Mathiơ 6

1Kơhea cĕ bơh bră tơpăt-durư̆ng mơ̆n dê lơi lơh amơh bư̆ng lơh sơđàp măt cro nde lơi dî ƀòn gô lăng tơmpơl, mơya dilah ơ̆-iyŏ tîgư̆n, gừn kơ̆mbrit lah oh mi rôh lŏ ơ̆ dî phăn-ƀan nơ̆m jơno sơđah să Bàp mơ̆n dê cŭngsî trồ. 2Gư̆n-jîng, dơ̆ oh mi rôh lŏ tơmpà jơno e gời, bư̆ng ôh kơluôk sơđàp măt mơ̆n gư̆ptî tơmpôl cro mablăc lơh nơ̆m kơp hîh jơnư̆m gư̆m makin gung dơng, lơi lơh mơmơh ƀòn gô dî jong-rơ bơh cro nde. Iyŏ ngăn Ăñ tơs î oh mi rôh lŏ, ƀòn gô dî wêl-tăl phăn ƀan mơ̆n lờt. 3Mơya tơm tô̆ oh mi rôh lŏ dờp jơno e gời, bư̆ng lơi ma tê eo oh mi rôh lŏ gư̆t bră tê ma mơ̆n ndăng lơh, 4lơh mơmơh bră jơno e gời oh mi rôh lŏ dê digơlăn ăm nơ̆m anẵu ndăp-ndơ, gừn Bàp oh mi rôh lŏ dê, la Bơtao lăng tơmpơl nơ̆m anẵu ndăp-ndơ, rơp dờp phăn ƀan ma oh mi rôh lŏ.

5Gừn dơ̆ oh mi rôh lŏ hôi-dăn, gừn bư̆ng gư̆ptî cro mablăc, bơh ƀòn gô kơñ hôi-dăn tơm tô̆ ñă nơ̆m lơ̆gay hîh jư̆m î nơ̆m anẵu malik gung, lơi lơh mơmơh ƀòn gô digơlăn dî cro nde lăng tơmpơl. Iyŏ ngăn, ăñ tơs î oh mi rôh lŏ, ƀòn gô sŏng dî phăn ƀan mơ̆n lờt. 6Hôm oh mi rôh lŏ, tơm tô̆ oh mi rôh lŏ hôi-dăn, păl mơ̆t cĕ nơ̆m ơdô̆ dêh oh mi rôh lŏ dê, gừn tơm tô̆ tơ̆l mpông ơdô̆ mơ̆n wăl, păl hôi-dăn î Bàp mơ̆n nơ̆m anẵu ndăp-ndơ rơ̆, gừn Bàp oh mi rôh lŏ dê, la Bơtao lăng tơmpơl nơ̆m anẵu ndăp-ndơ, rơp dờp e phăn-ƀan ma oh mi rôh lŏ. 7Î ndăng tơm jơ hôi-dăn, oh mi rôh lŏ bư̆ng tơs wêh tơs wăl jơno ơ̆ kwơ gư̆ptî lơ̆gay lang bol bơdih, bơh ƀòn gô kơlôi lah kơnơm bơh jơno khăi jơno tơs mơ̆n dê, ƀòn gô rơp dî kơnău iet. 8Gư̆n-jîng, oh mi rôh lŏ bư̆ng sơlôh gôjîng gư̆ptî ƀòn gô, bơh Bàp oh mi rôh lŏ dê gư̆t jơno găy oh mi rôh lŏ kờp kơñ lai mơ tô̆ oh mi rôh lŏ hôi-dăn î Kơnràñ. 9Tîgư̆n, oh mi rôh lŏ păl hôi-dăn cĕ tîdô:

‘Khoai Bàp ƀòn kon ăm cŭngsî trồ,

dăn Sơnăn Kơnràñ dî sang-goh.

10Dăn lơgơ Kơnràñ păl trôh,

dăn nùs-kơñ Kơnràñ dî tom tơlôh nteàh ù kŭng gư̆ptî cŭngsî trồ!

11Dăn dờp e ma ƀòn kon nge dô jơno sa kơp nge ƀòn kon dê;

12î dăn hồ-toh bơh lơ̆gay jơno tìs glài ƀòn kon dê,

gư̆ptî ƀòn kon kŭng sŏng hồ-toh lơ̆gay cro tìs glài î ƀòn kon;

13î dăn bư̆ng iyà tơmơ̆t ƀòn kon nơ̆m jơno pơlum,

mơya dăn dŏng ƀòn kon klàs bơh cro bờk.’

14Bơh dilah oh mi rôh lŏ hồ-toh ma cro nde lơ̆gay jơno tìs-glài ƀòn gô dê, gừn Bàp oh mi rôh lŏ dê cŭngsî trồ kŭng rơp hồ-toh ma oh mi rôh lŏ. 15Hôm dilah oh mi rôh lŏ ơ̆ hồ-toh ma cro nde, gừn Bàp oh mi rôh lŏ dê kŭng rơp ơ̆ hồ-toh lơ̆gay jơno tìs glài ma oh mi rôh lŏ dê.

16Ơ̆ nư̆ng sî tîgư̆n, tơm tô̆ oh mi rôh lŏ ăt sa, bư̆ng lơh gư̆ptî tơmpôl cro moat-jrum nùs don mablăc, bơh ƀòn gô lơh bồi môh măt lơi ƀòn gô digơlăn sơđah ma cro nde tơmpơl mơ̆n la cro ndăng ăt sa. Iyŏ ngăn ăñ tơs î oh mi rôh lŏ, ƀòn gô sŏng dî tăl phăn-ƀan mơ̆n lờt. 17Hôm oh mi rôh lŏ, tơm tô̆ ăt sa, păl bŏng mơñà nơ̆m găl mơ̆n î rao môh măt mơ̆n, 18mơmơh lơh oh mi rôh lŏ digơlăn ơ̆ sơđah ma cro nde tơmpơl mơ̆n ndăng ăt sa, mơya la ma Bàp mơ̆n ăm nơ̆m anẵu ndăp-ndơ; gừn Bàp oh mi rôh lŏ dê, la Bơtao lăng tơmpơl nơ̆m anẵu ndăp-ndơ, rơp e phăn-ƀan ma oh mi rôh lŏ.

19Bư̆ng prăp ăn lơi ma să tơm mơ̆n phăn-màng nơ̆m ù, la anẵu mà mŏ moa băl î grŏ-sa set tơngroh, kŭng la anẵu mà cro kơntô̆ng rlèt mơ̆t gừn kơntô̆ng. 20Mơya păl prăp ăn lơi phăn-màng ma mơ̆n cŭngsî trồ, la anẵu ơ̆ tom mŏ moa hala grŏ-sa set tơngroh, î la anẵu mà cro kơntô̆ng ơ̆ rlèt mơ̆t hala kơntô̆ng. 21Bơh phăn-màng oh mi rôh lŏ dê ăm anẵu găy, gừn nùs oh mi rôh lŏ dê kŭng rơp ăm anẵu gư̆n. 22Gơ-măt la đeng să-jăn. Gư̆n-jîng, dilah măt oh mi rôh lŏ la niem, gừn lơ̆ să-jăn oh mi rôh lŏ rơp dî bîng jơno ang. 23Mơya dilah măt oh mi rôh lŏ la bờk, gừn lơ̆ să-jăn oh mi rôh lŏ rơp kŏng bîng-jut kơnăm ñô̆ng. Tîgư̆n, dilah jơno ang nơ̆m oh mi rôh lŏ la kơnăm ñô̆ng, gừn kơnăm ñô̆ng rơ̆ dơng ngăn gư̆t nhẵư! 24Ơ̆ tom cro găy digơlăn duh bră bea hê cro pơnhơm, bơh cro gư̆n hala rơp ngañ cro pơnhơm dô gừn kơloh pơnhơm năy, hala rơp lăng dơng mang î cro pơnhơm dô gừn lăng ơ̆săp-ơ̆său cro pơnhơm năy. Oh mi rôh lŏ bư̆ng gư̆m duh bră Yang Tơm Trồ gư̆m î jên-priè dî ờ. 25Tài bơh jơno dô, ăñ tơs î oh mi rôh lŏ, bư̆ng kơlôi-rcăng ma jơno jîng oh mi rôh lŏ dê, mơ̆n sa bơh jơno găy hala mơ̆n ñô jơno găy — hala bơh să-jăn oh mi rôh lŏ dê, mơ̆n cù bơh jơno găy. Tom iyŏ jơno jîng gừn dơng mang rlo jơno sa, î să-jăn rlo jơno cù ờ ơ? 26Swì lăng cĕ nơ̆m anẵu kơp jơi sêm trồ lah, gô ơ̆ sêh kŭng ơ̆ koh, hala prăp ăn lơi nhòng tơ̆m rơtăng, mà Bàp oh mi rôh lŏ cŭngsî trồ rong-siem gô. Oh mi rôh lŏ ơ̆ dî dơng mang rlo î gô ờ ơ? 27Pơnah nde, cro găy nhòng tơmpôl oh mi rôh lŏ tơm tô̆ kơlôi-rcăng gừn digơlăn bơtăl nơ̆m rai-jîng mơ̆n dê du-lơwah ya? 28Gừn ngglơh oh mi rôh lŏ kơlôi-rcăng bơh ao cơmpha teh? Lăng swì cĕ nê̆-năn bơh jơi bơkao brông nơ̆m ƀlang srăy, mơmơh tîgay mà gô hon dơng. Gô ơ̆ lơh bră, kŭng ơ̆ tơ rŭi săy kơboă. 29Mơya ăñ tơs î oh mi rôh lŏ lah, ƀăt băl î bơtao Salômôn nơ̆m lơ̆gay jơno kơnhơ̆p-mơ̆nda gô dê cù bơka să gô, kŭng ơ̆ sơntu dơi gư̆ptî du-lăm bơkao nhòng khà lơ̆gay bơkao gư̆n. 30Hôm dilah Yang Tơm Trồ cù gư̆ptî gư̆n ma khơ̆ nơ̆m ƀlang srăy, la jơno nge dô hôm, gừn nge nhîng kŏng tư̆ng mbư̆ng nơ̆m nhă oềs, gừn tơmpôl cro nư̆ng dư̆ng-iè jơno don năy, gừn Kơnràñ ơ̆ lơh dî khăi rlo ờ ơ? 31Gư̆n-jîng, oh mi rôh lŏ bư̆ng kơlôi-rcăng mà tơs lah: ‘Ƀòn mơ̆n rơp sa jơno găy teh?’ hala ‘Ƀòn mơ̆n rơp ñô jơno găy teh?’ hala ‘Ƀòn mơ̆n rơp cù jơno găy teh?’ 32Bơh lơ̆gay lang bol bơdih jôi lăng jơh lơ̆gay jơno dô, î bơh Bàp oh mi rôh lŏ dê cŭngsî trồ gư̆t lah oh mi rôh lŏ păl cang kơp bơh lơ̆gay jơno rơ̆. 33Mơya lai ngăn păl jôi lăng lơgơ Yang î jơno tơpăt-durư̆ng Kơnràñ dê gừn jơh lơ̆gay jơno rơ̆ rơp dî bơtăl te ma oh mi rôh lŏ. 34Gư̆n-jîng, oh mi rôh lŏ bư̆ng kơlôi-rcăng bơh nge nhîng, bơh nge nhîng rơp kơlôi ma nge nhîng. Tom wêl-tăl ma du nge bră sơòs-sơngeh gô dê.