Mak 8

1Nơ̆m lơ̆gay nge gư̆n, tom te du tơmpôl lang bol khăi ngăn, î ơ̆ tom dî jơno găy sa. Ma-ngkơi jơ hôi lơ̆gay cro bơtê Kơnràñ, Kơnràñ tơs î ƀòn gô lah: 2“Ăñ kơloh tơmpôl lang bol dô, bơh ƀòn gô kư̆ ăm î ăñ păy nge lờt mà hôm dahrăư dî jơno găy sa ơ̆h. 3Dilah ăñ pơđơ ma ƀòn gô swà trê nơ̆m hîh ƀòn gô î klô̆ng jơgloh, gừn ƀòn gô rơp blă ha-ău nùs du ayoa nggùl gung, mà du pơnah cro nơ̆m ƀòn gô trôh sŏng bơh nơ̆m anẵu wĭc ngăn.” 4Lơ̆gay cro bơtê Kơnràñ tơs î Kơnràñ lah: “Cro găy nơ̆m dô, nơ̆m anẵu ƀlang ngêt-ngờt dô, digơlăn dưñ bơh sơgăy mà e ma tơmpôl lang bol gư̆ptî dô sa ƀăñ heh?” 5Kơnràñ lùp ƀòn gô lah: “Oh mi dî nhẵư lăm ƀăñ?” Ƀòn gô kla dẵư lah: “Poh-lăm.” 6Kơnràñ pơđơ ma tơmpôl lang bol nggui nơ̆m ù, gừn ma-ngkơi jơ dưñ poh-lăm ƀăñ, ưnngai, Kơnràñ pêh ƀăñ sŏng gư̆n dờp ma lơ̆gay cro bơtê Kơnràñ lơi ƀòn gô digơlăn iyà duh bră, bơh gư̆n ƀòn gô iyà tơmpà ma tơmpôl lang bol. 7Î ƀòn gô dî nhẵư lăm ka êt, gư̆n-jîng ma-ngkơi jơ ưnngai bơh ka, Kơnràñ pơđơ ƀòn gô kŭng tơmpà ka dô te. 8Lang bol sa gừn dî hơm-le, sŏng gư̆n ƀòn gô tơgom dî poh bai ƀăñ ngkah hôm jư. 9Jơ gư̆n, tom pơngăp puôn-rbô hê cro, sŏng gư̆n Kơnràñ e ma ƀòn gô trê. 10Khơñ ngăn, ma-ngkơi jơ mơ̆t nơ̆m ahẵu băl î lơ̆gay cro bơtê Kơnràñ, Kơnràñ swà trôh nơ̆m ƀòn Dalmanutha.

11Lơ̆gay cro Pharisi trôh gừn sơntơm tơmbơkai î Kơnràñ, kơñ jôi nơ̆m anẵu Kơnràñ du-lăm têl phadêh bơh cŭngsî trồ, lơi lòng Kơnràñ. 12Ma-ngkơi jơ nhim dưñ ayoa ngglăm nùs, Kơnràñ kla dẵư lah: “Ngglơh nŏk-noi dô kơñ jôi têl phadêh? Iyŏ ngăn, ăñ tơs î lơ̆gay ƀòn mê, ơ̆ tom têl phadêh găy rơp dî e ma nŏk-noi dô.” 13Ma-ngkơi jơ sŏng swà bơh ƀòn gô, mơ̆t wăl nơ̆m ahẵu, Kơnràñ swà găn mamằ-manăy.

14Lơ̆gay cro bơtê hwơbê̆ iyà ƀăñ, gừn ƀòn gô ơ̆ tom jơno găy nhòng să nơ̆m ahẵu, sî nư̆ng du-lăm ƀăñ. 15Kơnràñ ƀăn tơngkah ƀòn gô lah: “Kơhea cĕ! Jư cĕ să bơh dong cro Pharisi î dong Herôt dê.” 16Ƀòn gô tơmbơyê băl î găp lah bră dô la bơh ƀòn gô ơ̆ dî ƀăñ. 17Bơh gư̆t tîgư̆n, Yang Jesu tơs î ƀòn gô lah: “Ngglơh oh mi tơmbơkai bơh bră oh mi ơ̆ dî ƀăñ? Oh mi kŭng hôm dahrăư gư̆t dî, î kŭng hôm dahrăư wơng ya? Tom iyŏ nùs oh mi gôjîng krañ kơdăng lờt? 18Dî măt mà oh mi ơ̆ tơmpơl ya? Dî tua mà oh mi ơ̆ kơnău ya? Oh mi kŭng ơ̆ sơdơ ya? 19Tơm tô̆ ăñ pêh prăm-lăm ƀăñ e ma prăm-rbô hê cro, oh mi tơgom dî nhẵư lăm bai bîng ƀăñ ngkah?” Ƀòn gô kla dẵư î Kơnràñ lah: “Jư̆t-bea bai.” 20“Hôm dơ̆ poh-lăm ƀăñ e ma puôn-rbô hê cro, oh mi tơgom dî nhẵư lăm bai bîng ƀăñ ngkah?” Ƀòn gô kla dẵư î Kơnràñ lah: “Poh bai.” 21Gừn Kơnràñ tơs î ƀòn gô lah: “Lơh tîgay mà oh mi kŭng hôm dahrăư wơng?”

22Ƀòn gô swà trôh nơ̆m Ƀetsaiđa, gừn cro iyà trôh ma Kơnràñ du hôi cro ñô̆ng măt, sŏng gư̆n ƀòn gô răc-dăn Kơnràñ lơi Kơnràñ digơlăn tơmpơ̆p nơ̆m cro gư̆n. 23Kơ̆p iyà tê cro ñô̆ng măt, Kơnràñ tề gô tơlôh makin ƀòn. Ma-ngkơi jơ sòt dà dreo nơ̆m măt gô, kơnràñ ăn tê cŭngsî gô, Kơnràñ lùp lah: “Mê tom tơmpơl kơp jơno găy hă-ơ̆?” 24Ngẵư lăng cŭngsî, gô kla dẵư lah: “Ăñ tơmpơl cro mà ƀòn gô gôlơh gư̆ptî lơ̆gay sî ndăng swà.” 25Tơmjăt bơh gư̆n, du dơ̆ te, Kơnràñ ăn tê nơ̆m măt gô, sŏng gư̆n gô lăng nê̆ nê̆, măt dî ang wăl gừn gô lăng tơmpơl lơ̆gay jơno dubă loh-lang. 26Kơnràñ tơs î gô swà trê nơ̆m hîh gô, ƀăn tơngkah lah: “Bư̆ng swà mơ̆t nơ̆m ƀòn.”

27Yang Jesu băl î lơ̆gay cro bơtê Kơnràñ swà mơ̆t nơ̆m lơ̆gay ƀòn êt bơlao mađah Sesare Philip, gừn nơ̆m gung swà, Kơnràñ lùp lơ̆gay cro bơtê Kơnràñ, tơs î ƀòn gô lah: “Lang bol tơs ăñ la mơ̆t cro?” 28Sŏng gư̆n ƀòn gô tơs î Kơnràñ, lah: “Jăng Ƀaptis, pơnah nde lah: ‘Êli,’ hôm pơnah nde te la: ‘Du hôi nơ̆m lơ̆gay cro gơnoăr hwơr.’” 29Kơnràñ lùp ƀòn gô lah: “Hôm oh mi tơs ăñ la mơ̆t cro?” Tơm jơ kla dẵư, Pier tơs î Kơnràñ lah: “Kơnràñ la Yang Dŏng-Klàs.” 30Kơnràñ khă ƀòn gô lah ƀòn gô bư̆ng tơs î cro găy bơh Kơnràñ.

31Gừn Kơnràñ sơntơm ƀăn mơntău ƀòn gô lah Kon-Mơnùs păl kŏng khăi jơno sơòs-sơngeh, kŏng lơi căư bơh lơ̆gay cro kwăng kra, tơmpôl cro gơnoăr ăn jơno duh-khoai băl î lơ̆gay cro bơtău jơno-bơlăm, gư̆m kŏng tơngsơ̆t, sŏng gư̆n păy nge ma-ngkơi jîng wăl. 32Kơnràñ sŏng tơs jơno dô dubă loh-lang. Pier, ma-ngkơi jơ iyà Kơnràñ tơlôh dêh, sơntơm ƀoah-đas Kơnràñ. 33Mơya, tơm jơ sŏng tơmblăc wăl lăng lơ̆gay cro bơtê mơ̆n, Kơnràñ ƀoah-đas Pier lah: “Ơ cà Satan tò, rîc cĕ ma-ngkơi ăñ! Tài bơh amî ơ̆ lơi nùs mơ̆n kơlôi trôh bră Yang Tơm Trồ dê, ma nư̆ng kơlôi trôh bră kon-mơnùs.” 34Ma-ngkơi jơ hôi tơmpôl lang bol băl î lơ̆gay cro bơtê mơ̆n, Kơnràñ tơs î ƀòn gô lah: “Dilah cro găy kơñ jăt ma-ngkơi ăñ, cro gư̆n păl lơi căư sătan, tî sî pư̆ng mơ̆n gừn jăt ăñ. 35Bơh dilah cro găy kơñ dŏng-klàs jơno jîng mơ̆n, gừn rơp lơh roh gô; hôm cro găy tài bơh ăñ gư̆m Jơno Niem kŏng roh jơno jîng mơ̆n, gừn rơp dŏng-klàs dî gô. 36Bơh jơno kwơ găy ma cro dî lơ̆gay dunya mà wăl lơh roh hwîng-soan mơ̆n? 37Cro gư̆n digơlăn dưñ jơno găy gư̆p jơno lơi tơmbơgăl î hwîng-soan mơ̆n? 38Dilah cro găy ƀasmăt bơh ăñ gư̆m jơno ăñ dê nơ̆m nŏk-noi rês-àr bơnan î tồi-glài dô, gừn Kon-Mơnùs kŭng rơp ƀasmăt bơh cro gư̆n tơm tô̆ Kơnràñ trôh nơ̆m jơno gơklŏ Bàp Kơnràñ dê băl î lơ̆gay cro gơndrơh sang goh.”