Mathiơ 8

1Jơ gư̆n, Ma-ngkơi tơm jơ Kơnràñ bơh cŭng-yồ swà jư, lơ̆gay tơmpôl lang bol khăi swà jăt Kơnràñ. 2Lăng năy, du hôi cro kòp dun ma-ngkơi tơm jơ swà trôh, sŏng cun-khoai sơđàp Kơnràñ, tơs lah: “Ơ Yang, dilah Kơnràñ kơñ, Kơnràñ dî gơnoăr lơi lơh ăñ dî lơhiê.” 3Gừn tơm tô̆ sŏng e tê, Kơnràñ tơbi nơ̆m să gô, tơs lah: “Ăñ kơñ. Lơhiê cĕ.” Khơñ ngăn, gô dî lơhiê kop dun mơ̆n dê. 4Yang Jesu tơs î gô lah: “Kơhea cĕ, mê bư̆ng tơs î cro găy, mơya swà cĕ, sơđah-să ma cro gơnoăr ăn jơno duh-khoai î ăn jơno duh-khoai mà Môise sŏng bơtău pơđơ, gư̆ptî du jơno lơh cư̆ng ma ƀòn gô.”

5Jơ gư̆n, ma-ngkơi tơm jơ Kơnràñ swà mơ̆t nơ̆m ƀòn dơng Kapenaum, du hôi cro ăt-bồ rhieng lĭñ trôh băl î Kơnràñ, răc-dăn Kơnràñ 6lah: “Ơ Yang, cro dê̆-gơna ăñ jê bĭc pem nơ̆m hîh, kŏng jê-kơkua ngăn.” 7Kơnràñ tơs î ông lah: “Tơm tô̆ swà trôh lờt, ăñ rơp lơh sămƀeah ma gô.” 8Tơm tô̆ kla dẵư, cro ăt-bồ du-rhieng lĭñ tơs lah: “Ơ Yang, ăñ ơ̆ dî păl lơi Kơnràñ swà mơ̆t nơ̆m hîh ăñ ơ̆; mơya dăn Kơnràñ tơs nư̆ng du-dẵư ƀeh, gừn cro dê̆-gơna ăñ rơp dî sămƀeah. 9Bơh ăñ kŭng la du hôi cro păl duh bră nteàh gơnoăr, tom lơ̆gay tơmpôl lĭñ ăm nteàh gơnoăr ăñ. Ăñ tơs î cro dô: ‘Swà cĕ’, gừn gô swà, î cro nde: ‘Trôh cĕ’ gừn gô trôh, î pơđơ cro dê̆-gơna mơ̆n: ‘Lơh jơno dô,’ gừn gô lơh.” 10Mơya tơm tô̆ kơnău tîgư̆n, Yang Jesu ndrăt-ndròt gừn tơs î tơmpôl cro ndăng swà jăt Kơnràñ lah: “Iyŏ ngăn, ăñ tơs î oh mi rôh lŏ, ăñ ơ̆ tơmpơl jơno don dơng gư̆p tîgư̆n bơh du hôi cro găy nơ̆m Israel. 11Tơblơ̆ wăl, ăñ tơs oh mi rôh lŏ lah khăi cro rơp trôh bơh đah măttơnge tơlôh î đah măttơnge ñăp, sŏng gư̆n ƀòn gô rơp nggui sa băl î Abraham, Isăk î Jakôp nơ̆m lơgơ Yang cŭngsî trồ. 12Mơya lơ̆gay kon lơgơ dê rơp kŏng tư̆ng mbư̆ng nơ̆m anẵu ñô̆ng makin, la anẵu rơp tom ñim-rèa î tơget sề.” 13Sŏng gư̆n Yang Jesu tơs î cro ăt-bồ du-rhieng lĭñ: “Swà trê cĕ! Gư̆ptî jơno ông sŏng don, bră gư̆n păl dî lơh nên ma ông.” Gừn cro dê̆-gơna rơ̆ sŏng dî sămƀeah nơ̆m jơ gư̆n.

14Ma-ngkơi tơm jơ Yang Jesu swà mơ̆t nơ̆m hîh Pier dê, Kơnràñ tơmpơl pău ua ông bĭc nơ̆m cơnờng î ndăng kòp jê sồt. 15Kơnràñ tơbi nơ̆m tê mò, gừn kòp jê tơlôh bơh sơ mò, sŏng gư̆n mò lôh ñă î sơntơm du bră Kơnràñ. 16Jơ gư̆n, trôh brê mhău, cro nde lơboh ma Kơnràñ khăi cro kŏng cà lơh. Kơnràñ tơmprơh lơ̆gay cà gư̆n bơh î du jơno tơs gừn sămƀeah ma lơ̆gay cro găy kŏng kòp jê, 17mơmơh lơh bră gư̆n dî sơlôh gôjîng ngăn jơno sŏng dî tơs bơh cro gơnoăr-hwơr Esai lah: “Sătan Kơnràñ sŏng añ ơnong jơno lơbăn-lơñô ƀòn mơ̆n dê î añ lơ̆gay jơno kòp jê ƀòn mơ̆n dê.”

18Jơ gư̆n, dơ̆ lăng tơmpơl tơmpôl lang bol ăm tĕdơ mơ̆n, Yang Jesu e gơnoăr pơđơ swà găn mamằ-manăy dàlîng. 19Sŏng gư̆n du hôi cro bơtău jơno-bơlăm ma-ngkơi tơm jơ trôh en, sŏng tơs î Kơnràñ lah: “Ơ cro bơtău, ăñ rơp jăt cro bơtău bulah cro bơtău swà anẵu găy.” 20Yang Jesu tơs băl î ông lah: “Pî̀ dî trôm, gừn sêm trồ dî kơ̆nson, mơya Kon-Mơnùs ơ̆ dî anẵu ma Kơnràñ digơlăn sơn găl.” 21Bơh gư̆n, du hôi cro nde nơ̆m lơ̆gay cro bơtê tơs î Kơnràñ lah: “Ơ Yang, dăn e gơnoăr ăñ swà trê tăp bàp ăñ lai.” 22Mơya Yang Jesu tơs î gô lah: “Kư̆ jăt ăñ cĕ, gừn lơi cro sơ̆t tăp cro sơ̆t ƀòn gô dê.”

23Tơm tô̆ Kơnràñ sŏng swà mơ̆t nơ̆m ahẵu, lơ̆gay cro bơtê Kơnràñ swà jăt Kơnràñ. 24Lăng năy, du cal rbơ̆t dơng ngăn tom tơlôh nơ̆m dàlîng, tien gơs ahẵu kŏng yà dà gôgom. Mơya Kơnràñ ndăng bĭc lơhà. 25Gừn tơm tô̆ swà en, ƀòn gô ble Kơnràñ, tơs lah: “Ơ Yang, dăn Kơnràñ tơmdŏng, ƀòn mơ̆n mơn sơ̆t lờt!” 26Gừn Kơnràñ tơs î ƀòn gô lah: “Ơ nhẵư hê cro êt jơno don năy, ngglơh oh mi kơ̆mbrit?” Sŏng gư̆n, tơm tô̆ sŏng ñă atẵy, Kơnràñ ƀoah-đas cal î dàlîng, gừn dàlîng jîng ăm rngăp gư̆p bêl. 27Hôm tơmpôl gư̆n kơ̆mbrit-kơ̆mbròt, tơs lah: “Cro dô la măt cro, bơh tien gơs cal î dàlîng kŭng don dẵư gô?”

28Gừn dơ̆ Kơnràñ sŏng swà găn mamằ-manăy, trôh nơ̆m anẵu Gadara, bea hê cro kŏng cà lơh sŏng trôh tơmtom Kơnràñ, ma-ngkơi tơm jơ tơlôh bơh mơ̆ntô ƀùc, ƀòn gô mơsăk ngăn trôh dî ơ̆ cro găy khơ̆n swà găn nơ̆m gung gư̆n. 29Lăng năy, ƀòn gô kơkrẵy dơng, lah: “Ơ Kon Yang Tơm Trồ, ƀòn hî î Kơnràñ tom bră găy ya? Kơnràñ trôh nơ̆m dô lơh sơòs-sơngeh ƀòn hî lai tô̆ tơnge lơh nên ya?” 30Dơ̆ rơ̆, tom du mpôl sư khăi ngăn ndăng ăm sa ơ̆-hoan wĭc bơh anẵu ƀòn gô. 31Bơh gư̆n, tơmpôl càrak răc-dăn Kơnràñ, lah: “Dilah Kơnràñ tơmprơh ƀòn hî, dăn e ƀòn hî mơ̆t nơ̆m mpôl sư gư̆n.” 32Kơnràñ pơđơ ƀòn gô lah: “Swà tơlôh cĕ!” Bơh gư̆n la ma-ngkơi tơm jơ swà tơlôh, lơ̆gay ƀòn gô mơ̆t nơ̆m mpôl sư; gừn lăng năy, lơ̆gay mpôl sư bơh nơ̆m yồ plŏk sơndŏng tơñăp găl nơ̆m dàlîng sŏng sơ̆t lơhăp lơ̆ nơ̆m dà. 33Dơ̆ rơ̆, tơmpôl cro jư sư toat ăm pôn, gừn tơm jơ gôtrê trôh ƀòn dơng, ƀòn gô tơs wăl lơ̆gay bră, gư̆m î lơ̆gay bră gôtrê trôh î nhẵư hê cro kŏng cà lơh. 34Gừn lăng năy, lơ̆gay ƀòn dơng tơmjà găp trôh tơmtom Yang Jesu. Tơm tô̆ sŏng tơmpơl Kơnràñ, ƀòn gô răc-dăn Kơnràñ swà tơlôh bơh sơ anẵu ƀòn gô.