Heƀrơ 1

1Nơ̆m khăi tô̆ tơnge gư̆m bơh î khăi jơno lơh bơh rai yo, ma-ngkơi jơ Yang Tơm Trồ tơs î lơ̆gay ông-pang kơnơm bơh lơ̆gay cro gơnoăr-hwơr, 2gừn nơ̆m lơ̆gay nge dơ̆t-lŭi dô, Kơnràñ sŏng tơs î ƀòn mơ̆n kơnơm bơh Kon Kơnràñ, la Bơtao mà Kơnràñ sŏng pồ bơtao lơh jîng Cro Cơdô̆ lơ̆gay jini-jơno, kŭng bơh Kon gư̆n, Kơnràñ sŏng mon bơjîng lơ̆gay dăp trồ; 3mà Kon gư̆n la jơno ang gơcrà jơno gơklŏ î jơno rồp-să tơmtoh î să-jăn Kơnràñ dê, bơh sơgư̆n dŏng-kơl lơ̆gay phăn bơh jơno gơnăp-gơnoăr mơ̆n dê, gư̆n tơm tô̆ sŏng lơh bră rao lơhiê tồi-glài, Kon gư̆n nggui đah ma Bơtao Ryŭ-Ryơ̆m nơ̆m anẵu yơng; 4bơh dî sơlôh gôjîng dơng mang sơlơ rlo lơ̆gay cro gơndrơh, Kon sŏng dưñ-lăñ dî sơnăn dơng mang khăi gư̆t nhẵư dơ̆ rlo lơ̆gay cro gơndrơh gư̆n. 5Bơh Yang Tơm Trồ tom tơs î cro găy nơ̆m lơ̆gay cro gơndrơh lah:

“Kon la Kon Ăñ.

Nge dô Ăñ sŏng bơjîng Kon”?

Gừn kŭng tơs lah:

“Ăñ rơp la Bàp Mê,

gừn Mê rơp la Kon Ăñ”?

6Mơya hôm rlo tîrơ̆ te, tơm tô̆ Kơnràñ iyà Kon Dơ̆ Sơm trôh nơ̆m dunya, Kơnràñ tơs lah: “Lơ̆gay cro gơndrơh Yang Tơm Trồ dê păl duh-khoai Kon gư̆n.” 7Gôtrê ma lơ̆gay cro gơndrơh, Kơnràñ tơs lah:

“Bơtao lơh lơ̆gay cro gơndrơh mơ̆n jîng ayoa cal,

î lơ̆gay cro dŏng bră mơ̆n jîng lơ̆gay lơngkòt oềs.”

8Hôm î Kon gư̆n, gừn:

“Ơ Yang Tơm Trồ, sơban Kơnràñ hôm trôh dî miek miek ơ̆lơ̆ ơ̆lŭi,

gư̆m mư̆ng gơnăp-gơnoăr tơpăt-durư̆ng la mư̆ng gơnăp-gơnoăr lơgơ Kơnràñ dê.

9Kơnràñ kơñ-kơloh jơno tơpăt-durư̆ng gừn ngañ jơno bờk-mơsăk.

Bơh jơno gư̆n, Yang Tơm Trồ, rơ̆ la Yang Tơm Trồ Gô dê,

sŏng bŏng ma Gô mơñà sơhờp-sờhơn rlo lơ̆gay cro bơyô Gô.”

10Gừn “Ơ Yang, bơh dơ̆ sơm, Kơnràñ băt-tơngñă ple-ù,

î lơ̆gay dăp trồ la lơ̆gay bră lơh tê Kơnràñ dê.

11Gô rơp làt ha-ău, mơya Kơnràñ hôm miek miek,

jơh lơ̆gay gô rơp yo sìa gư̆ptî ao rơnjai,

12gư̆n gư̆ptî bơlah ao yơ, Kơnràñ rơp kơbôt gô wăl,

gư̆ptî ao makin, gô rơp kŏng tơmbơgăl,

mơya Kơnràñ gừn hôm gư̆ptî bơh sơm,

gừn lơ̆gay năm Kơnràñ dê rơp ơ̆ tom lơ̆.”

13Bulah tîgư̆n, Kơnràñ tom sŏng tơs î cro găy nơ̆m lơ̆gay cro gơndrơh:

“Nggui cĕ đah ma Ăñ

trôh dî jơ găy Ăñ lơh lơ̆gay cro tơmdră Kon dê jîng jơno kơnơl đăư ma jư̆ng Kon”?

14Ơ̆-iyŏ jơh lơ̆gay cro gơndrơh gư̆n la lơ̆gay hwîng dŏng bră, dî pơđơ trôh ma bră rong-siem bơh dî kwơ lơ̆gay cro dê mơñ dưñ-lăñ jơno dŏng-klàs hala ơ̆?