Rôma 9

1Ăñ tơs jơno ngăn nơ̆m Yang Dŏng-Klàs. Ăñ ơ̆ tơs blăc — nùs-nhơ̆m ăñ lơh cư̆ng ma ăñ nơ̆m Yang Hwîng Goh — 2lah î ăñ, tom jơno moat-jrum dơng î jơno jê-kơkua ơ̆ lơ̆ nhòng nùs ăñ. 3Bơh ăñ ờs kơp kơñ la să tơm mơ̆n kŏng sràt-rma, tơmcơlah bơh Yang Dŏng-Klàs tài bơh oh mi rôh lŏ ăñ, la lơ̆gay cro găp nŏk-noi ăñ jê jăt pơnah să-jăn. 4Să tơm ƀòn gô la lang bol Israel, mà lơ̆gay jơno gôtrê ma ƀòn gô la jơno sơnăn kon rong, ang tơcrà, lơ̆gay jơno hăư, bră dî dờp e gời ma jơno-bơlăm, jơno duh-khoai, î lơ̆gay jơno hăư; 5Ƀòn gô tơlôh bơh lơ̆gay tơmpôl ông-pang, gừn Yang Dŏng-Klàs tơlôh bơh ƀòn gô — (rơ̆ la jăt đah pơnah să-jăn) — Kơnràñ la Bơtao dơng yơng rlo lơ̆gay, rơ̆ la Yang Tơm Trồ păl dî jong-rơ trôh dî miek miek. Amen.

6Mơya ơ̆ tom bră jơno hăư Yang Tơm Trồ dê sŏng roh ơ̆ kwơ. Bơh ơ̆-iyŏ lơ̆gay cro găy tơlôh bơh Israel, gư̆n la cro Israel. 7Kŭng ơ̆-iyŏ jơh lơ̆gay kon so la nŏk-noi Abraham. Mơya la, “Bơh Isăk, nŏk-noi kon rơp dî hôi sơnăn.” 8Gơtha la, kon so jăt đah poăc-să, lơ̆gay tơmpôl gư̆n ơ̆-iyŏ la lơ̆gay kon Yang Tơm Trồ dê. Tơblơ̆ wăl, kon so jơno hăư-băl gừn dî tơs gư̆ptî nŏk-noi. 9Bơh dô la jơno hăư: “Nơ̆m tô̆ tơnge dô, Ăñ rơp trôh, gừn rơp tom du hôi kon klo ăn lơi ma Sara.” 10Mơya ơ̆ dî nư̆ng tîrơ̆ gời, mà Reƀeka kŭng tîgư̆n tơm tô̆ dî tơwă bơh du hôi cro, la Isăk, ông-pang ƀòn mơ̆n dê — 11Bơh nơ̆m jơ kon hôm dahrăư dî bơda, kŭng hôm dahrăư lơh jơno lơbăn-niem hala jơno bờk-mơsăk găy, lơi ma jơno lơh nên Yang Tơm Trồ dê jăt jơno săc-rwơh Kơnràñ dê digơlăn jư bơkhê, 12ơ̆-iyŏ tài bơh bră lơh, mơya la tài bơh Bơtao hôi-săc — jơno sŏng dî dờp e ma mò păl gư̆t, rơ̆ la: “Cro amî dơng rơp lơh cro dê̆-gơna ma cro oh.” 13Gư̆ptî jơno sŏng dî cêh lah: “Ăñ kơloh Jakôp, mơya Ăñ ngañ Esao.”

14Tîgư̆n, amơh ƀòn mơ̆n rơp tơs teh? Jơno tom jơno ơ̆ tơpăt-durư̆ng anẵu Yang Tơm Trồ ya? Bră gư̆n ơ̆ sơlôh jîng dî. 15Bơh Kơnràñ tơs î Môise, lah: “Ăñ rơp sơđah nùs lơbăn-niem î kơp cro găy mà Ăñ kơñ sơđah nùs lơbăn-niem, gừn Ăñ rơp kơñ-kơloh rngoh-rngăc kơp cro găy mà Ăñ kơñ-kơloh.” 16Gư̆n-jîng ơ̆-iyŏ bơh cro găy kơp kơñ, kŭng ơ̆-iyŏ bơh cro găy toat đah eo toat đah ma, mơya la jăt jơno gôtrê mađah Yang Tơm Trồ, Bơtao e sơđah nùs kơñ-kơloh rngoh-rngăc. 17Bơh Sră-Goh tơs bơh Pharaôn lah: “Kŭng bơh jơno dô, Ăñ sŏng pồ bơtao mê cŭngsî, lơi bơh mê Ăñ digơlăn lơh cư̆ng-tang gơnăp-gơnoăr Ăñ jê, î lơi amơh ma sơnăn Ăñ digơlăn dî tơs bơtău lam lơ̆ nơ̆m ù.” 18Gư̆n-jîng, Kơnràñ sơđah nùs lơbăn-niem î cro găy Kơnràñ kơñ, mơya Kơnràñ lơh kơdăng nùs cro găy Kơnràñ kơñ.

19Tîrơ̆ gừn oh mi rôh lŏ rơp lùp ăñ lah: “Tîgư̆n, Ngglơh Kơnràñ kŭng kư̆ đas teh? Bơh cro găy tơmdră wăl î nùs-kơñ Kơnràñ dê dî ya?” 20Ơ cro năy, nơ̆m ngăn tîdô mê la mơ̆t cro mà blơ̆-dră Yang Tơm Trồ? Hala jơno dî mon bơjîng rơp tơs î cro sŏng mon bơjîng jîng mơ̆n: “No-gwơh ông sŏng mon bơjîng ăñ jăt dơnău tîdô” teh? 21Hala cro mon kơlŏ ơ̆ dî gơnoăr nơ̆m ù lơ-ieng, lơi mon bơjîng du-lăm jơno bơh băl du khŭk ù, bulah jơno dô ăn lơi ma bră dơng mang, mơya jơno năy ăn lơi ma bră ơ̆ dơng mang? 22Hôm dilah Yang Tơm Trồ, bơh kơñ lơh cư̆ng nên jơno tơcao dơng Kơnràñ dê î rang sơđah jơno gơnăp-gơnoăr Kơnràñ, sŏng ăt-ăl nơ̆m jơno kŏng-ăt dơng gôtrê bơh lơ̆gay jơno ăn lơi ma jơno tơcao dơng, sŏng dî sơmơn lơs ma jơno tơngroh, 23î lơi Kơnràñ digơlăn rang sơđah jơno kơnhơ̆p-mơ̆nda jơno gơklŏ Kơnràñ dê nơ̆m lơ̆gay jơno ăn lơi ma jơno kơñ-kơloh rngoh-rngăc mà Kơnràñ sŏng sơmơn lơs ma jơno gơklŏ — 24Ƀăt băl î ƀòn mơ̆n, la tơmpôl cro mà Kơnràñ sŏng hôi-săc, ơ̆ dî nư̆ng bơh cro Juđa, mà hôm bơh lơ̆gay lang bol bơdih te? 25Gư̆ptî Kơnràñ kŭng tơs nơ̆m sră Ôse, lah:

“Ăñ rơp sơnăn cro ơ̆ iyŏ lang bol Ăñ, la ‘lang bol Ăñ’,

î cro ơ̆ dî kơloh la ‘cro dî kơñ-kơloh’.

26Gừn, jơno bră rơp tom nơ̆m anẵu mà jơno sŏng dî tơs ma ƀòn gô, lah: ‘Ƀòn mê ơ̆-iyŏ la lang bol Ăñ jê,’

gừn nơ̆m anẵu gư̆n, ƀòn gô rơp dî sơnăn la ‘lơ̆gay kon klo Yang Tơm Trồ dê hôm jîng miek.’”

27Mơya Esai dreo dơng bơh lang bol Israel lah:

“Bulah khà kon so lang bol Israel digơlăn la khăi gư̆ptî cas nơ̆m dàlîng,

mơya nư̆ng du pơnah hôm kađòng wăl rơp dî dŏng-klàs,

28bơh Yang rơp lơh nên jơno tơs Kơnràñ nơ̆m ù-teàh, lơh sŏng î sơbăc-sơbăng.”

29Gừn gư̆ptî Esai sŏng tơs lai lah:

“Dilah Yang lơ̆gay Tơmpôl Lĭñ dê sŏng ơ̆ lơi wăl ma ƀòn mơ̆n du nŏk-noi,

gừn nên-nôn ngăn ƀòn mơ̆n sŏng kŏng gôjîng gư̆ptî ƀòn dơng Sôđôm,

gừn ngăn la sŏng kŏng lơh gư̆ptî ƀòn dơng Gômôrơ.”

30Tîgư̆n, ƀòn mơ̆n rơp tơs amơh teh? Rơ̆ la lơ̆gay lang bol bơdih, rơ̆ la tơmpôl cro ơ̆ jôi jăt jơno tơpăt-durư̆ng, gừn sŏng dî wăl jơno tơpăt-durư̆ng, mơya jơno tơpăt-durư̆ng gư̆n kơnơm bơh jơno don. 31Hôm lang bol Israel, tơm tô̆ rơndôh jăt jơno-bơlăm jơno tơpăt-durư̆ng dê, gừn sŏng ơ̆ lơh wêl-tăl trôh jơno-bơlăm rơ̆. 32Tài bơh jơno găy? Rơ̆ la ơ̆ bơh jơno don, mơya gư̆ptî bơh bră lơh. Ƀòn gô sŏng sơndăc jư̆ng nơ̆m ne-lô̆ jơno tơm cơkhă, 33gư̆ptî sŏng dî cêh lah:

“Lăng cĕ dô, Ăñ ăn nơ̆m Siôn du ne-lô̆ jơno tơm cơkhă dê, î tơnăng lô̆ lơh gôjîng sơmăm tìs,

cro găy don anẵu ne-lô̆ gư̆n rơp ơ̆ kŏng jơno ƀasmăt.”