Mathiơ 1

1Sơnăn lơ̆gay ông-pang Yang Dŏng Klàs Jesu dê, kon so Dabit, kon so Abraham lah: 2Abraham bơda Isăk, Isăk bơda Jakôp, Jakôp bơda Juđa gư̆m oh mi ông dê, 3Juđa bơh Tamar bơda Pheres î Sereh, Pheres bơda Hesrôn, Hesrôn bơda Aram, 4Aram bơda Aminađap; Aminađap bơda Naasôn; Naasôn bơda Salmôn. 5Salmôn bơh Rahap bơda Ƀôô, Ƀôô bơh Rutơ bơda Ôƀet, Ôƀet bơda Jese, 6Jese bơda bơtao Dabit, Dabit bơh bo Uria bơda Salômôn,

7Salômôn bơda Rôƀôam, Rôƀôam bơda Aƀija, Aƀija bơda Asa, 8Asa bơda Jôsapat, Jôsapat bơda Jôram, Jôram bơda Ôsias. 9Ôsias bơda Jôtham, Jôtham bơda Acas, Acas bơda Esecias, 10Esecias bơda Manase, Manase bơda Amôs, Amôs bơda Jôsia, 11Jôsia bơda Jekônia î oh mi ông nơ̆m jơno kŏng iyà ăm dê̆ trôh nơ̆m Ƀaƀilôn,

12gừn ma-ngkơi jơno kŏng iyà ăm dê̆ trôh nơ̆m Ƀaƀilôn, Jekônia bơda Salathiel, Salathiel bơda Sôrôƀaƀel, 13Sôrôƀaƀel bơda Aƀiut, Aƀiut bơda Eliakim, Eliakim bơda Asôr, 14Asôr bơda Sađôk, Sađôk bơda Acim, Acim bơda Eliut. 15Eliut bơda Eleasar, Eleasar bơda Mathan, Mathan bơda Jakôp, 16Jakôp bơda Jôsep, bo-klo Mari dê, mà bơh mò cro bơda Yang Jesu, Bơtao dî sơnăn la Yang Dŏng-Klàs. 17Tîgư̆n, lơ̆gay kơp rai bơh Abraham trôh Dabit la jư̆t-puôn rai, bơh Dabit trôh jơno kŏng iyà ăm dê̆ nơ̆m Ƀaƀilôn la jư̆t-puôn rai, gừn bơh jơno kŏng iyà ăm dê̆ nơ̆m Ƀaƀilôn trôh Yang Dŏng-Klàs la jư̆t-puôn rai.

18Jơno bơda Yang Dŏng-Klàs Jesu dê la tîdô lah: Tơm tô̆ Mari, mơi Kơnràñ, sŏng dî tom lùp î Jôsep, mơya lai matô̆ ƀòn gô ăm băl î găp, gô kŏng gư̆t dî tơwă bơh anẵu Yang Hwîng Goh. 19Hôm Jôsep, bo-klo gô, la cro tơpăt-durư̆ng, gừn bơh ơ̆ kơñ tơs tơnggư̆t jơno bờk cro-ua, gô ămpôn kơñ lơi căư cro-ua gư̆n. 20Mơya tơm tô̆ Jôsep ndăng ăm kơlôi-sơnư̆ng bơh lơ̆gay bră rơ̆, gừn lăng năy, cro gơndrơh Yang dê sơđah să î Jôsep nơ̆m jơno bơbì, tơs lah: “Ơ Jôsep, kon so Dabit, bư̆ng kơ̆mbrit dưñ Mari lơh bo, bơh kon êt dî tơwă nơ̆m ua rơ̆ la bơh anẵu Yang Hwîng Goh. 21Cro-ua rơ̆ rơp bơda du hê kon klo, gừn tơmoh sơnăn măt kon la Jesu, bơh kon klo rơ̆ rơp dŏng lang bol mơ̆n klàs bơh tồi-glài.” 22Lơ̆gay bră dô tom tơlôh lơi lơh sơlôh gôjîng iyŏ ngăn jơno sŏng dî Yang tơs kơnơm bơh cro gơnoăr-hwơr, lah:

23“Gừn lăng năy, cro ua-drôh rơp tơwă î bơda du hôi kon klo, gừn cro nde rơp hôi sơnăn Kơnràñ la Emmanuel” — gơtha la “Yang Tơm Trồ ăm băl î ƀòn mơ̆n.”

24Sŏng gư̆n ma-ngkơi tơm jơ dî ple lôh bơh nơ̆m jơno bĭc, Jôsep sŏng lơh-jăt gư̆ptî jơno cro gơndrơh Yang dê sŏng ƀăn tơs, gừn dưñ ua rơ̆ lơh bo-ua mơ̆n. 25Mơya gô ơ̆ bĭc ăm băl î bo-ua gô trôh dî jơ gô bơda du hôi kon klo. Sŏng gư̆n gô tơmoh sơnăn măt kon la Jesu.