Mak 3

1Kơnràñ swà mơ̆t te nơ̆m hîh jơnư̆m, gừn tom du hôi cro kŏng sìa kơ̆mpang tê ndăng ăm nơ̆m gư̆n. 2Cro lăng jăt Kơnràñ nê̆ nê̆, tom iyŏ Kơnràñ rơp sămƀeah cro gư̆n nơ̆m nge Saƀat, lơi ƀòn gô digơlăn kơ̆p glài Kơnràñ. 3Kơnràñ pơđơ cro kŏng sìa kơ̆mpang tê lah: “Ñă ăm cĕ tî nhòng.” 4Gừn Kơnràñ lùp ƀòn gô lah: “Nge Saƀat dî gơnoăr lơh niem hala lơh mơsăk; dŏng cro hala tơngsơ̆t cro?” Mơya ƀòn gô ăm rngăp. 5Ma-ngkơi jơ blăc măt ngơ lăng ƀòn gô î nùs tơcao, moat-jrum bơh jơno kơdăng nùs ƀòn gô, Kơnràñ tơs î cro-klo gư̆n lah: “Tơlang cĕ kơ̆mpang tê mê.” Gô tơlang gừn kơ̆mpang tê gô dî sămƀeah wăl. 6Gừn dơ̆ tơlôh makin, lơ̆gay cro Pharisi băl î lơ̆gay cro mađah tơmpôl Herôt khơñ ngăn bơyê jôi kai-kơnĕ tơmdră wăl Kơnràñ, lơi amơh lơh ƀòn gô digơlăn tơngsơ̆t Kơnràñ.

7Yang Jesu băl î lơ̆gay cro bơtê Kơnràñ rîc trê bơlao dàlîng, gừn du tơmpôl lang bol khăi ngăn sŏng swà jăt bơh Galile, bơh Juđe, 8bơh Jerusalem, î bơh Idume băl î ƀòn mađah manăy dà măy Jôđăn, kŭng gư̆ptî tĕdơ ƀòn dơng Tirơ î Siđôn. Bơh kơnău gư̆t nhẵư jơno Kơnràñ lơh, du tơmpôl khăi ngăn sŏng hwa trôh î Kơnràñ. 9Kơnràñ pơđơ lơ̆gay cro bơtê Kơnràñ rcăng lai du-lăm ahẵu êt ma Kơnràñ tài bơh tơmpôl lang bol, lơi ƀòn gô ơ̆ tơm-tơcô̆ katet Kơnràñ. 10Tài bơh Kơnràñ sŏng sămƀeah khăi cro, tien gơs cro găy tom kòp jê păl tơm-tơcô̆ trôh en Kơnràñ lơi digơlăn tơmpơ̆p nơ̆m Kơnràñ. 11Kư̆ dơ̆ găy tơmpôl hwîng cà tơmpơl Kơnràñ, ƀòn gô tơmbĭc să nteàh sơđàp Kơnràñ, î ƀòn gô dreo kơkrẵy, tơs lah: “Kơnràñ la Kon Yang Tơm Trồ.” 12Kơnràñ krañ-cê ƀoah-đas ƀòn gô lơi ƀòn gô ơ̆ tơs tơnggư̆t bơh Kơnràñ.

13Kơnràñ swà hao cŭng-yồ gừn hôi lơ̆gay cro mà să tơm Kơnràñ kơp kơñ, gừn ƀòn gô trôh băl î Kơnràñ. 14Kơnràñ săc-rwơh jư̆t-bea hê (lơ̆gay cro mà Kơnràñ kŭng sơnăn la lơ̆gay cro gơnoăr bơtău dơng), lơi ƀòn gô ăm î Kơnràñ gư̆m lơi Kơnràñ digơlăn pơđơ ƀòn gô swà bơtău, 15Kŭng gư̆ptî dờp e gơnoăr tơmprơh cà. 16Kơnràñ săc-rwơh jư̆t-bea hê: î Simôn, Kơnràñ sơnăn te sơnăn măt la Pier; 17Jakơ, kon klo Seƀeđe, î Jăng, oh Jakơ, la lơ̆gay cro Kơnràñ kŭng sơnăn te sơnăn măt la Ƀôanerges, gơtha la lơ̆gay kon klo tơtàs; 18băl î Andre, Philip, Ƀathelemi, Mathiơ, Thôma, Jakơ kon klo Alphe, Thade, Simôn Selôt, 19î Juđa Iskariôt, kŭng la cro tơmdră Kơnràñ.

20Kơnràñ mơ̆t nơ̆m du-lăm hîh, gừn tơmpôl lang bol hwa găp trôh te, tien gơs Kơnràñ băl î lơ̆gay cro bơtê ơ̆ sa ƀăñ dî. 21Tơm tô̆ lơ̆gay cro hîh nhă Kơnràñ kơnău tîgư̆n, ƀòn gô trôh lơi kơ̆p jư Kơnràñ, bơh ƀòn gô tơs lah: “Amî gư̆n roh tơngoh lờt.” 22Lơ̆gay cro gơnoăr cêh, la lơ̆gay cro swà jư bơh Jerusalem, tơs lah: “Gô kŏng Ƀeelseƀul lơh,” î: “Kơnơm bơh bơtao cà mà gô tơmprơh cà.” 23Mơya tơm tô̆ sŏng hôi ƀòn gô trôh băl î mơ̆n, Kơnràñ tơs î ƀòn gô bơh î jơno pơ̆niyô lah: “Lơh tîgay Satan digơlăn tơmprơh Satan? 24Dilah du lơgơ kŏng tơmcơlah tơmdră wăl nư̆ng gô, gừn lơgơ rơ̆ ơ̆ ñă kơđư̆ng dî. 25Dilah du hîh nhă kŏng tơmcơlah tơmdră wăl nư̆ng gô, gừn hîh nhă rơ̆ rơp ơ̆ ñă kơđư̆ng jŏ dî. 26Gừn dilah cà Satan ndôh ñă tơmdră wăl nư̆ng gô mà kŏng tơmcơlah, gừn gô ơ̆ ñă kơđư̆ng dî, mơya sŏng trôh jơ sơ̆t roh lờt. 27Tơblơ̆ î bră tơmdră dêh sătan mơ̆n, tơm jơ sŏng mơ̆t nơ̆m hîh du hôi cro pran-kơdăng, ơ̆ cro găy digơlăn kơntô̆ng dî jini-jơno cro gư̆n nư̆ng dilah sŏng căp dî lai cro pran-kơdăng gư̆n, gừn sŏng rơ̆ gư̆n kơntô̆ng nơ̆m hîh gô. 28Iyŏ ngăn, ăñ tơs î ƀòn ông, lah lơ̆gay tồi-glài kon so kon-mơnùs dê rơp dî hồ, tien gơs lơ̆gay jơno sơmăm tìs găy î Yang ƀòn gô tơs tơlôh, 29mơya dilah cro găy tơs sơmăm tìs tơmdră wăl Yang Hwîng Goh, gừn ơ̆ tom jơno hồ glài trôh dî miek miek, mơya cro gư̆n kŏng kađòng glài miek miek.” 30Kơnràñ tơs tîgư̆n tài bơh ƀòn gô tơs lah: “Gô gừn kŏng hwîng cà lơh.”

31Mơi Kơnràñ băl î lơ̆gay oh Kơnràñ dê trôh, gừn tơm jơ ndăng ñă đah makin, ƀòn gô kơnơm cro tơnggơi dẵư ma Kơnràñ, hôi Kơnràñ tơlôh. 32Du tơmpôl khăi ndăng nggui tĕdơ Kơnràñ, gừn cro tơs î Kơnràñ lah: “Lăng tò, mơi Kơnràñ băl î lơ̆gay oh mi Kơnràñ ăm makin, ndăng jôi Kơnràñ.” 33Kla wăl dẵư ƀòn gô, Kơnràñ tơs lah: “Cro găy la mơi ăñ gư̆m lơ̆gay oh mi ăñ?” 34Sŏng gư̆n ma-ngkơi jơ blăc măt lăng lơ̆gay cro ndăng nggui wêl tĕdơ mơ̆n, Kơnràñ tơs lah: “Lăng cĕ dô, mơi ăñ gư̆m lơ̆gay oh mi ăñ! 35Bơh dilah cro găy lơh-jăt nùs-kơñ Yang Tom Trồ, gừn rơ̆ la oh mi, rôh lŏ, gư̆m mơi ăñ.”