî păl sơntu î jơno ang tơcrà mơñ dî e sơđah ma ƀòn mơ̆n. 19Bơh jơno mon bơjîng jơno kơp kơñ ăm cang ndăng dôh hôl cơkhă cang jơno e sơđah ma kon so Yang Tơm Trồ dê. 20Bơh lơ̆gay jini-jơno sŏng păl kŏng don-duh nteàh nùs tua jơno tơs gơlîng-gơlang, ơ̆-iyŏ bơh nùs dêh gô, mơya la bơh nùs-kơñ Bơtao sŏng pơđơ ƀòn gô păl don-duh, kơnơm nơ̆m jơno cang-kơnơm kơđư̆ng-bơkhê ngăn 21lah jơno mon bơjîng kŭng rơp dî hồ dŏng-klàs bơh să-jăn lơh cro ăm dê̆ ma jơno roh ha-ău, lơi dî tơmơ̆t jơno khăt-gơboh nơ̆m jơno ang tơcrà nơ̆m kon so Yang Tơm Trồ dê. 22Bơh ƀòn mơ̆n gư̆t lah jơh lơ̆gay jơno mon bơjîng kŭng nhơ̆ nhèng î cơdoh cơdang nơ̆m jơno jê-kơkua trôh dî nge dô. 23Mơya, ơ̆-iyŏ nư̆ng tîrơ̆ gời, mà ƀòn mơ̆n kŭng tîgư̆n, bulah tom dî ple-bơkao sơm năm Yang Hwîng dê — să tơm ƀòn mơ̆n kŭng nhơ̆ nhèng nơ̆m sătan, ndăng tơm tŭ dôh khôl ăm cang dî gơnoăr jîng kon rong, rơ̆ la jơno dŏng tơwai să-jăn ƀòn mơ̆n dê. 24Bơh ƀòn mơ̆n sŏng dî dŏng-klàs nơ̆m jơno cang-kơnơm kơđư̆ng bơkhê. Mà jơno cang-kơnơm dilah dî lăng tơmpơl gừn ơ̆-iyŏ la jơno cang-kơnơm. Bơh tom cro găy cang-kơnơm bơh jơno mà mơ̆n tơmpơl dî teh? 25Hôm dilah ƀòn mơ̆n cang-kơnơm bơh jơno mơ̆n hôm dahrăư tơmpơl, gừn ƀòn mơ̆n ndăng dôh khôl ăm cang bơh jơno ăt-ăl gư̆n.

26Mơya jăt dubă gư̆p tîgư̆n, Yang Hwîng kŭng tơmdŏng nơ̆m jơno lơbăn-lơñô ƀòn mơ̆n dê. Bơh ƀòn mơ̆n ơ̆ gư̆t jơno mà ƀòn mơ̆n păl hôi-dăn, gư̆ptî mơ̆n dî păl lơh, mơya să tơm Yang Hwîng băl î lơ̆gay dẵư kơkrẵy alô̆ng mơ̆n ơ̆-rgê tơs jîng î dẵư ngăc-ngăr hôi-dăn ala ma ƀòn mơ̆n. 27Hôm Bơtao lăng swì nùs tua cro gừn gư̆t nùs-nhơ̆m Yang Hwîng dê la amơh, bơh Kơnràñ hôi-dăn ala ma lơ̆gay cro sang-goh iyŏ ngăn jăt nùs-kơñ Yang Tơm Trồ dê. 28Pơnah nde, ƀòn mơ̆n gư̆t lah Yang Tơm Trồ lơh kơp bră tơm bơrkòt cro wăl î găp lơi lơh trôh jơno niem-lơhơn ăn lơi ma lơ̆gay cro kơñ-kơloh Yang Tơm Trồ, rơ̆ la ma lơ̆gay cro dî jơno hôi-săc jăt pơnah lơh nên Kơnràñ dê. 29Bơh tơmpôl cro mà Kơnràñ sŏng gư̆t lai, gừn Kơnràñ kŭng sŏng lơh nên lai lơi gư̆ptî rồp-să Kon Kơnràñ, lơi ma Kon rơ̆ gôjîng kon sơm nhòng khăi oh mi. 30Pơnah nde, lơ̆gay cro găy mà Kơnràñ sŏng lơh nên lai, gừn lơ̆gay cro gư̆n Kơnràñ kŭng hôi-săc. Gừn lơ̆gay cro găy mà Kơnràñ hôi-săc, gừn lơ̆gay cro gư̆n Kơnràñ kŭng e sơnăn la tơpăt-durư̆ng. Hôm lơ̆gay cro găy mà Kơnràñ e sơnăn la tơpăt-durư̆ng, gừn lơ̆gay cro gư̆n Kơnràñ kŭng sŏng lơh gôjîng jơno gơklŏ.

31Tîrơ̆ gừn, ƀòn mơ̆n rơp tơs amơh bơh lơ̆gay jơno dô? Dilah Yang Tơm Trồ tơmpẵu ma ƀòn mơ̆n, gừn mơ̆t cro tơmdră wăl ƀòn mơ̆n teh? 32Kơnràñ la Bơtao iyŏ ngăn sŏng ơ̆ kơnêh să tơm Kon mơ̆n, mơya sŏng jao phi Kon rơ̆ ala lơ̆gay ƀòn mơ̆n, gừn bơh jơno găy mà Kơnràñ rơp ơ̆ e gời lơ̆gay jơno băl î Kon rơ̆ e ma ƀòn mơ̆n? 33Mơ̆t cro rơp yă glài tơmdră wăl lơ̆gay cro dî săc-rwơh Yang Tơm Trồ dê teh? Yang Tơm Trồ la Bơtao sơnăn la tơpăt-durư̆ng. 34Cro găy la cro lơh nên glài teh? Yang Dŏng-Klàs Jesu la Bơtao sŏng sơ̆t — mơya rlo tîrơ̆ te, ma-ngkơi jơ dî lơh jîng wăl, Bơtao rơ̆ tien gơs ăm nggui đah tê ma Yang Tơm Trồ dê — î Kơnràñ ndăng hôi-dăn ala ma ƀòn mơ̆n. 35Mơ̆t cro rơp tơmcơlah ƀòn mơ̆n tơlôh bơh nùs kơñ-kơloh Yang Dŏng-Klàs dê? Iyŏ ngăn la jơno rŭng-rai, sơòs-sơngeh, kơ̆p-cơkhă, jơgloh tơhiê, ăm săkôh lơi sơlơ̆ñ, jơno roh ha-ău, hala pàs-đao? 36Gư̆ptî jơno dî cêh, lah:

“Tai bơh Kơnràñ, ƀòn kon kŏng jơno tơngsơ̆t kơp nge.

Ƀòn kon kŏng lăng gư̆ptî belàt ăn lơi ma bră tơngsơ̆t lơh rlău.”

37Mơya, nơ̆m lơ̆gay jơno rơ̆, ƀòn mơ̆n pha-lĭn dubă wêl-tăl kơnơm Bơtao kơñ-kơloh mơ̆n dê. 38Bơh ăñ dî jơno tơngkah nê̆ lah ơ̆ tom jơno sơ̆t, hala jơno jîng, ơ̆ tom lơ̆gay cro gơndrơh, hala tơmpôl cro gơnoăr ăt-bồ, hala lơ̆gay bră jơ dô, hala lơ̆gay jơno rơp trôh, ơ̆ tom gơnoăr-pran, 39hala đah yơng, hala đah jrô, kŭng ơ̆ tom kơp jơno găy mon bơjîng nde găy, rơp dî pran ayua tơmcơlah ƀòn mơ̆n tơlôh bơh nùs kơñ-kơloh Yang Tơm Trồ dê, la jơno ăm nơ̆m Yang Dŏng-Klàs Jesu, Yang ƀòn mơ̆n.