Mathiơ 7

1Bư̆ng cahrña, lơi oh mi rôh lŏ ơ̆ kŏng cahrña 2Bơh nơ̆m jơno lơh-glài mà oh mi rôh lŏ cahrña, oh mi rôh lŏ rơp kŏng cahrña, gừn bơh dơnău mà oh mi rôh lŏ weh wăl, dơnău rơ̆ rơp dî weh wăl î oh mi rôh lŏ. 3Mà ngglơh mê lăng tơmpơl brêh êt lŭi nhòng măt cro oh mi mơ̆n, mơya mê ơ̆ tơmpơl khô̆k sî ăm nơ̆m măt mơ̆n? 4Hala bơh î jơno găy gư̆n mà mê rơp tơs î cro oh mi mơ̆n lah: ‘Lơi ăñ dưñ cĕ brêh nhòng măt mê makin’, mà lăng năy, khô̆k sî ndăng ăm nhòng măt mê? 5Ơ cro nùs-nhơ̆m mablăc năy! Lai ngăn, dưñ cĕ khô̆k sî tơlôh bơh sơ măt mơ̆n, gừn ma-ngkơi rơ̆, gừn mê rơp tơmpơl nê̆-năn lơi dưñ tơlôh brêh êt tơlôh bơh sơ măt cro oh mi mơ̆n. 6Oh mi rôh lŏ bư̆ng e mpôl său jơno sang-goh, kŭng bư̆ng tư̆ng lô̆ acŏng mang mơ̆n sơđàp măt mpôl sư, kơ̆mbrit tơmpôl gô jă lơ̆gay jơno gư̆n nơ̆m jư̆ng gô, gừn ma-ngkơi tơm jơ tơmblăc wăl gừn ƀòn gô rơp kăp-crề oh mi rôh lŏ.

7Dăn cĕ, gừn jơno rơ̆ rơp dî dờp e ma oh mi rôh lŏ. Jôi cĕ, gừn oh mi rôh lŏ rơp tơmtom. Toh cĕ, gừn mpông rơp dî pẵư ma oh mi rôh lŏ. 8Bơh kơp cro găy dăn gừn dî; cro găy jôi gừn tơmtom; î, mpông rơp dî pẵư ma cro găy toh mpông. 9Hala tom cro găy nơ̆m nhòng oh mi rôh lŏ, la cro mà kon mơ̆n dăn ƀăñ — mơya cro gư̆n rơp dờp e ma kon gư̆n ne-lô̆? 10Hala kon gư̆n kŭng dăn ka — mơya cro gư̆n rơp dờp e ma gô beh? 11Tîgư̆n, dilah oh mi rôh lŏ, la bờk, gư̆t dờp e kon so mơ̆n lơ̆gay jơno e gời niem, gừn Bàp oh mi rôh lŏ cŭngsî trồ dê rơp dờp e ma cro găy dăn Kơnràñ khăi jơno niem rlo gư̆t nhẵư? 12Gư̆n-jîng, nơ̆m lơ̆gay kơp bră, dilah oh mi rôh lŏ kơñ kơp jơno găy lơi cro nde lơh ma mơ̆n, gừn oh mi rôh lŏ kŭng păl lơh jơno rơ̆ ma ƀòn gô, bơh gư̆n la jơno-bơlăm gư̆m lơ̆gay jơno cro gơnoăr-hwơr.

13Swà mơ̆t cĕ tî mpông hăt. Bơh mpông dơng î gung dơng bơlăm trôh jơno roh-rùi, î tom khăi cro swà mơ̆t nơ̆m gư̆n. 14Rơ̆ la bơh mpông hăt î gung dî lơh jîng wêt bơlăm trôh jơno jîng, mà dî du êt cro jôi tom dî gô.

15Kơhea cĕ bơh lơ̆gay cro gơnoăr-hwơr mablăc, la tơmpôl cro cù kato belàt trôh î oh mi rôh lŏ, mơya nơ̆m nhòng nùs, ƀòn gô la mpôl său-cơho jơgloh sa tơhu. 16Oh mi rôh lŏ rơp đăl gư̆t ƀòn gô bơh anẵu ple ƀòn gô dê. Cro nde tom iyŏ pĕ ple ño bơh pôm lẵu, hala bơh ple sî-hra lẵu brê? 17Kŭng tîgư̆n, kơp sî niem gừn tơlôh ple niem; hôm sî ƀăyƀà gừn tơlôh ple ƀăyƀà. 18Sî niem ơ̆-rgê tơlôh ple ƀăyƀà, sî ƀăyƀà kŭng ơ̆-rgê tơlôh ple niem. 19Kơp sî găy ơ̆ tơlôh ple niem gừn păl kăl î tư̆ng nơ̆m oềs. 20Gư̆n-jîng, oh mi rôh lŏ rơp gư̆t nên ƀòn gô bơh anẵu ple ƀòn gô dê. 21Ơ̆-iyŏ kơp cro tơs î ăñ: ‘Ơ Yang, Ơ Yang’, rơp mơ̆t nơ̆m lơgơ Yang cŭngsî trồ ơ̆, mơya la cro lơh-jăt nùs-kơñ Bàp ăñ cŭngsî trồ gời. 22Nơ̆m nge gư̆n, khăi cro rơp tơs î ăñ lah: ‘Ơ Yang, ơ Yang, ơ̆-iyŏ ƀòn hî sŏng e Sơnăn Kơnràñ tơs hwơr, sŏng e Sơnăn Kơnràñ tơmprơh càrak î sŏng e Sơnăn Kơnràñ lơh khăi bră gơnăp-gơnoăr, ơ̆h?’ 23Gừn jơ rơ̆, ăñ rơp tơs nê̆-năn î ƀòn gô lah: ‘Ăñ ơ̆ tom gư̆t ƀòn mê ơ̆h! Ơ tơmpôl lơh bờk-mơsăk năy, tơlôh swà cĕ ndăp bơh sơ Ăñ!’

24Gư̆n-jîng, kơp cro găy kơnău lơ̆gay jơno ăñ bơtău dô î lơh-jăt, gừn rơp gư̆ptî du hôi cro jăk-sai băt-tơngñă hîh mơ̆n cŭngsî lô̆ tơliê. 25Prù mih duh, dà rlîng trôh, cal khôm î jơndruh kơdăng nơ̆m hîh gư̆n, mà hîh gư̆n ơ̆ rlăm dî bơh sŏng băt-tơngñă cŭngsî lô̆ tơliê. 26Gừn kơp cro găy kơnău lơ̆gay jơno ăñ bơtău dô mà ơ̆ lơh-jăt, gừn gư̆ptî du hôi cro wì-lơngôh băt-tơngñă hîh mơ̆n cŭngsî càs. 27Prù mih duh, dà rlîng trôh, cal khôm î jơndruh kơdăng nơ̆m hîh gư̆n, gừn hîh rơ̆ rlăm lơ̆ î kŏng tơlah-tơlơn lề rlo ngăn.”

28Bră tom tơlôh rơ̆ la dơ̆ Yang Jesu tơs bơtău sŏng lơ̆gay jơno dô, tơmpôl lang bol khăi ndrăt-ndròt bơh jơno ƀăn mơntău Kơnràñ dê, 29bơh Kơnràñ ƀăn mơntău ƀòn gô gư̆ptî cro dî gơnoăr, mà ơ̆ gư̆ptî cro bơtău jơno-bơlăm ƀòn gô dê.