Rôma 10

1Ơ oh mi rôh lŏ, jơno kơp kơñ nhòng nùs ăñ gư̆m jơno hôi-dăn ăñ jê î Yang Tơm Trồ, ala ma ƀòn gô, la lơi ƀòn gô dî jơno dŏng-klàs. 2Bơh ăñ lơh cư̆ng bơh ƀòn gô lah ƀòn gô dî nùs ngăc-ngăr gôtrê î Yang Tơm Trồ, mơya ơ̆ jăt jơno gư̆t jăk nê̆-năn. 3Tài bơh ơ̆ đăl gư̆t jơno tơpăt-durư̆ng Yang Tơm Trồ, î grat pran ayua lơi tơngñă jơno tơpăt-durư̆ng dêh ma mơ̆n, gư̆n-jîng ƀòn gô ơ̆ kơñ don-duh jơno tơpăt-durư̆ng Yang Tơm Trồ dê. 4Bơh Yang Dŏng-Klàs la jơno lơh wêl-tăl dubă jơno-bơlăm, lơi iyà trôh jơno tơpăt-durư̆ng ma lơ̆gay cro dî nùs don. 5Bơh Môise cêh bơh jơno tơpăt-durư̆ng tơlôh bơh jơno-bơlăm lah: “Cro găy sŏng lơh-jăt lơ̆gay jơno dô, gừn cro rơ̆ kơnơm bơh gư̆n rơp jîng.” 6Mơya jơno tơpăt-durư̆ng bơh jơno don tơs tîdô lah: “Bư̆ng tơs nhòng nùs mơ̆n lah: ‘Cro găy rơp hao trôh cŭng trồ?’ (gơtha la, lơi iyà Yang Dŏng-Klàs jư nteàh); 7hala ‘Cro găy rơp jư trôh nơ̆m brŏng jrô rngăp-rnghêm teh?’” (Gơtha la, lơi iyà Yang Dŏng-Klàs hao cŭngsî bơh anẵu sơ̆t.) 8Tơblơ̆ wăl, jơno rơ̆ tơs amơh teh? “Jơno niem ăm en kon, nhòng yôi kon î ngglăm nùs kon.”

Gư̆n la dẵư jơno don mà ƀòn hî tơs bơtău tơs. 9Bơh dilah oh mi rôh lŏ tơs dưñ-lăñ sơnăn Jesu la Yang bơh î kơ̆mbung yôi mơ̆n, gừn oh mi rôh lŏ don nhòng nùs mơ̆n lah Yang Tơm Trồ sŏng lơh Kơnràñ jîng wăl bơh anẵu sơ̆t, gừn oh mi rôh lŏ rơp dî dŏng-klàs. 10Tài bơh cro găy bơh nùs don kơnơm gừn bơlăm trôh jơno tơpăt-durư̆ng, hôm cro găy bơh dẵư sơnăn tơlôh gừn bơlăm trôh jơno dŏng-klàs. 11Bơh Sră-Goh tơs lah: “Lơ̆gay cro don anẵu Kơnràñ rơp ơ̆ kŏng ƀasmôh ƀasmăt.” 12Bơh ơ̆ tom jơno tơmcơlah nhòng cro Juđa î cro Grek, bơh băl du hôi Bơtao la Yang lơ̆gay kơp cro, bîng jơno sơmah gôtrê î lơ̆gay cro hôi dăn î Kơnràñ. 13Bơh “lơ̆gay cro, rơ̆ la kơp cro găy sŏng hôi dăn sơnăn Yang, rơp dî dŏng-klàs.” 14Tîgư̆n, lơh tîgay ƀòn gô digơlăn hôi-dăn î Bơtao mà ƀòn gô hôm dahrăư don teh? Gừn lơh mơmơh ƀòn gô digơlăn don Bơtao mà ƀòn gô hôm dahrăư kơnău? Mà lơh mơmơh ƀòn gô digơlăn kơnău tơm tô̆ ơ̆ tom cro tơs bơtău? 15Mơya amơh tơmpôl ƀòn gư̆n tơs bơtău dilah ƀòn gô ơ̆ dî pơđơ swà teh? Gư̆ptî jơno sŏng dî cêh, lah: “Kơ̆mpang jư̆ng tơmpôl cro tơs tơnggư̆t jơno niem la niem-lơhơn gư̆t nhẵư!”

16Mơya, ơ̆-iyŏ lơ̆gay sŏng kơnău jăt Jơno Niem; bơh Esai tơs lah: “Ơ Yang, cro găy sŏng don jơno tơs tơnggư̆t ƀòn hî dê?” 17Gư̆n-jîng, jơno don trôh bơh bră kơnău, mà bră kơnău rơ̆ la kơnơm bơh jơno tơs Yang Dŏng-Klàs. 18Mơya, ăñ dăn lùp lah: “tom iyŏ la ƀòn gô ơ̆ kơnău dî?” Nê̆-năn ngăn gừn,

“Dẵư tơmpôl ƀòn gư̆n sŏng pơndrơ lam lơ̆ ù,

î jơno tơs ƀòn gô dê trôh lơ̆gay anẵu dơ̆t-lŭi dunya dê.”

19Bulah tîgư̆n, ăñ dăn lùp lah: Tom iyŏ la lang bol Israel sŏng ơ̆ đăl gư̆t? Lai ngăn, Môise tơs lah:

“Să tơm Ăñ rơp lơh ma ƀòn mê tơcao-gơget bơh î cro ơ̆-iyŏ la du lang bol.

Ăñ rơp mơgă ma ƀòn mê tơcao nùs bơh du lang bol ơ̆ tom jơno gư̆t wơng.”

20Sŏng gư̆n, Esai dưñ lơh khơ̆n-sa, gừn ông tơs lah:

“Ăñ sŏng dî tơmtom bơh tơmpôl cro ơ̆ jôi lăng Ăñ,

Ăñ sŏng jîng sơđah tơlôh să ăñ ma lơ̆gay cro ơ̆ jôi lùp Ăñ.”

21Hôm î lang bol Israel, Kơnràñ tơs lah: “Lơ̆ du nge, Ăñ pẵư tê mơ̆n ma đah du lang bol ơ̆ don dẵư î măñ tơmdră.”