Mathiơ 2

1Ma-ngkơi tơm tô̆ Yang Jesu sŏng dî bơda nơ̆m Ƀêtlehem lơgơ Juđe nơ̆m rai bơtao Herôt, gừn lăng năy, lơ̆gay cro jăk-sai bơh đah măt tơnge tơlôh trôh nơ̆m Jerusalem, 2lùp lah: “Bơtao sŏng dî bơda la Bơtao lang bol Juđa ăm anẵu găy? Bơh ƀòn hî sŏng tơmpơl sơmăñ Kơnràñ ăm bơh đah măt tơnge tơlôh gừn swà trôh lơi duh-khoai Kơnràñ.” 3Mơya tơm tô̆ kơnău jơno rơ̆, bơtao Herôt kŏng ơ̆ sô̆k ăm, gư̆m du ƀòn dơng Jerusalem kŭng gư̆ptî ông. 4Sŏng gư̆n ma-ngkơi tơm tô̆ jơnư̆m wăl lơ̆gay cro gơnoăr ăn jơno duh-khoai î lơ̆gay cro bơtău jơno-bơlăm nơ̆m lang bol, ông khao lùp ƀòn gô lah: “Yang Dŏng-Klàs dî bơda nơ̆m anẵu găy?” 5Ƀòn gô tơs î bơtao lah: “Nơ̆m Ƀêtlehem lơgơ Juđe, bơh sŏng dî cêh tîgư̆n bơh cro gơnoăr-hwơr,

6‘Hôm Ƀêtlehem, lơgơ Juđa,

ngăn mê ơ̆-iyŏ êt rlo lơ̆gay nơ̆m ƀòn dơng lơgơ Juđa dê,

bơh dî mê rơp tơlôh du Bơtao ăt-bồ

la Bơtao rơp jư lăng Israel, lang bol Ăñ.’”

7Dơ̆ gư̆n, tơm tô̆ ndăp hôi lơ̆gay cro jăk-sai trôh, Herôt lùp ƀòn gô tô̆ jơ sơmăñ sŏng tơlôh. 8Tơm tô̆ sŏng lơi ƀòn gô swà trôh nơ̆m Ƀêtlehem, ông ƀăn tơngkah lah: “Ma-ngkơi tơm tô̆ swà, ƀòn mê khao lùp nê̆-năn bơh kon êt rơ̆, tơm tô̆ ƀòn ông jôi tom lờt, tơs cĕ ma ăñ lơi ăñ kŭng trôh duh-khoai Kơnràñ.” 9Ma-ngkơi tơm tô̆ sŏng kơnău bơtao tơs, ƀòn gô swà gung, gừn lăng năy, sơmăñ mà ƀòn gô sŏng tơmpơl bơh đah măt tơnge tơlôh swà lai mađàp ƀòn gô trôh dî tơm tô̆ trôh gừn gô ñă wăl nơ̆m anẵu kon êt ăm. 10Tơm tô̆ sŏng lăng tơmpơl sơmăñ, ƀòn gô sơhờp-sờhơn hưh hơh ngăn. 11Ma-ngkơi tơm tô̆ mơ̆t nơ̆m hîh, ƀòn gô tơmpơl kon êt băl î Mari, mơi Kơnràñ. Sŏng gư̆n tơm tô̆ sŏng cơdơn krô̆ng nteàh gừn ƀòn gô duh-khoai Kơnràñ, gừn tơm tô̆ sŏng pẵư lơ̆gay jơno mang mơ̆n, ƀòn gô ăn ma Kơnràñ lơ̆gay jơno mang la: màh, kơlhô î cai trŭ. 12Gừn bơh sŏng dî e tơnggư̆t bư̆ng blăc trê wăl ma anẵu bơtao Herôt nơ̆m jơno bơbì, ƀòn gô trê wăl nơ̆m lơgơ mơ̆n bơh î gung nde.

13Dơ̆ ƀòn gô sŏng swà lờt, gừn lăng cĕ năy, du hôi cro gơndrơh Yang dê sơđah-să î Jôsep nơ̆m du jơno bơbì, tơs lah: “Ma-ngkơi tơm jơ lôh bĭc, iyà cĕ kon êt băl î mơi kon êt gừn pleh lêh nơ̆m lơgơ Ejiptơ, sŏng gư̆n kư̆ ăm wăl nơ̆m rơ̆ trôh dî jơ găy ăñ pơđơ mê, bơh Herôt kơñ jôi kon êt lơi tơngsơ̆t.” 14Sŏng gư̆n tơm tô̆ lôh bĭc, gô sŏng iyà kon êt băl î mơi Kơnràñ pleh lêh ma Ejiptơ nơ̆m brê tơmăng, 15gừn gô ăm wăl nơ̆m rơ̆ trôh dî tô̆ Herôt sơ̆t, rơ̆ la lơi lơh sơlôh gôjîng iyŏ ngăn jơno sŏng dî tơs bơh Yang kơnơm bơh cro gơnoăr-hwơr lah: “Ăñ sŏng hôi kon ăñ tơlôh bơh Ejiptơ.”

16Dơ̆ rơ̆, tơm tô̆ tơmpơl lah mơ̆n kŏng lơ̆gay cro jăk-sai lăng ơ̆săp-ơ̆său, gừn Herôt tơcao nùs ngăn, ma-ngkơi tơm jơ e tơlôh jơno tơs swà, ông tơngsơ̆t lơ̆gay kơp kon klo bơh bea năm lêh matieh nơ̆m Ƀêtlehem î lơ̆gay tĕdơ anẵu rơ̆, jăt gư̆ptî tô̆ tơnge ông lùp bơh lơ̆gay cro jăk-sai. 17Tîgư̆n la dî lơh sơlôh gôjîng iyŏ ngăn jơno sŏng dî tơs kơnơm bơh cro gơnoăr-hwơr Jeremi, lah:

18“Nơ̆m ƀòn Rama kơnău du jơno dreo,

ñim-rèa î alô̆ng lơngŏ-lơngañ,

Racel ñim ma kon mơ̆n dê,

gừn gô ơ̆ kơñ cro găy mơ̆ndơm-mơ̆nieng, bơh ƀòn gô ơ̆ hôm te.”

19Jơ gư̆n, tơm tô̆ Herôt sŏng sơ̆t lờt, gừn lăng cĕ năy, du hôi cro gơndrơh Yang dê sơđah-să î Jôsep nhòng jơno bơbì nơ̆m Ejiptơ, 20tơs lah: “Ma-ngkơi tơm jơ lôh bĭc, iyà băl cĕ kon êt băl î mơi kon êt rơ̆ gừn swà trôh ù Israel, bơh lơ̆gay cro jôi tơngsơ̆t să-jăn kon êt rơ̆ sŏng sơ̆t lờt.” 21Gừn tơm tô̆ lôh bĭc, Jôsep iyà kon êt băl î mơi Kơnràñ gừn mơ̆t nơ̆m ù Israel. 22Mơya, tơm tô̆ kơnău lah Acelaus ndăng ăt-bồ lơgơ Juđe ala ma Herôt, bàp mơ̆n, gô kơ̆mbrit swà trôh nơ̆m gư̆n. Mơya tơm tô̆ sŏng dî tơs tơnggư̆t bơh jơno bơbì, gô ruc trê nơ̆m ƀòn lơgơ Galile, 23gừn tơm tô̆ trôh nơ̆m gư̆n lờt, gô ăm nơ̆m ƀòn dơng sơnăn la Nasaret, lơi dî lơh sơlôh gôjîng iyŏ ngăn jơno sŏng dî tơs kơnơm bơh lơ̆gay cro gơnoăr-hwơr lah, Kơnràñ rơp dî sơnăn la cro Nasaret.