Mak 5

1Sŏng gư̆n ƀòn gô swà trôh mamằ manăy dàlîng, trôh nơ̆m bơlao ù Jerase. 2Tơm tô̆ Kơnràñ tơlôh bơh ahẵu, ƀăt jai gư̆n, du hôi cro kŏng hwîng cà lơh tơlôh wă-rẵu Kơnràñ bơh bơlao mơ̆ntô ƀùc, 3Cro dô dî anẵu ăm-pan nơ̆m lơ̆gay anẵu mơ̆ntô ƀùc, î ơ̆ cro găy digơlăn kơ̆p jư gô dî te, ngui băl ƀăt î săy-srê̆ kŭng ơ̆ dî. 4Tài bơh khăi dơ̆ gô kŏng căp bơh î anôh gư̆m săy-srê̆, mà săy-srê̆ gừn kŏng gô dui tư̆ng tĕ, hôm anôh gừn kŏng jăn tơlah lề, gừn ơ̆ cro găy tăl pran lơi kơ̆p jư gô. 5Kơp tơnge tơmăng nơ̆m anẵu mơ̆ntô ƀùc î nơ̆m lơ̆gay anẵu yồ grôi, gô dreo kơkrẵy î cua koh dêh să-jăn bơh î lô̆ sồt. 6Tơm tô̆ lăng tơmpơl Yang Jesu bơh ma wĭc, gô cơplŏk trôh gừn tơmbĭc să nteàh sơđàp Kơnràñ. 7Dreo kơkrẵy dơng dẵư, gô tơs lah: “Ơ Jesu, Kon Yang Tơm Trồ Dơng Rlo Lơ̆gay, ăñ tom bră găy î Kơnràñ? Ăñ răc-dăn Kơnràñ sràt-să sơđàp Yang Tơm Trồ, bư̆ng lơh sơòs-gleh ăñ.” 8Bơh Kơnràñ ờs sŏng pơđơ ma gô, lah: “Ơ hwîng cà tò, tơlôh cĕ bơh cro dô.” 9Kơnràñ lùp gô lah: “Mê mơh sơnăn?” Gô tơs î Kơnràñ lah: “Sơnăn ăñ la Du Tơmpôl Lĭñ, bơh ƀòn hî khăi ngăn.” 10Sŏng gư̆n gô kư̆ răc-dăn miek î Kơnràñ lah bư̆ng tơmprơh ƀòn gô tơlôh bơh bơlao gư̆n. 11Jơ gư̆n, nơ̆m anẵu gư̆n tom du mpôl sư khăi ngăn ndăng dî hồ sa nơ̆m yồ, 12gư̆n-jîng ƀòn gô răc-dăn Kơnràñ, lah: “Dăn e gơnoăr ma ƀòn hî mơ̆t nơ̆m mpôl sư, lơi ƀòn hî digơlăn ñăp mơ̆t nơ̆m gô.” 13Kơnràñ e gơnoăr ma ƀòn gô, gừn tơm jơ sŏng tơlôh makin gừn lơ̆gay hwîng cà ñăp mơ̆t nơ̆m mpôl sư. Gừn mpôl sư — dî yà pơngăp bea-rbô lăm — bơh dô̆ng yồ sơndŏng nơ̆m dàlîng gừn sơ̆t lơhăp nơ̆m dàlîng. 14Lơ̆gay cro jư sư toat lơi căư î tơs wăl bră gư̆n nơ̆m bơlao ƀòn dơng gư̆m anẵu bơlao ƀòn êt, gư̆n-jîng khăi cro swà trôh lơi lăng bră găy sŏng tom tơlôh. 15Ƀòn gô trôh anẵu Yang Jesu gừn tơmpơl cro kŏng cà lơh — rơ̆ cro bơh lai kŏng Du Tơmpôl cà ñă — ndăng nggui sơgư̆n, dî tơngcù ôi-ao niem î ăm nơ̆m jơno tơngoh ang; gừn ƀòn gô kơ̆mbrit-kơ̆mbròt ngăn. 16Nhẵư hê cro tơmpơl tơs wăl ma ƀòn gô bră sŏng tom tơlôh mơmơh tîgay ma cro kŏng cà lơh î bră bơh mpôl sư. 17Gừn ƀòn gô pẵư dẵư răc-dăn Kơnràñ tơlôh bơh ƀòn lơgơ ƀòn gô. 18Tơm tô̆ Kơnràñ ndăng lơbà mơ̆t nơ̆m ahẵu, cro bơh lai kŏng cà lơh răc-dăn Kơnràñ lơi gô digơlăn ăm băl î Kơnràñ. 19Kơnràñ ơ̆ e gơnoăr ma gô, mơya pơđơ ma gô lah: “Swà trê cĕ nơ̆m hîh mê, trôh băl ma lơ̆gay cro găp să mê mà tơs wăl ma ƀòn gô bră dơng Yang sŏng lơh nơ̆m mê î mơmơh tîgay Kơnràñ sŏng lơh nùs kơñ-kơloh mê.” 20Sŏng gư̆n, gô tơlôh swà gừn sơntơm tơs tơnggư̆t nơ̆m ƀòn Dekapôl bră dơng mơmơh tîgay mà Yang Jesu sŏng lơh ma gô, gừn kơp cro kŭng ndrăt-ndròt.

21Ma-ngkơi jơ Yang Jesu ăm nơ̆m ahẵu swà găn mamằ-manăy du dơ̆ te, du tơmpôl lang bol khăi ngăn bơjư̆m wăl tĕdơ Kơnràñ, î Kơnràñ ndăng ăm anẵu mằ dàlîng. 22Tò, du hôi nơ̆m lơ̆gay cro lăng jư hîh jơnư̆m, sơnăn la Jeru, swà trôh, gừn tơm tô̆ tơmpơl Kơnràñ, ông cơdơn krô̆ng anẵu jư̆ng Kơnràñ. 23Ông lơ̆ nùs răc-dăn Kơnràñ tơm tô̆ tơs lah: “Kon-ua êt ăñ dê ndăng kòp kơjơ̆ ngăn. Dăn Kơnràñ trôh lơi Kơnràñ ăn tê cŭng să kơmom lơi kơmom digơlăn dî sămƀeah gư̆m dî jîng.” 24Bơh gư̆n Kơnràñ swà î ông, du tơmpôl lang bol khăi ngăn kŭng swà jăt Kơnràñ gư̆m tơcô̆ katet tĕdơ Kơnràñ.

25Tom du hôi cro-ua kŏng kòp tôh mham jư̆t-bea năm, 26sŏng kŏng sơòs-sơngeh ngăn bơh khăi cro gơnoăr sơnăm gư̆m sŏng roh lơhiê lơ̆gay jini-jơno mơ̆n dê, mà ơ̆ tom dî kwơ găy, mơya ala bơh gư̆n, hôm kòp sơlôh jîng bờt rlo, 27ma-ngkơi jơ kơnău bơh Yang Jesu, gừn dơ̆ trôh en đah ma-ngkơi Kơnràñ nhòng tơmpôl lang bol khăi, amî ua tơbi nơ̆m ao Kơnràñ. 28Tài bơh amî ua kơlôi lah: “Dilah mơ̆n nư̆ng tơbi nơ̆m ao Kơnràñ gời gừn mơ̆n rơp dî ƀeah.” 29Ƀăt jơ gư̆n, kòp tôh mham gô dê kơdrơ̆ wăl, gư̆m gô đăl gư̆t nơ̆m să-jăn mơ̆n, lah să-jăn sŏng dî sămƀeah klàs kòp. 30Jơ gư̆n jai, Yang Jesu, đăl gư̆t nơ̆m să mơ̆n lah gơnăp-gơnoăr bơh să mơ̆n sŏng tơlôh makin, gư̆n-jîng tơmblăc wăl nhòng tơmpôl khăi, Kơnràñ lùp lah: “Cro găy sŏng tơbi nơ̆m ao ăñ dê?” 31Lơ̆gay cro bơtê Kơnràñ tơs î Kơnràñ lah: “Cro bơtău tơmpơl tơmpôl khăi ndăng tơcô̆ katet cro bơtău, ma cro bơtău hôm lùp lah: ‘Cro găy tơmpơ̆p nơ̆m ăñ’ yơh?” 32Kơnràñ hôm ndăng lăng tĕdơ lơi lăng cro găy sŏng lơh jơno gư̆n. 33Jơ gư̆n, cro-ua dô, bơh sŏng sơlôh jîng kơ̆mbrit-kơ̆mbròt gư̆m ntơ-să, gư̆t bră sŏng tơmtom ma mơ̆n, gư̆n-jîng sŏng trôh, tơmbĭc să nteàh sơđàp Kơnràñ gừn tơs wăl ma Kơnràñ lơ̆gay jơno tơpăt ngăn. 34Mơya Kơnràñ tơs î amî ua gư̆n lah: “Ơ kon ua, jơno don kon sŏng sămƀeah kon. Swà cĕ ngglăm lơngăp-lơnge gư̆m dî ƀeah pran-kơdăng bơh kòp kon dê.”

35Nơ̆m dơ̆ Kơnràñ hôm ndăng tơs, tom nhẵư hê cro bơh nơ̆m hîh cro lăng jư hîh jơnư̆m dê trôh tơs lah: “Kon ua ông dê sơ̆t lờt. Ngglơh hôm lơh gleh cro bơtău te?” 36Mơya tơm tô̆ kơnău dî jơno ƀòn gô tơs, Yang Jesu tơs î cro lăng jư hîh jơnư̆m lah: “Bư̆ng kơ̆mbrit. Nư̆ng don gời.” 37Kơnràñ ơ̆ e gơnoăr cro nde swà băl î mơ̆n, sî nư̆ng Pier, Jakơ gư̆m Jăng, oh Jakơ. 38Kơnràñ swà trôh nơ̆m hîh cro lăng jư hîh jơnư̆m gừn tơmpơl jơno ndrăm-ndròm băl î jơno ñim-rèa gư̆m dreo kơkrẵy. 39Tơm tô̆ lơbà mơ̆t, Kơnràñ tơs î ƀòn gô lah: “Ngglơh ƀòn mê moat-jrum gư̆m ñim-rèa? Kon êt ơ̆ sơ̆t, mà kơmom ndăng bĭc.” 40Bơh gư̆n ƀòn gô tơngyŏ-tơnghiel Kơnràñ, mơya tơm jơ sŏng tơmprơh lơ̆ ƀòn gô tơlôh makin, Kơnràñ iyà bàp, mơi kon êt dê gư̆m lơ̆gay cro swà băl î Kơnràñ, sŏng gư̆n Kơnràñ trôh anẵu kon êt bĭc. 41Ma-ngkơi jơ iyà tê kơmom êt, Kơnràñ pơđơ kapề êt lah: “Talitha, koum!” jơno rơ̆ gừn dî cêh tơlôh la: “Kon ua êt, ăñ pơđơ kon lôh ñă cĕ.” 42Jơ gư̆n jai, kapề êt lôh nggui gư̆m lơbà swà (bơh sŏng dî jư̆t-bea năm), gư̆m lơ̆gay cro ăm nơ̆m gư̆n jơ gư̆n ngĕ-ngăl ndrăt kơ̆mbrit ngăn. 43Kơnràñ ƀăn tơngkah ƀòn gô krañ-cê lah ơ̆ du hôi cro găy dî gư̆t bră dô, gừn Kơnràñ pơđơ ƀòn gô e kapề êt sa.