Mak 6

1Bơh anẵu gư̆n, Kơnràñ sŏng tơlôh swà, sŏng gư̆n trê trôh ƀòn tơm mơ̆n dê, gư̆m lơ̆gay cro bơtê Kơnràñ dê swà jăt Kơnràñ. 2Trôh nge Saƀat, Kơnràñ sơntơm bơtău pơđơ nơ̆m hîh jơnư̆m. Khăi cro kơnău ndrăt kơ̆mbrit, tơs lah: “Lơ̆gay jơno bơtău dô dưñ bơh sờ găy? Jơno jăk-sai sŏng dî dờp ma ông dô băl î nhẵư gơnoăr phadêh gư̆ptî năy tơlôh bơh tê ông gư̆n la amơh?” 3“Ơ̆-iyŏ dô la cro lơh sî, kon klo Mari dê, gư̆m amî klo Jakơ dê, Jôse, Juđe î Simôn ơ̆h? Ơ̆-iyŏ nhẵư oh ua ông dê gư̆n ndăng ăm nơ̆m dô nhòng ƀòn mơ̆n ơ̆h?” Ƀòn gô tơs sơmăm tìs bơh Kơnràñ. 4Yang Jesu tơs î ƀòn gô lah: “Hîh gơnoăr-hwơr gừn ơ̆ prŏi jơno kingam, nư̆ng nơ̆m lơgơ ƀòn tơm mơ̆n, nhòng tĕdơ găp bơtien mơ̆n î nơ̆m cro hîh nhă mơ̆n.” 5Kơnràñ ơ̆ rgê lơh du-lăm bră gơnăp-gơnoăr găy nơ̆m anẵu gư̆n, Kơnràñ nư̆ng sŏng sămƀeah tơm jơ ăn tê cŭngsî nơ̆m du êt cro kòp jê. 6Kơnràñ tơmpơl phadêh tài bơh nùs ơ̆ don ƀòn gô dê, sŏng gừn Kơnràñ swà bơtău pơđơ nơ̆m tĕdơ lơ̆gay ƀòn tơm.

7Kơnràñ hôi jư̆t-bea hê cro gơnoăr bơtău gư̆m sơntơm pơđơ ƀòn gô tơlôh swà, tư̆ng du yô du yô Kơnràñ kŭng e ma ƀòn gô dî gơnoăr cŭngsî lơ̆gay hwîng cà, 8gừn ƀăn pơđơ ƀòn gô lah bư̆ng iyà jơno găy jăt băl nơ̆m gung swà, nư̆ng iyà du ƀĕ mư̆ng-jra gời — ơ̆ ƀăñ, ơ̆ kơdô̆ng, kŭng ơ̆ jên-priè nơ̆m săy bơ̆t — 9mà crăp jep cơkhŏ, gừn “Oh mi bư̆ng cù bea blah ao.” 10Gừn Kơnràñ pơđơ e ƀòn gô lah: “Dilah tơm jơ oh mi mơ̆t nơ̆m hîh găy, păl kư̆ ăm nơ̆m gư̆n trôh dî jơ găy oh mi tơlôh swà bơh hîh rơ̆. 11Dilah anẵu găy ơ̆ wă-rẵu oh mi, hala ơ̆ kơñ iet oh mi, gừn tơm jơ tơlôh bơh anẵu gư̆n, kơtôh cĕ buh nteàh jư̆ng mơ̆n gư̆ptî jơno cư̆ng-tang tơmdră wăl ƀòn gô.” 12Gư̆n la, ma-ngkơi jơ tơlôh swà, ƀòn gô bơtău tơs lah lơ̆gay cro păl mbư̆ng lơi căư glài. 13Ƀòn gô tơmprơh khăi cà, mơya bông mơñà ma khăi cro kòp gư̆m sămƀeah ƀòn gô.

14Bơh gư̆n, bơtao Herôt sŏng kơnău gư̆t bră dô, bơh jơno tien pơndrơ Kơnràñ sŏng sơlôh jîng lam lơ̆, î cro tơs lah: “Jăng Ƀaptis sŏng dî lơh jîng wăl bơh anẵu sơ̆t, bơh gư̆n lơ̆gay bră phadêh gơnăp-gơnoăr ndăng dî lơh anẵu cro dô.” 15Hôm lơ̆gay cro nde tơs lah: “Ông gư̆n la Êli.” Mà du pơnah nde te gừn tơs la: “La cro gơnoăr hwơr, gư̆ptî du hôi nơ̆m lơ̆gay cro gơnoăr hwơr.” 16Mơya tơm jơ kơnău tîrơ̆, Herôt tơs lah: “Jăng, cro mà ăñ sŏng koh găl, gô sŏng dî lơh jîng wăl.” 17Bơh sătan Herôt, sŏng pơđơ cro, kơ̆p Jăng î căp gô nơ̆m hîh jam bơh bră Herôdias (bo-ua Philip, oh bơtao) tài bơh bơtao sŏng tơmhòp î ua-gư̆n. 18Tài bơh Jăng sŏng tơs î Herôt lah: “Ngăn la tơblơ̆ jơno-bơlăm tơm jơ bơtao tơmhòp bo-ua oh klo bơtao.” 19Mơya Herôdias tơcao ngăn ông î kơñ tơngsơ̆t ông, ma gô ơ̆ lơh dî, 20bơh Herôt duh kơ̆mbrit Jăng, bơh gư̆t Jăng la cro tơpăt-durư̆ng î sang-goh, gư̆n-jîng bơtao lăng jư ma Jăng dî lơngăp-lơnge, bulah tơm jơ kơnău jăng tơs, lơh bơtao sơmiê ngăn, mà bơtao kŭng rcăng nùs iet kơnău ông. 21Sŏng gư̆n trôh ñăm dî tô̆ tơnge, la dơ̆ Herôt lơh jơno sa kah sơdơ nge bơda gô wă-rẵu lơ̆gay cro kwăng dơng gô dê băl î lơ̆gay cro ăt-bồ tơmpôl lĭñ, î lơ̆gay cro kwăng dơng ăt-bồ lơgơ Galile, 22gừn dơ̆ gư̆n kon ua bơtao dê la Herôdias sŏng lơbà mơ̆t, tơmya, gừn lơh Herôt băl î lơ̆gay cro năc nggui băl kaƀang î bơtao niem-nùs ngăn, gư̆n-jîng bơtao tơs î kon ua-gư̆n lah: “Dăn cĕ î ăñ lơ̆gay jơno găy kon kơñ gừn ăñ rơp e gô ma kon.” 23Gô sràt-să î kon-ua lah: “Bulah kon dăn î ăñ, trôh dî nggùl dà lơgơ ăñ, ăñ kŭng rơp e ma kon.” 24Bơh gư̆n, ma-ngkơi jơ swà tơlôh makin, gô lùp mơi gô lah: “Kon păl dăn jơno găy?” Sŏng gư̆n mò kla dẵư lah: “Kơ̆ndoh-găl Jăng Ƀaptis.” 25Ƀăt jơ gư̆n, nơ̆m jơno sơbăc-sơbăng dơ̆ mơ̆t blăc wăl î bơtao, gô dăn lah: “Kon kơñ la ƀăt jơ dô bơtao e ma kon kơ̆ndoh-găl Jăng Ƀaptis ăn nơ̆m sơlao.” 26Bulah gôjîng moat-jrum ngăn, mơya bơtao ơ̆ kơñ khan jơno kon-ua dăn tài bơh jơno sràt-să gô dê î lơ̆gay cro năc ndăng nggui băl kaƀang î gô, 27gư̆n-jîng bơtao khơñ ngăn, pơđơ lĭñ ngui đao, iyà găl Jăng trôh, gừn ma-ngkơi jơ tơlôh makin, cro lĭñ swà koh găl Jăng nơ̆m hîh jam. 28Cro lĭñ iyà găl Jăng ăn nơ̆m sơlao gừn dờp ma kon-ua, sŏng gư̆n kon ua dờp găl gư̆n wăl ma mơi gô, 29tơm jơ kơnău gư̆t sŏng bră, lơ̆gay cro bơtê Jăng trôh, iyà ƀùc ông, gừn iyà ƀùc swà lơboh tăp nơ̆m mơ̆ntô.

30Lơ̆gay cro gơnoăr bơtău bơjư̆m wăl băl î Yang Jesu, tơs ma Kơnràñ lơ̆gay bră ƀòn gô sŏng lơh î lơ̆gay jơno ƀòn gô sŏng mơntău. 31Kơnràñ tơs î ƀòn gô lah: “Sătan oh mi swà trôh dêh cĕ bơlao găy gư̆n ngêt-ngờt, î bơdê cĕ să dư̆ng-iè.” Bơh tom khăi ngăn cro swà eo swà ma, gừn tien gơs ƀòn gô ơ̆ dî tô̆ jơ lơi ăm sa. 32Ƀòn gô băl î găp swà hao mơ̆t nơ̆m ahẵu trôh nơ̆m du-anẵu ngêt-ngờt. 33Khăi cro tơmpơl ƀòn gô tơlôh swà î đăl gư̆t ƀòn gô, gư̆n-jîng bơh lơ̆gay kơp ƀòn dơng, cro sŏng băl î găp cơplŏk jư̆ng trôh nơ̆m gư̆n î trôh nơ̆m anẵu lai ƀòn gô. 34Tơm tô̆ tơlôh bơh nơ̆m ahẵu, Kơnràñ tơmpơl du tơmpôl lang bol khăi ngăn, gừn Kơnràñ rngoh-rngăc kơñ-kơloh ƀòn gô bơh ƀòn gô gư̆ptî belàt ơ̆ tom dî cro jư, sŏng gư̆n Kơnràñ sơntơm ƀăn mơntău ƀòn gô khăi jơno. 35Jơ gư̆n brê mhău lờt, gư̆n-jîng tơm jơ trôh băl î Kơnràñ, lơ̆gay cro bơtê Kơnràñ tơs lah: “Anẵu dô la anẵu ngêt-ngờt î jơ dô brê mhău oañ lờt. 36Dăn pơđơ lang bol swà trê, lơi ma-ngkơi jơ sŏng swà mơ̆t nơ̆m lơ̆gay ƀòn êt tĕdơ dô, gừn ƀòn gô digơlăn tăc dêh jơno găy lơi sa.” 37Mơya tơm tô̆ kla wăl dẵư ƀòn gô, Kơnràñ tơs lah: “Oh mi e cĕ ma ƀòn gô sa.” Ƀòn gô tơs î Kơnràñ lah: “Tơm tô̆ swà lờt, gừn ƀòn hî digơlăn tăc dî bea-rhieng dơñe ƀăñ mà e ma tơmpôl lang bol sa ơ̆h?” 38Tîrơ̆ gừn, Kơnràñ tơs î ƀòn gô lah: “Swà cĕ. Jôi swì. Oh mi dî nhẵư lăm ƀăñ?” Ma-ngkơi jơ swì lăng sŏng, ƀòn gô tơs lah: “Prăm-lăm ƀăñ î bea-lăm ka.” 39Kơnràñ pơđơ ma lơ̆gay lang bol nggui nteàh jîng du tơmpôl du tơmpôl nơ̆m khơ̆ pơ̆t. 40Ƀòn gô nggui tơmcơlah tơmpôl khăi tơmpà jîng du-rhieng hê gư̆m jîng prăm-jư̆t hê. 41Ma-ngkơi jơ iyà prăm-lăm ƀăñ î bea-lăm ka, ngẵư măt lêh cŭngsî trồ, Kơnràñ ưnngai î pêh ƀăñ sŏng gư̆n dờp ma lơ̆gay cro bơtê Kơnràñ lơi ƀòn gô iyà tơmpà ma tơmpôl lang bol. Kơnràñ kŭng tơmpà bea-lăm ka ma lơ̆gay cro. 42Ƀòn gô sa băl gư̆m dî hơm-le. 43Gừn ƀòn gô săc tơgom dî jư̆t-bea bai bîng lơ̆gay ƀăñ ngkah î ka. 44Lơ̆gay cro sŏng sa ƀăñ pơngăp la prăm-rbô hê cro-klo.

45Ƀăt jơ gư̆n, Kơnràñ pơtĕo lơ̆gay cro bơtê mơ̆n hao mơ̆t nơ̆m ahẵu gừn swà lai găn mamằ-manăy, trôh nơ̆m Ƀetsaiđa, nơ̆m tơm jơ Kơnràñ e ma tơmpôl lang bol swà trê. 46Tơm tô̆ ƀòn gô sŏng swà lờt, Kơnràñ swà hao lêh nơ̆m yồ lơi hôi-dăn. 47Trôh ñô̆ng, ahẵu sŏng ăm nhòng dàlîng, gừn Kơnràñ ăm du hôi nơ̆m cŭngsî mamằ. 48Tơmpơl ƀòn gô ndăng grat pran pai was — bơh cal ndăng pôh tơblơ̆ wăl î mađah ƀòn gô — gừn pơngăp nơ̆m jơ dơ̆ puôn tơmăng gư̆n, Kơnràñ swà jư̆ng cŭngsî măt dàlîng trôh anẵu ƀòn gô gư̆m Kơnràñ kơñ swà găn ƀòn gô. 49Mơya tơm tô̆ lăng tơmpơl Kơnràñ lơbà swà cŭngsî măt dàlîng, ƀòn gô tôn lah gư̆n la phùc, gư̆n-jîng ƀòn gô dreo kơkrẵy dơng, 50bơh ƀòn gô kŭng tơmpơl Kơnràñ gừn kŏng kơ̆mbrit tơpơ hwîng mơngă. Mơya khơñ ngăn, Kơnràñ tơs î ƀòn gô gư̆m pơđơ ƀòn gô, lah: “Kơđư̆ng cĕ nùs! Cro bơtău dô! Bư̆ng kơ̆mbrit!” 51Kơnràñ lơbà mơ̆t nơ̆m ahẵu î ƀòn gô gừn cal ăm rngăp wăl, lơ̆gay cro bơtê ndrăt-ndròt ngăn nơ̆m nhòng ƀòn gô. 52Bơh ƀòn gô ơ̆ tom wơng bơh gơnoăr phadêh sơlơ̆ ƀăñ. Ala bơh gư̆n, nùs ƀòn gô kŭng hôm kră-kơdăng.

53Tơm tô̆ sŏng swà găn mamằ-manăy, ƀòn gô swà trôh nơ̆m Genesaret gừn tơngduh kơnoĕ nơ̆m gư̆n. 54Tơm tô̆ ƀòn gô tơlôh bơh ahẵu, bơh đăl gư̆t Kơnràñ khơñ, 55gư̆n-jîng cro cơplŏk swà kơp nơ̆m ƀòn gư̆n gừn sơntơm tung lơ̆gay cro kŏng kòp bĭc ăm nơ̆m cơnờng trôh anẵu mà ƀòn gô kơnău lah Kơnràñ ndăng ăm anẵu gư̆n. 56Dilah anẵu găy Kơnràñ swà trôh, nơ̆m lơ̆gay kơp ƀòn, hala nơ̆m ƀòn dơng hala nơ̆m ƀòn êt, tơmpôl lang bol kŭng iyà lơ̆gay cro kòp ăn nơ̆m anẵu bơlao drà gừn dăn Kơnràñ lơi ƀòn gô digơlăn tơmpơ̆p dư̆ng-iè nơ̆m tieng ao Kơnràñ dê, gừn kơp cro găy tơmpơ̆p nơ̆m Kơnràñ kŭng dî ƀeah kòp.