Mathiơ 10

1Ma-ngkơi jơ hôi jư̆t-bea hê cro bơtê mơ̆n trôh, Kơnràñ sŏng e ma ƀòn gô gơnoăr cŭngsî lơ̆gay hwîng cà-ràk, lơi tơmprơh ƀòn gô î sămƀeah kơp jơno kòp jê băl jơno lơbăn-lơñô. 2Sơnăn jư̆t-bea hê cro bơtê la tîdô: Lai ngăn, Simôn (dî sơnăn la Pier) î Andre, oh ông; Jakơ kon klo Seƀeđe î Jăng, oh klo ông; 3Philip î Ƀathelemi; Thôma î Mathiơ la cro dăr-dia; Jakơ kon Alphe dê, gư̆m Thade; 4Simôn Sêlôt, î Juđa Iskariôt, kŭng la cro sŏng blơ̆-dră Kơnràñ.

5Yang Jesu sŏng pơđơ bea hê cro dô swà, ma-ngkơi jơ ƀăn tơngkah ƀòn gô, lah: “Bư̆ng swà tîgung măy lơ̆gay lang bol bơdih, kŭng bư̆ng mơ̆t nơ̆m ƀòn dơng cro Samari. 6Mơya păl swà trôh ma lơ̆gay belàt tìs kơ̆mprah hîh nhă Israel gừn niem rlo. 7Jơ gư̆n, tơm tô̆ swà gung, oh mi bơtău cĕ, tơs lah: ‘Lơgơ Yang cŭngsî trồ mơñ trôh lờt.’ 8Sămƀeah cĕ cro lơbăn-lơñô, lơh cro sơ̆t jîng wăl, lơh lơhiê cro kòp dun gư̆m tơmprơh kơp cà tơlôh. Oh mi sŏng dưñ-lăñ gời, gừn e gời cĕ. 9Bư̆ng prăp jư màh, hala jên, hala priè nơ̆m kơdŏk oh mi, 10bư̆ng iyà kơdô̆ng swà gung, hala bea blah ao, cơkhŏ, hala mư̆ng-jra, bơh cro lơh mơn dî păl pơnah jơno sa mơ̆n. 11Hôm nơ̆m ƀòn dơng hala ƀòn êt găy mà oh mi swà mơ̆t, jôi jăt cĕ du hôi cro găy gư̆n nơ̆m anẵu dô la cro dî păl, ăm cĕ nơ̆m anẵu gư̆n trôh dî jơ găy oh mi tơlôh swà. 12Jơ gư̆n, tơm tô̆ mơ̆t nhòng hîh gư̆n, păl e lơnge ma anẵu rơ̆. 13Du pơnah nde, dilah hîh gư̆n la anẵu dî păl, gừn jơno lơngăp-lơnge oh mi dê păl trôh cŭngsî gô, pơnah nde, dilah gô ơ̆-iyŏ la anẵu dî păl, gừn jơno lơngăp-lơnge oh mi dê rơp gôtrê wăl î oh mi. 14Gừn cro găy ơ̆ wă-rẵu oh mi, kŭng ơ̆ kơñ iet lơ̆gay jơno oh mi dê, gừn tơm tô̆ swà tơlôh bơh nơ̆m hîh hala ƀòn dơng gư̆n, kơtôh cĕ buh bơh jư̆ng oh mi. 15Iyŏ ngăn, ăñ tơs î oh mi, rơp tom jơno kŏng ngkhờc ma lơgơ Sôđôm î Gômôrơ nơ̆m nge cahrña rlo la ma ƀòn dơng gư̆n.

16Lăng năy, ăñ pơđơ oh mi swà gư̆ptî belàt ăm nhòng mpôl său-cơho, gư̆n-jîng păl gôjîng jăk-sai cĕ gư̆ptî beh î lơbăn-niem gư̆ptî sêm kơ̆ntơp. 17Mơya kơhea cĕ bơh cro nde, bơh ƀòn gô rơp lơboh oh mi ma tơmpôl kwăng cahrña, gừn cro nde rơp pơng lơh oh mi î mư̆ng nơ̆m hîh jư̆m ƀòn gô; 18sŏng gư̆n oh mi tien gơs rơp kŏng lơboh trôh sơđàp lơ̆gay cro kwăng dơng lơgơ î lơ̆gay bơtao tài bơh ăñ, lơi gư̆ptî du jơno lơh cư̆ng ma ƀòn gô gư̆m lơ̆gay lang bol bơdih. 19Mơya dơ̆ ƀòn gô jao lơboh oh mi, bư̆ng kơlôi-rcăng mơ̆n tơs amơh hala jơno găy mơ̆n păl tơs, bơh jơno mà oh mi păl tơs rơp dî e ma oh mi nơ̆m jơ gư̆n. 20Bơh ơ̆-iyŏ oh mi la cro tơs, mơya la Hwîng Yang Bàp oh mi tơs nơ̆m nùs oh mi. 21Rlo tîgư̆n, amî rơp jao lơboh oh nơ̆m anẵu sơ̆t, gừn bàp rơp jao lơboh kon, gừn kon so rơp gơhao tơmdră wăl mơi bàp î lơh ƀòn gô păl kŏng sơ̆t. 22Gừn oh mi rơp kŏng lơ̆gay cro ngañ bơh sơnăn ăñ, mơya cro găy kŏng-ăt dơi trôh dî lŭi-dơ̆t, cro rơ̆ rơp dî dŏng-klàs. 23Mơya jơ găy cro nde cơkhă kơ̆p oh mi nơ̆m ƀòn dơng dô, gừn toat swà cĕ ma ƀòn dơng nde, bơh iyŏ ngăn, ăñ tơs î oh mi, nên-nôn ngăn oh mi rơp hôm dahrăư swà lơ̆ kơp ƀòn dơng nơ̆m Israel trôh dî jơ Kon-Mơnùs trôh.

24Cro bơtê gừn ơ̆ dơng rlo cro bơtău, cro dê̆ kŭng ơ̆ dơng rlo cro pơnhơm mơ̆n. 25Gôtrê î cro bơtê, lơh mơmơh cro rơ̆ digơlăn gư̆ptî cro bơtău mơ̆n, gừn cro dê̆-gơna gừn gư̆ptî cro pơnhơm mơ̆n, la tăl lờt. Dilah cro nde sŏng hôi cro pơnhơm hîh la Ƀeelseƀul, gừn cro hîh nhă cro pơnhơm ơ̆ kwơ rlo trôh dî dư̆ng găy! 26Tîgư̆n, bư̆ng kơ̆mbrit ƀòn gô, bơh ơ̆ tom jơno găy ămpôn mà ơ̆ dî rang sơđah tơlôh, kŏng ămpôn ndăp mà ơ̆ dî đăl gư̆t. 27Jơno ăñ tơs î oh mi nơ̆m anẵu ñô̆ng, tơs tơlôh cĕ nơ̆m anẵu ang, gừn jơno oh mi kơnău tîpô̆ng tua, tơs tơlôh cĕ cŭngsî tơkang hîh. 28Bư̆ng kơ̆mbrit tơmpôl cro tơngsơ̆t să-jăn mà ơ̆ tơngsơ̆t sơ̆t dî hwîng-soan. Mơya păl kơ̆mbrit Bơtao digơlăn tơngroh băl hwîng-soan gư̆m î să-jăn nơ̆m brŏng-oềs gừn niem rlo. 29Ơ̆-iyŏ bea-lăm sêm-răc brău î khà priè du su hala ơ̆h? Gừn ơ̆ tom sêm găy nơ̆m pơnah mpôl gô rơp duh nơ̆m ù nư̆ng sî nùs kơñ Bàp oh mi dê. 30Mà ƀăt băl lơ̆gay sŏ nơ̆m găl oh mi, lơ̆gay sŏng dî yà lơ̆ lờt. 31Gư̆n-jîng, bư̆ng kơ̆mbrit, oh mi dơng mang khăi rlo sêm-răc. 32Tîgư̆n, kơp cro, rơ̆ la dilah cro găy tơs nê̆-năn ăñ sơđàp măt cro nde, gừn ăñ kŭng rơp tơs nê̆-năn cro rơ̆ sơđàp măt Bàp ăñ cŭngsî trồ. 33Mơya kơp cro găy khan ăñ sơđàp măt cro nde, gừn ăñ kŭng rơp khan cro rơ̆ sơđàp măt Bàp ăñ cŭngsî trồ.

34Bư̆ng kơlôi lah ăñ trôh lơi iyà jơno lơngăp-lơnge nơ̆m ù. Ăñ ơ̆ trôh lơi iyà jơno lơngăp-lơnge, mà la pàs-đao. 35Bơh ăñ trôh lơi lơh kon klo tơmdră wăl bàp mơ̆n, kon ua tơmdră wăl mơi mơ̆n, bơtô ua tơmdră wăl mơi bo-klo mơ̆n; 36gừn cro tơmdră du hôi cro la lơ̆gay cro nơ̆m hîh nhă cro rơ̆. 37Cro găy kơloh bàp hala mơi rlo ăñ gừn ơ̆ dî păl î ăñ; cro găy kơloh kon klo hala kon ua rlo ăñ kŭng ơ̆ dî păl î ăñ. 38Gừn cro găy ơ̆ tî sî pư̆ng mơ̆n î jăt ma-ngkơi ăñ gừn ơ̆ dî păl î ăñ. 39Cro găy jôi jơno jîng mơ̆n rơp lơh roh gô, mơya cro găy roh jơno jîng mơ̆n tài bơh ăñ rơp jôi dî gô.

40Cro găy wă-rẵu oh mi la wă-rẵu ăñ, gừn cro găy wă-rẵu ăñ kŭng wă-rẵu Bơtao sŏng pơđơ ăñ. 41Cro găy wă-rẵu du hôi cro gơnoăr-hwơr bơh sơnăn gơnoăr-hwơr rơp dưñ-lăñ phăn-ƀan cro gơnoăr-hwơr dê, gừn cro găy wă-rẵu du hôi cro tơpăt-durư̆ng bơh sơnăn la tơpăt-durư̆ng rơp dưñ-lăñ phăn-ƀan cro tơpăt-durư̆ng dê. 42Gừn dilah cro găy e du hôi nơ̆m lơ̆gay cro kơmom êt dô ñô du cơdŏ dà ngêt nư̆ng sî bơh sơnăn cro bơtê, gừn iyŏ ngăn, ăñ tơs î oh mi, cro rơ̆ nên-nôn ngăn ơ̆ roh phăn-ƀan mơ̆n dê.”