Mathiơ 4

1Sŏng gư̆n Yang Jesu dî Yang Hwîng Goh bơlăm mơ̆t nơ̆m ƀlang-càs kŏng lơi càrak pơlum. 2Ma-ngkơi gư̆n, tơm tô̆ sŏng ăt sa tơm puôn-jư̆t nge gư̆m puôn-jư̆t tơmăng, gừn Kơnràñ jơgloh. 3Ma-ngkơi tơm jơ trôh en, cro pơlum tơs î Kơnràñ, lah: “Dilah ông la Kon Yang Tơm Trồ, e gơnoăr pơđơ cĕ lơi lơ̆gay lô̆ dô sơlôh gôjîng ƀăñ cĕ.” 4Mơya Kơnràñ kla wăl dẵư, tơs lah: “Tom jơno cêh lah: ‘Kon-mơnùs rơp jîng ơ̆-iyŏ kơnơm nư̆ng bơh ƀăñ gời ờ, mơya la kơnơm bơh lơ̆gay jơno tơs tơlôh bơh tî dẵư Yang Tơm Trồ.’” 5Sŏng gư̆n càrak iyà Kơnràñ mơ̆t nơ̆m ƀòn dơng sang-goh, dờp Kơnràñ ñă ăm anẵu yơng ngăn cŭng tơkang hîh duh-khoai, 6gừn tơs î Kơnràñ lah: “Dilah ông la Kon Yang Tơm Trồ, sơndŏng nteàh hă, bơh tom jơno cêh, lah: ‘Kơnràñ rơp pơđơ lơ̆gay cro gơndrơh Kơnràñ lăng jư mê,’ î: ‘Ƀòn gô rơp sơđăư mê nơ̆m kơ̆mpang tê ƀòn gô, lơi jư̆ng mê ơ̆ sơ̆mpĭñ dî lô̆ mon.’”

7Yang Jesu kla wăl dẵư gô lah: “Pơnah nde, tom jơno cêh lah: ‘Kon bư̆ng lòng Yang, la Yang Tơm Trồ kon dê.’” 8Du dơ̆ te, càrak kŭng iyà Kơnràñ hao cŭng-yồ yơng ngăn î sơđah ma Kơnràñ lăng lơ̆gay ƀòn lơgơ dunya băl jơno ang gơcrà gô dê. 9Gừn gô tơs î Kơnràñ lah: “Ăñ rơp e ma ông lơ̆gay jơno dô, dilah ông duh-khoai ăñ, bơh î bră tơmbĭc să mơ̆n nteàh.” 10Jơ gư̆n, Yang Jesu tơs î gô lah: “Ơ Satan, Pleh cĕ mande! Bơh tom jơno cêh lah: ‘Kon păl duh-khoai Yang, la Yang Tơm Trồ kon dê, gừn kon rơp duh-khoai nư̆ng du hôi Kơnràñ gời.’”

11Sŏng gư̆n càrak pleh bơh sơ Kơnràñ, gừn lăng năy, lơ̆gay cro gơndrơh trôh gừn sơntơm duh bră Kơnràñ.

12Jơ gư̆n, ma-ngkơi tơm jơ kơnău gư̆t lah Jăng sŏng kŏng kơ̆p jam, Kơnràñ ruc trê nơ̆m ƀòn Galile. 13Tơm tô̆ Kơnràñ tơlôh bơh sơ Nasaret trôh ăm nơ̆m ƀòn dơng Kapenaum en dàlîng, nơ̆m tơ-nhal ù Saƀulôn î Neptali, 14lơi lơh sơlôh gôjîng iyŏ ngăn jơno sŏng dî tơs kơnơm bơh cro gơnoăr-hwơr Esai, lah:

15“Ù Jebulun î ù Neptali,

gung tơlôh ma đah dàlîng, manăy dà măy Jôđăn,

rơ̆ la ƀòn Galile gôtrê ma lang bol bơdih —

16lang bol nggui nơ̆m anẵu kơnăm ñô̆ng sŏng lăng tơmpơl jơno ang dơng;

gừn jơno ang sŏng jroh cŭngsî lơ̆gay cro nggui nơ̆m ƀòn gư̆m nteàh hwîng jơno sơ̆t.”

17Bơh jơ gư̆n, Yang Jesu sơntơm bơtău î tơs, lah: “Tơcao mbư̆ng glài cĕ, bơh lơgơ Yang cŭngsî trồ sŏng trôh en lờt.” 18Jơ gư̆n, Tơm tô̆ ndăng swà jư̆ng mamằ dàlîng Galile, Kơnràñ lăng tơmpơl bea hê oh mi, Simôn, dî sơnăn la Pier, î Andre oh ông gư̆n, ndăng drăng sơnñol nơ̆m dàlîng bơh ƀòn gô la cro lơh ka. 19Gừn Kơnràñ tơs î ƀòn gô lah: “Swà jăt ăñ cĕ, gừn ăñ rơp lơh ma oh mi gôjîng cro drăng sơnñol cro.” 20Ƀăt jơ gư̆n, tơm tô̆ sŏng lơi căư sơnñol mơ̆n, ƀòn gô swà jăt Kơnràñ. 21Ma-ngkơi tơm tô̆ bơh anẵu gư̆n swà te, Kơnràñ tơmpơl bea hê oh mi nde, la Jakơ kon Seƀeđe, î Jăng oh ông, nơ̆m ahẵu băl î Seƀeđe, bàp ƀòn gô, ndăng sî sơnñol gừn Kơnràñ hôi jà ƀòn gô, 22sŏng gư̆n khơñ ngăn, tơm tô̆ sŏng lơi căư ahẵu î bàp mơ̆n, ƀòn gô swà jăt Kơnràñ.

23Gừn Kơnràñ swà sơdô sơdă nơ̆m lơ̆gay lơgơ Galile, ƀăn mơntău nơ̆m lơ̆gay hîh jư̆m lang bol, tơs bơtău Jơno Niem bơh lơgơ Yang, băl î sămƀeah lơ̆gay jơno kòp jê î lơ̆gay lơbăn-lơñô nơ̆m lang bol. 24Jơno kơnău tơs bơh Kơnràñ kơnău pơndrơ lam trôh dî lơ̆ lơgơ Siri, gừn cro nde lơboh trôh ma Kơnràñ lơ̆gay cro kòp jê, kŏng kòp jê khăi kòp gư̆m jê-sồt pha phadêh, kŏng cà lơh, kŏng mos sơnrăng, kwềt gơlte, gừn Kơnràñ sămƀeah lơ̆ ma ƀòn gô. 25Lơ̆gay tơmpôl lang bol khăi swà jăt Kơnràñ bơh Galile, lơgơ Dekapôl, ƀòn dơng Jerusalem, lơgơ Juđe, î bơh đah năy dà măy Jôđăn.