Mathiơ 5

1Jơ gư̆n, tơm tô̆ tơmpơl tơmpôl lang bol, Kơnràñ swà hao cŭng-yồ, gừn tơm tô̆ Kơnràñ sŏng nggui nteàh, lơ̆gay cro bơtê Kơnràñ trôh băl ma Kơnràñ. 2Kơnràñ pẵư dẵư ƀăn mơntău ƀòn gô, lah:

3“Lơnge ma tơmpôl cro kơsòt-rƀah sơòs-sơngeh nơ̆m hwîng-nùs,

bơh lơgơ Yang cŭngsî trồ la ăn ma ƀòn gô.

4Lơnge ma tơmpôl cro ñim-rèa,

bơh ƀòn gô rơp dî mơ̆ndơm-mơ̆nieng.

5Lơnge ma tơmpôl cro niem-lơhơn,

bơh ƀòn gô rơp dưñ-lăñ dî ù.

6Lơnge ma tơmpôl cro jơgloh î tơhiê jơno tơpăt-durư̆ng,

bơh ƀòn gô rơp dî tăl hơm.

7Lơnge ma tơmpôl cro gư̆t kơñ-kơloh,

bơh ƀòn gô rơp dî kơñ-kơloh.

8Lơnge ma tơmpôl cro sang-goh nơ̆m nùs-nhơ̆m,

bơh ƀòn gô rơp lăng tơmpơl Yang Tơm Trồ.

9Lơnge ma tơmpôl cro tơmrơm băl,

bơh ƀòn gô rơp dî sơnăn la ƀòn kon Yang Tơm Trồ dê.

10Lơnge ma tơmpôl cro kŏng kơ̆p-cơkhă tài bơh jơno tơpăt-durư̆ng,

bơh lơgơ Yang cŭngsî trồ la ăn ma ƀòn gô.

11Oh mi rôh lŏ dî lơnge tơm tô̆ cro tơngyŏ-tơnghiel oh mi rôh lŏ, băl kŏng kơ̆p rôn-bơklơ̆n î tơs lơ̆gay jơno bờk-mơsăk tơm bơcĕ tơmdră î oh mi rôh lŏ tài bơh ăñ.

12Hơn-sờ î sơhờp-sờhơn cĕ, bơh phăn-ƀan oh mi rôh lŏ nơ̆m lơgơ trồ la dơng ngăn, bơh cro nde sŏng kơ̆p-cơkhă lơ̆gay cro gơnoăr-hwơr lai oh mi rôh lŏ gư̆p tîgư̆n.

13Oh mi rôh lŏ la boh ù dê. Mơya dilah boh ha-ău ăng, gừn dưñ jơno găy lơi lơh gô ăng wăl? Nư̆ng kŏng tư̆ng makin lơi kŏng jă kơ̆mpung bơh cro, gừn gô ơ̆ hôm kwơ ma jơno găy te. 14Oh mi rôh lŏ la jơno ang dunya dê. Du ƀòn dơng ăm cŭng-yồ gừn ơ̆ kŏng tơmbàk ndăp dî. 15Kŭng ơ̆ tom cro găy su đeng gừn ăn gô nteàh thô̆ng, mơya la ăn cŭngsî jư̆ng đeng, gừn gô bơang ma lơ̆gay cro nơ̆m hîh. 16Kŭng gư̆p tîgư̆n, jơno ang oh mi rôh lŏ bơang cĕ sơđàp măt cro nde, lơi ƀòn gô digơlăn tơmpơl lơ̆gay bră niem oh mi rôh lŏ î jong-rơ Bàp oh mi rôh lŏ ăm cŭngsî trồ.

17Bư̆ng kơlôi lah ăñ trôh lơi lơh tơngroh jơno-bơlăm hala lơ̆gay jơno tơs hwơr. Ăñ sŏng trôh ơ̆-iyŏ lơi lơh tơngroh, mơya la lơi lơh jîng wêl-tăl. 18Bơh iyŏ ngăn, ăn tơs î oh mi rôh lŏ, trôh dî jơ găy trồ î ù rơp roh, gừn ơ̆ tom du cik hala du joềt găy nơ̆m jơno-bơlăm rơp roh, trôh dî jơ găy lơ̆gay jơno dî wêl-tăl. 19Gư̆n-jîng, dilah cro găy lơi căư du-lăm jơno êt ngai ngăn nơ̆m lơ̆gay jơno-bơlăm dô î bơtău cro nde lơh tîgư̆n gừn rơp kŏng sơnăn la êt ngai ngăn nơ̆m lơgơ Yang cŭngsî trồ. Mơya cro găy lơh-jăt î bơtău jơno gư̆n, gừn cro rơ̆ rơp dî sơnăn la dơng nơ̆m lơgơ Yang cŭngsî trồ. 20Bơh ăñ tơs î oh mi rôh lŏ lah dilah jơno tơpăt-durư̆ng oh mi rôh lŏ dê ơ̆ lîng rlo jơno tơpăt-durư̆ng lơ̆gay cro bơtău jơno-bơlăm î cro Pharisi dê, gừn oh mi rôh lŏ nên-nôn ngăn rơp ơ̆ mơ̆t nơ̆m lơgơ Yang cŭngsî trồ.

21Oh mi rôh lŏ sŏng kơnău tîgư̆n, jơno sŏng dî tơs bơtău ma cro rai yo: ‘Bư̆ng tơngsơ̆t cro’, mà ‘cro găy tơngsơ̆t cro, gừn rơp păl kŏng jơno cahrña.’ 22Mơya ăñ tơs î oh mi rôh lŏ gư̆t lah cro găy tơcao oh mi mơ̆n rơp păl kŏng jơno cahrña. Mà cro găy tơs oh mi mơ̆n lah: ‘Mơngăl gơla!’, rơp păl kŏng tơmpôl jơnư̆m cahrña. Hôm cro găy wac-rma: ‘Wì-lơngôh!’ gừn rơp kŏng lơh-glài nơ̆m brŏng-oềs. 23Gư̆n-jîng, dilah oh mi rôh lŏ ndăng ăn jơno duh-khoai mơ̆n nơ̆m kaƀang duh-khoai lờt nơ̆m anẵu gư̆n, oh mi rôh lŏ kah sơdơ lah du hôi oh mi mơ̆n dê tom jơno găy gư̆n tơmdră î mơ̆n, 24gừn lơi cĕ jơno ăn duh-khoai mơ̆n nơ̆m mađàp kaƀang duh-khoai î swà mơ̆nde, lai ngăn lơh tơmrơm cĕ î cro oh mi mơ̆n, bơh gư̆n, ma-ngkơi tơm tô̆ swà, ăn cĕ jơno duh-khoai mơ̆n dê. 25Rơndăp tăp sên cĕ nơ̆m jơno lơbăn niem î cro yă mơ̆n dubă khơñ dilah jơ găy oh mi rôh lŏ ndăng ăm nơ̆m gung băl î cro rơ̆, kơ̆mbrit cro yă digơlăn jao oh mi rôh lŏ ma cro kwăng cahrña, gừn cro kwăng cahrña jao ma tơmpôl lĭñ, sŏng gư̆n oh mi rôh lŏ rơp kŏng tư̆ng nơ̆m hîh jam. 26Iyŏ ngăn, ăñ tơs î oh mi rôh lŏ, oh mi nên-nôn ngăn rơp ơ̆ tơlôh klàs bơh nơ̆m gư̆n trôh dî jơ găy oh mi digơlăn kla lơ̆ priè dồs.

27Oh mi rôh lŏ sŏng kơnău tîdô, jơno sŏng dî tơs bơtău lah: ‘bư̆ng tìs-glài rês-àr bơnan.’ 28Mơya ăñ tơs î oh mi rôh lŏ lah kơp cro găy lăng du hôi cro-ua î nùs ham-kơñ ua rơ̆, gừn cro rơ̆ tìs-glài rês-àr bơnan î ua rơ̆ ngglăm nùs mơ̆n lờt. 29Pơnah nde, dilah gơ-măt đah ma lơh oh mi rôh lŏ sơmăm tìs, kwĕ cĕ gô makin gừn tư̆ng wĭc bơh sơ oh mi rôh lŏ. Bơh tî gư̆n la niem rlo ma oh mi rôh lŏ tơm tô̆ du pơnah să-jăn oh mi kŏng roh-rùi, mà lơ̆gay să-jăn mơ̆n ơ̆ kŏng tư̆ng nơ̆m brŏng oềs. 30Gừn dilah tê ma oh mi rôh lŏ lơh să tơm mơ̆n sơmăm tìs; koh cĕ gô î mbư̆ng wĭc bơh sơ oh mi rôh lŏ. Bơh tîgư̆n la niem rlo ma oh mi rôh lŏ tơm tô̆ du pơnah să-jăn oh mi kŏng roh-rùi, mà jơh lơ̆gay să-jăn mơ̆n ơ̆ mơ̆t nơ̆m brŏng oềs. 31Hôm jơno sŏng dî bơtău: ‘Cro găy lơi căư bo-ua mơ̆n, gừn cro rơ̆ păl dờp e ma gô du păng sră tơmlơi.’ 32Mơya ăñ tơs î oh mi rôh lŏ lah kơp cro găy lơi căư bo-ua mơ̆n, mà ơ̆ tom yă yom bơh glài rês-àr bơnan, gừn lơh ma gô kŏng glài rês-àr bơnan. Gừn dilah cro găy tơmhòp î cro kŏng tơmlơi căư, gừn tìs-glài rês-àr bơnan.

33Oh mi rôh lŏ sŏng kơnău tîdô, jơno cro yo bơtău lah: ‘Bư̆ng sràt-să blăc, mơya păl lơh-jăt jơno sràt-să mơ̆n dê î Yang.’ 34Mơya ăñ tơs î oh mi rôh lŏ bư̆ng sràt-să bơh jơno găy; kŭng bư̆ng sơđah trồ mà sràt-să, bơh gư̆n la sơban Yang Tơm Trồ dê; 35kŭng bư̆ng sơđah ù mà sràt-să, bơh ù la kơnơl jư̆ng Kơnràñ; kŭng bư̆ng sơđah ƀòn dơng Jerusalem mà sràt-să, bơh gư̆n la ƀòn dơng Bơtao dơng dê. 36Oh mi rôh lŏ kŭng bư̆ng sơđah găl mơ̆n mà sràt-să, bơh oh mi rôh lŏ ơ̆-rgê lơi lơh dî du-dăng săy sŏ sơlôh bẵu hala uñ. 37Mơya jơno tơs oh mi rôh lŏ la ‘Dî, la dî,’ hala ‘Ơ̆, la ơ̆.’ Hôm jơno găy rlo ma bră dô la tơlôh bơh càrak.

38Oh mi rôh lŏ sŏng kơnău tîdô, jơno sŏng dî tơs lah: ‘Măt kla măt, gừn sề kla sề.’ 39Mơya, ăñ tơs î oh mi rôh lŏ bư̆ng tơmdră cro bờk-mơsăk. Ala sơgư̆n, kơp cro găy pah ƀồ đah ma oh mi rôh lŏ, kŭng dờp cĕ ƀồ hôm wăl ma cro gư̆n. 40Gôtrê mađah cro kơñ yă oh mi rôh lŏ nơ̆m hîh cahrña î dưñ ao nhòng oh mi rôh lŏ dê, lơi cĕ cro rơ̆ dưñ gư̆m ao makin mơ̆n. 41Gừn cro găy bơklơ̆n oh mi rôh lŏ swà gung du kơsồ, gừn swà cĕ î cro rơ̆ bea kơsồ. 42Dờp cĕ ma cro lùp dăn oh mi rôh lŏ, gừn bư̆ng tơmblăc măt bơh sơ cro kơñ dăn mơn bơh nơ̆m anẵu oh mi rôh lŏ.

43Oh mi rôh lŏ sŏng kơnău tîdô jơno sŏng dî tơs lah: ‘Kơñ-kơloh cĕ cro tĕdơ mơ̆n gừn ngañ cro tơmdră mơ̆n.’ 44Mơya ăñ tơs î oh mi rôh lŏ, păl kơñ kơloh cĕ cro tơmdră mơ̆n î hôi dăn ala ma cro kơ̆p rôn-bơklơ̆n mơ̆n, 45amơh lơh oh mi rôh lŏ digơlăn dî gôjîng kon Bàp mơ̆n dê cŭngsî trồ. Rơ̆ la bơh Kơnràñ lơh măt tơnge Kơnràñ dê tơlôh nơ̆m cro bờk-mơsăk gư̆m cro lơbăn-niem, î Kơnràñ e mih ma cro tơpăt-durư̆ng gư̆m cro ơ̆ tơpăt-durư̆ng. 46Bơh dilah oh mi rôh lŏ kơñ-kơloh tơmpôl cro găy kơñ-kơloh mơ̆n, gừn oh mi rôh lŏ tom lăñ phăn-ƀan găy ya? Ơ̆ iyŏ tơmpôl cro dăr-dia kŭng lơh jăt gư̆ptî rơ̆ ơ? 47Gừn dilah oh mi rôh lŏ wă-rẵu nư̆ng tơmpôl cro oh mi mơ̆n, gừn oh mi rôh lŏ lơh dơng rlo jơno găy? Ơ̆-iyŏ lơ̆gay lang bol bơdih kŭng lơh jăt gư̆ptî rơ̆ ơ? 48Tîrơ̆ gư̆n, oh mi rôh lŏ rơp păl niem wêl-tăl, gư̆ptî Bàp oh mi rôh lŏ dê cŭngsî trồ la wêl-tăl.