Rôma 13

1Lơ̆gay kơp cro păl don-duh cĕ lơ̆gay cro dî gơnăp-gơnoăr lơh dơng rlo ma mơ̆n, bơh ơ̆ tom gơnăp-gơnoăr găy hôm miek dilah ơ̆ tài bơh Yang Tơm Trồ, hôm lơ̆gay gơnăp-gơnoăr jơ dô gừn dî lơh nên bơh Yang Tơm Trồ. 2Gư̆n-jîng, cro găy ăn mơ̆n tơmdră wăl gơnăp-gơnoăr, rơ̆ la tơmdră wăl gơnoăr pơđơ Yang Tơm Trồ dê; mà tơmpôl cro lơh tơmdră gư̆n rơp kŏng añ jơno lơh-glài dêh ma mơ̆n. 3Bơh lơ̆gay tơmpôl cro kwăng bang ơ̆-iyŏ la jơno kơ̆mbrit-kơ̆mbròt gôtrê î bră lơbăn-niem, mơya la e ma bră mơsăk dê. Hôm oh mi rôh lŏ kơñ klàs ơ̆ păl kơ̆mbrit tơmpôl gơnoăr ăt-bồ rơ̆ ya? Lơh cĕ jơno niem, gừn oh mi rôh lŏ rơp lăñ dî jơno jong-rơ mơnê bơh cro gơnoăr ăt-bồ, 4tài bơh cro rơ̆ la dê̆-gơna Yang Tơm Trồ dê kơlôi trôh jơno niem-lơhơn ma oh mi rôh lŏ. Mơya dilah oh mi rôh lŏ lơh bră bờk-mơsăk, gừn kơ̆mbrit-kơ̆mbròt cĕ, bơh cro ơ̆ iyà đao dubă ơ̆ kwơ, bơh gô la dê̆-gơna Yang Tơm Trồ dê, rơ̆ la cro lơh kla bră jơno mơsăk lơi jơno tơcao dơng ăn lơi ma cro lơh bră bờk-mơsăk. 5Gư̆n-jîng, jơno păl cang ngăn la kŏng don-duh, ơ̆-iyŏ nư̆ng bơh jơno tơcao dơng, mà hôm tài bơh nùs tua ya. 6Tài bơh kŭng bơh jơno gư̆n gư̆n-jîng oh mi rôh lŏ păl lơboh-dia. Bơh ƀòn gô la dê̆-gơna Yang Tơm Trồ dê, grat pran miek gôtrê ma nơ̆m bră lơh dô. 7Păl kla ma lơ̆gay cro jơno mơ̆n hôm kađòng dồs î ƀòn gô. Lơboh-dia ma cro mơ̆n păl lơboh; nap dia ma cro mơ̆n păl nap; kơ̆mbrit cro mơ̆n dî păl kơ̆mbrit; kingam cro mơ̆n dî păl kingam.

8Bư̆ng kađòng dồs cro găy kơp jơno găy, nư̆ng sî nùs kơñ-kơloh băl ma găp, bơh cro găy kơñ-kơloh cro găp ƀòn gừn lơh wêl-tăl jơno-bơlăm. 9Bơh jơno dô: “Kon bư̆ng tìs-glài sơlăp-sơbêl, kon bư̆ng tơngsơ̆t cro, kon bư̆ng kơntô̆ng-kơño, kon bư̆ng ham-hà,” gừn dilah hôm tom kơp jơno gơnoăr pơđơ nde găy te, gừn lơ̆gay jơno gư̆n dî tơnggom wăl nơ̆m jơno dô: “kon păl kơloh cro găp ƀòn kon dê gư̆ptî să tơm kon.” 10Jơno kơñ-kơloh ơ̆ lơh tơmbờk cro găp ƀòn. Tîgư̆n, jơno kơñ-kơloh la jơno lơh wêl-tăl jơno bơlăm.

11Gừn gư̆p tîrơ̆, bơh gư̆t tô̆ tơnge, lah sŏng trôh jơ e ma oh mi rôh lŏ păl lôh atẵy bơh bĭc. Bơh jơ dô jơno dŏng-klàs ƀòn mơ̆n dê sŏng en rlo pơndrơm î bơh jơ ƀòn mơ̆n mhăy don. 12Tơmăng mơñ lơ̆, hôm nge mơñ trôh. Gừn, ƀòn mơ̆n păl hồ rơmbư̆ng lơ̆gay bră lơh jơno kơnăm ñô̆ng dê, sŏng gư̆n dưñ cù pàs-đao ao lòs jơno ang dê. 13Ƀòn mơ̆n păl lơbà swà dubă dî păl, gư̆ptî nhòng brê tơnge, ơ̆ ñô sa gư̆m mañơ̆l-lơmbẵy; ơ̆ sơlăp-sơbêl gư̆m lơh gơlîng-gơlang, ơ̆ tơmbơkai gư̆m ƀoah tơcao. 14Tơblơ̆ wăl, dưñ cù cĕ Yang, la Yang Dŏng-Klàs Jesu, gừn bư̆ng lơh-jăt jơno kơlôi-rcăng lai đah să-jăn kơlôi bơh lơ̆gay jơno ham-kơñ.