Tit 3

1Păl tơngkah ƀòn gô don-duh î lơh-jăt lơ̆gay cro kwăng bơtao băl î lơ̆gay cro ăt-bồ, păl rcăng-să ma lơ̆gay bră niem, 2Bư̆ng tơs bờk cro găy, bư̆ng jôi gung, mà păl niem-lơhơn, jơh nùs tơng-êt să î lơ̆gay cro. 3Bơh ƀòn mơ̆n lai mađàp ƀua kŭng la tơmpôl cro wì-lơngôh î ơ̆ don jơno, kŏng pơlum î lơh dê̆ ma lơ̆gay wêl-tăl jơno ham-kơñ băl î jơno sơhờp-sờhơn, jîng nơ̆m jơno bờk-mơsăk î khi-mờc, păl ngañ, gư̆m tơmtơcao găp. 4Mơya tơm tô̆ jơno lơbăn-niem î nùs kơñ-kơloh Yang Tơm Trồ dê, Yang Dŏng-Klàs ƀòn mơ̆n, dî rang sơđah, 5gừn Kơnràñ dŏng-tă ƀòn mơ̆n, ơ̆-iyŏ bơh lơ̆gay bră lơh tơlôh bơh jơno tơpăt-durư̆ng mà ƀòn mơ̆n sŏng lơh, mơya bơh nùs kơñ-kơloh Kơnràñ dê, bơh bră rao lơhiê jơno bơda wăl mhăy î jơno bơgăl mhăy bơh Yang Hwîng Goh, 6la Bơtao mà Yang Tơm Trồ sŏng tôh dubă bîng-tăl nơ̆m ƀòn mơ̆n kơnơm bơh Yang Dŏng-Klàs ƀòn mơ̆n la Yang Dŏng-Klàs Jesu, 7lơi ma-ngkơi jơ dî sơnăn la tơpăt-durư̆ng kơnơm jơno sơmah-sơmai Kơnràñ, ƀòn mơ̆n dî sơlôh jîng lơ̆gay cro cơdô̆ jăt gư̆ptî jơno cang-kơnơm bơkhê bơh jơno jîng miek miek. 8Jơno Niem gư̆n la păl don căk-cê, gừn ăñ kơñ kon tơs nê̆-năn nơ̆m lơ̆gay jơno gư̆n, lơi lơh tơmpôl cro găy sŏng don Yang Tơm Trồ rơp kơhea-să lơi ăn să nơ̆m bră lơbăn-niem. Lơ̆gay bră gư̆n la niem ngăn gư̆m dî kwơ ma khăi cro. 9Mơya păl pleh lơ̆gay jơno tơmbơkai wì-lơngôh, lơ̆gay bră bơh nŏk-noi, jơno tơmđas î jơno tơmbơkai bơh jơno-bơlăm bơh gô la lơ̆gay jơno ơ̆ niem gư̆m ơ̆ kwơ. 10Păl lơi căư cro găy jăt gung duh-khoai nde tơm jơ du dơ̆ hala bea dơ̆ e tơnggư̆t lai, 11bơh gư̆t lah cro gư̆p tîgư̆n sŏng kŏng tìs kơ̆mprah gư̆m kư̆ tìs-glài, la cro kơ̆p dêh glài sătan mơ̆n.

12Tơm tô̆ ăñ pơđơ Atemas hala Ticikơ swà anẵu kon, gư̆n kon trôh khơñ cĕ tơmtom ăñ nơ̆m Nikôpôli, bơh ăñ sŏng lơh nên ăm nơ̆m kơnnhe lơngềt nơ̆m anẵu gư̆n. 13Iyà cĕ cro kwăng cahrña Sena î Apôlôs swà gung dubă lơngăp-lơnge, bư̆ng lơi ƀòn gô prŏi jơno găy. 14Lơ̆gay oh mi rôh lŏ nơ̆m Yang ƀòn mơ̆n dê kŭng păl bơtê ăn să nơ̆m lơ̆gay bră niem-lơhơn dŏng-kơl lơ̆gay jơno kơñ ngui kơp kơñ, lơi jîng ơ̆ dî tơlôh ple-đău.

15Lơ̆gay tơmpôl cro ăm î ăñ còp-să kon. Pơyoa cĕ jơno còp-să tơmpôl cro kơñ-kơloh ƀòn mơ̆n nơ̆m jơno don. Dăn jơno sơmah ăm băl î lơ̆gay oh mi rôh lŏ.