Rôma 12

1Tîgư̆n, ơ oh mi rôh lŏ, bơh jơno kơloh-kơlài Yang Tơm Trồ dê, ăñ răc-dăn oh mi rôh lŏ ăn să-jăn mơ̆n ma Yang Tơm Trồ gư̆ptî du-lăm jơno ăn duh-khoai jîng, sang-goh, niem-nùs Kơnràñ, rơ̆ la jơno duh-khoai iyŏ ngăn oh mi rôh lŏ dê. 2Gừn bư̆ng dubă băl î rai dô, mơya păl dî lơh sơlơ̆ nơ̆m khu tơngoh tài bơh jơno bơgăl mhăy wăl, lơi oh mi rôh lŏ cư̆ng-tang dî nê̆-năn jơno găy la nùs-kơñ niem-lơhơn, niem-nùs gư̆m wêl-tăl Yang Tơm Trồ dê.

3Bơh kơnơm bơh jơno sơmah sŏng dî dờp e ma ăñ, ăñ dăn tơs î kơp cro ăm nhòng tơmpôl oh mi rôh lŏ bư̆ng kơlôi-sơnư̆ng bơh sătan mơ̆n dơng rlo jơno păl kơlôi, ala sơgư̆n la lăng wì lơi ang tơngoh lăng jư să tơm, jăt gư̆ptî du-lăm dơnău jơno don Yang Tơm Trồ sŏng dờp tơmpà e ma kơp să cro. 4Bơh tien gơs gư̆ptî ƀòn mơ̆n tom khăi pơnah nơ̆m du-lăm să-jăn, mơya lơ̆gay pơnah să-jăn ơ̆ dî băl du pơnah lơh bră durư̆ng băl, 5gừn jăt dubă gư̆ptî gư̆n, khăi cro ƀòn mơ̆n la du-lăm să-jăn nơ̆m Yang Dŏng-Klàs, mà kơp du hôi cro la pơnah băl î găp. 6Mơya ƀòn mơ̆n dî lơ̆gay jơno sơmah e gời phadêh î găp jăt jơno sơmah sŏng dî dờp e ma mơ̆n, tom iyŏ la jơno sơmah tơs hwơr, gừn jăt dơnău jơno don dê; 7tom iyŏ la jơno sơmah duh bră, gừn ăn lơi nơ̆m bră duh bră, tom iyŏ la jơno sơmah ƀăn mơntău, gừn ăn lơi nơ̆m bră ƀăn mơntău; 8tom iyŏ la jơno sơmah mơ̆ndơm-mơ̆nieng, gừn ăn lơi nơ̆m bră mơ̆ndơm-mơ̆nieng, jơno sơmah dờp e gời, gừn lơh bơh î jơno sơhờp dơng ơnàng, jơno sơmah ăt-bồ, gừn lơh bơh î jơno jờh nùs, jơno sơmah sơđah nùs kơloh-kơlài, gừn lơh bơh î jơno sơhờp-sờhơn.

9Jơno kơñ-kơloh gừn ơ̆ lơh blăc blơ̆, bơh tơcao ngañ jơno bờk-mơsăk, prăp jư mơ̆n kađie-kađieh î jơno lơbăn-niem; 10la jơno tơm kơloh ăn lơi ma găp nơ̆m jơno kơñ-kơloh oh mi dê, lơh krơh ma găp nơ̆m jơno kingam băl; 11nơ̆m jơno jơdeh-jơdai, la ơ̆ lơh brĕ brăy alah-atà. Nơ̆m nùs tua, păl jơmrăc-jơmrài cĕ, păl duh bră Yang; 12sơhờp-sờhơn nơ̆m jơno cang-kơnơm, ăt-ăl cĕ nơ̆m jơno rŭng-rai; kơđư̆ng nơ̆m jơno hôi-dăn; 13tơmpà lơ̆gay jơno kơñ ngui lơ̆gay cro sang-goh dê, tơte jăt gung dà nùs sơmah-sơmai wă-rẵu năc. 14E lơnge cĕ ma tơmpôl cro kơ̆p-cơkhă oh mi rôh lŏ; e lơnge cĕ gừn bư̆ng sràt-rma; 15lơi sơhờp băl î lơ̆gay cro sơhờp, lơi ñim băl î lơ̆gay cro ñim; 16tơm tô̆ dî du nùs băl kơlôi-sơnư̆ng ăn lơi băl ma găp, ơ̆ tom jơno kơlôi-sơnư̆ng pơnhừ-să, mơya la kŏng đăl gư̆t lơ̆gay cro kơsòt-rƀah. Bư̆ng gôjîng jăk-sai kơnơm bơh să tơm mơ̆n; 17tơm tô̆ ơ̆ kla tê wăl jơno mơsăk bơh î jơno mơsăk ma kơp cro găy, rong-siem lơ̆gay jơno niem-lơhơn sơđàp măt lơ̆gay cro. 18Dilah rgê lơh, anẵu gơnoăr bră găy gôtrê ma mơ̆n, gừn prăp jư jơno ăm tơmrơm băl î lơ̆gay cro. 19Ơ oh mi rôh lŏ kơloh ngăn, bư̆ng bơh dêh sătan mơ̆n kla jơno mơsăk, mơya păl lơi e anẵu ma jơno tơcao dơng Yang Tơm Trồ dê, bơh jơno sŏng dî cêh lah: “‘Bră tơm kla jơno mơsăk ăn lơi e ma Ăñ; Ăñ rơp lơh tơm kla wăl,’ Yang tơs tîgư̆n.”

20“Mơya, dilah cro tơmdră oh mi rôh lŏ tom jơgloh, păl e ma gô sa.

Dilah cro gư̆n tơhiê, gừn păl e ma gô ñô.

Bơh tơm tô̆ lơh tîgư̆n, oh mi rôh lŏ rơp crăm rnga oềs brông cŭngsî găl gô.”

21Bư̆ng lơi mơ̆n kŏng pơlum mơ̆ndơm bơh jơno mơsăk, mơya păl pha-lĭn jơno mơsăk bơh î jơno niem.