Mak 4

1Du dơ̆ te, Kơnràñ sơntơm bơtău pơđơ nơ̆m mằ dàlîng, gừn du tơmpôl lang bol khăi ngăn bơjư̆m băl wêl tĕdơ Kơnràñ. Tîrơ̆ gư̆n, Kơnràñ sŏng lơbà mơ̆t nơ̆m du-lăm ahẵu nơ̆m dàlîng lơi nggui anẵu gư̆n, hôm lơ̆gay tơmpôl lang bol ăm nơ̆m mằ dàlîng. 2Kơnràñ mơntău ƀòn gô khăi jơno î jơno pơ̆niyô, gư̆m nơ̆m jơno ƀăn mơntău mơ̆n dê, Kơnràñ tơs î ƀòn gô lah: 3“Iet cĕ dô! Tò, du hôi cro lơh bră tơlôh swà sêh gơ. 4Bră tơngtrôh tơm tô̆ cro sêh gơ, du khà gơ ru tikîng gung gừn sêm trôh sa lơ̆ khà gư̆n. 5Khà gơ nde ru nơ̆m anẵu lô̆ kơndrom, la anẵu ơ̆-hoan tom ù mane dư̆ng-iè găy, gừn gô hon khơñ ngăn, tài bơh gôlăp ơ̆ jrô nơ̆m ù. 6Tơm tô̆ măttơnge tơlôh yơng, sî kŏng tơal bơh tơnge, gư̆m tài bơh ơ̆ tom reah, gư̆n-jîng gô kŏng rău-răñ. 7Khà nde ru nơ̆m nhòng pôm lẵu, lẵu hon tơng katet gô, gừn gô ơ̆ tơlôh ple-đău găy dî. 8Lơ̆gay gơ nde te ru nơ̆m ù niem, kơp du-lăm gơ lơh gôjîng công nha, tơm tô̆ hon gừn dî dơng, gừn gô tơlôh jîng păy-jư̆t, tơlôh jîng pro-jư̆t, î tơlôh jîng du-rhieng.” 9Gừn Kơnràñ tơs lah: “Cro găy dî tua lơi iet, iet cĕ.”

10Tơm tô̆ Kơnràñ ăm dêh du hôi, lơ̆gay cro ăm tĕdơ Kơnràñ băl î jư̆t-bea hê cro gơnoăr bơtău dơng lùp Kơnràñ bơh lơ̆gay jơno pơ̆niyô gư̆n. 11Kơnràñ tơs î ƀòn gô lah: “Jơno ndăp-ndơ bơh lơgơ Yang Tơm Trồ dê sŏng dî e ma oh mi rôh lŏ, mơya î lơ̆gay cro bơdih, lơ̆gay jơno la bơh î jơno pơ̆niyô,

12lơi tơm tô̆ lăng, gừn ƀòn gô kŭng digơlăn lăng, mà ơ̆ tơmpơl dî,

tơm tô̆ iet, gừn ƀòn gô kŭng digơlăn iet, mà ơ̆ wơng dî,

kơ̆mbrit la, ƀòn gô mbư̆ng lơi căư glài gừn glài dî hồ-toh ma ƀòn gô.”

13Kơnràñ tơs î ƀòn gô lah: “Oh mi ơ̆ wơng jơno pơ̆niyô dô ơ̆h? Tîrơ̆ gừn amơh oh mi wơng dî lơ̆gay kơp jơno pơ̆niyô? 14Cro sêh gơ gư̆n la sêh jơno Yang. 15Hôm dô la lơ̆gay cro tikîng gung anẵu mà jơno niem dî sêh tơlôh, mà tơm jơ ƀòn gô kơnău jơno niem gư̆n, Satan khơñ ngăn trôh gừn kơntô̆ng thơ̆t jơno niem sŏng dî sêh anẵu ƀòn gô. 16Kŭng tîgư̆n, dô la lơ̆gay cro anẵu lô̆ cas tơm jơ dî sêh, rơ̆ la cro ma tơm jơ ƀòn gô kơnău jơno niem, khơñ ngăn dưñ lăñ jơno niem bơh î nùs sơhờp-sờhơn, 17mà ƀòn gô ơ̆ tom reah nhòng gô mà nư̆ng la ăm bơdơh. Bơh gư̆n tơm jơ rŭng-rai hala jơno kơ̆p-cơkhă tơlôh bơh jơno niem, ƀòn gô khơñ ngăn sơ̆ndăc blă. 18Khà nde la lơ̆gay cro nhòng pôm lẵu dî sêh jơno niem. Dô la lơ̆gay cro kơnău jơno niem, 19mà lơ̆gay jơno kơlôi-rcăng bơh rai dô, î kơlôi bơh jơno kơnhơ̆p-mơ̆nda dê, băl î nùs ham-kơñ khăi jơno nde tơcô̆ mơ̆t, lơh katet jơno niem gừn gô sơlôh jîng ơ̆ công nha. 20Gừn dô la lơ̆gay cro nơ̆m ù niem dî sêh jơno niem, rơ̆ la lơ̆gay cro kơnău jơno niem gừn dưñ lăñ, sŏng gư̆n tơlôh ple bơkao, tơlôh păy-jư̆t, tơlôh pro-jư̆t, î tơlôh du-rhieng.”

21Kơnràñ tơs î ƀòn gô lah: “Kơlŏ oềs su ang ơ̆-iyŏ dî ăn lơi nteàh thô̆ng hala mphôm cơnờng ơ̆h? Ơ̆-iyŏ lơi gô dî ăn cŭngsî jư̆ng kơlŏ oềs ơ̆h? 22Tài bơh ơ̆ tom jơno găy la ndăp-ndơ dilah ơ̆-iyŏ la lơi dî sơđah tơlôh, kŭng ơ̆ tom jơno găy sŏng tom tơlôh dubă ndăp-ndơ mà ơ̆-iyŏ la lơi iyà tơlôh anẵu ang. 23Dilah Cro găy dî tua lơi iet, iet cĕ.” 24Sŏng gư̆n Kơnràñ tơs î ƀòn gô lah: “Păl iet cĕ jơno oh mi rôh lŏ kơnău. Oh mi rôh lŏ weh tău trôh dư̆ng găy, gừn jơno tău gư̆n rơp dî weh tău ma oh mi î gô rơp dî khăi rlo ma oh mi rôh lŏ te. 25Bơh cro găy dî gừn gô rơp dî e ma cro gư̆n, hôm cro ơ̆ dî, gừn tien gơs jơno mà cro gư̆n dî, rơp kŏng dưñ lơ̆ bơh gô.”

26Kơnràñ tơs lah: “Lơgơ Yang Tơm Trồ la tîdô: gư̆ptî du hôi cro tò sêh gơ nơ̆m ù. 27Gô bĭc hala lôh, tơmăng hala tơnge, ne gơ păl măt î hon dơng mơmơh tîgay — sătan gô ơ̆ gư̆t. 28Ù tơlôh ple bơkao jăt jơno bơjîng gô dê: Bơhsơm la sî nha, sŏng gư̆n trôh bơkao kôi, sŏng gư̆n gơ kơjơ̆ anẵu bơkao gư̆n. 29Sŏng gư̆n tơm tô̆ kơnnhe kôi dư̆m, gô khơñ ngăn e mơ̆ koh bơh kơnnhe koh kôi trôh sŏng.”

30Gư̆m Kơnràñ tơs lah: “Ƀòn mơ̆n digơlăn sơntu lơgơ Yang Tơm Trồ gư̆p tîgay, hala ƀòn mơ̆n digơlăn tơs lơgơ rơ̆ bơh î jơno pơ̆niyô găy? 31Gư̆ptî du-ne gơ nha-kai, la gơ mà tơm jơ dî sêh nơ̆m ù, sơm ngăn la êt ngăn nơ̆m lơ̆gay kơp gơ nơ̆m ù, 32mơya tơm tô̆ sŏng dî sêh lờt, gô hon gừn gôjîng dơng rlo lơ̆gay kơp bièp nơ̆m buơn, î gô sơ̆mbơ̆t tơlôh kơp mbơlong dơng, tien gơs sêm trồ digơlăn lơh kơ̆nson nteàh lơyơ̆ gô.”

33Î khăi jơno pơ̆niyô tîgư̆n, Kơnràñ bơtău jơno niem ma ƀòn gô, jăt jơno jăk ƀòn gô digơlăn iet dî, 34mơya Kơnràñ ơ̆ bơtău jơno găy ma ƀòn gô mà ơ̆ tom jơno pơ̆niyô. Mơya tơm tô̆ ăm dêh, Kơnràñ tơs nê̆ lơ̆gay jơno ma lơ̆gay cro bơtê mơ̆n.

35Nơ̆m nge gư̆n, dơ̆ brê mhău ñô̆ng lờt, Kơnràñ tơs î ƀòn gô lah: “Ƀòn mơ̆n păl swà găn bơlao mamằ-manăy.” 36Gừn tơm tô̆ sŏng swà bơh tơmpôl lang bol, ƀòn gô bơlăm Kơnràñ swà băl î ƀòn gô, bơh Kơnràñ ndăng ăm nơ̆m ahẵu. Kŭng tom kơp ahẵu nde jăt Kơnràñ. 37Du brôh cal rbơ̆t kơdăng ngăn pôh trôh î kơbồt dàlîng kư̆ sơn-gàc nơ̆m ahẵu tien gơs ahẵu mơn bîng dà. 38Hôm să tơm Kơnràñ ndăng ăm ma-ngkơi tieng ahẵu, sơ̆mƀîng găl bĭc. Ƀòn gô ble Kơnràñ lôh gư̆m tơs î Kơnràñ lah: “Ơ cro bơtău, cro bơtău ơ̆ kơlôi la ƀòn mơ̆n mơn sơ̆t ơ̆h?” 39Ma-ngkơi jơ lôh ñă, Kơnràñ tơmprơh cal gư̆m tơs î dàlîng lah: “Ha-ău cĕ! Ăm rngăp cĕ!” Bơh gư̆n, cal lơ̆ pôh, gừn tom jơno ăm rngăp wăl. 40Kơnràñ tơs î ƀòn gô lah: “Ngglơh oh mi kơ̆mbrit? Oh mi hôm dahrăư dî jơno don ơ̆h?” 41Ƀòn gô ntơ-kơ̆mbrit băl î jơno kơ̆mbrit-kơ̆mbròt ngăn gừn ƀòn gô tơs î găp lah: “Tîrơ̆ gừn Cro dô la cro găy, bơh tien gơs cal î dàlîng păl don jơno Gô?”