Mathiơ 3

1Nơ̆m lơ̆gay nge gư̆n, Jăng Ƀaptis trôh tơs bơtău nơ̆m ƀlang-càs nơ̆m lơgơ Juđe, 2lah: “Tơcao mbư̆ng glài cĕ, bơh lơgơ Yang cŭngsî trồ mơñ trôh en sŏng.” 3Bơh dô la cro sŏng dî tơs bơh cro gơnoăr-hwơr Esai, lah:

“Tom dẵư cro hôi dơng nơ̆m ƀlang-càs lah:

‘Was cĕ lơs gung ma Yang,

lơh tơng tơpăt cĕ lơ̆gay gung dà Kơnràñ.’”

4Jăng dô cù ao bơh î sơnẵu lakđa kăt săy bơ̆t bơh î kato tĕdơ bơ̆t, hôm jơno sa ông dê la măy sơđah-kơtîng î dà kròt brê. 5Sŏng gư̆n lang bol Jerusalem, băl lơgơ Juđe î lơ̆gay ƀòn tĕdơ dà măy Jôđăn swà trôh ma ông, 6gừn tơm tô̆ ndăng tơs sơđah tồi-glài mơ̆n, ƀòn gô dî ông lơh ƀaptem nơ̆m dà măy Jôđăn. 7Ma-ngkơi tơm jơ lăng tơmpơl khăi cro Pharisi gư̆m cro Saduse trôh bơh gơnoăr lơh ƀaptem mơ̆n dê, ông tơs î ƀòn gô lah: “Ơ nŏk-noi beh tơ̆nglơ năy, măt cro sŏng e tơnggư̆t lai lơi ƀòn mê toat ămpôn pleh klàs bơh jơno tơcao dơng mơñ trôh? 8Gư̆n-jîng, sơlôh công nha cĕ dî păl î nùs mbư̆ng lơi căư glài. 9Î ƀòn ông kŭng bư̆ng kơlôi mà tơs î găp lah: ‘Ƀòn mơ̆n dî Abraham la ông-pang mơ̆n.’ Bơh ăñ tơs î ƀòn ông lah Yang Tơm Trồ digơlăn lơh gôjîng kon so ma Abraham bơh lơ̆gay ne-lô̆ dô. 10Mơya sung dî ăn en tơm-si lờt. Gư̆n-jîng, lơ̆gay sî ơ̆ tơlôh ple niem gừn kŏng kăl tơngduh nteàh î mbư̆ng nơ̆m oềs. 11Ăñ lơh ƀaptem bơh jơno tơcao mbư̆ng glài ma oh mi rôh lŏ bơh î dà. Mơya Bơtao trôh ma-ngkơi ăñ dî gơnoăr dơng rlo ăñ, bơh Bơtao rơ̆ gừn ăñ la cro ơ̆ dî păl hồ cơkhŏ ma Kơnràñ. Kơnràñ rơp lơh ƀaptem ma oh mi rôh lŏ bơh î Yang Hwîng Goh gư̆m bơh î oềs. 12Đông Kơnràñ dê ăm nơ̆m tê Kơnràñ, sŏng gư̆n Kơnràñ gơ̆m lơhiê ngăn ƀlang jă kôi mơ̆n î tơmƀù kôi Kơnràñ nơ̆m tơ̆m. Mơya Kơnràñ rơp su lơhiê rhăy bơh î oềs ơ̆ tom tơngsơ̆t dî.”

13Jơ gư̆n, Yang Jesu swà bơh lơgơ Galile trôh nơ̆m dà măy Jôđăn, anẵu Jăng dê, lơi dî ông lơh ƀaptem măư. 14Mơya Jăng kư̆ jôi cơkhă Kơnràñ, tơs lah: “Sătan ăñ păl dăn Kơnràñ lơh ƀaptem măư ma ăñ, gừn Kơnràñ trôh wăl ma ăñ ơ?” 15Mơya tơm tô̆ kla wăl dẵư, Yang Jesu tơs î ông lah: “Jơ dô, kư̆ lơh tîgư̆n cĕ, bơh tîgư̆n la dî păl î ƀòn mơ̆n lơi lơh wêl-tăl lơ̆gay jơno tơpăt-durư̆ng.” Sŏng gư̆n Kơnràñ lơi ông lơh. 16Jơ gư̆n, tơm tô̆ kŏng lơh ƀaptem lờt, Yang Jesu tơlôh khơñ bơh dà jai, gừn lăng năy, lơ̆gay dăp trồ pẵư sơđàp măt Kơnràñ, gừn Kơnràñ tơmpơl Hwîng Yang Tơm Trồ dê gư̆ptî sêm kơ̆ntơp jư răp cŭng mơnì Kơnràñ, 17gừn lăng năy, du jơno tơs bơh lơ̆gay dăp trồ lah: “Dô la Kon kơñ-kơloh Ăñ jê. Ăñ niem-nùs ngăn bơh anẵu Kon rơ̆.”