Mak 7

1Lơ̆gay cro Pharisi băl î nhẵư hê cro bơtău jơno-bơlăm, sŏng trôh bơh Jerusalem, ndăng bơjư̆m wăl tĕdơ Kơnràñ. 2Bơh sŏng tơmpơl nhẵư hê cro bơtê Kơnràñ dê, tơm tô̆ ƀòn gô sa ƀăñ î kơ̆mpang tê sơmơ̆-sơmĭñ, rơ̆ la hôm dahrăư rao. 3(Bơh cro Pharisi kŭng gư̆ptî lơ̆gay cro Juđa kŭng ơ̆ sa jơno dilah hôm dahrăư rao tê mơ̆n lơhiê, bơh lơh-jăt jơno-bơlăm yo ông-pang dê; 4î jơno iyà trê bơh nơ̆m drà, ƀòn gô ơ̆ sa dilah hôm dahrăư rao lơhiê, î khăi jơno nde mà ƀòn gô sŏng dưñ-lăñ lơi prăp jư; bră rao jrồ wan, gŏ lîng, î lơ̆gay jini-jơno lơh bơh î kong.) 5Lơ̆gay cro Pharisi î cro bơtău jơno-bơlăm khao lùp Kơnràñ lah: “Ngglơh cro bơtê cro bơtău dê ơ̆ jîng jăt jơno-bơlăm yo ông-pang dê, mà sa ƀăñ bơh î tê hôm dahrăư rao?” 6Mơya tơm tô̆ kla wăl dẵư ƀòn gô, Kơnràñ tơs lah: “Esai tơs jơno hwơr iyŏ ngăn bơh lơ̆gay cro jơno don mablăc ƀòn mê. Gư̆ptî tom cêh tîdô lah:

‘Lang bol dô don kơ̆mbrit ăñ sơ bơ-yôi công lơm-piet

mơya nùs-nhơ̆m ƀòn gô dê gừn wĭc ngai bơh ăñ.

7Hôm ƀòn gô duh-khoai ăñ dubă ơ̆ kwơ,

tơm tô̆ ƀăn bơtău lơ̆gay jơno pơđơ bơlăm kon-mơnùs dê gư̆ptî lơ̆gay gung duh-khoai.’

8Lơi căư gơnoăr pơđơ Yang Tơm Trồ dê, ƀòn mê prăp jư jơno-bơlăm rai yo kon-mơnùs dê.” 9Gừn Kơnràñ tơs î ƀòn gô: “Niem ngăn ma ƀòn ông lơi căư jơno gơnoăr pơđơ Yang Tơm Trồ dê lơi prăp jư jơno bơlăm yo mơ̆n dê! 10Bơh Môise bơtău: ‘Don duh cĕ mơi mơ̆n î bàp mơ̆n,’ gư̆m ‘Cro găy rma mơi hala bàp — cro gư̆n dơ̆t-lŭi păl kŏng tơngsơ̆t.’ 11Mơya ƀòn ông tơs: ‘Dilah du hôi cro tơs î mơi hala bàp mơ̆n lah: “Dilah jơno găy mơi bàp dî păl rong-siem bơh kon la Korban (rơ̆ la jơno ăn ma Yang Tơm Trồ),”’ 12gừn ƀòn ông ơ̆ e gơnoăr cro gư̆n lơh du-lăm jơno găy ma mơi hala bàp mơ̆n dê te, 13lơh jơno Yang Tơm Trồ dê sơlôh jîng ơ̆ kwơ bơh î jơno-bơlăm yo ƀòn ông dê ma ƀòn ông sŏng bơtău wăl, gư̆m ƀòn ông lơh khăi jơno durư̆ng băl gư̆p tîgư̆n.” 14Gư̆m ma-ngkơi jơ hôi wăl tơmpôl lang bol trôh, Kơnràñ tơs î ƀòn gô lah: “Lơ̆gay oh mi rôh lŏ iet cĕ ăñ gư̆m wơng cĕ: 15Ơ̆ tom jơno găy bơh makin du hôi cro mơ̆t nhòng să cro rơ̆ mà digơlăn lơh sơmơ̆-sơmĭñ cro rơ̆; mơya lơ̆gay jơno bơh nhòng tơlôh bơh cro gư̆n, gư̆n la lơ̆gay jơno lơh sơmơ̆-sơmĭñ cro gư̆n.” 16(Dilah cro găy dî tua lơi iet, iet cĕ.)

17Tơm tô̆ Kơnràñ swà mơ̆t nơ̆m hîh, wĭc bơh tơmpôl khăi, lơ̆gay cro bơtê Kơnràñ lùp Kơnràñ bơh jơno pơ̆niyô. 18Kơnràñ tơs î ƀòn gô lah: “Tîgư̆n mà oh mi kŭng ơ̆ tom jơno gư̆t wơng ya? Oh mi ơ̆ đăl tơmpơl lah kơp jơno bơh makin mơ̆t nơ̆m nhòng du hôi cro ơ̆-rgê lơh sơmơ̆-sơmĭñ cro rơ̆ dî ya? 19Tài bơh gô ơ̆ mơ̆t ngglăm nùs cro ơ̆, ma la mơ̆t nơ̆m klô̆ng, sŏng gư̆n kŏng tơlôh makin nơ̆m hîh katiu (gơtha la lơ̆gay jơno sa la niem lơhiê.)” 20Mơya Kơnràñ tơs lah: “Jơno tơlôh bơh ngglăm cro gư̆n la jơno lơh sơmơ̆-sơmĭñ cro gư̆n. 21Bơh ăm nơ̆m ngglăm, tơlôh bơh ngglăm nùs cro gư̆n, bơda tơlôh lơ̆gay jơno kơlôi bờk, rês-àr, kơntô̆ng-kơño, tơngsơ̆t cro, 22sơlăp-sơbêl, ham-hà, bờk-mơsăk, blăc-pơlum, lîng-lang, gơ-măt tơmngañ, tơngyŏ-tơnghiel, tơngyơng să, wì-lơngôh. 23Lơ̆ kơp jơno bờk-mơsăk dô bơh ngglăm nùs tơlôh gư̆m gô lơh sơmơ̆-sơmĭñ cro gư̆n.”

24Sŏng gư̆n tơm tô̆ ñă atẵy bơh sơgư̆n, Kơnràñ swà trôh nơ̆m ƀòn Tirơ î Siđôn, gư̆m tơm tô̆ sŏng mơ̆t nơ̆m du-lăm hîh, Kơnràñ ơ̆ kơñ cro găy gư̆t, kŭng ơ̆-rgê pôn să dî. 25Mơya nơ̆m jơ gư̆n, du hôi cro-ua năy, la cro dî kon-ua êt mò dê kŏng hwîng cà lơh, tài bơh sŏng kơnău bơh Kơnràñ, gư̆n-jîng tơm jơ trôh, gô tơmbĭc să nteàh anẵu jư̆ng Kơnràñ. 26Jơ gư̆n, cro-ua rơ̆ la cro Grek, nŏk-noi Sirô-Phenisi, gừn gô răc-dăn Kơnràñ lơi Kơnràñ tơmprơh cà tơlôh bơh kon-ua gô. 27Kơnràñ tơs î gô lah: “Lai ngăn, lơi cĕ kon so sa hơm ka. Bơh ngăn la ơ̆ niem ơ̆ tơm jơ dưñ ƀăñ kon so gừn tư̆ng mbư̆ng ma său kon.” 28Mơya gô kla wăl dẵư î tơs băl î Kơnràñ lah: “Ngăn tîrơ̆, ơ Yang, î lơ̆gay său kon ăm mphôm kaƀang sa lơ̆gay ƀăñ ngkah bơh kon so dê.” 29Bơh gư̆n Kơnràñ tơs î gô lah: “Bơh jơno dô, e swà trê cĕ jờh. Cà tơlôh sŏng bơh kon-ua e dê.” 30Tơm tô̆ swà trê trôh nơ̆m hîh gô, gô tơmpơl kon êt bĭc nơ̆m cơnờng, î cà tơlôh sŏng.

31Gừn du dơ̆ te, ma-ngkơi jơ swà tơlôh bơh ƀòn Tirơ, Kơnràñ swà găn ƀòn dơng Siđôn trôh nơ̆m dàlîng Galile, trôh nhòng ƀòn Dekapôl. 32Cro iyà trôh ma Kơnràñ du hôi cro tê̆-tua î kơmblău, sŏng gư̆n ƀòn gô răc-dăn Kơnràñ, lơi Kơnràñ ăn tê cŭngsî amî gư̆n. 33Tơm tô̆ sătan Kơnràñ iyà cro gư̆n tơlôh bơh tơmpôl lang bol, Kơnràñ ăn kơp kon tê Kơnràñ nơ̆m bea đah pô̆ng tua gô, gừn dơ̆ sŏng soh dà dreo lờt, Kơnràñ bŏng nơ̆m lơm-piet gô. 34Î ngẵư măt cŭngsî trồ, Kơnràñ nhim dơng, sŏng gư̆n tơs î gô lah: “Ephata,” (gơtha la: “Pẵư tơlôh cĕ!”) 35Bơh gư̆n tua amî gư̆n dî kơnău wăl, jơno krañ cê bơh nơ̆m lơm-piet gô dî lơbăn, gừn gô sơntơm tơs loh-lang. 36Kơnràñ khă ƀòn gô lơi ƀòn gô bư̆ng tơs jơno găy î cro găy. Mơya Kơnràñ sî khă ƀòn gô dư̆ng găy, ƀòn gô sî tơs tơnggư̆t jơno gư̆n makin khăi rlo tîrơ̆. 37Cro nde lơh ndrăt-ndròt ngăn, tơs lah: “Ông gư̆n sŏng lơh lơ̆gay bră niem ngăn. Tien gơs, ông gư̆n lơh ma cro tê̆-tua kơnău wăl î cro kơmblău tơs dî.”