Mathiơ 9

1Dơ̆ sŏng mơ̆t nơ̆m ahẵu, Kơnràñ swà găn dàlîng î gôtrê trôh ƀòn dơng mơ̆n dê. 2Lăng năy, cro nde lơboh trôh ma Kơnràñ du hôi cro bĭc pem nơ̆m cơnờng. Tơm tô̆ Yang Jesu tơmpơl jơno don ƀòn gô, Kơnràñ tơs î cro bĭc pem lah: “Ơ kon, bơkhê cĕ nùs. Lơ̆gay tồi-glài kon sŏng dî hồ-toh.” 3Gừn lăng năy, du khà nơ̆m lơ̆gay cro bơtău jơno-bơlăm tơs î găp: “Cro dô tơs sơmăm tìs î Yang Tơm Trồ.” 4Bơh gư̆t sŏng lơ̆gay jơno kơlôi-sơnư̆ng ƀòn gô, Yang Jesu tơs lah: “Ƀòn ông kơlôi bờk-mơsăk ngglăm nùs mơ̆n lơi no-lơh? 5Bơh jơno găy la ƀòn rlo lơi tơs: ‘Lơ̆gay Tồi-glài kon sŏng dî hồ-toh,’ hala tơs: ‘Ñă atẵy cĕ î swà jơ’? 6Mơya lơi ƀòn ông digơlăn gư̆t lah Kon-Mơnùs dî gơnoăr nơ̆m ù lơi hồ glài …” gừn nơ̆m dơ̆ rơ̆, Kơnràñ tơs î cro bĭc pem lah: “Ñă atẵy cĕ, bôt bêl kon dê, î trê nơ̆m hîh mơ̆n jờh.” 7Gừn ma-ngkơi tơm tô̆ ñă atẵy, cro gư̆n swà trê nơ̆m hîh mơ̆n. 8Bơh gư̆n la, tơm tô̆ tơmpơl tîgư̆n, tơmpôl lang bol kơ̆mbrit-kơ̆mbròt gừn jong-rơ Yang Tơm Trồ bơh sŏng e ma kon-mơnùs gơnoăr tîgư̆n. 9Tơm tô̆ sŏng bơh anẵu rơ̆ tơlôh swà, Yang Jesu tơmpơl du hôi cro sơnăn la Mathiơ ndăng ăm nggui nơ̆m anẵu lơboh-dia, gừn Kơnràñ pơđơ ông: “Jăt cĕ ăñ.” Gừn ma-ngkơi tơm jơ ñă atẵy, ông swà jăt Kơnràñ.

10Bră tom tơlôh tơm tô̆ Kơnràñ nggui sa nơ̆m hîh, gừn lăng năy, khăi cro lơboh-dia gư̆m cro glài trôh, sŏng nggui sa nơ̆m kaƀang băl î Yang Jesu gư̆m lơ̆gay cro bơtê Kơnràñ. 11Tơm tô̆ tơmpơl tîgư̆n, tơmpôl cro Pharisi tơs î lơ̆gay cro bơtê Kơnràñ lah: “Tài bơh jơno găy mà cro bơtău ƀòn mê sa băl î tơmpôl lơboh-dia gư̆m cro glài?” 12Mơya ma-ngkơi tơm jơ kơnău jơno rơ̆, Kơnràñ tơs lah: “Cro pran să gừn ơ̆ tom kă bơh cro gơnoăr sơnăm, mơya la cro kòp jê. 13Hôm ma-ngkơi tơm jơ swà tơlôh, păl bơtê gư̆t wơng cĕ jơno gơtha seng dô la amơh: ‘Ăñ kơñ nùs kơñ-kơloh, ơ̆-iyŏ jơno ăn duh-khoai.’ Bơh ăñ trôh, ơ̆-iyŏ hôi cro tơpăt-durư̆ng, mơya la cro tom glài.”

14Dơ̆ gư̆n, lơ̆gay cro bơtê Jăng dê trôh tơmtom Kơnràñ, lùp lah: “Tài bơh jơno găy mà ƀòn hî î tơmpôl cro Pharisi ăt sa, hôm lơ̆gay cro bơtê ông dê ơ̆ ăt sa?” 15Yang Jesu tơs î ƀòn gô: “Ơ̆-iyŏ cro bơtô hôm ăm ñô sa tơmhòp î cro bơyô digơlăn gừn moat-jrum ƀòn gô? Mơya rơp trôh nge ma cro bơtô dî iyà swà bơh ƀòn gô, tơm jơ gư̆n ƀòn gô rơp ăt sa. 16Pơnah nde, tom cro găy sĩh tơmbôl du-plờk bơtơi mhăy nơ̆m ao yo, bơh plờk sĩh tơmbôl tĕ blah ao rơ̆, gừn rơp lơh sơlôh têl tĕ tơmpơl ƀiƀà rlo te. 17Kŭng ơ̆ tom cro găy tôh alăk mhăy nhòng lîng kato yo. Mơya dilah lơh tîgư̆n, gừn nên-nôn lîng kato rơp cơdang, alăk hua makin gừn lîng rơp bơcah-lề. Ala bơh gư̆n, cro tôh alăk mhăy nhòng lîng kato mhăy, gừn lơ̆ bea-lăm rơp hôm niem lêh.”

18Nơ̆m tơm jơ Kơnràñ ndăng tơs lơ̆gay jơno rơ̆ î ƀòn gô, gừn lăng năy, du hôi cro gơnoăr ăt-bồ ma-ngkơi tơm jơ trôh en, sŏng cun gơtăng sơđàp Kơnràñ, tơs lah: “Kon ua ăñ mhăy sơ̆t, mơya dơ̆ trôh nơ̆m gư̆n, dăn cro bơtău trôh e tê tơbi cŭngsî gô, gừn gô rơp jîng.” 19Ma-ngkơi tơm jơ ñă atẵy, Yang Jesu î lơ̆gay cro bơtê Kơnràñ swà jăt ông rơ̆. 20Gừn lăng năy, du hôi cro-ua kŏng-ăt kòp rôh mham trôh jư̆t-bea năm, tơm tô̆ swà trôh ma-ngkơi Kơnràñ lờt, gừn sŏng tơbi nơ̆m tieng ao Kơnràñ, 21bơh gô kơlôi dêh: “Dilah ăñ nư̆ng tơbi nơ̆m ao Kơnràñ gời, gừn mơ̆n rơp dî ƀeah kòp.” 22Mơya ma-ngkơi tơm jơ blăc wăl gừn tơmpơl cro-ua rơ̆, Yang Jesu tơs lah: “Ơ kon ua, kơđư̆ng cĕ nùs. Jơno don kon sŏng lơh kon dî ƀeah.” Gừn cro-ua gư̆n dî ƀeah kòp bơh jơ gư̆n. 23Sŏng gư̆n Yang Jesu, ma-ngkơi tơm jơ swà trôh nơ̆m hîh cro gơnoăr ăt-bồ hîh jư̆m gừn tơmpơl cro ôh kơwao î du tơmpôl khăi ndrăm-ndròm ngăn, 24sŏng tơs lah: “Swà tơlôh lơ̆ makin cĕ, bơh kơmon-ua ơ̆-iyŏ sơ̆t, mơya la hôm bĭc.” Sŏng gư̆n ƀòn gô yŏ tơngñŏ Kơnràñ. 25Bơh gư̆n la, tơm tô̆ tơmpôl lang bol kŏng tơmprơh tơlôh makin lờt, gừn ma-ngkơi jơ mơ̆t nhòng, Kơnràñ kơ̆p tê kon-ua, gừn kon-ua lôh nggui dêh. 26Jơno dô dî lam pơndrơ nơ̆m kơp ƀòn lơgơ gư̆n.

27Tơm jơ Yang Jesu ndăng swà bơh anẵu gư̆n tơlôh, gừn bea hê cro ñô̆ng swà jăt Kơnràñ, dreo dơng î lùp la: “Ơ Kon bơtao Dabit, dăn kơloh-kơlài ƀòn hî!” 28Dơ̆ rơ̆, tơm tô̆ mơ̆t nơ̆m hîh lờt, bea hê cro ñô̆ng măt swà trôh en Kơnràñ gừn Yang Jesu tơs î ƀòn gô lah: “Tom iyŏ ƀòn mê don lah ăñ digơlăn lơh dî bră gư̆n ya?” Ƀòn gô tơs î Kơnràñ: “Ngăn, Ơ Yang.” 29Pơnjăt te, Kơnràñ tơbi nơ̆m măt ƀòn gô, tơs lah: “Bră rơ̆ păl dî tơlôh ma ƀòn mê jăt gư̆ptî jơno don bea hê ƀòn mê dê,” 30Măt ƀòn gô dî pẵư ang wăl, gừn Yang Jesu khă krañ-cê ƀòn gô, lah: “Kơhea cĕ, ƀòn mê bư̆ng e cro găy gư̆t.” 31Mơya ma-ngkơi jơ tơlôh makin, ƀòn gô tơs wăl bră rơ̆ nơ̆m lơ̆ ƀòn lơgơ gư̆n.

32Jơ gư̆n, ndăng jơ ƀòn gô tơlôh, gừn lăng năy, cro nde lơboh trôh ma Kơnràñ du hôi cro kơmblău kŏng cà lơh. 33Dơ̆ cà kŏng tơmprơh tơlôh lờt, gừn cro kơmblău răk-sa dî, tơmpôl lang bol ndrăt-ndròt, tơs lah: “Du bră tîgư̆n hôm dahrăư dî rang sơđah nơ̆m lang bol Israel!” 34Mơya tơmpôl cro Pharisi ờs tơs lah: “Ông tơmprơh cà-ràk kơnơm bơh bơtao cà.”

35Yang Jesu swà kơp lơ̆gay ƀòn dơng î ƀòn êt, ƀăn mơntău nơ̆m lơ̆gay hîh jư̆m ƀòn gô, tơs bơtău Jơno Niem bơh lơgơ trồ, gư̆m sămƀeah lơ̆gay jơno kòp jê băl î lơ̆gay jơno lơbăn-lơñô. 36Jơ gư̆n, tơm tô̆ tơmpơl lơ̆gay tơmpôl lang bol khăi, Kơnràñ dî nùs kơloh-kơlài ala ma ƀòn gô, bơh ƀòn gô kŏng sơòs-sơngeh î gơprah-gơprĭng, gư̆ptî belàt ơ̆ tom cro jư. 37Ma-ngkơi gư̆n, Kơnràñ tơs î lơ̆gay cro bơtê mơ̆n: “Kơnnhe koh gừn dơng ngăn, mơya cro koh gừn êt ngăn. 38Gư̆n-jîng, hôi-dăn khơñ cĕ î Cro Pơnhơm kơnnhe koh, lơi Kơnràñ pơđơ cro koh mơ̆t nơ̆m kơnnhe koh mơ̆n dê.”