Rôma 11

1Gừn ăñ dăn lùp lah: Tom iyŏ Yang Tơm Trồ sŏng lơi căư lang bol Kơnràñ? Bră gư̆n ơ̆ sơlôh dî ờ! Bơh să tơm ăñ kŭng la du hôi cro Israel, bơh nŏk-noi Abraham, gôtrê mađah nŏk-noi Ƀenjamin. 2Yang Tơm Trồ ơ̆ lơi căư lang bol Kơnràñ, la lang bol Kơnràñ sŏng gư̆t lai. Hala oh mi rôh lŏ ơ̆ gư̆t Sră-Goh tơs jơno găy bơh Êli, tơm tô̆ ông hôi-dăn î Yang Tơm Trồ tơmdră wăl î lang bol Israel. 3“Khoai Yang, ƀòn gô sŏng tơngsơ̆t lơ̆gay cro gơnoăr-hwơr Kơnràñ dê, ƀòn gô sŏng lơh roh kaƀang duh-khoai Kơnràñ, nư̆ng hôm kađòng wăl du hôi ăñ, gừn ƀòn gô kŭng hôm jôi jơno lơi tơngsơ̆t ăñ.” 4Mơya Yang Tơm Trồ kla wăl dẵư gô amơh teh? “Ăñ sŏng ăn lơi ma Ăñ poh-rbô hê cro-klo la tơmpôl cro ơ̆ cơdơn krô̆ng sơđàp rồp Ƀaal.” 5Gừn kŭng jăt dubă tîgư̆n nơ̆m tô̆ tơnge jai dô, sơdô sơdă hôm du pơnah kađòng wăl jăt jơno săc-rwơh jơno sơmah dê. 6Mơya dilah bơh jơno sơmah, gừn ơ̆-iyŏ bơh bră lơh te. Dilah ơ̆, jơno sơmah ơ̆ hôm la jơno sơmah. 7Tîgư̆n la amơh lơh teh? Jơno mà lang bol Israel jôi lăng, gừn lang bol gư̆n ơ̆ tom dưñ dî gô; mà cro găy dî săc-rwơh gừn dưñ dî, mơya khà hôm wăl sŏng kŏng kră kơdăng nùs, 8gư̆ptî jơno sŏng dî cêh, lah: “Yang Tơm Trồ sŏng dờp e ma ƀòn gô hwîng-nùs wì-lơngôh, măt ơ̆ tơmpơl, tua ơ̆ kơnău, trôh dî nge dô.” 9Î Dabit gừn tơs lah:

“Lơi cĕ kaƀang ƀòn gô dê sơlôh gôjîng sơnñol, kơ̆ndăp, ne-lô̆ sơ̆mpĭñ jư̆ng,

î jơno tơm kla wăl ăn lơi ma ƀòn gô.

10Lơi cĕ măt ƀòn gô kŏng kơnăm ñô̆ng lơi ơ̆ lăng tơmpơl,

î lơh cĕ bơ̆t ƀòn gô kư̆ păl lơh miek cơ-ngô̆ng.”

11Tîgư̆n, ăñ dăn lùp lah: “Tom iyŏ ƀòn gô sŏng sơ̆mpĭñ jư̆ng sŏng gư̆n blă tơñăp?” Bră gư̆n ơ̆ tom tơlôh dî ờ! Ala sơgư̆n, bơh jơno tìs-glài ƀòn gô dê, jơno dŏng-klàs trôh î lang bol bơdih, lơi lơh ma ƀòn gô tơcao-gơget. 12Pơnah nde, dilah jơno tìs-glài ƀòn gô dê iyà trôh jơno kơnhơ̆p-mơ̆nda dunya dê, î jơno lơbăn prŏi ƀòn gô dê iyà trôh jơno kơnhơ̆p-mơ̆nda lơ̆gay lang bol bơdih dê, gừn jơno wêl-tăl ƀòn gô dê rơp sơlơ kơnhơ̆p-mơ̆nda tơngkah-tơngkăñ rlo gư̆t nhẵư? 13Hôm jơ dô, ăñ dăn tơs î oh mi rôh lŏ la lơ̆gay lang bol bơdih: Gừn, sơlơ tài bơh să tơm ăñ la cro gơnoăr bơtău dơng ma lơ̆gay lang bol bơdih, ăñ lơh sơhờp ngăn bơh gơnoăr bră mơ̆n, 14bulah lơi bơh jơno găy gư̆n, ăñ digơlăn lơh ma lang bol jăt đah să-jăn ăñ jê tơcao-gơget gừn digơlăn dŏng-klàs dî du pơnah cro bơh anẵu ƀòn gô. 15Bơh dilah jơno khan lơi căư ƀòn gô iyà trôh jơno tơmrơm dunya dê, gừn bră ƀòn gô dưñ-lăñ rơp amơh lơh dilah ơ̆-iyŏ la jơno jîng tơlôh bơh anẵu sơ̆t teh? 16Pơnah nde, dilah pơnah kơmbôh dơ̆ sơm la sang-goh, gừn băl î kơnăc kơmbôh gư̆n kŭng gư̆p tîrơ̆. Î dilah reah la sang-goh, gừn lơ̆gay mbơlong kŭng tîgư̆n ya. 17Mơya dilah du pơnah mbơlong sŏng kŏng geh căư, hôm oh mi rôh lŏ, tơm tô̆ la mbơlong sî ôlibe brê, sŏng dî crăp tòp tơmơ̆t nơ̆m anẵu ƀòn gô, gừn sŏng gôjîng dî pơnah băl kơ̆n-tă jîng bîng-tăl bơh reah sî ôlibe dê, 18gừn bư̆ng tơngyeh să mơ̆n rlo lơ̆gay mbơlong nde. Mơya bulah oh mi rôh lŏ tơngyeh să, gừn kah sơdơ lah ơ̆-iyŏ sătan oh mi rôh lŏ kŏng ơnong rong reah sî, mà la reah sî rong oh mi rôh lŏ. 19Tîgư̆n, oh mi rôh lŏ rơp tơs lah: “Lơ̆gay mbơlong gư̆n sŏng kŏng geh căư, lơi să tơm ăñ digơlăn dî crăp tòp tơmơ̆t.” 20Iyŏ ngăn tîgư̆n! Ƀòn gô sŏng kŏng geh căư bơh jơno ơ̆ don, hôm să tơm oh mi rôh lŏ gừn ñă kơđư̆ng kơnơm bơh jơno don. Bư̆ng ăn nùs trôh lơ̆gay jơno kơlôi tơngyơng să mơ̆n, mà kơ̆mbrit-kơ̆mbròt cĕ. 21Bơh dilah Yang Tơm Trồ ơ̆ hồ kla lơ̆gay mbơlong jîng dêh năy, gừn Kơnràñ kŭng rơp ơ̆ hồ kla oh mi rôh lŏ. 22Tîgư̆n, lăng gư̆t cĕ nùs lơbăn-niem î jơno krañ-cê Yang Tơm Trồ dê; jăt bơh jơno krañ-cê gôtrê î tơmpôl cro sŏng gơhuc gơplơ̆, mơya nùs lơbăn-niem Yang Tơm Trồ dê ăn lơi ma oh mi rôh lŏ, dilah oh mi rôh lŏ kư̆ ăm nơ̆m jơno lơbăn-niem Kơnràñ dê. Dilah ơ̆, să tơm oh mi rôh lŏ kŭng rơp kŏng koh rơmbư̆ng căư. 23Hôm tơmpôl cro năy kŭng tîrơ̆, dilah ƀòn gô ơ̆ ăm miek nơ̆m jơno ơ̆ don, gừn ƀòn gô rơp dî crăp tòp tơmơ̆t băl. Bơh Yang Tơm Trồ dî gơnăp-gơnoăr lơi crăp tòp ƀòn gô tơmơ̆t băl wăl. 24Bơh dilah oh mi rôh lŏ sŏng kŏng păc bơh sơ tơm-si bơh du ƀĕ sî ờs dơm jăt la sî ôlibe brê, gừn sŏng dî crăp tòp tơmơ̆t tơblơ̆ î jơno ờs dơm nơ̆m sî ôlibe niem, gừn tơmpôl cro gư̆n, rơ̆ la tơmpôl cro lơh-jăt ờs dơm jơno năy, rơp sơlơ rlo te dî crăp tòp tơmơ̆t nơ̆m sî ôlibe să tơm dê khăi ơ̆ gư̆t nhẵư teh?

25Ơ oh mi rôh lŏ, ăñ ơ̆ kơñ oh mi rôh lŏ ơ̆ gư̆t bơh jơno ndăp-ndơ dô, lơi oh mi rôh lŏ ơ̆ dî jơno jăk-sai jăt sătan mơ̆n dê, bơh jơno kơdăng nùs tơlôh bơh du pơnah lang bol Israel sŏng tom tơlôh, trôh dî jơ tăl khà lơ̆gay lang bol bơdih tơmơ̆t; 26gừn tîgư̆n, lơ̆ Israel rơp dî dŏng-klàs, gư̆ptî sŏng dî cêh lah:

“Bơtao Dŏng-Tă rơp trôh bơh Siôn;

Kơnràñ rơp lơh roh lơ̆gay jơno ơ̆ don Yang tơlôh bơh sơ Jakôp.

27Gừn rơ̆ la jơno hăư-băl bơh anẵu Ăñ jê ăn lơi ma ƀòn gô,

tơm tô̆ Ăñ sŏng mbư̆ng lơi căư tồi-glài ƀòn gô dê.”

28Jăt bơh Jơno Niem, ƀòn gô la cro tơmdră tài bơh jơno kwơ oh mi rôh lŏ dê. Mơya jăt jơno săc-rwơh, gừn ƀòn gô la cro dî kơñ-kơloh tài bơh lơ̆gay ông-pang ƀòn gô dê. 29Tài bơh lơ̆gay jơno e gời gư̆m jơno hôi-săc Yang Tơm Trồ dê la lơ̆gay jơno ơ̆-rgê tơmbơgăl. 30Bơh tien gơs gư̆ptî lai ƀua să tơm oh mi rôh lŏ sŏng ơ̆ don jơno Yang Tơm Trồ, mà jơ dô sŏng dî kơñ-kơloh rngoh-rngăc anẵu jơno ơ̆ don tơmpôl cro dô, 31gừn kŭng tîrơ̆, tơmpôl cro dô, jơ dô sŏng ơ̆ don băl anẵu jơno kơloh-kơlài oh mi rôh lŏ, lơi jơ dô ƀòn gô kŭng digơlăn dî kơloh-kơlài. 32Bơh Yang Tơm Trồ sŏng tơng-gron lơ̆gay cro nơ̆m jơno ơ̆ don băl, lơi Kơnràñ digơlăn e nùs kơloh-kơlài lơ̆gay cro.

33Ời, niem ngăn jơno đah jrô gôtrê bơh jơno kơnhơ̆p-mơ̆nda gư̆m jơno jăk-sai băl î jơno gư̆t wơng Yang Tơm Trồ dê! Amơh lơ̆gay jơno lơh nên Kơnràñ dê ơ̆-rgê jôi swì dî, î gung dà Kơnràñ dê ơ̆ tom cro găy rgê gư̆t dî ờ!

34Bơh, “Cro găy sŏng gư̆t nùs-nhơ̆m Yang dê?

Hala mơ̆t cro sŏng gôjîng cro lai gơnoăr bơyê bră Kơnràñ dê?

35Hala mơ̆t cro sŏng e ma Kơnràñ lai,

sŏng rơp dî Kơnràñ kla wăl?”

36Bơh lơ̆gay jơno tơlôh bơh Kơnràñ, kơnơm nơ̆m Kơnràñ, î gôtrê mađah Kơnràñ. Jơno gơklŏ gôtrê ma Kơnràñ trôh dî miek miek. Amen.