Philemôn 1

1Pol, cro ăm jam Yang Dŏng-Klàs Jesu dê, î cro oh mi la Timôthe pơyoa ma Philemôn, cro bơyô kơñ-kơloh gư̆m la cro lơh bră băl ƀòn hî dê; 2ma Appi, cro rôh ƀòn hî dê, ma Acip, cro bơyô ƀòn hî dê, î e hîh jư̆m goh nơ̆m hîh ông dê. 3Dăn jơno sơmah î jơno lơngăp-lơnge bơh Yang Tơm Trồ, Bàp ƀòn mơ̆n gư̆m Yang ƀòn mơ̆n, la Yang Dŏng-Klàs Jesu, trôh nơ̆m oh mi rôh lŏ.

4Ăñ ưnngai miek miek Yang Tơm Trồ ăñ dê, ăñ kah trôh ông nơ̆m jơno hôi-dăn ăñ dê. 5Ăñ ờs kơnău bơh jơno kơñ-kơloh ông băl î jơno don mà ông dî nơ̆m Yang Jesu, gư̆m lơi ăn ma lơ̆gay kơp cro sang-goh, 6tien gơs jơno tơmpà jơno don ông dê digơlăn sơlôh gôjîng ple-đău nơ̆m jơno đăl gư̆t bơh lơ̆gay jơno niem gôtrê ma Yang Dŏng-Klàs ăm nhòng ƀòn mơ̆n. 7Ơ cro oh mi, ăñ sŏng dî khăi jơno sơhờp-sờhơn î jơno tơngkah-mơ̆ndơm tài bơh jơno kơñ-kơloh ông dê, bơh nùs-nhơ̆m lơ̆gay tơmpôl cro sang-goh dê sŏng dî bơgăl mhăy kơnơm bơh ông.

8Tîrơ̆ gư̆n, bulah tom khăi jơno khơ̆n-sa nơ̆m Yang Dŏng-Klàs lơi pơdơ ma ông bơh jơno ông păl lơh, 9mơya bơh jơno kơñ-kơloh, ăñ e tơnggư̆t jơno răc-dăn gừn niem rlo — tơm tô̆ la du hôi cro gư̆ptî Pol dô, du hôi cro kra, mà jơ dô kŭng la cro kŏng jam bơh Yang Dŏng-Klàs Jesu — 10Ăñ răc-dăn ông ala măư ma bơh kon ăñ jê, Ônesim cro mà ăñ sŏng bơjîng nơ̆m săy-srê̆ mơ̆n dê. 11Lai ƀua, amî gư̆n ơ̆ tom kwơ ma ông, mơya jơ dô gừn tom kwơ băl ma ông gư̆m ma ăñ, 12gư̆n la cro mà ăñ pơđơ trê wăl tơmtom ông — să tơm amî gư̆n — cro dô la nùs-nhơ̆m ăñ jê. 13Ăñ kơp kơñ jư amî gư̆n wăl î mơ̆n, lơi amî gư̆n digơlăn ala măư ông dŏng bră ma ăñ nhòng săy-srê̆ tài bơh Jơno Niem. 14Bulah tîgư̆n, ăñ ơ̆ kơñ lơh jơno găy mà ơ̆ tom jơno niem-nùs ông dê, lơi bră niem ông dê ơ̆-iyŏ gư̆ptî la bơh rôn-bơklơ̆n, mơya bơh nùs-kơñ lơh. 15Kŭng bơh jơno dô mà amî gư̆n sŏng kŏng tơmcơlah î ông nơ̆m du tô̆ tơnge, lơi ma ông digơlăn wă-rẵu wăl amî gư̆n miek miek, 16ơ̆ hôm gư̆ptî cro ăm dê̆ te, mơya dơng mang rlo ma du hôi cro ăm dê̆ — du hôi cro oh mi kơñ-kơloh ngăn, lai ngăn gôtrê î ăñ, mà rlo ma rơ̆ te gôtrê î ông, băl nơ̆m să-jăn gư̆m nơ̆m Yang. 17Bơh gư̆n, dilah ông lăng ăñ gư̆ptî la cro bơyô lơh bră băl, dăn wă-rẵu amî gư̆n gư̆ptî wă-rẵu ăñ. 18Hôm dilah amî gư̆n sŏng lơh bờk-mơsăk ông hala kađòng dồs ông lơ̆gay kơp jơno găy, gừn cêh cĕ khà gư̆n ma ăñ. 19Ăñ la Pol, sŏng cêh jơno dô bơh î tê mơ̆n: să tơm ăñ rơp kla wăl, lơi ơ̆ tơs î ông lah ông tien gơs kađòng dồs ăñ să tơm ông! 20Ngăn, cro oh mi, dăn ăñ dưñ dî jơno kwơ bơh anẵu ông nhòng Yang; dăn ông lơh bơgăl mhăy cĕ nùs-nhơ̆m ăñ jê nhòng Yang Dŏng-Klàs.

21Bơh don nơ̆m jơno don-duh ông dê, gư̆n-jîng ăñ sŏng cêh sră pơyoa ma ông, gư̆t lah ông rơp lơh nên tien gơs rlo ma lơ̆gay jơno ăñ ndăng tơs. 22Bơh sơgư̆n, kŭng dăn rcăng du anẵu ăm ma ăñ, bơh ăñ kơp kơñ lah kơnơm jơno hôi-dăn oh mi rôh lŏ dê, ăñ rơp dî hồ trê î oh mi rôh lŏ.

23Epapras cro kŏng jam băl î ăñ nơ̆m Yang Dŏng-Klàs Jesu còp-să ông. 24Mak, Aritak, Demas, î Luka, lơ̆gay cro bơyô ăñ dê, kŭng còp-să ông.

25Dăn jơno sơmah Yang ƀòn mơ̆n dê, la Yang Dŏng-Klàs Jesu ăm î hwîng-nùs oh mi rôh lŏ. Amen!